પદ્મ પુરાણ · અધ્યાય 3.29

નારદૌવાચ-।
તતો ગચ્છેત રાજેંદ્ર કાલિંદીતીર્થમુત્તમમ્ ।
તત્ર સ્નાત્વા નરો રાજન્ન દુર્ગતિમવાપ્નુયાત્

પુષ્કરે તુ કુરુક્ષેત્રે બ્રહ્માવર્ત્તે પૃથૂદકે ।
અવિમુક્તે સુવર્ણાખ્યે યત્ફલં લભતે નરઃ

તત્ફલં સમવાપ્નોતિ યમુનાયાં નરોત્તમ ।
સ્વર્ગભોગેતિરાગો વૈ યેષાં મનસિ વર્તતે

યમુનાયાં વિશેષેણ સ્નાનદાનેન સત્તમ ।
આયુરારોગ્યસંપત્તૌ રૂપયૌવનતા ગુણે

યેષાં મનોરથસ્તૈસ્તુ ન ત્યાજ્યં યમુનાજલમ્ ।
યે બિભ્યતિ નરકાદેર્દારિદ્ર્યોઽત્ર સંતિ ચ

સર્વથા તૈઃ પ્રયત્નેન તત્ર કાર્યં નિમજ્જનમ્ ।
દારિદ્ર્ય પાપ દૌર્ભાગ્ય પંક પ્રક્ષાલનાય વૈ

ઋતે વૈ યામુનં તોયં ન ચાન્યોસ્તિ યુધિષ્ઠિર ।
શ્રદ્ધાહીનાનિ કર્માણિ મતાન્યર્ધફલાનિ વૈ ।
ફલં દદાતિ સંપૂર્ણં યામુનં સ્નાનમાત્રતઃ

અકામો વા સકામો વા યામુને સલિલે નૃપ ।
ઇહામુત્ર ચ દુઃખાનિ મજ્જનાન્નૈવ પશ્યતિ

પક્ષદ્વયે યથા ચંદ્ર ક્ષીઃયતે વર્દ્ધતે તથા ।
પાતકં નશ્યતે તત્ર સ્નાનાત્પુણ્યં વિવર્દ્ધતે

યથાબ્ધૌ સુખમાયાંતિ રત્નાનિ વિવિધાનિ ચ ।
આયુર્વિત્તં કલત્રાણિ સંપદઃ સંભવંતિ ચ

કામધેનુર્યથા કામં ચિંતામણિર્વિચિંતિતમ્ ।
દદાતિ યમુનાસ્નાનં તદ્વત્સર્વં મનોરથમ્

કૃતે તપઃ પરં જ્ઞાનં ત્રેતાયાં યજનં તથા ।
દ્વાપરે ચ કલૌ દાનં કાલિંદી સર્વદા શુભા

સર્વેષાં સર્વવર્ણાનામાશ્રમાણાં ચ ભૂપતે ।
યામુને મજ્જનં ધર્મં ધારાભિઃ ખલુ વર્ષતિ

અસ્મિન્વૈ ભારતે વર્ષે કર્મભૂમૌ વિશેષતઃ ।
કાલિંદ્યસ્નાયિનાં નૄણાં નિષ્ફલં જન્મકીર્ત્તિતમ્

નૈશ્વર્યં ગગને યદ્વચ્ચાંદ્રે ઽમાયાં તુ મંડલે ।
તદ્વન્ન ભાતિ સત્કર્મ યમુનામજ્જનં વિના

વ્રતૈર્દાનૈસ્તપોભિશ્ચ ન તથા પ્રીયતે હરિઃ ।
તત્ર મજ્જનમાત્રેણ યથા પ્રીણાતિ કેશવઃ

ન સમં વિદ્યતે કિંચિત્તેજઃ સૌરેણ તેજસા ।
તદ્વન્ન યમુનાસ્નાનં સમાનાઃ ક્રતુજાઃ ક્રિયાઃ

પ્રીતયે વાસુદેવસ્ય સર્વપાપાપનુત્તયે ।
કાલિંદ્યા મજ્જનં કુર્ય્યાત્સ્વર્ગલાભાય માનવઃ

કિં રક્ષિતેન દેહેન સુપુષ્ટેન બલીયસા ।
અધ્રુવેણ સુદેહેન યમુના મજ્જનં વિના

અસ્થિસ્તંભં સ્નાયુબંધં માંસક્ષતજ લેપનમ્ ।
ચર્માવનદ્ધ દુર્ગંધં પૂર્ણં મૂત્રપુરીષયોઃ

જરાશોક વિપદ્વ્યાપ્તં રોગમંદિરમાતુરમ્ ।
રાગમૂલમનિત્યં ચ સર્વદોષસમાશ્રયમ્

પરોપકારપાપાર્તિ પરદ્રોહપરેર્ષિકમ્ ।
લોલુપં પિશુનં ક્રૂરં કૃતઘ્નં ક્ષણિકં તથા

નિષ્ઠુરં દુર્ધરં દુષ્ટં દોષત્રયવિદૂષિતમ્ ।
અશુચિતાપિ દુર્ગંધિ તાપત્રયવિમોહિતમ્

નિસર્ગતો ઽધર્મરતં તૃષ્ણાશતસમાકુલમ્ ।
કામક્રોધમહાલોભ નરકદ્વારસંસ્થિતમ્

કૃમિવર્ચસ્તુ ભસ્માદિ પરિણામગુણાવહમ્ ।
ઈદૃક્શરીરં વ્યર્થં હિ યમુનામજ્જનં વિના

બુદ્બુદા ઇવ તોયેષુ પ્રત્યંડા ઇવ પક્ષિષુ ।
જાયંતે મરણાયૈવ યમુનાસ્નાન વર્જિતાઃ

અવૈષ્ણવો હતો વિપ્રો હતં શ્રાદ્ધમપિંડકમ્ ।
અબ્રહ્મણ્યં હતં ક્ષત્રમનાચાર હતં કુલમ્

સદંભશ્ચ હતો ધર્મ્મઃ ક્રોધેનૈવ હતં તપઃ ।
અદૃઢં ચ હતં જ્ઞાનં પ્રમાદેન હતં શ્રુતમ્

પરભક્ત્યા હતા નારી બ્રહ્મચારી સ્ત્રિયા હતઃ ।
અદીપ્તેઽગ્નૌ હતો હોમો હતા ભક્તિઃ સમાયિકા

ઉપજીવ્યા હતા કન્યા સ્વાર્થે પાકક્રિયા હતા ।
શૂદ્ર ભક્ષો હતો યોગઃ કૃપણસ્ય હતં ધનમ્

અનભ્યાસહતા વિદ્યા હતો બોધો વિરોધકૃત્ ।
જીવિતાર્થં હતં તીર્થં જીવનાર્થં હતં વ્રતમ્

અસત્યા ચ હતા વાણી તથા પૈશુન્યવાદિની ।
ષટ્કર્ણગો હતો મંત્રો વ્યગ્રચિત્તો હતો જપઃ

હતમશ્રોત્રિયે દાનં હતો લોકશ્ચ નાસ્તિકઃ ।
અશ્રદ્ધયા હતં સર્વં યત્કૃતં પારલૌકિકમ્

ઇહ લોકો હતો નૄણાં દરિદ્રાણાં યથા નૃપ ।
મનુષ્યાણાં હતં જન્મ કાલિદીમજ્જનં વિના

ઉપપાતક સર્વાણિ પાતકાનિ મહાંતિ ચ ।
ભસ્મી ભવંતિ સર્વાણિ યમુનામજ્જનાન્નૃપ

વેપંતે સર્વપાપાનિ યમુનાયાં ગતે નરે ।
નાશકે સર્વપાપાનાં યદિ સ્નાસ્યતિ વારિણિ

પાવકા ઇવ દીપ્યંતે યમુનાયાં નરોત્તમાઃ ।
વિમુક્તાઃ સર્વપાપેભ્યો મેઘેભ્ય ઇવ ચંદ્રમાઃ

આર્દ્ર શુષ્કલઘુસ્થૂલં વાઙ્મનઃ કર્મભિઃ કૃતમ્ ।
તત્ર સ્નાનં દહેત્પાપં પાવકઃ સમિધો યથા

પ્રામાદિકં ચ યત્પાપં જ્ઞાનાજ્ઞાનકૃતં ચ યત્ ।
સ્નાનમાત્રેણ નશ્યેત યમુનાયાં નૃપોત્તમ

નિષ્પાપાસ્ત્રિદિવં યાંતિ પાપિષ્ઠા યાંતિ શુદ્ધતામ્ ।
સંદેહો નાત્ર કર્તવ્યઃ સ્નાને વૈ યમુનાજલે

સર્વેઽધિકારિણો હ્યત્ર વિષ્ણુભક્તૌ તથા નૃપ ।
સર્વેષાં સર્વદા દેવી યમુના પાપનાશિકા

એષ એવ પરો મંત્ર એતચ્ચ પરમં તપઃ ।
પ્રાયશ્ચિત્તં પરં ચૈવ યમુનાસ્નાનમુત્તમમ્

નૃણાં જન્માંતરાભ્યાસાત્કાલિંદી મજ્જને મતિઃ ।
અધ્યાત્મજ્ઞાનકૌશલ્યં જન્માભ્યાસાદ્યથા નૃપ

સંસારકર્દમાલેપ પ્રક્ષાલન વિશારદમ્ ।
પાવનં પાવનાનાં ચ યમુનાસ્નાનમુત્તમમ્

સ્નાતાસ્તત્ર ચ યે રાજન્સર્વકામફલપ્રદે ।
શુભાંશ્ચ ભુંજતે ભોગાંશ્ચંદ્ર સૂર્યગ્રહોપમાન્

યમુના મોક્ષદા પ્રોક્તા મથુરાસંગતા યદિ ।
મથુરાયાં ચ કાલિંદી પુણ્યાધિકવિવર્દ્ધિની

અન્યત્ર યમુના પુણ્યા મહાપાતકહારિણી ।
વિષ્ણુભક્તિપ્રદા દેવી મથુરા સંગતા ભવેત્

ભક્તિભાવેન સંયુક્તા કાલિંદ્યાં યદિ મજ્જયેત્ ।
કલ્પકોટિસહસ્રાણિ વસતે સન્નિધૌ હરેઃ

મુક્તિં પ્રયાંતિ મનુજાઃ નૂનં સાંખ્યેન વર્જિતાઃ ।
પિતરસ્તસ્ય તૃપ્યંતિ તૃપ્તાઃ કલ્પશતૈર્દિવિ

યે પિબંતિ નરા રાજન્યમુનાસલિલં શુભમ્ ।
પંચગવ્યસહસ્રૈસ્તુ સેવિતૈઃ કિં પ્રયોજનમ્

કોટિતીર્થસહસ્રૈસ્તુ સેવિતૈઃ કિં પ્રયોજનમ્ ।
તત્ર દાનં ચ હોમશ્ચ સર્વં કોટિગુણં ભવેત્

ઇતિ શ્રીપાદ્મે મહાપુરાણે સ્વર્ગખંડે ઊનત્રિંશોઽધ્યાયઃ