પદ્મ પુરાણ · અધ્યાય 1.29

।
એકોનત્રિંશોઽધ્યાયઃ ।
પુલસ્ત્યૌવાચ।
તથૈવાન્યત્પ્રવક્ષ્યામિ સર્વકામફલપ્રદમ્।
સૌભાગ્યશયનંનામ યત્પુરાણવિદો વિદુઃ

પુરા દગ્ધેષુ લોકેષુ ભૂર્ભુવઃ સ્વર્મહાદિષુ।
સૌભાગ્યં સર્વભૂતાનામેકસ્થમભવત્તદા

વૈકુંઠં સર્વમાસાદ્ય વિષ્ણોર્વક્ષસ્થલે સ્થિતમ્।
તતઃ કાલેન કિયતા પુનઃ સર્ગવિધૌ નૃપઃ

અહંકારવૃતેલોકે પ્રધાનપુરુષાન્વિતે।
સ્પર્દ્ધાયાં ચ પ્રવૃદ્ધાયાં કમલાસનકૃષ્ણયોઃ

પિંગાકારા સમુદ્ભૂતા વહ્નિજ્વાલાતિભીષણા।
તયાભિતપ્તસ્ય હરેર્વક્ષસસ્તદ્વિનિઃસૃતમ્

યદ્વક્ષઃસ્થલમાશ્રિત્ય વિષ્ણોઃ સૌભાગ્યમાસ્થિતમ્।
રસરૂપં ન તદ્યાવદાપ્નોતિ વસુધાતલે

ઉત્ક્ષિપ્તમંતરિક્ષાત્તુ બ્રહ્મપુત્રેણ ધીમતા।
દક્ષેણ પીતમાત્રં તદ્રૂપલાવણ્યકારકમ્

બલંતેજોમહજ્જાતં દક્ષસ્ય પરમેષ્ઠિનઃ।
શેષં યદપતદ્ભૂમાવષ્ટધા તદ્વ્યજાયત

તતસ્ત્વોષધયો જાતાઃ સપ્ત સૌભાગ્યદાયિકાઃ।
ઇક્ષવસ્તરુરાજશ્ચ નિષ્પવાવશ્શાલિધાન્યકમ્

વિકારવચ્ચ ગોક્ષીરં કુસુંભં કુસુમં તથા।
લવણં ચાષ્ટમં તદ્વત્સૌભાગ્યાષ્ટકમુચ્યતે

પીતં યદ્બ્રહ્મપુત્રેણ યોગજ્ઞાનવિદા પુરા।
દુહિતા સાભવત્તસ્માદ્યા સતીત્યભિધીયતે

લોકાનતીત્ય લાલિત્યાલ્લલિતા તેન ચોચ્યતે।
ત્રૈલોક્યસુંદરીં દેવીમુપયેમે પિનાકધૃત્

ત્રિવિશ્વસૌભાગ્યમયીં ભુક્તિમુક્તિફલપ્રદામ્।
તામારાધ્ય પુમાન્ભક્ત્યા નારી વા કિં ન વિંદતિ

ભીષ્મ ઉવાચ।
કથમારાધનં તસ્યા લલિતાયા મુને વદ।
યદ્વિધાનં ચ જગતઃ શાંતયે તદ્વદસ્વ મે

પુલસ્ત્ય ઉવાચ।
વસંતમાસમાસાદ્ય તૃતીયાયાં જનપ્રિયઃ।
શુક્લપક્ષસ્ય પૂર્વાહ્ણે તિલૈઃ સ્નાનં સમાચરેત્

તસ્મિન્નહનિ સા દેવી કિલ વિશ્વાત્મના સતી।
પાણિગ્રહણિકૈર્મંત્રૈરુદૂઢા વરવર્ણિની

તયા સહૈવ વિશ્વેશં તૃતીયાયામથાર્ચયેત્।
ફલૈર્નાનાવિધૈર્દીપૈર્ધૂપૈર્નૈવેદ્યસંયુતૈઃ

પ્રતિમાં પંચગવ્યેન તથા ગંધોદકેન ચ।
સ્નાપયિત્વાર્ચયેદ્ગૌરીમિંદુશેખરસંયુતામ્

નમોસ્તુ પાટલાયૈ તુ પાદૌ દેવ્યાઃ શિવસ્ય ચ।
શિવાયેતિ ચ સંકીર્ત્ય જયાયૈ ગુલ્ફયોર્દ્વયોઃ

ત્ર્યંબકાયેતિ રુદ્રસ્ય ભવાન્યૈ જંઘયોર્યુગમ્।
શિરો રુદ્રેશ્વરાયેતિ વિજયાયૈ ચ જાનુની

સંકીર્ત્ય હરિકેશાય તથોરુવરદે નમઃ।
ઈશાયેતિ કટિં રત્યૈ શંકરાયેતિ શંકરમ્

કુક્ષિદ્વયં ચ કોટવ્યૈ શૂલિનં શૂલપાણયે।
મંગલાયૈ નમસ્તુભ્યમુદરં ચાભિભૂજયેત્

સર્વાત્મને નમો રુદ્રમીશાન્યૈ ચ કુચદ્વયમ્।
શિવં વેદાત્મને તદ્વદ્રુદ્રાણ્યૈ કંઠમર્ચયેત્

ત્રિપુરઘ્નાય વિશ્વેશમનંતાયૈ કરદ્વયમ્।
ત્રિલોચનાયેતિ હરં બાહૂ કાલાનલપ્રિયે

સૌભાગ્યભવનાયેતિ ભૂષણાનિ સદાર્ચયેત્।
સ્વાહાસ્વધાયૈ ચ મુખમીશ્વરાયેતિ શૂલિનમ્

અશોકવનવાસિન્યૈ પૂજ્યાવોષ્ઠૌ ચ ભૂતિદૌ।
સ્થાણવે ચ હરં તદ્વદાસ્યં ચંદ્રમુખપ્રિયે

નમોર્ધનારીશહરમસિતાંગીતિ નાસિકામ્।
નમ ઉગ્રાય લોકેશં લલિતેતિ પુનર્ભ્રુવૌ

શર્વાય પુરહર્ત્તારં વાસુદેવ્યૈ તથાલકમ્।
નમઃ શ્રીકંઠનાથાય શિવકેશાંસ્તથાર્ચયેત્

ભીમોગ્રભીમરૂપિણ્યૈ શિરઃ સર્વાત્મને નમઃ।
હરમભ્યર્ચ્ય વિધિવત્સૌભાગ્યાષ્ટકમગ્રતઃ

સ્થાપયેત્સ્નિગ્ધનિષ્પાવાન્કુસુંભક્ષીરજીરકમ્।
તરુરાજેક્ષુલવણં કુસ્તુંબુરુમથાષ્ટમમ્

દદ્યાત્સૌભાગ્યકૃદ્યસ્માત્સૌભાગ્યાષ્ટકમિત્યુત।
એવંનિવેદ્ય તત્સર્વમગ્રતઃ શિવયોઃ પુનઃ

ચૈત્રે શૃંગાટકાન્પ્રાશ્ય સ્વપેદ્ભૂમાવરિંદમ।
પુનઃ પ્રભાતે ચ તથા કૃતસ્નાનજપઃ શુચિઃ

સંપૂજ્ય દ્વિજદાંપત્યં માલ્યવસ્ત્રં વિભૂષણૈઃ।
સૌભાગ્યાષ્ટકસંયુક્ત સૌવર્ણં પ્રતિમાદ્વયમ્

પ્રીયતાં મેત્ર લલિતા બ્રાહ્મણાય નિવેદયેત્।
એવં સંવત્સરં યાવત્તૃતીયાયાં સદા નૃપ

પ્રાશને દાનમંત્રે ચ વિશેષોયં નિબોધ મે।
ગોશૃંગાંબુ મધૌ પ્રોક્તં વૈશાખે ગોમયં પુનઃ

જ્યેષ્ઠે મંદારકુસુમં બિલ્વપત્રં શુચૌ સ્મૃતમ્।
શ્રાવણે દધિસંપ્રાશ્યં નભસ્યે તુ કુશોદકમ્

ક્ષીરં ચાશ્વયુજે માસિ કાર્ત્તિકે પૃષદાજ્યકમ્।
માર્ગશીર્ષે તુ ગોમૂત્રં પૌષે સંપ્રાશયેદ્ઘૃતમ્

માઘે કૃષ્ણતિલાંસ્તદ્વત્પંચગવ્યં ચ ફાલ્ગુને।
લલિતા વિજયા ભદ્રા ભવાની કુમુદા શિવા

વાસુદેવી તથા ગૌરી મંગલા કમલા સતી।
ઉમા ચ દાનકાલે તુ પ્રીયતામિતિ કીર્ત્તયેત્

તસ્મિંસ્તુ દ્વાદશે માસિ દ્વાદશ્યાં કૃષ્ણમર્ચયેત્।
તથા લક્ષ્મીં ચ તત્રૈવ ભર્ત્રા સાર્ધમથાર્ચયેત્

પૌર્ણમાસ્યામતસ્તદ્વત્સપત્નીકઃ પિતામહઃ।
ઉપાસનીયો વિદુષા પરત્રા ભીતિમિચ્છતા

સૌભાગ્યાષ્ટકં તદ્વચ્ચ દાતવ્યં ભૂતિમિચ્છતા।
મલ્લિકાશોકકમલં કદંબોત્પલચંપકમ્

કુબ્જકં કરવીરં ચ બાણમમ્લાનપંકજમ્।
સિંદુવારં ચ સર્વેષુ માસેષુ કુસુમં સ્મૃતમ્

જપાકુસુંભકુસુમં માલતી શતપત્રિકા।
યથાલાભં પ્રશસ્તાનિ કરવીરં ચ સર્વદા

એવં સંવત્સરં યાવદુપોષ્ય વિધિવન્નરઃ।
સ્ત્રી ચ નક્તં કુમારી ચ શિવમભ્યર્ચ્ય ભક્તિતઃ

વ્રતાંતે શયનં દદ્યાત્સર્વોપસ્કરસંયુતમ્।
ઉમામહેશ્વરૌ હૈમૌ વૃષભં ચ ગવા સહ

સ્થાપયિત્વા ચ શયનં બ્રાહ્મણાય નિવેદયેત્।
દ્વાદશ્યાં વત્સરં ત્વેકં મહાલક્ષ્મ્યા ચ કેશવમ્

બ્રહ્માણં સહ સાવિત્ર્યા પૂજયિત્વા નરસ્ત્વિહ।
સર્વાન્કામાનવાપ્નોતિ મનસા સમભીપ્સિતાન્

અન્યાન્યપિ યથાશક્તિ મિથુનાન્યંબરાદિભિઃ।
ધાન્યાલઙ્કારગોદાનૈરન્યૈશ્ચ ધનસઞ્ચયૈઃ

વિત્તશાઠયેન રહિતઃ પૂજયેદ્ગતવિસ્મયઃ।
એવં કરોતિ યઃ સમ્યક્સૌભાગ્યશયનવ્રતમ્

સર્વાન્કામાનવાપ્નોતિ પદં વા નિત્યમશ્નુતે।
ફલસ્યૈકસ્ય ચ ત્યાગમેતત્કુર્વન્સમાચરેત્

યશઃ કીર્તિમવાપ્નોતિ પ્રતિમાસં નરાધિપ।
સૌભાગ્યારોગ્યરૂપૈશ્ચ વસ્ત્રાલંકારભૂષણૈઃ

ન વિયુક્તો ભવેદ્રાજન્સૌભાગ્યશયનપ્રદઃ।
યસ્તુ દ્વાદશવર્ષાણિ સૌભાગ્યશયનવ્રતમ્

કરોતિ સપ્ત ચાષ્ટૌ વા બ્રહ્મલોકે મહીયતે।
પૂજ્યમાનો વસેત્સમ્યક્યાવત્કલ્પાયુતં નરઃ

વિષ્ણોર્લોકમથાસાદ્ય શિવલોકગતસ્તથા।
નારી વા કુરુતે યા તુ કુમારી વા નરેશ્વર

સાપિ તત્ફલમાપ્નોતિ દેવ્યનુગ્રહલાલિતા।
શૃણુયાદપિ યશ્ચૈવ પ્રદદ્યાદથવા મતિમ્

સોપિ વિદ્યાધરો ભૂત્વા સ્વર્ગલોકે ચિરં વસેત્।
ઇદમિહ મદનેન પૂર્વસૃષ્ટં શતધનુષા ચ કૃતં નરેણ તદ્વત્

કૃતમથ પવનેન નંદિના ચ કિમુ જનનાથમહાદ્ભુતં ન વા સ્યાત્

ઇતિ શ્રીપાદ્મપુરાણે પ્રથમે સૃષ્ટિખંડે વ્રતાધ્યાયોનામ એકોનત્રિંશોઽધ્યાયઃ