પદ્મ પુરાણ · અધ્યાય 5.5

શેષ ઉવાચ।
અથાભિષિક્તં રામં તુ તુષ્ટુવુઃ પ્રણતાઃ સુરાઃ ।
રાવણાભિધદૈત્યેંદ્ર વધહર્ષિતમાનસાઃ

દેવા ઊચુઃ।
જય દાશરથે સુરાર્તિહઞ્જયજય દાનવવંશદાહક ।
જય દેવવરાંગનાગણગ્રહણવ્યગ્રકરારિદારક

તવયદ્દનુજેંદ્ર નાશનં કવયો વર્ણયિતું સમુત્સુકાઃ ।
પ્રલયે જગતાંતતીઃ પુનર્ગ્રસસે ત્વં ભુવનેશલીલયા

જય જન્મજરાદિદુઃખકૈઃ પરિમુક્તપ્રબલોદ્ધરોદ્ધર ।
જય ધર્મકરાન્વયાંબુધૌ કૃતજન્મન્નજરામરાચ્યુત

તવ દેવવરસ્ય નામભિર્બહુપાપા અપિ તે પવિત્રિતાઃ ।
કિમુ સાધુદ્વિજવર્યપૂર્વકાઃ સુતનું માનુષતામુપાગતાઃ

હરવિરિંચિનુતં તવ પાદયોર્યુગલમીપ્સિતકામસમૃદ્ધિદમ્ ।
હૃદિ પવિત્રયવાદિકચિહ્નિતૈઃ સુરચિતં મનસા સ્પૃહયામહે

યદિ ભવાન્ન દધાત્યભયં ભુવો મદનમૂર્તિ તિરસ્કરકાંતિભૃત્ ।
સુરગણા હિ કથં સુખિનઃ પુનર્નનુભવંતિ ઘૃણામય પાવન

યદા યદાસ્માન્દનુજાહિ દુઃખદાસ્તદા તદા ત્વં ભુવિ જન્મભાગ્ભવેઃ ।
અજોઽવ્યયોઽપીશવરોઽપિ સન્વિભો સ્વભાવમાસ્થાય નિજં નિજાર્ચિતઃ

મૃતસુધાસદૃશૈરઘનાશનૈઃ સુચરિતૈરવકીર્ય મહીતલમ્ ।
અમનુજૈર્ગુણશંસિભિરીડિતઃ પ્રવિશ ચાશુ પુનર્હિ સ્વકં પદમ્

અનાદિરાદ્યોજરરૂપધારી હારી કિરીટી મકરધ્વજાભઃ ।
જયં કરોતુ પ્રસભં હતારિઃ સ્મરારિ સંસેવિતપાદપદ્મઃ

ઇત્યુક્ત્વા તે સુરાઃ સર્વે બ્રહ્મેંદ્રપ્રમુખા મુહુઃ ।
પ્રણેમુરરિનાશેન પ્રીણિતા રઘુનાયકમ્

ઇતિ સ્તુત્યાતિસંહૃષ્ટો રઘુનાથો મહાયશાઃ ।
પ્રોવાચ તાન્સુરાન્વીક્ષ્ય પ્રણતાન્નતકંધરાન્

શ્રીરામ ઉવાચ।
સુરા વૃણુત મે યૂયં વરં કિંચિત્સુદુર્લ્લભમ્ ।
યં કોઽપિ દેવો દનુજો ન યક્ષઃ પ્રાપ સાદરઃ

સુરા ઊચુઃ।
સ્વામિન્ભગવતઃ સર્વં પ્રાપ્તમસ્માભિરુત્તમમ્ ।
યદયં નિહતઃ શત્રુરસ્માકં તુ દશાનનઃ

યદાયદાઽસુરોઽસ્માકં બાધાં પરિદધાતિ ભોઃ ।
તદા તદેતિ કર્તવ્યમેતાવદ્વૈરિનાશનમ્

તથેત્યુક્ત્વા પુનર્વીરઃ પ્રોવાચ રઘુનંદનઃ ।
શ્રીરામ ઉવાચ।
સુરાઃ શૃણુત મદ્વાક્યમાદરેણ સમન્વિતાઃ

ભવત્કૃતં મદીયૈર્વૈગુણૈર્ગ્રથિતમદ્ભુતમ્ ।
સ્તોત્રં પઠિષ્યતિ મુહુઃ પ્રાતર્નિશિ સકૃન્નરઃ

તસ્ય વૈરિ પરાભૂતિર્ન ભવિષ્યતિ દારુણા ।
ન ચ દારિદ્ર્યસંયોગો ન ચ વ્યાધિપરાભવૌ

મદીયચરણદ્વંદ્વે ભક્તિસ્તેષાં તુ ભૂયસી ।
ભવિષ્યતિ મુદાયુક્તે સ્વાંતે પુંસાં તુ પાઠતઃ

ઇત્યુક્ત્વા સોઽભવત્તૂષ્ણીં નરદેવશિરોમણિઃ ।
સુરાઃ સર્વે પ્રહૃષ્ટાસ્તે યયુર્લોકં સ્વકં સ્વકમ્

રઘુનાથોઽપિ ભ્રાતૄંસ્તાન્પાલયંસ્તાતવદ્બુધાન્ ।
પ્રજાઃ પુત્રાનિવ સ્વીયાલ્લાઁલયઁલ્લોકનાયકઃ

યસ્મિઞ્છાસતિ લોકાનાં નાકાલમરણં નૃણામ્ ।
ન રોગાદિ પરાભૂતિર્ગૃહેષુ ચ મહીયસી

નેતિઃ કદાપિ દ્દશ્યેત વૈરિજં ભયમેવ ચ ।
વૃક્ષાઃ સદૈવ ફલિનો મહી ભૂયિષ્ઠધાન્યકા

પુત્રપૌત્રપરીવાર સનાથી કૃતજીવનાઃ ।
કાંતા સંયોગજસુખૈર્નિરસ્તવિરહક્લમાઃ

નિત્યં શ્રીરઘુનાથસ્ય પાદપદ્મકથોત્સુકાઃ ।
કદાપિ પરનિંદાસુ વાચસ્તેષાં ભવંતિ ન

કારવોઽપિ કદા પાપં નાચરંતિ મનસ્યહો ।
રઘુનાથકરાઘાતદુઃખશંકાભિશંસિનઃ

સીતાપતિમુખાલોક નિશ્ચલીભૂતલોચનાઃ ।
લોકા બભૂવુઃ સતતં કારુણ્યપરિપૂરિતાઃ

રાજ્યં પ્રાપ્તમસાપત્નં સમૃદ્ધબલવાહનમ્ ।
ઋષિભિર્હૃષ્ટપુષ્ટૈશ્ચ રમ્યં હાટકભૂષણૈઃ

સંપુષ્ટમિષ્ટાપૂર્તાનાં ધર્માણાં નિત્યકર્તૃભિઃ ।
સદા સંપન્નસસ્યં ચ સુવસુક્ષેત્રસંયુતમ્

સુદેશં સુપ્રજં સ્વસ્થં સુતૃણં બહુગોધનમ્ ।
દેવતાયતનાનાં ચ રાજિભિઃ પરિરાજિતમ્

સુપૂર્ણા યત્ર વૈ ગ્રામાઃ સુવિત્તર્દ્ધિવિરાજિતાઃ ।
સુપુષ્પકૃત્રિમોદ્યાનાઃ સુસ્વાદુફલપાદપાઃ

સપદ્મિનીકકાસારા યત્ર રાજંતિ ભૂમયઃ ।
સદંભા નિમ્નગા યત્ર ન યત્ર જનતા ક્વચિત્

કુલાન્યેવ કુલીનાનાં વર્ણાનાં નાધનાનિ ચ ।
વિભ્રમો યત્ર નારીષુ ન વિદ્વત્સુ ચ કર્હિચિત્

નદ્યઃ કુટિલગામિન્યો ન યત્ર વિષયે પ્રજાઃ ।
તમોયુક્તાઃ ક્ષપા યત્ર બહુલેષુ ન માનવાઃ

રજોયુજઃ સ્ત્રિયો યત્ર નાધર્મબહુલા નરાઃ ।
ધનૈરનંધો યત્રાસ્તિ જનો નૈવ ચ ભોજને

અનયઃ સ્યંદનો યત્ર ન ચ વૈરાજપૂરુષઃ ।
દંડઃ પરશુકુદ્દાલવાલવ્યજનરાજિષુ

આતપત્રેષુ નાન્યત્ર ક્વચિત્ક્રોધોપરોધજઃ ।
અન્યત્રાક્ષિકવૃંદેભ્યઃ ક્વચિન્ન પરિદેવનમ્

આક્ષિકા એવ દૃશ્યંતે યત્ર પાશકપાણયઃ ।
જાડ્યવાર્તા જલેષ્વેવ સ્ત્રીમધ્યા એવ દુર્બલાઃ

કઠોરહૃદયા યત્ર સીમંતિન્યો ન માનવાઃ ।
ઔષધેષ્વેવ યત્રાસ્તિ કુષ્ઠયોગો ન માનવે

વેધો યત્ર સુરત્નેષુ શૂલં મૂર્તિકરેષુ વૈ ।
કંપઃ સાત્વિકભાવોત્થો ન ભયાત્ક્વાપિ કસ્યચિત્

સંજ્વરઃ કામજો યત્ર દારિદ્ર્યકલુષસ્ય ચ ।
દુર્લ્લભત્વં સદૈવસ્ય સુકૃતેન ચ વસ્તુનઃ

ઇભા એવ પ્રમત્તા વૈ યુદ્ધે વીચ્યો જલાશયે ।
દાનહાનિર્ગજેષ્વેવ તીક્ષ્ણા એવ હિ કંટકાઃ

બાણેષુ ગુણવિશ્લેષો બંધોક્તિઃ પુસ્તકે દૃઢા ।
સ્નેહત્યાગઃ ખલેષ્વેવ ન ચ વૈ સ્વજને જને

તં દેશં પાલયામાસ લાલયઁલ્લાલિતાઃ પ્રજાઃ ।
ધર્મં સંસ્થાપયન્દેશે દુષ્ટે દંડધરોપમઃ

એવં પાલયતો દેશં ધર્મેણ ધરણીતલમ્ ।
સહસ્રં ચ વ્યતીયુર્વૈ વર્ષાણ્યેકાદશ પ્રભોઃ

તત્ર નીચજનાચ્છ્રુત્વા સીતાયા અપમાનતામ્ ।
સ્વાં ચ નિંદાં રજકતસ્તાં તત્યાજ રઘૂદ્વહઃ

પૃથ્વીં પાલયમાનસ્ય ધર્મેણ નૃપતેસ્તદા ।
સીતાં વિરહિતામેકાં નિદેશેન સુરક્ષિતામ્

કદાચિત્સંસદો મધ્યે હ્યાસીનસ્ય મહામતેઃ ।
આજગામ મુનિશ્રેષ્ઠઃ કુંભોત્પત્તિર્મુનિર્મહાન્

ગૃહીત્વાર્ઘ્યં સમુત્તસ્થૌ વસિષ્ઠેન સમન્વિતઃ ।
જનતાભિર્મહારાજો વાર્ધિશોષકમાગતમ્

સ્વાગતેન સુસંભાવ્ય પપ્રચ્છ તમનામયમ્ ।
સુખોપવિષ્ટં વિશ્રાંતં બભાષે રઘુનંદનઃ

ઇતિ શ્રીપદ્મપુરાણે પાતાલખંડે શેષવાત્સ્યાયનસંવાદે રામાશ્વમેધે અગસ્ત્યસમાગમોનામ પંચમોઽધ્યાયઃ