નારાયણીય · અધ્યાય 10.82

પ્રદ્યુમ્નો રૌક્મિણેયઃ સ ખલુ તવ કલા શમ્બરેણાહૃતસ્તં
હત્વા રત્યા સહાપ્તો નિજપૂરમહરદ્ રુક્મિકન્યાં ચ ધન્યામ્ ।
તત્પુત્રોઽથાનિરુદ્ધો ગુણનિધિરવહદ્ રોચનાં રુક્મિપૌત્રીં
તત્રોદ્વાહે ગતસ્ત્વં ન્યવધિ મુસલિના રુક્મ્યપિ દ્યૂતવૈરાત્ ॥

બાણસ્ય સા બલિસુતસ્ય સહસ્રબાહોર્-
માહેશ્વરસ્ય મહિતા દુહિતા કિલોષા ।
ત્વત્પૌત્રમેનમનિરુદ્ધમદૃષ્ટપૂર્વં
સ્વપ્નેઽનુભૂય ભગવન્! વિરહાતુરાભૂત્ ॥

યોગિન્યતીવ કુશલા ખલુ ચિત્રલેખા
તસ્યાઃ સખી વિલિખતી તરુણાનશેષાન્ ।
તત્રાનિરુદ્ધમુષ્યા વિદિતં નિશાયા-
માનેષ્ટ યોગબલતો ભવતો નિકેતાત્ ॥

કન્યાપુરે દયિતયા સુખમારમન્તં
ચૈનં કથઞ્ચન બબન્ધુષિ શર્વબન્ધૌ ।
શ્રીનારદોક્તતદુદન્તદુરન્તરોષૈસ્-
ત્વં તસ્ય શોણિતપુરં યદુભિર્ન્યરુન્ધાઃ ॥

પુરીપાલઃ શૈલપ્રિયદુહિતૃનાથોઽસ્ય ભગવાન્
સમં ભૂતવ્રાતૈર્યદુબલમશઙ્કં નિરુરુધે ।
મહાપ્રાણો બાણો જટિતિ યુયુધાનેન યુયુધે
ગુહઃ પ્રદ્યુમ્નેન ત્વમપિ પુરહન્ત્રા જઘટિષે ॥

નિરુદ્ધાશેષાસ્ત્રે મુમુહુષિ તવાસ્ત્રેણ ગિરિશે
દ્રુતા ભૂતા ભીતાઃ પ્રમથકુલવીરાઃ પ્રમથિતાઃ ।
પરાસ્કન્દત્ સ્કન્દઃ કુસુમશરબાણૈશ્ચ સચિવઃ
સ કુમ્ભાણ્ડો ભાણ્ડં નવમિવ બલેનાશુ બિભિદે ॥

ચાપાનાં પઞ્ચશત્યા પ્રસભમુપગતે છિન્નચાપેઽથ બાણે
વ્યર્થે યાતે સમેતો જ્વરપતિરશનૈરજ્વરિ ત્વજ્જ્વરેણ ।
જ્ઞાની સ્તુત્વાથ દત્ત્વા તવ ચરિતજુષાં વિજ્વરં સ જ્વરોઽગાત્
પ્રાયોઽન્તર્જ્ઞાનવન્તોઽપિ ચ બહુતમસા રૌદ્રચેષ્ટા હિ રૌદ્રાઃ ॥

બાણં નાનાયુધોગ્રં પુનરભિપતિતં દુર્પદોષાદ્ વિતન્વન્
નિર્લૂનાશેષદોષં સપદિ બુબુધુષા શઙ્કરેણોપગીતઃ ।
તદ્વાચા શિષ્ટબાહુદ્વિતયમુભયતો નિર્ભયં તત્પ્રિયં તં
મુક્ત્વા તદ્દત્તમાનો નિજપુરમગમઃ સાનિરુદ્ધઃ સહોષઃ ॥

મુહુસ્તાવચ્છક્રં વરુણમજયો નન્દહરણે
યમં બાલાનીતૌ દવદહનપાનેઽનિલસખમ્ ।
વિધિં વત્સસ્તેયે ગિરિશામિહ બાણસ્ય સમરે
વિભો! વિશ્વોત્કર્ષી તદયમવતારો જયતિ તે ॥

દ્વિજરુષા કૃકલાસવપુર્ધરં નૃગનૃપં ત્રિદિવાલયમાપયન્ ।
નિજજને દ્વિજભક્તિમનુત્તમામુપદિશન્ પવનેશ્વર! પાહિ મામ્ ॥