પદ્મ પુરાણ · અધ્યાય 4.25

શૌનક ઉવાચ।
શ્રીપદં વિષ્ણુચરિતં સર્વોપદ્રવનાશનમ્ ।
સર્વપાપક્ષયકરં દુષ્ટગ્રહનિવારણમ્

વિષ્ણુસાન્નિધ્યદં ચૈવ ચતુર્વર્ગફલપ્રદમ્ ।
યઃ શૃણોતિ નરો ભક્ત્યા ચાંતે યાતિ હરેર્ગૃહમ્

નામોચ્ચારણમાહાત્મ્યં શ્રૂયતે મહદદ્ભુતમ્ ।
યદુચ્ચારણમાત્રેણ નરો યાયાત્પરં પદમ્

તદ્વદસ્વાધુના સૂત વિધાનં નામકીર્તને ।
સૂત ઉવાચ।
શૃણુ શૌનક વક્ષ્યામિ સંવાદં મોક્ષસાધનમ્

નારદઃ પૃષ્ટવાન્પૂર્વં કુમારં તદ્વદામિ તે ।
એકદા યમુનાતીરે નિવિષ્ટં શાંતમાનસમ્

સનત્કુમારં પપ્રચ્છ નારદો રચિતાઞ્જલિ ।
શ્રુત્વા નાનાવિધાન્ધર્માન્ધર્મવ્યતિકરાંસ્તથા

શ્રીનારદ ઉવાચ।
યોઽસૌ ભગવતા પ્રોક્તો ધર્મવ્યતિકરો નૃણામ્ ।
કથં તસ્ય વિનાશઃ સ્યાદુચ્યતાં ભગવત્પ્રિય

શ્રીસનત્કુમાર ઉવાચ।
શૃણુ નારદ ગોવિંદ પ્રિય ગોવિંદધર્મવિત્ ।
યત્પૃષ્ટં લોકનિર્મુક્તિકારણં તમસઃ પરમ્

સર્વાચારવિવર્જિતાઃ શઠધિયો વ્રાત્યા જગદ્વઞ્ચકાઃ ।
દંભાહંકૃતિપાનપૈશુનપરાઃ પાપાશ્ચ યે નિષ્ઠુરાઃ

યે ચાન્યે ધનદારપુત્રનિરતાઃ સર્વેઽધમાસ્તેઽપિ હિ ।
શ્રીગોવિંદપદારવિંદશરણાઃ શુદ્ધા ભવંતિ દ્વિજ

તમપિ દેવકરં કરુણાકરસ્થવિરજંગમમુક્તિકરં પરમ્ ।
અતિચરંત્યપરાધપરા જના ય ઇહ તાન્વપતિ ધ્રુવનામ હિ

સર્વાપરાધકૃદપિ મુચ્યતે હરિસંશ્રયઃ ।
હરેરપ્યપરાધાન્યઃ કુર્યાદ્દ્વિપદપાંસનઃ

નામાશ્રયઃ કદાચિત્સ્યાત્તરત્યેવ સ નામતઃ ।
નામ્નો હિ સર્વસુહૃદો હ્યપરાધાત્પતત્યધઃ

શ્રીનારદ ઉવાચ।
કે તેઽપરાધા વિપ્રેંદ્ર નામ્નો ભગવતઃ કૃતાઃ ।
વિનિઘ્નંતિ નૃણાં કૃત્યં પ્રાકૃતં હ્યાનયંતિ ચ

શ્રીસનત્કુમાર ઉવાચ।
સતાં નિંદા નામ્નઃ પરમમપરાધં વિતનુતે ।
યતઃ ખ્યાતિં યાંતં કથમુ સહતે તદ્વિગર્હામ્ ।
શુભસ્ય* શ્રીવિષ્ણોર્ય ઇહ ગુણનામાદિસકલં ।
ધિયાભિન્નં પશ્યેત્સ ખલુ હરિનામાહિતકરઃ ૧૫ *[કહીં-(શિવસ્ય)]।
ગુરોરવજ્ઞા શ્રુતિશાસ્ત્રનિંદનં તથાર્થવાદો હરિનામ્નિ કલ્પનમ્ ।
નામાપરાધસ્ય હિ પાપબુદ્ધિર્ન વિદ્યતે તસ્ય યમૈર્હિ શુદ્ધિઃ

ધર્મવ્રતત્યાગ હુતાદિ સર્વશુભક્રિયા સામ્યમપિ પ્રમાદઃ ।
અશ્રદ્દધાનો વિમુખોઽપ્યશૃણ્વન્યશ્ચોપદેશઃ શિવનામાપરાધઃ

શ્રુત્વાપિ નામમાહાત્મ્યં યઃ પ્રીતિરહિતોઽધમઃ ।
અહં મમાદિ પરમો નામ્નિ સોઽપ્યપરાધકૃત્

એવં નારદ શંકરેણ કૃપયા મહ્યં મુનીનાં પરં ।
પ્રોક્તં નામસુખાવહં ભગવતો વર્જ્યં સદા યત્નતઃ ।
યે જ્ઞાત્વાપિ ન વર્જયંતિ સહસા નામ્નોઽપરાધાન્દશ ।
ક્રુદ્ધા માતરમપ્યભોજનપરાઃ ખિદ્યંતિ તે બાલવત્

અપરાધવિમુક્તો હિ નામ્નિ જપ્તં સદા ચર ।
નામ્નૈવ તવ દેવર્ષે સર્વં સેત્સ્યતિ નાન્યતઃ

શ્રીનારદ ઉવાચ।
સનત્કુમાર પ્રિય સાહસાનાં વિવેકવૈરાગ્યવિવર્જિતાનામ્ ।
દેહપ્રિયાર્થાત્મપરાયણાનાં મુક્તાપરાધાઃ પ્રભવંતિ નઃ કથમ્

શ્રીસનત્કુમાર ઉવાચ।
જાતે નામાપરાધે તુ પ્રમાદે તુ કથંચન ।
સદા સંકીર્તયન્નામ તદેકશરણો ભવેત્

નામાપરાધયુક્તાનાં નામાન્યેવ હરંત્યઘમ્ ।
અવિશ્રાંતિ પ્રયુક્તાનિ તાન્યેવાર્થ કરાણિ યત્

નામૈકં યસ્ય ચિહ્નં સ્મરણપથગતં શ્રોત્રમૂલં ગતં વા ।
શુદ્ધં વાઽશુદ્ધવર્ણં વ્યવહિતરહિતં તારયત્યેવ સત્યમ્ ।
તચ્ચેદ્દેહદ્રવિણજનિતાલોભપાખણ્ડ મધ્યે ।
નિક્ષિપ્તં સ્યાન્ન ફલજનકં શીઘ્રમેવાત્ર વિપ્ર

ઇદં રહસ્યં પરમં પુરા નારદ શંકરાત્ ।
શ્રુતં સર્વાશુભહરમપરાધનિવારકમ્

વિદુર્વિષ્ણ્વભિધાનં યે હ્યપરાધપરા નરાઃ ।
તેષામપિ ભવેન્મુક્તિઃ પઠનાદેવ નારદ

નામ્નો માહાત્મ્યમખિલં પુરાણે પરિગીયતે ।
તતઃ પુરાણમખિલં શ્રોતુમર્હસિ માનદ

પુરાણશ્રવણે શ્રદ્ધા યસ્ય સ્યાદ્ભ્રાતરન્વહમ્ ।
તસ્ય સાક્ષાત્પ્રસન્નઃ સ્યાચ્છિવો વિષ્ણુશ્ચ સાનુગઃ

યત્સ્નાત્વા પુષ્કરે તીર્થે પ્રયાગે સિંધુસંગમે ।
તત્ફલં દ્વિગુણં તસ્ય શ્રદ્ધયા વૈ શૃણોતિ યઃ

યે પઠંતિ પુરાણાનિ શૃણ્વંતિ ચ સમાહિતાઃ ।
પ્રત્યક્ષરં લભંત્યેતે કપિલાદાનજં ફલમ્

અપુત્રો લભતે પુત્રં ધનાર્થી લભતે ધનમ્ ।
વિદ્યાર્થી લભતે વિદ્યાં મોક્ષાર્થી મોક્ષમાપ્નુયાત્

યે શૃણ્વંતિ પુરાણાનિ કોટિજન્માર્જિતં ખલુ ।
પાપજાલં તુ તે હત્વા ગચ્છંતિ હરિમંદિરમ્

પુરાણવાચકં વિપ્રં પૂજયેદ્ભક્તિભાવતઃ ।
ગોભૂહિરણ્યવસ્ત્રૈશ્ચ ગંધપુષ્પાદિભિર્મુને

કાંસ્યૈર્વિનિર્મિતં પાત્રં જલપાત્રં મુદાન્વિતઃ ।
કર્ણકુંડલકં ચૈવ મુદ્રિકાં સ્વર્ણનિર્મિતામ્

આસનં તુ તથા દદ્યાત્પુષ્પમાલ્યં તપોધન ।
વિત્તશાઠ્યં ન કુર્વીત દાનં હીનફલં યતઃ

પુરાણં વાચયેદ્વિપ્ર સર્વકામાર્થસિદ્ધયે ।
સુવર્ણં રજતં વસ્ત્રં પુષ્પમાલ્યં તુ ચંદનમ્

દદ્યાદ્યો પુસ્તકં ભક્ત્યા સગચ્છેદ્ધરિમંદિરમ્ ।
કુર્વંતિ વિધિનાનેન સંપૂર્ણં પુસ્તકં ચ યે ।
તેષાં નામાનિ લિંપેત ચિત્રગુપ્તોઽર્ચનાદ્દ્વિજ

ઇતિ શ્રીપાદ્મે મહાપુરાણે બ્રહ્મખંડે સૂતશૌનકસંવાદે।
પંચવિંશતિતમોઽધ્યાયઃ