નારાયણીય · અધ્યાય 10.69
કેશપાશધૃતપિચ્છિકાવિતતિ સઞ્ચલન્મકરકુણ્ડલં
હારજાલવનમાલિકાલલિતમઙ્ગરાગઘનસૌરભમ્ ।
પીતચેલધૃતકાઞ્ચિકાઞ્ચિતમુદઞ્ચદંશુમણિનૂપુરં
રાસકેલિપરિભૂષિતં તવ હિ રૂપમીશ! કલયામહે ॥
તાવદેવ કૃતમણ્ડને કલિતકઞ્ચુલીકકુચમણ્ડલે
ગણ્ડલોલમણિકુણ્ડલે યુવતિમણ્ડલેઽથ પરિમણ્ડલે ।
અન્તરા સકલસુન્દરીયુગલમિન્દિરારમણ! સઞ્ચરન્
મઞ્જુલાં તદનુ રાસકેલિમયિ કઞ્જનાભ! સમુપાદધાઃ ॥
વાસુદેવ! તવ ભાસમાનમિહ રાસકેલિરસસૌરભં
દૂરતોઽપિ ખલુ નારદાગદિતમાકલય્ય કુતુકાકુલા ।
વેષભૂષણવિલાસપેશલવિલાસિનીશતસમાવૃતા
નાકતો યુગપદાગતા વિયતિ વેગતોઽથ સુરમણ્ડલી ॥
વેણુનાદકૃતતાનદાનકલગાનરાગગતિયોજના-
લોભનીયમૃદુપાદપાતકૃતતાલમેલનમનોહરમ્ ।
પાણિસંક્વણિતકઙ્કણં ચ મુહુરંસલમ્બિતકરામ્બુજંષ્
શ્રોણિબિમ્બચલદમ્બરં ભજત રાસકેલિરસડમ્બરમ્ ॥
શ્રદ્ધયા વિરચિતાનુગાનકૃતતારતારમધુરસ્વરે
નર્તનેઽથ લલિતાઙ્ગહારલુલિતાઙ્ગહારમણિભૂષણે ।
સમ્મદેન કૃતપુષ્પવર્ષમલમુન્મિષદ્ દિવિષદાં કુલં
ચિન્મયે ત્વયિ નિલીયમાનમિવ સંમુમોહ સવધૂકુલમ્ ॥
સ્વિન્નસન્નતનુવલ્લરી તદનુ કાપિ નામ પશુપાઙ્ગના
કાન્તમંસમવલમ્બતે સ્મ તવ તાન્તિભારમુકુલેક્ષણા ।
કાચિદાચલિતકુન્તલા નવપટીરસારનવસૌરભં
વઞ્ચનેન તવ સઞ્ચુચુમ્બ ભુજમઞ્ચિતોરુપુલકાઙ્કુરમ્ ॥
કાપિ ગણ્ડભુવિ સન્નિધાય નિજગણ્ડમાકુલિતકુણ્ડલં
પુણ્યપૂરનિધિરન્વવાપ તવ પૂગચર્વિતરસામૃતમ્ ।
ઇન્દિરાવિહૃતિમન્દિરં ભુવનસુન્દરં હિ નટનાન્તરે
ત્વામવાપ્ય દધુરઙ્ગનાઃ કિમુ ન સમ્મદોન્મદદશાન્તરમ્ ॥
ગાનમીશ! વિરતં ક્રમેણ કિલ વાદ્યમેલનમુપારતં
બ્રહ્મસમ્મદરસાકુલાઃ સદસિ કેવલં નનૃતુરઙ્ગનાઃ ।
નાવિદન્નપિ ચ નીવિકાં કિમપિ કુન્તલીમપિ ચ કઞ્ચુલીં
જ્યોતિષામપિ કદમ્બકં દિવિ વિલમ્બિતં કિમપરં બ્રુવે ॥
મોદસીમ્નિ ભુવનં વિલાપ્ય વિહૃતિં સમાપ્ય ચ તતો વિભો!
કેલિસમ્પ્તૃદિતનિર્મલાઙ્ગનવઘર્મલેશસુભગાત્મનામ્ ।
મન્મથાસહનચેતસાં પશુપયોષિતાં સુકૃતચોદિતસ્-
તાવદાકલિતમૂર્તિરાદધિથ મારવીરપરમોત્સવાન્ ॥
કેલિભેદપરિલોલિતાભિરતિલાલિતાભિરબલાલિભિઃ
સ્વૈરમીશ! નનુ સૂરજાપયસિ ચારુ નામ વિહૃતિં વ્યધાઃ ।
કાનનેઽપિ ચ વિસારિશીતલકિશોરમારુતમનોહરે
સૂનસૌરભમયે વિલેસિથ વિલાસિનીશતવિમોહનમ્ ॥
કામિનીરિતિ હિ યામિનીષુ ખલુ કામનીયકનિધે! ભવાન્
પૂર્ણસમ્મદરસાર્ણવં કમપિ યોગિગમ્યમનુભાવયન્ ।
બ્રહ્મશઙ્કરમુખાનપીહ પશુપાઙ્ગનાસુ બહુમાનયન્
ભક્તલોકગમનીયરૂપ! કમનીય! કૃષ્ણ! પરિપાહિ મામ્ ॥
મૂળ પાઠ: Nārāyaṇīya · Data entry n.n. · GRETIL (Göttingen) · CC BY-NC-SA 4.0