નારાયણીય · અધ્યાય 10.88

પ્રાગેવાચાર્યપુત્રાહૃતિનિશમનયા સ્વીયષટ્સૂનુવીક્ષાં
કાઙ્ક્ષન્ત્યા માતુરુકત્યા સુતલભુવિ બલિં પ્રાપ્ય તેનાર્ચિતસ્ત્વમ્ ।
ધાતુઃ શાપાદ્ધિરણ્યાન્વિતકશિપુભવાન્ શૌરિજાન્ કંસભગ્ના-
નાનીયૈનાન્ પ્રદર્શ્ય સ્વપદમનયથાઃ પૂર્વપુત્રાન્ મરીચેઃ ॥

શ્રુતદેવ ઇતિ શ્રુતં દ્વિજેન્દ્રં બહુલાશ્વં નૃપતિં ચ ભક્તિપૂર્ણમ્ ।
યુગપત્ ત્વમનુગ્રહીતુકામો મિથિલાં પ્રાપિથ તાપસૈઃ સમેતઃ ॥

ગચ્છન્ દ્વિમૂર્તિરુભયોર્યુગપન્નિકેત-
મેકેન ભૂરિવિભવૈર્વિહિતોપચારઃ ।
અન્યેન તદ્દિનભૃતૈશ્ચ ફલૌદનાદ્યૈસ્-
તુલ્યં પ્રસેદિથ દદાથ ચ મુક્તિમાભ્યામ્ ॥

ભૂયોઽથ દ્વારવત્યાં દ્વિજતનયમૃતિં તત્પ્રલાપાનપિ ત્વં
કો વા દૈવં નિરુન્ધ્યાદિતિ કિલ કથયન્ વિશ્વવોઢાપ્યસોઢાઃ ।
જિષ્ણોર્ગર્વં વિનેતું ત્વયિ મનુજધિયા કુણ્ઠિતાં ચાસ્ય બુદ્ધિં
તત્ત્વારૂઢાં વિધાતું પરમતમપદપ્રેક્ષણેનેતિ મન્યે ॥

નષ્ટા અષ્ટાસ્ય પુત્રાઃ પુનરપિ તવ તૂપેક્ષયા કષ્ટવાદઃ
સ્પષ્ટો જાતો જનાનામથ તદવસરે દ્વારકામાર પાર્થઃ ।
મૈત્ર્યા તત્રોષિતોઽસૌ નવમસુતભૃતૌ વિપ્રવર્યપ્રરોદં
શ્રુત્વા ચક્રે પ્રતિજ્ઞામનુપહૃતસુતઃ સન્નિવેક્ષ્યે કૃશાનુમ્ ॥

માની સ ત્વામપૃષ્ટ્વા દ્વિજનિલયગતો બાણજાલૈર્મહાસ્ત્રૈ
રુન્ધાનઃ સૂતિગેહં પુનરપિ સહસા દૃષ્ટનષ્ટે કુમારે ।
યામ્યામૈન્દ્રીંતથાયાઃ સુરવરનગરીર્વિદ્યયાસાદ્ય સદ્યો
મોઘોદ્યોગઃ પતિષ્યન્ હુતભુજિ ભવતા સસ્મિતં વારિતોઽભૂત્ ॥

સાર્ધં તેન પ્રતીચીં દિશમતિજવિના સ્યન્દનેનાભિયાતો
લોકાલોકં વ્યતીતસ્તિમિરભરમથો ચક્રધામ્ના નિરુન્ધન્ ।
ચક્રાંશુક્લિષ્ટદૃષ્ટિં સ્થિતમથ વિજયં પશ્ય પશ્યેતિ વારાં
પારે ત્વં પ્રાદદશઃ કિમપિ હિ તમસાં દૂરદૂરં પદં તે ॥

તત્રાસીનં ભુજઙ્ગાધિપશયનતલે દિવ્યભૂષાયુધાદ્યૈ-
રાવીતં પીતચેલં પ્રતિનવજલદશ્યામલં શ્રીમદઙ્ગમ્ ।
મૂર્તીનામીશિતારં પરમિહ તિસૃણામેકમર્થં શ્રુતીનાં
ત્વામેવ ત્વં પરાત્મન્! પ્રિયસખસહિતો નેમિથ ક્ષેમરૂપમ્ ॥

યુવાં મામેવદ્વાવધિકવિવૃતાન્તર્હિતતયા
વિભિન્નૌ સુન્દ્રષ્ટું સ્વયમહમહાર્ષં દ્વિજસુતાન્ ।
નયેતં દ્રાગેનાનિતિ ખલુ વિતીર્ણાન્ પુનરમૂન્
દ્વિજાયાદાયાદાઃ પ્રણુતમહિમા પાણ્ડુજનુષા ॥

એવં નાનાવિહારૈર્જગદભિરમયન્ વૃષ્ણિવંશં પ્રપુષ્ણ-
ન્નીજાનો યજ્ઞભૈદૈરતુલવિહૃતિભિઃ પ્રીણયન્નેણનેત્રાઃ ।
ભૂભારક્ષેપદમ્ભાત્ પદકમલજુષાં મોક્ષણાયાવતીર્ણઃ
પૂર્ણં બ્રહ્મૈવ સાક્ષાદ્ યદુષુ મનુજતારૂષિતસ્ત્વં વ્યલાસીઃ ॥

પ્રાયેણ દ્વારવત્યામવૃતદયિ તદી નારદસ્ત્વદ્રસાર્દ્રસ્-
તસ્માલ્લેભે કદાચિત્ ખલુ સુકૃતનિધિસ્ત્વત્પિતા તત્ત્વબોધમ્ ।
ભક્તાનામગ્રયાયી સ ચ ખલુ મતિમાનુદ્ધવસ્ત્વત્ત એવ
પ્રાપ્તો વિજ્ઞાનસારં સ કિલ જનહિતાયાધુનાસ્તે વદર્યામ્ ॥

સોઽયં કૃષ્ણાવતારો જયતિ તવ વિભો! યત્ર સૌહાર્દભીતિ-
સ્નેહદ્વેષાનુરાગપ્રભૃતિભિરતુલૈરશ્રમૈર્યોગભેદૈઃ ।
આર્તિં તીર્વા સમસ્તામમૃતપદમગુઃ સર્વતઃ સર્વલોકાઃ
સ ત્વં વિશ્વાર્તિશાન્ત્યૈ પવનપુરપતે! ભક્તિપૂર્ત્યૈ ચ ભૂયાઃ ॥