પદ્મ પુરાણ · અધ્યાય 2.38

સૂત ઉવાચ-
એવં સંબોધિતો વેનઃ પાપભાવં ગતઃ કિલ ।
પુરુષેણ તેન જૈનેન મહાપાપેન મોહિતઃ

નમસ્કૃત્ય તતઃ પાદૌ તસ્યૈવ ચ દુરાત્મનઃ ।
વેદધર્મં પરિત્યજ્ય સત્યધર્માદિકાં ક્રિયામ્

સુયજ્ઞાનાં નિવૃત્તિઃ સ્યાદ્વેદાનાં હિતથૈવ ચ ।
પુણ્યશાસ્ત્રમયો ધર્મસ્તદા નૈવ પ્રવર્તિતઃ

સર્વપાપમયો લોકઃ સંજાતસ્તસ્ય શાસનાત્ ।
નૈવ યાગાશ્ચ વેદાશ્ચ ધર્મશાસ્ત્રાર્થમુત્તમમ્

ન દાનાધ્યયનં વિપ્રાસ્તસ્મિઞ્છાસતિ પાર્થિવે ।
એવં ધર્મપ્રલોપોભૂન્મહત્પાપં પ્રવર્તિતમ્

અંગેન વાર્યમાણસ્તુ અન્યથા કુરુતે ભૃશમ્ ।
ન નનામ પિતુઃ પાદૌ માતુશ્ચૈવ દુરાત્મવાન્

સનકસ્યાપિ વિપ્રસ્ય અહમેકઃ પ્રતાપવાન્ ।
પિત્રા નિવાર્યમાણશ્ચ માત્રા ચૈવ દુરાત્મવાન્

ન કરોતિ શુભં પુણ્યં તીર્થદાનાદિકં કદા ।
આત્મભાવાનુરૂપં ચ બહુકાલં મહાયશાઃ

પુનઃ સર્વૈર્વિચાર્યૈવં કસ્માત્પાપી વ્યજાયત ।
અંગપ્રજાપતેઃ પુત્રો વંશલાઞ્છનમાગતઃ

પુનઃ પપ્રચ્છ ધર્માત્મા સુતાં મૃત્યોર્મહાત્મનઃ ।
કસ્ય દોષાત્સમુત્પન્નો વદ સત્યં મમ પ્રિયે

સુનીથોવાચ-
પૂર્વમેવ સ્વવૃત્તાંતમાત્મપુણ્યં ચ નંદિની ।
સમાચષ્ટ ચ અંગાય મમ દોષાન્મહામતે

બાલ્યે કૃતં મયા પાપં સુશંખસ્ય મહાત્મનઃ ।
તપસિ સંસ્થિતસ્યાપિ નાન્યત્કિંચિત્કૃતં મયા

શપ્તાહં કુપ્યતા તેન દુષ્ટા તે સંતતિર્ભવેત્ ।
ઇતિ જાને મહાભાગ તેનાયં દુષ્ટતાં ગતઃ

સમાકર્ણ્ય મહાતેજાસ્તયા સહ વનં યયૌ ।
ગતે તસ્મિન્મહાભાગે સભાર્યે ચ વને તદા

સપ્તૈતે ઋષયસ્તત્ર વેનપાર્શ્વં ગતાસ્તથા ।
સમાહૂય તતઃ પ્રોચુરંગસ્ય તનયં પ્રતિ

ઋષય ઊચુઃ-
મા વેન સાહસં કાર્ષીઃપ્રજાપાલો ભવાનિહ ।
ત્વયા સર્વમિદં લોકં ત્રૈલોક્યં સચરાચરમ્

ધર્મે ચૈવ મહાભાગ સકલં હિ પ્રતિષ્ઠિતમ્ ।
પાપકર્મપરિત્યજ્ય પુણ્યં કર્મ સમાચર

એવમુક્તેષુ તેષ્વેવ પ્રહસન્વાક્યમબ્રવીત્ ।
વેન ઉવાચ-
અહમેવ પરો ધર્મોઽહમેવાર્હઃ સનાતનઃ

અહં ધાતા અહં ગોપ્તા અહં વેદાર્થ એવ ચ ।
અહં ધર્મો મહાપુણ્યો જૈનધર્મઃ સનાતનઃ

મામેવ કર્મણા વિપ્રા ભજધ્વં ધર્મરૂપિણમ્ ।
ઋષય ઉચુઃ-
બ્રાહ્મણાઃ ક્ષત્ત્રિયા વૈશ્યાસ્ત્રયોવર્ણા દ્વિજાતયઃ

સર્વેષામેવ વર્ણાનાં શ્રુતિરેષા સનાતની ।
વેદાચારેણ વર્તંતે તેન જીવંતિ જંતવઃ

બ્રહ્મવંશાત્સમુદ્ભૂતો ભવાન્બ્રાહ્મણ એવ ચ ।
પશ્ચાદ્રાજા પૃથિવ્યાશ્ચ સંજાતઃ કૃતવિક્રમઃ

રાજપુણ્યેન રાજેંદ્ર સુખં જીવંતિ વૈ દ્વિજાઃ ।
રાજ્ઞઃ પાપેન નશ્યંતિ તસ્માત્પુણ્યં સમાચર

સમાદૃતસ્ત્વયા ધર્મઃ કૃતશ્ચાપિ નરાધિપ ।
ત્રેતાયુગસ્ય કર્માપિ દ્વાપરસ્ય તથા નહિ

કલેશ્ચૈવ પ્રવેશં તુ વર્ત્તયિષ્યંતિ માનવાઃ ।
જૈનધર્મં સમાશ્રિત્ય સર્વે પાપપ્રમોહિતાઃ

વેદાચારં પરિત્યજ્ય પાપં યાસ્યંતિ માનવાઃ ।
પાપસ્ય મૂલમેવં વૈ જૈનધર્મં ન સંશયઃ

અનેન મુગ્ધા રાજેંદ્ર મહામોહેન પાતિતાઃ ।
માનવાઃ પાપસંઘાતાસ્તેષાં નાશાય નાન્યથા

ભવિષ્યત્યેવ ગોવિંદઃ સર્વપાપાપહારકઃ ।
સ્વેચ્છારૂપં સમાસાદ્ય સંહરિષ્યતિ પાતકાત્

પાપેષુ સંગતેષ્વેવં મ્લેચ્છનાશાય વૈ પુનઃ ।
કલ્કિરેવ સ્વયં દેવો ભવિષ્યતિ ન સંશયઃ

વ્યવહારં કલેશ્ચૈવ ત્યજ પુણ્યં સમાશ્રય ।
વર્તયસ્વ હિ સત્યેન પ્રજાપાલો ભવસ્વ હિ

વેન ઉવાચ-
અહં જ્ઞાનવતાં શ્રેષ્ઠઃ સર્વં જ્ઞાતં મયા ઇહ ।
યોઽન્યથા વર્તતે ચૈવ સ દંડ્યો ભવતિ ધ્રુવમ્

અત્યર્થં ભાષમાણં તં રાજાનં પાપચેતનમ્ ।
કુપિતાસ્તે મહાત્માનઃ સર્વે વૈ બ્રહ્મણઃ સુતાઃ

કુપિતેષ્વેવ વિપ્રેષુ વેનો રાજા મહાત્મસુ ।
બ્રહ્મશાપભયાત્તેષાં વલ્મીકં પ્રવિવેશ હ

અથ તે મુનયઃ ક્રુદ્ધા વેનં પશ્યંતિ સર્વતઃ ।
જ્ઞાત્વા પ્રનષ્ટં ભૂપં તં વલ્મીકસ્થં સુસાંપ્રતમ્

બલાદાનિન્યુસ્તં વિપ્રાઃ ક્રૂરં તં પાપચેતનમ્ ।
દૃષ્ટ્વા ચ પાપકર્માણં મુનયઃ સુસમાહિતાઃ

સવ્યં પાણિં મમંથુસ્તે ભૂપસ્ય જાતમન્યવઃ ।
તસ્માજ્જાતો મહાહ્રસ્વો નીલવર્ણો ભયંકરઃ

બર્બરો રક્તનેત્રસ્તુ બાણપાણિર્ધનુર્દ્ધરઃ ।
સર્વેષામેવ પાપાનાં નિષાદાનાં બભૂવ હ

ધાતા પાલયિતા રાજા મ્લેચ્છાનાં તુ વિશેષતઃ ।
તં દૃષ્ટ્વા પાપકર્માણમૃષયસ્તુ મહામતે

મમંથુર્દક્ષિણં પાણિં વેનસ્યાપિ મહાત્મનઃ ।
તસ્માજ્જાતો મહાત્મા સ યેન દુગ્ધા વસુંધરા

પૃથુર્નામ મહાપ્રાજ્ઞો રાજરાજો મહાબલઃ ।
તસ્ય પુણ્યપ્રસાદાચ્ચ વેનો ધર્માર્થકોવિદઃ

ચક્રવર્તિપદં ભુક્ત્વા પ્રસાદાત્તસ્ય ચક્રિણઃ ।
જગામ વૈષ્ણવં લોકં તદ્વિષ્ણોઃ પરમં પદમ્

ઇતિ શ્રીપદ્મપુરાણે ભૂમિખંડે વેનોપાખ્યાનેઽષ્ટત્રિંશોઽધ્યાયઃ