પદ્મ પુરાણ · અધ્યાય 3.10

ઋષય ઊચુઃ-।
પૃથિવ્યા હિ પરીમાણં સંસ્થાનં સરિતસ્તથા ।
ત્વત્તઃ શ્રુત્વા મહાભાગ અમૃતં પીતમેવ ચ

તત્ર ભૂમૌ ચ તીર્થાનિ પાવનાનીતિ નઃ શ્રુતમ્ ।
આચક્ષ્વ તાનિ સર્વાણિ યથાફલકરાણિ ચ ।
સવિશેષં મહાપ્રાજ્ઞ શ્રોતુમિચ્છામહે તવ

સૂત ઉવાચ-।
ધન્યં પુણ્યં મહાખ્યાનં પૃષ્ટમેવ તપોધનાઃ ।
યથામતિ પ્રવક્ષ્યામિ યથાયોગં યથાશ્રુતમ્

પુરાતનં પ્રવક્ષ્યામિ દેવર્ષેર્નારદસ્ય હિ ।
યુધિષ્ઠિરેણ સંવાદં શૃણુ તદ્દ્વિજસત્તમાઃ

હૃતરાજ્યાઃ પાંડુપુત્રા વને તસ્મિન્મહારથાઃ ।
ન્યવસંતિ મહાભાગા દ્રૌપદ્યા સહ પાંડવાઃ

અથાપશ્યન્મહાત્માનં દેવર્ષિં તત્ર નારદમ્ ।
દીપ્યમાનં શ્રિયા બ્રાહ્મ્યા દીપ્તાગ્નિસમતેજસમ્

સ તૈઃ પરિવૃતઃ શ્રીમાન્ભ્રાતૃભિઃ કુરુનંદનઃ ।
દિવિ ભાતિ હિ દીપ્તૌજા દેવૈરિવ શતક્રતુઃ

યથા ચ દેવાન્સાવિત્રી યાજ્ઞસેની તથા પતીન્ ।
ન જહૌ ધર્મતઃ પાર્થાન્મેરુમર્કપ્રભા યથા

પ્રતિગૃહ્ય તતઃ પૂજાં નારદો ભગવાનૃષિઃ ।
આશ્વાસયદ્ધર્મ્મપુત્રં યુક્તરૂપપ્રિયેણ ચ

ઉવાચ ચ મહાત્માનં ધર્મ્મરાજં યુધિષ્ઠિરમ્ ।
બ્રૂહિ ધર્મ્મભૃતાં શ્રેષ્ઠ કિં પ્રાર્થ્યં હિ દદામિ તે

અથ ધર્મસુતો રાજા પ્રણમ્ય ભ્રાતૃભિઃ સહ ।
ઉવાચ પ્રાંજલિર્વાક્યં નારદં દેવસંમિતમ્

ત્વયિ તુષ્ટે મહાભાગ સર્વલોકાભિપૂજિતે ।
કૃતમિત્યેવ મન્યે હિ પ્રસાદાત્તવ સુવ્રત

યદિ ત્વહમનુગ્રાહ્યો ભ્રાતૃભિઃ સહિતોઽનઘ ।
સંદેહં મે મુનિશ્રેષ્ઠ હૃત્સ્થં ત્વં છેત્તુમર્હસિ

પ્રદક્ષિણાં યઃ કુરુતે પૃથિવીં તીર્થતત્પરઃ ।
કિં ફલં તસ્ય કાર્ત્સ્ન્યેન તદ્બ્રહ્મન્વક્તુમર્હસિ

નારદ ઉવાચ-।
શૃણુ રાજન્નવહિતો દિલીપેન યથા પુરા ।
વસિષ્ઠસ્ય સકાશાદ્વૈ સર્વમેતદુપશ્રુતમ્

પુરા ભાગીરથીતીરે દિલીપો રાજસત્તમઃ ।
ધર્મ્યં વ્રતં સમાસ્થાય ન્યવસન્મુનિવત્તદા

શુભેદેશે મહારાજપુણ્યે દેવર્ષિપૂજિતે ।
ગંગાદ્વારે મહાતેજા દેવગંધર્વસેવિતે

સ પિતૄંસ્તર્પયામાસ દેવાંશ્ચ પરમદ્યુતિઃ ।
ઋષીંશ્ચ તર્પયામાસ વિધિદૃષ્ટેન કર્મણા

કસ્યચિત્ત્વથ કાલસ્ય જપન્નેવ મહામનાઃ ।
દદર્શ ભૂતસંકાશં વસિષ્ઠમૃષિમુત્તમમ્

પુરોહિતં સ તં દૃષ્ટ્વા દીપ્યમાનમિવ શ્રિયા ।
પ્રહર્ષમતુલં લેભે વિસ્મયં પરમં યયૌ

ઉપસ્થિતં મહારાજ પૂજયામાસ ભારત ।
સ હિ ધર્મ્મભૃતાં શ્રેષ્ઠો વિધિદૃષ્ટેન કર્મણા

શિરસા ચાર્ઘ્યમાદાય શુચિઃ પ્રયતમાનસઃ ।
નામસંકીર્ત્તયામાસ તસ્મિન્બ્રહ્મર્ષિસત્તમે

દિલીપોઽહં તુ ભદ્રં તે દાસોસ્મિ તવ સુવ્રત ।
તવ સંદર્શનાદેવ મુક્તોહં સર્વકિલ્બિષૈઃ

એવમુક્ત્વા મહારાજ દિલીપો દ્વિપદાં વરઃ ।
વાગ્યતઃ પ્રાંજલિર્ભૂત્વા તૂષ્ણીમાસીદ્યુધિષ્ઠિર

તં દૃષ્ટ્વા નિયમેનાથ સ્વાધ્યાયેન ચ કર્ષિતમ્ ।
દિલીપં નૃપતિશ્રેષ્ઠં મુનિઃ પ્રીતમનાભવત્

ઇતિ શ્રીપાદ્મે મહાપુરાણે સ્વર્ગખંડે દશમોઽધ્યાયઃ