પદ્મ પુરાણ · અધ્યાય 2.100

।
વિષ્ણુરુવાચ-
નર્મદાયાસ્તટે રમ્યે વટે તિષ્ઠતિ વૈ પિતા ।
વિજ્વલોઽપિ સમાયાતઃ પિતરં પ્રણિપત્ય સઃ

વાસુદેવાભિધાનસ્ય સ્તોત્રસ્યાપિ મહામતિઃ ।
સમાચષ્ટે સ ધર્માત્મા મહિમાનં પિતુઃ પુરઃ

યથા વિષ્ણુઃ સમાગત્ય દદૌ તસ્મૈ વરં શુભમ્ ।
તત્સર્વં કથયામાસ સુપ્રસન્નેન ચેતસા

કુંજલોપિ ચ વૃત્તાંતં સમાકર્ણ્ય સ ભૂપતેઃ ।
હર્ષેણ મહતાવિષ્ટઃ પુત્રમાલિંગ્ય વિજ્વલમ્

આહ પુણ્યં કૃતં વત્સ ત્વયા રાજ્ઞે મહાત્મને ।
ઉપકારં મહાપુણ્યં વાસુદેવસ્ય કીર્તનાત્

એવમાભાષ્ય તં પુત્રમાશીર્ભિરભિનંદ્ય ચ ।
પુત્રં દેવસમોપેતં સ્તુત્વા ચૈવ પુનઃ પુનઃ

સ્થિતઃ સરિત્તટે રમ્યે ચ્યવનસ્યોપપશ્યતઃ ।
એતત્તે સર્વમાખ્યાતં તેષાં વૃત્તં મહાત્મનામ્

વૈષ્ણવાનાં મહારાજ અન્યત્કિં તે વદામ્યહમ્ ।
વેન ઉવાચ-
અમૃતં શંખપાત્રેણ પાનાર્થં મમ ચાર્પિતમ્

તસ્માત્કસ્ય ન ચ શ્રદ્ધા પાતું મર્ત્યસ્ય ભૂતલે ।
ઉત્તમં વૈષ્ણવં જ્ઞાનં પાનાનામિહ સર્વદા

ત્વયૈવં કથ્યમાનસ્ય પાને તૃપ્તિર્ન જાયતે ।
શ્રોતું હિ દેવદેવેશ મમ શ્રદ્ધા વિવર્દ્ધતે

કથયસ્વ પ્રસાદાન્મે કુંજલસ્યાપિ ચેષ્ટિતમ્ ।
મહાત્મના કિમુક્તં ચ ચતુર્થં તનયં પ્રતિ

તત્ત્વં સુવિસ્તરાદેવ કૃપયા કથયસ્વ મે ।
શ્રીભગવાનુવાચ-
શ્રૂયતામભિધાસ્યામિ ચરિત્રં કુંજલસ્ય ચ

બહુશ્રેયઃ સમાયુક્તં ચરિત્રં ચ્યવનસ્ય ચ ।
ઇદં પુણ્યં નરશ્રેષ્ઠ આખ્યાનં પાપનાશનમ્

યઃ શૃણોતિ નરો ભક્ત્યા ગોસહસ્રફલં લભેત્

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે શતતમોઽધ્યાયઃ