પદ્મ પુરાણ · અધ્યાય 2.2

સૂત ઉવાચ-
તદાદાય મહાત્માઽસૌ નિર્જગામ ત્વરાન્વિતઃ ।
પિતૃભક્ત્યા તપોભિશ્ચ સત્યાર્જવબલેન સઃ

ધર્મમાકૃષ્ટવાંશ્ચૈવ ધર્મશર્મા તતસ્તદા ।
સમાકૃષ્ટસ્તુ વૈ ધર્મસ્તપસા તસ્ય ધીમતઃ

ધર્મશર્માણમાયાતં ઇદં વચનમબ્રવીત્ ।
કસ્માત્ત્વયા સમાહૂતો ધર્મશર્મન્સમાગતઃ

તન્મે કથય કાર્યં ત્વં તત્કરોમિ ન સંશયઃ ।
ધર્મશર્મોવાચ-
યદ્યસ્તિ ગુરુશુશ્રૂષા યદિ નિષ્ઠાઽચલં તપઃ

તેન સત્યેન મે ધર્મ વેદશર્મા સ જીવતુ ।
ધર્મ ઉવાચ-
દમશૌચેન સત્યેન તપસા તવ સુવ્રત

પિતૃભક્ત્યા તવ ભ્રાતા વેદશર્મા મહાભુજઃ ।
પુનરેવ મહાત્માસૌ જીવનં ચ લભિષ્યતિ

તપસાનેન તુષ્ટોસ્મિ પિતૃભક્ત્યા મહામતે ।
વરં વરય ભદ્રં તે દુર્લભં ધર્મવિત્તમૈઃ

એવમાકર્ણિતં તેન સુવાક્યં ધર્મશર્મણા ।
વૈવસ્વતં મહાત્માનં સમુવાચ મહાયશાઃ

દેહિ મે ત્વચલાં ભક્તિં પિતુઃ પાદાર્હણે પુનઃ ।
ધર્મે રતિં તથા મોક્ષં સુપ્રસન્નો યદા મમ

તમુવાચ તતો ધર્મો મત્પ્રસાદાદ્ભવિષ્યતિ ।
એવમુક્તે મહાવાક્યે વેદશર્મા તદોત્થિતઃ

પ્રસુપ્તવન્મહાપ્રાજ્ઞો ધર્મશર્માણમબ્રવીત્ ।
ક્વ સા દેવી ગતા ભ્રાતઃ ક્વ સ તાતો ભવેદિતિ

સમાસેન સમાખ્યાતં યથા પિત્રા નિયોજિતઃ ।
સમાજ્ઞાય તતો હૃષ્ટો ધર્મશર્મા તમબ્રવીત્

મમાદ્યૈવ મહાભાગ શિરસા જીવિતેન ચ ।
સંમુખી ભવ વૈ ભ્રાતઃ કોન્યો મે ત્વાદૃશો ભુવિ

ભ્રાતરં ચૈવમાભાષ્ય ઉત્સુકઃ પિતરં પ્રતિ ।
ગમનાય મતિં ચક્રે ભ્રાત્રા ચ ધર્મશર્મણા

દ્વાવેતૌ તુ ગતૌ તત્ર પિતરં હૃષ્ટમાનસૌ ।
દ્વાભ્યાં તત્ર સમાસ્થાય શિવશર્માણમુત્તમમ્

ધર્મશર્મા તદોવાચ પિતરં દીપ્તિસંયુતમ્ ।
મમાદ્યૈવ મહાભાગ તપસા જીવિતેન ચ

વેદશર્મા સમાનીતસ્તં પુત્રં પ્રગૃહાણ ભોઃ ।
શિવશર્મા તતો હૃષ્ટો ભક્તિં વિજ્ઞાય તસ્ય ચ

ન કિંચિદબ્રવીત્તં તુ પુનશ્ચિંતામુપેયિવાન્ ।
પુરતો વિનયેનાપિ વર્તમાનં મહામતિમ્

વિષ્ણુશર્માણમાભાષીદ્વત્સ મે વચનં કુરુ ।
ઇંદ્રલોકં વ્રજસ્વાદ્ય તસ્માદાનય ચામૃતમ્

અનયા કાન્તયા સાર્દ્ધં સ્થાતુમિચ્છામિ સાંપ્રતમ્ ।
સાગરાદ્યત્સમુત્પન્નમમૃતં વ્યાધિનાશનમ્

સાધુનેચ્છતિ મામેષા યથૈનાં તુ લભામ્યહમ્ ।
તથા કુરુષ્વ શીઘ્રં ત્વમન્યથાન્યં પ્રયાસ્યતિ

વૃદ્ધં જ્ઞાત્વાવમન્યેત ઇયં બાલા સુરૂપિણી ।
અદ્ય દેવ્યાનયા સાર્દ્ધં પ્રિયયા ભુવનત્રયે

નિર્દોષો વ્યાધિનિર્મુક્તો યથા તાત ભવામ્યહમ્ ।
તથા કુરુષ્વ મે વત્સ મદ્ભક્તોસિ યદા ભુવિ

એવમાકર્ણ્ય તદ્વાક્યં પિતુસ્તસ્ય મહાત્મનઃ ।
વિષ્ણુશર્મા તદોવાચ પિતરં દીપ્તતેજસમ્

સર્વમેતત્કરિષ્યામિ ભવતઃ સુખમુત્તમમ્ ।
એવમાભાષ્ય ધર્માત્મા વિષ્ણુશર્મા મહામતિઃ

પિતરં તં નમસ્કૃત્ય પુનઃ કૃત્વા પ્રદક્ષિણમ્ ।
બલેન મહતા સોપિ તપસા નિયમેન ચ

અંતરિક્ષગતશ્ચાસીદ્ગચ્છમાનસ્ય ધીમતઃ ।
સ મહાવાયુવેગેન ઐંદ્રં સંપ્રતિગચ્છતિ

ઇતિ શ્રીપદ્મપુરાણે ભૂમિખંડે શિવશર્મચરિતે દ્વિતીયોઽધ્યાયઃ