પદ્મ પુરાણ · અધ્યાય 1.66

વ્યાસ ઉવાચ-
ભ્રાતરં નિહતં દૃષ્ટ્વા કાલેયો નામ દાનવઃ।
ચિત્રરથં પ્રદુદ્રાવ ધૃત્વા બાણં સકાર્મુકમ્

દૃષ્ટ્વાસુરં વિધાવંતં કાલમૃત્યુસમપ્રભમ્।
અરૌત્સીત્તં મહાવીર્યો જયંતઃ પાકશાસનિઃ

અબ્રવીચ્ચ મહાતેજા દૈતેયં સુરસત્તમઃ।
તથ્યં ધર્માભિસંયુક્તં લોકદ્વયહિતં ધ્રુવમ્

શસ્ત્રાભિઘાતદુઃખાર્તં કશ્મલં ચાન્યસંયુતમ્।
પ્રભગ્નં ચ નિરસ્તં ચ યો હંતિ સ ચ બાલિશઃ

સુચિરં રૌરવં ભુક્ત્વા તસ્ય દાસો ભવેચ્ચિરમ્।
તસ્માન્મામું પ્રયુધ્યસ્વ યુદ્ધધર્મસ્થિતો ભવ

જયંતમબ્રવીદ્વાક્યં કાલેયઃ ક્રોધમૂર્ચ્છિતઃ।
નિહત્ય ભ્રાતૃહંતારમથ ત્વાંહન્મિ સાંપ્રતમ્

તતસ્તં ચાસુરશ્રેષ્ઠં કાલાનલસમપ્રભમ્।
જયંતો નિશિતૈર્બાણૈર્જઘાન સુરસત્તમઃ

નિચકર્ત્ત શરાન્સોપિ ત્રિભિર્વિવ્યાધ ચાસુરઃ।
યથાવૃષ્ટિગણં પ્રાપ્ય નદી ગૈરિકવાહિની

તથા તૌ ચ મહાવીર્યૌ ન ક્ષીણૌ ન ચ કાતરૌ।
ન શર્મ પરિલેભાતે પરસ્પરજયૈષિણૌ

અથ તસ્ય ચ દૈત્યસ્ય ધનુશ્ચિચ્છેદ ચેષુણા।
યંતારં પંચભિર્બાણૈઃ પાતયામાસ ભૂતલે

અષ્ટાભિર્નિશિતૈર્બાણૈશ્ચતુરોશ્વાનપાતયાત્।
શક્તિં સંગૃહ્ય ભૂમિષ્ઠઃ કુમારં ચ જઘાન હ

ગદયા પીડિતં સાશ્વં સવરૂથં સકૂબરમ્।
પાતયિત્વા ધરણ્યાં ચ સિંહનાદં નનાદ હ

લાઘવાત્સ ધરાં ગત્વા ગદાપાણિરુપસ્થિતઃ।
વજ્રપાતાદ્યથા શબ્દો લોકાનાં દુઃસહો ભવેત્

તથા તયોર્ગદાપાતે શબ્દઃ સ્યાત્તુ મુહુર્મુહુઃ।
એવં તયોર્ગદાયુદ્ધં યાવદબ્દચતુષ્ટયમ્

પ્રભગ્ને તે ગદે ખસ્થૌ ખડ્ગચર્મધરાવુભૌ।
તદા પદાતિનોર્યુદ્ધમદ્ભુતં લોમહર્ષણં

દૃષ્ટ્વા ચ વિસ્મયં જગ્મુર્દેવાસુરમહોરગાઃ।
ખડ્ગપાતૈર્મુહૂર્તાંતે તયોશ્છિન્ને તુ વર્મણી

અભવત્ખડ્ગયુદ્ધં ચ તયોર્યુદ્ધાતિશીલિનોઃ।
દધાર ચિકુરે તસ્ય જયંતો ભીમવિક્રમઃ

શિરશ્છિત્વાસ્ય ખડ્ગેન પાતયામાસ ભૂતલે।
તતસ્તુ જયશબ્દેન દેવાઃ સર્વે નનંદિરે

પ્રભગ્ના દૈત્યસંઘાશ્ચ દિશઃ સર્વાઃ પ્રદુદ્રુવુઃ

ઇતિ શ્રીપાદ્મપુરાણે પ્રથમે સૃષ્ટિખંડે કાલેયવધોનામ ષટ્ષષ્ટિતમોઽધ્યાયઃ