પદ્મ પુરાણ · અધ્યાય 2.80

પિપ્પલ ઉવાચ-
કામકન્યાં યદા રાજા ઉપયેમે દ્વિજોત્તમ ।
કિં ચક્રાતે તદા તે દ્વે પૂર્વભાર્યે સુપુણ્યકે

દેવયાની મહાભાગા શર્મિષ્ઠા વાર્ષપર્વણી ।
તયોશ્ચરિત્રં તત્સર્વં કથયસ્વ મમાગ્રતઃ

સુકર્મોવાચ-
યદાનીતા કામકન્યા સ્વગૃહં તેન ભૂભુજા ।
અત્યર્થં સ્પર્ધતે સા તુ દેવયાની મનસ્વિની

તસ્યાર્થે તુ સુતૌ શપ્તૌ ક્રોધેનાકુલિતાત્મના ।
શર્મિષ્ઠાં ચ સમાહૂય શબ્દં ચક્રે યશસ્વિની

રૂપેણ તેજસા દાનૈઃ સત્યપુણ્યવ્રતૈસ્તથા ।
શર્મિષ્ઠા દેવયાની ચ સ્પર્ધેતે સ્મ તયા સહ

દુષ્ટભાવં તયોશ્ચાપિ સાઽજ્ઞાસીત્કામજા તદા ।
રાજ્ઞે સર્વં તયા વિપ્ર કથિતં તત્ક્ષણાદિહ

અથ ક્રુદ્ધો મહારાજઃ સમાહૂયાબ્રવીદ્યદુમ્ ।
શર્મિષ્ઠા વધ્યતાં ગત્વા શુક્રપુત્રી તથા પુનઃ

સુપ્રિયં કુરુ મે વત્સ યદિ શ્રેયો હિ મન્યસે ।
એવમાકર્ણ્ય તત્તસ્ય પિતુર્વાક્યં યદુસ્તદા

પ્રત્યુવાચ નૃપેંદ્રં તં પિતરં પ્રતિ માનદ ।
નાહં તુ ઘાતયે તાત માતરૌ દોષવર્જિતે

માતૃઘાતે મહાદોષઃ કથિતો વેદપંડિતૈઃ ।
તસ્માદ્ઘાતં મહારાજ એતયોર્ન કરોમ્યહમ્

દોષાણાં તુ સહસ્રેણ માતા લિપ્તા યદા ભવેત્ ।
ભગિની ચ મહારાજ દુહિતા ચ તથા પુનઃ

પુત્રૈર્વા ભ્રાતૃભિશ્ચૈવ નૈવ વધ્યા ભવેત્કદા ।
એવં જ્ઞાત્વા મહારાજ માતરૌ નૈવ ઘાતયે

યદોર્વાક્યં તદા શ્રુત્વા રાજા ક્રુદ્ધો બભૂવ હ ।
શશાપ તં સુતં પશ્ચાદ્યયાતિઃ પૃથિવીપતિઃ

યસ્માદાજ્ઞાહતા ત્વદ્ય ત્વયા પાપિ સમોપિ હિ ।
માતુરંશં ભજસ્વ ત્વં મચ્છાપકલુષીકૃતઃ

એવમુક્ત્વા યદું પુત્રં યયાતિઃ પૃથિવીપતિઃ ।
પુત્રં શપ્ત્વા મહારાજસ્તયા સાર્દ્ધં મહાયશાઃ

રમતે સુખભોગેન વિષ્ણોર્ધ્યાનેન તત્પરઃ ।
અશ્રુબિંદુમતીસા ચ તેન સાર્દ્ધં સુલોચના

બુભુજે ચારુસર્વાંગી પુણ્યાન્ભોગાન્મનોનુગાન્ ।
એવં કાલો ગતસ્તસ્ય યયાતેસ્તુ મહાત્મનઃ

અક્ષયા નિર્જરાઃ સર્વા અપરાસ્તુ પ્રજાસ્તથા ।
સર્વે લોકા મહાભાગ વિષ્ણુધ્યાનપરાયણાઃ

તપસા સત્યભાવેન વિષ્ણોર્ધ્યાનેન પિપ્પલ ।
સર્વે લોકા મહાભાગ સુખિનઃ સાધુસેવકાઃ

ઇતિ શ્રીપદ્મપુરાણે ભૂમિખંડે વેનોપાખ્યાને માતાપિતૃતીર્થવર્ણને યયાતિચરિત્રેઽશીતિતમોઽધ્યાયઃ