પદ્મ પુરાણ · અધ્યાય 2.52

શિવશર્મોવાચ-।
મંગલે શ્રૂયતાં વાક્યં યદિ પૃચ્છસિ સાંપ્રતમ્ ।
યદર્થં હિ ત્વયા પૃષ્ટં તન્નિબોધ વરાનને

ઇયં હિ સાંપ્રતં પ્રાપ્તા વરાકી ભિક્ષુરૂપિણી ।
વસુદત્તસ્ય વિપ્રસ્ય સુતેયં ચારુલોચને

સુદેવા નામ ભદ્રેયં મમ જાયા પ્રિયા સદા ।
કેનાપિ કારણેનૈવ દેશં ત્યક્ત્વા સમાગતા

મમદુઃખેન દગ્ધેયં વિયોગેન વરાનને ।
માં જ્ઞાત્વા તુ સમાયાતા ભિક્ષુરૂપેણ તે ગૃહમ્

એવં જ્ઞાત્વા ત્વયા ભદ્રે આતિથ્યં પરિશોભિતમ્ ।
કર્ત્તવ્યં ન ચ સંદેહ ઇચ્છંત્યા મમ સુપ્રિયમ્

ભર્તુર્વાક્યં નિશમ્યૈવ મંગલા પતિદેવતા ।
હર્ષેણ મહતાવિષ્ટા સ્વયમેવ સુમંગલા

સ્નાનાચ્છાદન ભોજ્યં ચ મમ ચક્રે વરાનને ।
રત્નકાંચનયુક્તૈશ્ચાભરણૈશ્ચ પતિવ્રતા

અહં હિ ભૂષિતા ભદ્રે તયૈવ પતિકામ્યયા ।
તયાહં ભૂષિતા દેવિ માનસ્નાનૈશ્ચ ભોજનૈઃ

ભર્ત્રાહં માનિતા દેવિ જાતં દુઃખમનંતકમ્ ।
મમોરસિ મહાતીવ્રં સર્વપ્રાણવિનાશનમ્

તસ્યા માનો મયા દૃષ્ટો દુઃખમાત્મગતં તથા ।
ચિંતા મે દારુણા જાતા યયા પ્રાણા વ્રજંતિ મે

કદાપિ વચનં દત્તં ન મયા પાપયા શુભમ્ ।
અસ્યૈવ વિપ્રવર્યસ્ય આચરંત્યા ચ દુષ્કૃતમ્

પાદપ્રક્ષાલનં નૈવ અંગસંવાહનં નહિ ।
એકાંતં ન મયા દત્તં તસ્યૈવ હિ મહાત્મનઃ

સંભાષાં કથમસ્યૈવ કરિષ્યે પાપનિશ્ચયા ।
રાત્રૌ ચૈવ તદા તત્ર પતિતા દુઃખસાગરે

એવં હિ ચિંતમાનાયાઃ સ્ફુટિતં હૃદયં મમ ।
ગતાઃ પ્રાણાસ્તદા કાયં પરિત્યજ્ય વરાનને

તત્ર દૂતાઃ સમાયાતા ધર્મરાજસ્ય વૈ તદા ।
વીરાશ્ચ દારુણાઃ ક્રૂરા ગદાચક્રાસિધારિણઃ

તૈસ્તુ બદ્ધા મહાભાગે શૃંખલૈર્દૃઢબંધનૈઃ ।
નીતા યમપુરં તૈસ્તુ રુદમાના સુદુઃખિતા

મુદ્ગરૈસ્તાડ્યમાનાહં દુર્ગમાર્ગેણ પીડિતા ।
ભર્ત્સ્યમાના યમસ્યાગ્રે તૈસ્તત્રાહં પ્રવેશિતા

દૃષ્ટાહં યમરાજેન સક્રોધેન મહાત્મના ।
અંગારસંચયે ક્ષિપ્તા ક્ષિપ્તા નરકસંચયે

લોહસ્ય પુરુષં કૃત્વા અગ્નિના પરિતાપિતઃ ।
મમોરસિ સમુત્ક્ષિપ્તો નિજભર્તુશ્ચ વંચનાત્

નાનાપીડાતિસંતપ્તા નરકાગ્નિપ્રતાપિતા ।
તૈલદ્રોણ્યાં પરિક્ષિપ્તા કરમ્ભવાલુકોપરિ

અસિપત્રૈશ્ચ સંચ્છિન્ના જલમંત્રેણ વાહિતા ।
કૂટશાલ્મલિવૃક્ષેષુ ક્ષિપ્તા તેન મહાત્મના

પૂયશોણિતવિષ્ઠાયાં પતિતા કૃમિસંકુલે ।
સર્વેષુ નરકેષ્વેવં ક્ષિપ્તાહં નૃપનંદિનિ

પીડાયુક્તેષુ તીવ્રેષુ તેનૈવાપિ મહાત્મના ।
કરપત્રૈઃ પાટિતાહં શક્તિભિસ્તાડિતા ભૃશમ્

અન્યેષ્વેવ નરકેષુ પાતિતા નૃપનંદિનિ ।
યોનિગર્તેષુ ક્ષિપ્તાસ્મિ પતિતા દુઃખસંકટે

ધર્મરાજેન તેનાહં નરકેષુ નિપાતિતા ।
વલ્ગુનીયોનિમાસાદ્ય ભુક્તં દુઃખં સુદારુણમ્

ગતાહં ક્રૌષ્ટુકીં યોનિં શુનીયોનિં પુનર્ગતા ।
સકુક્કુટીં ચ માર્જારીમાખુયોનિં ગતા હ્યહમ્

એવં યોનિવિશેષેષુ પાપયોનિષુ તેન ચ ।
ક્ષિપ્તાસ્મિ ધર્મરાજેન પીડિતા સર્વયોનિષુ

તેનૈવાહં કૃતા ભૂમૌ શૂકરી નૃપનંદિનિ ।
તવહસ્તે મહાભાગે સંતિ તીર્થાન્યનેકશઃ

તેનોદકેન સિક્તાસ્મિ ત્વયૈવ વરવર્ણિનિ ।
મમ પાપં ગતં દેવિ પ્રસાદાત્તવ સુંદરિ

તવૈવ તેજઃપુણ્યેન જાતં જ્ઞાનં વરાનને ।
ઇદાનીં મામુદ્ધરસ્વ પતિતાં નરકસંકટે

યદા નોદ્ધરસે દેવિ પુનર્યાસ્યામિ દારુણમ્ ।
નરકં ચ મહાભાગે ત્રાહિ માં દુઃખભાગિનીમ્

ગતાહં પાપભાવેન દીનાહં ચ નિરાશ્રયા ।
સુદેવોવાચ-
કિં કૃતં હિ મયા ભદ્રે સુકૃતં પુણ્યસંભવમ્

યેનાહમુદ્ધરે ત્વાં વૈ તન્મે ત્વં વદ સાંપ્રતમ્ ।
શૂકર્યુવાચ-
અયં રાજા મહાભાગ ઇક્ષ્વાકુર્મનુનંદનઃ

વિષ્ણુરેષ મહાપ્રાજ્ઞો ભવતી શ્રીર્હિ નાન્યથા ।
પતિવ્રતા મહાભાગા પતિવ્રતપરાયણા

ત્વં સતી સર્વદા ભદ્રે સર્વતીર્થમયી પ્રિયા ।
દેવિ સર્વમયી નિત્યં સર્વદેવમયી સદા

મહાપતિવ્રતા લોક એકા ત્વં નૃપતેઃ પ્રિયા ।
યયા શુશ્રૂષિતો ભર્તા ભવત્યા હિ અહર્નિશમ્

એકસ્ય દિવસસ્યાપિ પુણ્યં દેહિ વરાનને ।
પતિ શુશ્રૂષિતસ્યાપિ યદિ મે કુરુષે પ્રિયમ્

મમ માતા પિતા ત્વં વૈ ત્વં મે ગુરુઃ સનાતનઃ ।
અહં પાપા દુરાચારા અસત્યા જ્ઞાનવર્જિતા

મામુદ્ધર મહાભાગે ભીતાહં યમતાડનૈઃ ।
સુકલોવાચ-
એવં શ્રુત્વા તયા પ્રોક્તં સમાલોક્ય નૃપં તદા

કિં કરોમિ મહારાજ એષા કિં વદતે પશુઃ ।
ઇક્ષ્વાકુરુવાચ-
એનાં દુઃખાં વરાકીં વૈ પાપયોનિં ગતાં શુભે

સમુદ્ધરસ્વ પુણ્યૈસ્ત્વં મહચ્છ્રેયો ભવિષ્યતિ ।
એવમુક્તા વરા નારી સુદેવા ચારુમંગલા

ઉવાચૈકાબ્દપુણ્યં તે મયા દત્તં વરાનને ।
એવમુક્તેન વાક્યેન તયા દેવ્યા હિ તત્ક્ષણાત્

રૂપયૌવનસંપન્ના દિવ્યમાલાવિભૂષિતા ।
દિવ્યદેહા ચ સંભૂતા તેજોજ્વાલાસમાવૃતા

સર્વભૂષણશોભાઢ્યા નાનારત્નૈશ્ચ શોભિતા ।
સંજાતા દિવ્યરૂપા સા દિવ્યગંધાનુલેપના

દિવ્યં વિમાનમારૂઢા અંતરિક્ષં ગતા સતી ।
તામુવાચ તતો રાજ્ઞીં પ્રણતાનતકંધરા

સ્વસ્ત્યસ્તુ તે મહાભાગે પ્રસાદાત્તવ સુંદરિ ।
વ્રજામિ પાતકાન્મુક્તા સ્વર્ગં પુણ્યતમં શુભમ્

પ્રણમ્યૈવં ગતા સ્વર્ગં સુદેવા શૃણુ સત્તમ ।
એતત્તે સર્વમાખ્યાતં સુકલાયા નિવેદિતમ્

ઇતિ શ્રીપદ્મપુરાણે ભૂમિખંડે વેનોપાખ્યાને સુકલાચરિત્રે સુદેવાસ્વર્ગારોહણંનામ દ્વિપંચાશત્તમોઽધ્યાયઃ