નારાયણીય · અધ્યાય 10.40

તદનુ નન્દમમન્દશુભાસ્પદં નૃપપુરીં કરદાનકૃતે ગતમ્ ।
સમવલોક્ય જગાદ્ ભવત્પિતા વિદિતકંસસહાયજનોદ્યમઃ ॥

અયિ સખે! તવ બાલકજન્મ માં સુખયતેઽદ્ય નિજાત્મજજન્મવત્ ।
ઇતિ ભવત્પિતૃતાં વ્રજનાયકે સમધિરોપ્ય શશંસ તમાદરાત્ ॥

ઇહ ચ સન્ત્યનિમિત્તશતાનિ તે કટકસીમ્ને તતો લઘુ ગમ્યતામ્ ।
ઇતિ ચ તદ્વચસા વ્રજનાયકો ભવદપાયભિયા દ્રુતમાયયૌ ॥

અવસરે ખલુ તત્ર ચ કાચન વ્રજપદે મધુરાકૃતિરઙ્ગના ।
તરલષટ્પદલાલિતકુન્તલા કપટપોતક! તે નિકટં ગતા ॥

સપસિ સા હૃતબાલકચેતના નિશિચરાન્વયજા કિલ પૂતના ।
વ્રજવધૂષ્વિહ કેયમિતિ ક્ષણં વિમૃશતીષુ ભવન્તમુપાદદે ॥

લલિતભાવવિલાસહૃતાત્મભિર્યુવતિભિઃ પ્રતિરોદ્ધુમપારિતા ।
સ્તનમસૌ ભવનાન્તનિષેદુષી પ્રદદુષી ભવતે કપટાત્મને ॥

સમધિરુહ્ય તદઙ્કમશઙ્કિતસ્ત્વમથ બાલકલોપનરોષિતઃ ।
મહદિવામ્રફલં કુચમણ્ડલં પ્રતિચુચૂષિથ દુર્વિષદૂષિતમ્ ॥

અસુભિરેવ સમં ધયતિ ત્વયિ સ્તનમસૌ સ્તનિતોપમનિસ્વના ।
નિરપતદ્ ભયદાયિ નિજં વપુઃ પ્રતિગતા પ્રવિસાર્ય ભુજાવુભૌ ॥

ભયદઘોષણભીષણવિગ્રહશ્રવણદર્શનમોહિતવલ્લવે ।
વ્રજપદે તદુરઃસ્થલખેલનં નનુ ભવન્તમગૃહ્ણત ગોપિકાઃ ॥

ભુવનમઙ્કલ!નામભિરેવ તે યુવતિભિર્બહુધા કૃતરક્ષણઃ ।
ત્વમયિ વાતનિકેતનનાથ! મામગદયન્ કુરુ તાવકસેવકમ્ ॥