નારાયણીય · અધ્યાય 6.22

અજામિલો નામ મહીસુરઃ પુરા ચરન્ વિભો! ધર્મપથાન્ ગૃહાશ્રમી ।
ગુરોર્ગિરા કાનનમેત્ય દૃષ્ટવાન્ સુઘૃષ્ટશીલાં કુલટાં મદાકુલામ્ ॥

સ્વતઃ પ્રશાન્તોઽપિ તદાહૃતાશયઃ સ્વધર્મમુત્સૃજ તયા સમારમન્ ।
અધર્મકારી દશમી ભવન્ પુનર્દધૌ ભવન્નામયુતે સુતે રતિમ્ ॥

સ મૃત્યુકાલે યમરાજકિઙ્ગરાન્ ભયઙ્કરામ્સ્ત્રીનભિલક્ષયન્ ભિયા ।
પુરા મનાક્ ત્વત્સ્મૃતિવાસનાબલાજ્જુહાવ નારાયણનામકં સુતમ્ ॥

દુરાશયસ્યાપિ તદાત્વનિર્ગતત્વદીયનામાક્ષરમાત્રવૈભવાત્ ।
પુરોઽભિપેતુર્ભવદીયપાર્ષદાશ્ચતુર્ભુજાઃ પીતપટા મનોહરાઃ ॥

અમું ચ સમ્પાશ્ય વિકર્ષતો ભટાન્ વિમુઞ્ચતેત્યારુરુધુર્બલાદમી ।
નિવારિતાસ્તે ચ ભવજ્જનૈસ્તદા તદીયપાપં નિખિલં ન્યવેદયન્ ॥

ભવન્તુ પાપાનિ કથં તુ નિષ્કૃતે કૃતેઽપિ ભો દણ્ડનમસ્તિ પણ્ડિતાઃ! ।
ન નિષ્કૃતિઃ કિઈં વિદિતા ભવાદૃશામિતિ પ્રભો! ત્વત્પુરુષા બભાષિરે ॥

શ્રુતિસ્મૃતિભ્યાં વિહિતા વ્રતાદયઃ પુનન્તિ પાપં ન લુનન્તિ વાસનામ્ ।
અનન્તસેવા તુ નિકૃન્તતિ દ્વયીમિતિ પ્રભો! ત્વત્પુરુષા બભાષિરે ॥

અનેન ભો! જન્મસહસ્રકોટિભિઃ કૃતેષુ પાપેષ્વપિ નિષ્કૃતિઃ કૃતા ।
તદગ્રહીન્નામ ભયાકુલો હરેરિતિ પ્રભો! ત્વત્પુરુષા બભાષિરે ॥

નૃણામબુદ્ધ્યાપિ મુકુન્દકીર્તનં દહત્યઘૌઘાન્ મહિમાસ્ય તાદૃશઃ ।
યથાગ્નિરેધાંસિ યથૌષેધં ગદાનિતિ પ્રભો! ત્વત્પુરુષા બભાષિરે ॥

ઇતીરિતૈર્યામ્યભટૈરપાસૃતે ભવદ્ભટાનાં ચ ગણે તિરોહિતે ।
ભવત્સ્મૃતિં કઞ્ચન કાલમાચરન્ ભવત્પદં પ્રાપિ ભવદ્ભટૈરસૌ ॥

સ્વકિઙ્ગરાવેદનશઙ્કિતો યમસ્ત્વદઙ્ઘ્રિભક્તેષુ ન ગમ્યતામિતિ ।
સ્વકીયભૃત્યાનશિશિક્ષદુચ્ચકૈઃ સ દેવ! વાતાલય્નાથ! પાહિ મામ્ ॥