નારાયણીય · અધ્યાય 11.95

આદૌ હૈરણ્યગભીં તનુમવિકલજીવાત્મિકામાસ્થિતસ્ત્વં
જીવત્વં પ્રાપ્ય માયાગુણગણખચિતો વર્તસે વિશ્વયોને! ।
તત્રોદ્વૃદ્ધેન સત્ત્વેન તુ ગણયુગલં ભક્તિભાવં ગતેન-
ચ્છિત્વા સત્ત્વં ચ હિત્વા પુનરનુપહિતો વર્તિતાહે ત્વમેવ ॥

સત્ત્વોન્મેષાત્ કદાચિત્ ખલુ વિષયરસે દોષબોધેઽપિ ભૂમન્!
ભૂયોઽપ્યેષુ પ્રવૃત્તિઃ સતમસિ રજસિ પ્રોદ્ધતે દુર્નિવારા ।
ચિત્તં તાવદ્ ગુણાશ્ચ ગ્રથિતમિહ મિથસ્તાનિ સર્વાણિ રોદ્ધું
તુર્યે ત્વય્યેકભક્તિઃ શરણમિતિ ભવાન્ હંસારૂપી ન્યગાદીત્ ॥

સન્તિ શ્રેયાંસિ ભૂયાંસ્યપિ રુચિભિદયા કર્મિણાં નિર્મિતાનિ
ક્ષુદ્રાનન્દાશ્ચ સાન્તા બહુવિધગતયઃ કૃષ્ણ! તેભ્યો ભવેયુઃ ।
ત્વં ચાચખ્યાથ સખ્યે નનુ મહિતતમાં શ્રેયસાં ભક્તિમેકાં
ત્વદ્ભક્ત્યાનન્દતુલ્યઃ ખલુ વિષયજુષાં સમ્મદઃ કેન વા સ્યાત્ ॥

ત્વદ્ભક્ત્યા તુષ્ટબુદ્ધેઃ સુખમિહ ચરતો વિચ્યુતાશસ્ય ચાશાઃ
સર્વાઃ સ્યુઃ સૌખ્યમય્યઃ સલિલકુહરગસ્યેવ તોયૈકમય્યઃ ।
સોઽયં ખલ્વિન્દ્રલોકં કમલજભવનં યોગસિદ્ધીશ્ચ હૃદ્યા
નાકાઙ્ક્ષત્યેતદાસ્તાં સ્વયમનુપતિતે મોક્ષસૌખ્યેઽપ્યનીહઃ ॥

ત્વદ્ભક્તો બાધ્યમાનોઽપિ ચ વિષયરસૈરિન્દ્રિયાશાન્તિહેતોર્-
ભક્ત્યૈવાક્રમ્યમાણૈઃ પુનરપિ ખલુ તૈર્દુર્બલૈર્નાભિજય્યઃ ।
સપ્તાર્ચિર્દીપિતાર્ચિર્દહતિ કિલ યથા ભૂરિદારુપ્રપઞ્ચં
ત્વદ્ભક્ત્યોઘે તથૈવ પ્રદહતિ દુરિતં દુર્મદઃ ક્વેન્દ્રિયાણામ્ ॥

ચિત્તાર્દ્રીભાવવમુચ્ચૈર્વપુષિ ચ પુલકં હર્ષબાષ્યં ચ હિત્વા
ચિત્તં શુધ્યેત્ કથં વા કિમુ બહુતપસા વિદ્યયા વીતભક્તેઃ ।
ત્વદ્ગાથાસ્વાદસિદ્ધાઞ્જનસતતમરીમૃજ્યમાનોઽયમાત્મા
ચક્ષુર્વત્ તત્ત્વસૂક્ષ્મં ભજતિ ન તુ તથાભ્યસ્તયા તર્કકોટ્યા ॥

ધ્યાનં તે શીલયેયં સમતનુસુખબદ્ધાસનો નાસિકાગ્ર-
ન્યસ્તાક્ષઃ પૂરકાદ્યૈર્જિતપવનપથશ્ચિત્તપદ્મં ત્વવાઞ્ચમ્ ।
ઊર્ધ્વાગ્રં ભવયિત્વા રવિવિધુશિખિનઃ સંવિચિન્ત્યોપરિષ્ટાત્
તત્રસ્થં ભાવયે ત્વાં સજલજલધરશ્યામલં કોમલાઙ્ગમ્ ॥

આનીલશ્લક્ષ્ણકેશં જ્વલિતમકરસત્કુણ્ડલં મન્દહાસ-
સ્યન્દાર્દ્રં કૌસ્તુભશ્રીપરિગતવનમાલોરુહારાભિરામમ્ ।
શ્રીવત્સાઙ્કં સુબાહું મૃદુલસદુદરં કાઞ્ચનચ્છાયચેલં
ચારુસ્નિગ્ધોરુમમ્ભોરુહલલિતપદં ભાવયેયં ભવન્તમ્ ॥

સર્વાઙ્ગેષ્વઙ્ગ! રઙ્ગત્કુતુકમતિમુહુર્ધારયન્નીશ! ચિત્તં
તત્રાપ્યેકત્ર યુઞ્જે વદનસરસિજે સુન્દરે મન્દહાસે ।
તત્રાલીનં તુ ચેતઃ પરમસુખચિદદ્વૈતરૂપે વિતન્વ-
ન્નન્યન્નો ચિન્તયેયં મુહુરિતિ સમુપારૂઢયોગો ભવેયમ્ ॥

ઇત્થં ત્વદ્ધ્યાનયોગે સતિ પુનરણિમાદ્યષ્ટસંસિદ્ધયસ્તા
દૂરશ્રુત્યાદયોઽપિ હ્યહમહમિકયા સમ્પતેયુર્મુરારે! ।
ત્વત્સમ્પ્રાપ્તૌ વિલમ્બાવહમખિમિદં નાદ્રિયે કામયેઽહં
ત્વામેવાનન્દપૂર્ણં પવનપુરપતે! પાહિ માં સર્વતાપાત્ ॥