પદ્મ પુરાણ · અધ્યાય 5.68

શેષ ઉવાચ-
પરિસ્વાદન્ક્રતૌ તૃપ્તિં ન પ્રાપ સુરસંયુતઃ

નારાયણો મહાદેવો બ્રહ્મા તત્ર ચતુર્મુખઃ ।
વરુણશ્ચ કુબેરશ્ચ તથાન્યે લોકપાલકાઃ

તત્રાસ્વાદ્ય હવિઃ સ્નિગ્ધં વસિષ્ઠેન પરિષ્કૃતમ્ ।
તત્ર પુનર્હિ વિપ્રેંદ્રાઃ ક્ષુધાર્તાઇવ ભોજનાત્

સર્વાન્દેવાંશ્ચ સંતર્પ્ય હવિષા કરુણાનિધિઃ ।
વસિષ્ઠપ્રેરિતઃ સર્વમિતિ કર્તવ્યમાચરત્

બ્રાહ્મણાદાનસંતુષ્ટા હવિસ્તુષ્ટાઃ સુરાવરાઃ ।
તૃપ્તાઃ સર્વે સ્વકં ભાગં ગૃહીત્વા સ્વાલયં યયુઃ

ઋષિભ્યો હોતૃમુખ્યેભ્યઃ પ્રાદાદ્રાજ્યં ચતુર્દિશમ્ ।
સંતુષ્ટાસ્તે દ્વિજારામમાશીર્ભિરદદુઃ શુભમ્

પૂર્ણાહુતિં તતઃ કૃત્વા વસિષ્ઠઃ પ્રાહ સુસ્ત્રિયઃ ।
વર્ધાપયંતુ ભૂમીશં યાગપૂર્તિકરં પરમ્

તદ્વાક્યં તાઃ સ્ત્રિયઃ શ્રુત્વા લાજૈરવાકિરન્મુદા ।
લાવણ્યજિતકંદર્પં મહામણિવિભૂષિતમ્

તતોઽવભૃથસ્નાનાર્થં પ્રેરયામાસ ભૂમિપમ્ ।
યયૌ રામઃ સહસ્વીયૈઃ સરયૂતીરમુત્તમમ્

અનેકરાજકોટીભિઃ પરીતઃ પાદચારિભિઃ ।
જગામ સ સરિચ્છ્રેષ્ઠાં પક્ષિવૃંદસમાકુલામ્

તારાપતિરિવ સ્વાભિર્ભાર્યાભિર્વૃત ઉત્પ્રભઃ ।
વિરોચતે તથા તદ્વદ્રામો રાજગણૈર્વૃતઃ

તદુત્સવં સમાજ્ઞાય યયુર્લોકાસ્ત્વરાયુતાઃ ।
સીતાપતિમુખાલોકનિશ્ચલીભૂતલોચનાઃ

રાજેંદ્રં સીતયા સાકં ગચ્છંતં સરિતં પ્રતિ ।
વિલોક્ય મુદિતા લોકાશ્ચિરં દર્શનલાલસાઃ

અનેક નટગંધર્વા ગાયંતો યશ ઉજ્જ્વલમ્ ।
અનુજગ્મુર્મહીશાનં સર્વલોકનમસ્કૃતમ્

નર્તક્યસ્તત્ર નૃત્યંત્યઃ ક્ષોભયંત્યઃ પતેર્મનઃ ।
જલયંત્રૈશ્ચ સિંચંત્યો યયુઃ શ્રીરામસેવનમ્

મહારાજં વિલિપંત્યો હરિદ્રા કુંકુમાદિભિઃ ।
પરસ્પરં પ્રલિપંત્યો મુદં પ્રાપુર્મહત્તરામ્

કુચયુગ્મોપરિન્યસ્તમુક્તાહારસુશોભિતાઃ ।
શ્રવણદ્વંદ્વસંમૃષ્ટસ્વર્ણકુંડલલક્ષિતાઃ

અનેકનરનારીભિઃ સંકીર્ણં માર્ગમાચરન્ ।
યથાવત્સરિતં પ્રાપ શિવપુણ્યજલાપ્લુતામ્

તત્ર ગત્વા સ વૈદેહ્યા રામઃ કમલલોચનઃ ।
પ્રવિવેશ જલં પુણ્યં વસિષ્ઠાદિભિરન્વિતઃ

અનુપ્રવિવિશુઃ સર્વે રાજાનો જનતાસ્તથા ।
તત્પાદરજસા પૂતજલં લોકૈકવંદિતમ્

પરસ્પરં પ્રસિંચંતો જલયંત્રૈર્મનોરમૈઃ ।
સુશોણનયનાઃ સર્વે હર્ષં પ્રાપુર્મનોધિકમ્

સ રામઃ સીતયા સાર્ધં ચિરં પુણ્યજલપ્લવે ।
ક્રીડિત્વા જલકલ્લોલૈર્નિરગાદ્ધર્મસંયુતઃ

દુકૂલવાસાઃ સકિરીટકુંડલઃ કેયૂરશોભાવરકંકણાન્વિતઃ ।
કંદર્પકોટિશ્રિયમુદ્વહન્નૃપો રાજાગ્ર્યવર્યૈરુપસંસ્તુતો બભૌ

સયાગયૂપં વરવર્ણશોભિતં કૃત્વા સરિત્તીરવરે મહામનાઃ ।
ત્રૈલોક્યલોકશ્રિયમાપ હ્યદ્ભુતામન્યૈર્દુરાપાં નૃપતિર્ભુજૈર્નિજૈઃ

એવં જનકપુત્ર્યાસૌ હયમેધત્રયં ચરન્ ।
ત્રૈલોક્યે કીર્તિમતુલાં પ્રાપ દેવૈઃ સુદુર્લભામ્

એવં તે વર્ણિતં તાત યત્પૃષ્ટો રામસત્કથામ્ ।
વિસ્તૃતઃ કથિતો મેધો ભૂયઃ કિં પૃચ્છસે દ્વિજ

યઃ શૃણોતિ હરેર્ભક્ત્યા રામચંદ્રસ્ય સન્મખમ્ ।
બ્રહ્મહત્યાં ક્ષણાત્તીર્ત્વા બ્રહ્મશાશ્વતમાપ્નુયાત્

અપુત્રો લભતે પુત્રાન્નિર્ધનો ધનમાપ્નુયાત્ ।
રોગાર્તો મુચ્યતે રોગાદ્બદ્ધો મુચ્યેત બંધનાત્

યત્કથાશ્રવણાદ્દુષ્ટઃ શ્વપચોઽપિ પરં પદમ્ ।
પ્રાપ્નોતિ કિમુ વિપ્રાગ્ર્યો રામભક્તિપરાયણઃ

રામં સ્મૃત્વા મહાભાગં પાપિનઃ પરમં પદમ્ ।
પ્રાપ્નુયુઃ પરમં સ્વર્ગં શક્રદેવાદિદુર્લભમ્

તે ધન્યા માનવા લોકે યે સ્મરંતિ રઘૂત્તમમ્ ।
તે ક્ષણાત્સંસૃતિં તીર્ત્વા ગચ્છંતિ સુખમવ્યયમ્

પ્રત્યેકમક્ષરં બ્રહ્મહત્યાવંશદવાનલઃ ।
તં યઃ શ્રાવયતે ધીમાંસ્તં ગુરું સંપ્રપૂજયેત્

શ્રુત્વા કથાં વાચકાય ગવાં દ્વંદ્વં પ્રદાપયેત્ ।
સપત્નીકાય સંપૂજ્ય વસ્ત્રાલંકારભોજનૈઃ

કુંડલાભ્યાં વિરાજંત્યૌ મુદ્રિકાભિરલંકૃતે ।
રામસીતે સ્વર્ણમય્યૌ પ્રતિમે શોભને વરે

કૃત્વા તુ વાચકાયૈવ દીયતે ભો દ્વિજોત્તમ ।
તસ્ય દેવાશ્ચ પિતરો વૈકુંઠં પ્રાપ્નુયુસ્તદા

ત્વયા પૃષ્ટા રામકથા મયા તે કથિતા પુરા ।
કિમન્યત્કથ્યતાં બ્રહ્મન્પુરતસ્તવ ધીમતઃ

શૃણ્વંતિ યે કથામેતાં બ્રહ્મહત્યૌઘનાશિનીમ્ ।
તે યાંતિ પરમં સ્થાનં યચ્ચ દેવૈઃ સુદુર્લભમ્

ગોઘ્નશ્ચાપિ સુતઘ્નશ્ચ સુરાપો ગુરુતલ્પગઃ ।
ક્ષણાત્પૂતો ભવત્યેવ નાત્ર સંશયિતું ક્ષમમ્

ઇતિ શ્રીપદ્મપુરાણે પાતાલખણ્ડે શેષવાત્સ્યાયનસંવાદે રામાશ્વમેધે શ્રવણપઠનપુણ્યવર્ણનં નામાષ્ટષષ્ટિતમોઽધ્યાયઃ