નારાયણીય · અધ્યાય 11.96

ત્વં હિ બ્રહ્મૈવ સાક્ષાત્ પરમુરુમહિમન્નક્ષરાણામકાર-
સ્તારો મન્ત્રેષુ રાજ્ઞાં મનુરસિ મુનિષુ ત્વં ભૃગુર્નારદોઽપિ ।
પ્રહ્લાદો દાનવાનાં પશુષુ ચ સુરભિઃ પક્ષિણાં વૈનતેયો
નાગાનામસ્યનન્તઃ સુરસરિદપિ ચ સ્રોતસાં વિશ્વમૂર્તે! ॥

બ્રહ્મણ્યાનાં બલિસ્ત્વં ક્રતુષુ ચ જપયજ્ઞોઽસો વીરેષુ પાર્થો
ભક્તાનામુદ્ધવસ્ત્વં બલમસિ બલિનાં ધામ તેજસ્વિનાં ત્વમ્ ।
નાસ્ત્યન્તસ્ત્વદ્વિભૂતેર્વિકસદતિશયં વસ્તુ સર્વં ત્વમેવ
ત્વં જીવસ્ત્વં પ્રધાનં યદિહ ભવદૃતે તન્ન કિઞ્ચિત્ પ્રપઞ્ચે ॥

ધર્મં વર્ણાશ્રમાણાં શ્રુતિપથવિહિતં ત્વત્પરત્વેન ભક્ત્યા
કુર્વન્તોઽન્તર્વિરાગે વિકસતિ શનકૈઃ સન્ત્યજન્તો લભન્તે ।
સત્તાસ્ફૂર્તિપ્રિયત્વાત્મકમખિલપદાર્થેષુ ભિન્નેષ્વભિન્નં
નિર્મૂલં વિશ્વમૂલં પરમમહમિતિ ત્વદ્વિબોધં વિશુદ્ધમ્ ॥

જ્ઞાનં કર્માપિ ભક્તિસ્ત્રિતયમિહ ભવત્પ્રાપકં તત્ર તાવદ્
નિર્વિણ્ણાનામશેષે વિષય ઇહ ભવેદ્ જ્ઞાનયોગેઽધિકારઃ ।
સક્તાનાં કર્મયોગસ્ત્વયિ હિ વિનિહિતો યે તુ નાત્યન્તસક્તા
નાપ્યત્યન્તં વિરક્તાસ્ત્વયિ ચ ધૃતરસા ભક્તિયોગો હ્યમીષામ્ ॥

જ્ઞાનં ત્વદ્ભક્તતાં વા લઘુ સુકૃતવશાન્મર્ત્યલોકે લભન્તે
તસ્માત્ તત્રૈવ જન્મ સ્પૃહયતિ ભગવન્! નાકગો નારકો વા ।
આવિષ્ટં માં તુ દૈવાદ્ ભવજલનિધિપોતાયિતે મર્ત્યદેહે
ત્વં કૃત્વા કર્ણધારં ગુરુમનુગુણવાતાયિતસ્તારયેથાઃ ॥

અવ્યક્તં માર્ગયન્તઃ શ્રુતિભિરપિ નયૈઃ કેવલજ્ઞાનલુબ્ધાઃ
ક્લિશ્યન્તેઽતીવ સિદ્ધિં બહુતરજનુષામન્ત એવાપ્નુવન્તિ ।
દુરસ્થઃ કર્મયોગોઽપિ ચ પરમફલે નન્વયં ભક્તિયોગ-
સ્ત્વામૂલાદેવ હૃદ્યસ્ત્વરિતમયિ! ભવત્પ્રાપકો વર્ધતાં મે ॥

જ્ઞાનાયૈવાતિયત્નં મુનિરપવદતે બ્રહ્મતત્ત્વં તુ શૃણ્વન્
ગાઢં ત્વત્પાદભક્તિં શરણમયતિ યસ્તસ્ય મુક્તિઃ કરાગ્રે ।
ત્વદ્ધ્યાનેઽપીહ તુલ્યા પુનરસુકરતા ચિત્તચાઞ્ચલ્યહેતો-
રભ્યાસાદાશુ શક્યં વશયિતું ત્વત્કૃપાચારુતાભ્યામ્ ॥

નિર્વિણ્ણઃ કર્મમાર્ગે ખલુ વિષમતમે ત્વત્કથાદૌ ચ ગાઢં
જાતશ્રદ્ધોઽપિ કામાનયિ ભુવનપતે! નૈવ શક્નોમિ હાતુમ્ ।
તદ્ ભૂયો નિશ્ચયેન ત્વયિ નિહિતમના દોષબુદ્ધ્યા ભજંસ્તાન્
પુષ્ણીયાં ભક્તિમેવ ત્વયિ હૃદયગતે મઙ્ક્ષુ નઙ્ક્ષ્યન્તિ સઙ્ગાઃ ॥

કશ્ચિત્ ક્લેશાર્જિતાર્થક્ષયવિમલમતિર્નુદ્યમાનો જનૌધૈઃ
પ્રાગેવં પ્રાહિ વિપ્રો ન ખલુ મમ જનઃ કાલકર્મગ્રહા વા ।
ચેતો મે દુઃખહેતુસ્તદિહ ગુણગણં ભાવયત્ સર્વકારી-
ત્યુક્ત્વા શાન્તો ગતસ્ત્વાં મમ ચ કુરુ વિભો! તાદૃશીં ચિત્તશાન્તિમ્ ॥

એલઃ પ્રાગુર્વશીં પ્રત્યતિવિવશમનાઃ સેવમાનશ્ચિરં તાં
ગાઢં નિર્વિદ્ય ભૂયો યુવતિસુખમિદં ક્ષુદ્રમેવેતિ ગાયન્ ।
ત્વદ્ભક્તિં પ્રાપ્ય પૂર્ણઃ સુખતરમચરત્ તદ્વદુદ્ધૂય સઙ્ગં
ભક્તોત્તંસં ક્રિયા માં પવનપુરપતે! હન્ત મે રુન્ધિરોગાન્ ॥