પદ્મ પુરાણ · અધ્યાય 2.35

રંભોવાચ-
બ્રહ્મા અવ્યક્તસંભૂતસ્તસ્માજ્જજ્ઞે પ્રજાપતિઃ ।
અત્રિર્નામ સ ધર્માત્મા તસ્ય પુત્રો મહામનાઃ

અંગો નામ અયં ભદ્રે નંદનં વનમાગતઃ ।
ઇંદ્રસ્ય સંપદં દૃષ્ટ્વા લીલાતેજસમુત્તમામ્

કૃતા સ્પૃહા અનેનાપિ ઇંદ્રસ્ય સદૃશે પદે ।
ઈદૃશો હિ યદા પુત્રો મમ સ્યાદ્ધર્મસંયુતઃ

સુશ્રેયો મે ભવેજ્જન્મ યશઃ કીર્તિ સમન્વિતમ્ ।
આરાધિતો હૃષીકેશસ્તપોભિર્નિયમૈસ્તથા

સુપ્રસન્ને હૃષીકેશે વરં યાચિતવાનયમ્ ।
ઇંદ્રસ્ય સદૃશં પુત્રં વિષ્ણુતેજઃ પરાક્રમમ્

વૈષ્ણવં સર્વપાપઘ્નં દેહિ મે મધુસૂદન ।
દત્તવાન્સ તદા પુત્રમીદૃશં સર્વધારકમ્

તદાપ્રભૃતિ વિપ્રેંદ્રઃ પુણ્યાં કન્યાં પ્રપશ્યતિ ।
યથા ત્વં ચારુસર્વાંગી તથાયં પરિપશ્યતિ

એનં ગચ્છ વરારોહે અસ્માત્પુત્રો ભવિષ્યતિ ।
પુણ્યાત્મા પુણ્યધર્મજ્ઞો વિષ્ણુતેજઃ પરાક્રમઃ

એતત્તે સર્વમાખ્યાતં તથાહં પૃચ્છિતા ત્વયા ।
અયં ભર્તા ભવત્યર્હો ભવેદેવ ન સંશયઃ

સુશંખસ્યાપિ યઃ શાપો વૃથા સોઽપિ ભવિષ્યતિ ।
અસ્માજ્જાતે મહાભાગે પુત્રે ધર્મપ્રચારિણિ

ભવિષ્યસિ સુખી ભદ્રે સત્યં સત્યં વદામ્યહમ્ ।
સુક્ષેત્રે કૃષિકારસ્તુ બીજં વપતિ તત્પરઃ

સ તથા ભુંજતે દેવિ યથા બીજં તથા ફલમ્ ।
અન્યથા નૈવ જાયેત તત્સર્વં સદૃશં ભવેત્

અયમેષ મહાભાગસ્તપસ્વી પુણ્યવીર્યવાન્ ।
અસ્ય વીર્યાત્સમુત્પન્નો અસ્યૈવગુણસંપદા

યુક્તઃ પુત્રો મહાતેજાઃસર્વદેહભૃતાં વરઃ ।
ભવિષ્યતિ મહાભાગ્યો યુક્તાત્મા યોગતત્વવિત્

એવં હિ વાક્યં તુ નિશમ્ય બાલા રંભાપ્રિયોક્તં શિવદાયકં તત્ ।
વિચિંત્ય બુદ્ધ્યેહ સુનીથયા તદા તત્ત્વાર્થમેતત્પરિસત્યમેવ હિ

ઇતિ શ્રીપદ્મપુરાણે ભૂમિખંડેવેનોપાખ્યાને પંચત્રિંશોઽધ્યાયઃ