નારાયણીય · અધ્યાય 10.81

સ્નિગ્ધાં મુગ્ધાં સતતમપિ તાં લાલયન્ સત્યભામાં
યાતો ભૂયઃ સહ ખલુ તયા યાજ્ઞસેનીવિવાહમ્ ।
પાર્થપ્રીત્યૈ પુનરપિ પનાગાસ્થિતો હસ્તિપુર્યાં
શક્રપ્રસ્થં પુરમપિ વિભો! સંવિધાયાગતોઽભૂઃ ॥

ભદ્રાં ભદ્રાં ભવદવરજાં કૌરવેણાર્થ્યમાનાં
ત્વદ્વાચા તામહૃત કુહનામસ્કરી શક્રસૂનુઃ ।
તત્ર ક્રુદ્ધં બલમનુનયન્ પ્રત્યગાસ્તેન સાર્ધં
શક્રપ્રસ્થં પ્રિયસખમુદે સત્યભામાસહાયઃ ॥

તત્ર ક્રીડન્નપિ ચ યમુનાકૂલદૃષ્ટાં ગૃહીત્વા
તાં કાલિન્દીં નગરમગમઃ ખાણ્ડવપ્રીણિતાગ્નિઃ ।
ભ્રાતૃત્રસ્તાં પ્રણયવિવશાં દેવ! પૈતૃષ્વસેયીં
રાજ્ઞાં મધ્યે સપદિ જહ્રિષે મિત્રવિન્દામવન્તીમ્ ॥

સત્યાં ગત્વા પુનરુદવહો નગ્નજિન્નન્દનાં તાં
બદ્ધ્વા સપ્તાપિ ચ વૃષવરાન્ સપ્તમૂર્તિર્નિમેષાત્ ।
ભદ્રાં નામ પ્રદદુરથ તે દેવ! સન્તર્દનાદ્યાસ્-
તત્સોદર્યાં વરદ! ભવતઃ સાપિ પૈતૃષ્વસેયી ॥

પાર્થાદ્યૈરપ્યકૃતલવનં તોયમાત્રાભિલક્ષ્યં
લક્ષં છિત્વા શફરમવૃથા લક્ષણાં મદ્રકન્યામ્ ।
અષ્ટાવેવં તવ સમભવન્ વલ્લભાસ્તત્ર મધ્યે
શુશ્રોથ ત્વં સુરપતિગિરા ભૌમદુશ્ચેષ્ટિતાનિ ॥

સ્મૃતાયાતં પક્ષિપ્રવરમધિરૂઢસ્ત્વમગમો
વહન્નઙ્કે ભામામુપવનમિવારાતિનગરમ્ ।
વિભિન્દન્ દુર્ગાણિ ત્રુટિતપૃતનાશોનિતરસૈઃ
પુરં તાવત્ પ્રાગ્જ્યોતિષમકુરુથાઃ શોણિતપૂરમ્ ॥

મુરસ્ત્વાં પઞ્ચાસ્યો જલધિવનમધ્યાદુદપતત્
સ ચક્રે ચક્રેણ પ્રદલિતશિરા મઙ્ક્ષુ ભવતા ।
ચતુદન્તૈર્દન્તાવલપતિભિરિન્ધાનસમરં
રથાઙ્ગેનચ્છિત્વા નરકમકરોસ્તીર્ણરકમ્ ॥

સ્તુતો ભૂમ્યા રાજ્યં સપદિ ભગદત્તેઽસ્ય તનયે
ગજં ચૈકં દત્ત્વા પ્રજિઘાયિથ નાગાન્ નિજપુરીમ્ ।
ખલેનાબદ્ધાનાં સ્વગતમનસાં ષોડશ પુનઃ
સહસ્રાણિ સ્ત્રીણામપિ ચ ધનરાશિં ચ વિપુલમ્ ॥

ભૌમાપાહૃતકુણ્ડલં તદદિતેર્દાતું પ્રયાતો દિવં
શક્રાદ્યૈર્મહિતઃ સમં દયિતયા દ્યુસ્ત્રીષુ દત્તહ્વિયા ।
હૃત્વા કલ્પતરું રુષાભિપતિતં જિત્વેન્દ્રમભ્યાગમસ્-
તત્તુ શ્રીમદદોષ ઈદૃશ ઇતિ વ્યાખ્યાતુમેવાકૃથાઃ ॥

કલ્પદ્રું સત્યભામાભવનભુવિ સૃજન્ દ્વ્યષ્ટસાહસ્રયોષાઃ
સ્વીકૃત્ય પ્રત્યગારં વિહિતબહુવપુર્લાલયન્ કેલિભેદૈઃ ।
આશ્ચર્યાન્નારદાલોકિતવિવિધગતિસ્તત્ર તત્રાપિ ગેહે
ભૂયઃ સર્વાસુ કુર્વન્ દશ દશ તનયાન્ પાહિ વાતાલયેશ! ॥