નરસિંહપુરાણ · અધ્યાય 19

યૈઃ સ્તુતો નામભિસ્ તેન સવિતા વિશ્વકર્મણા
તાન્ય્ અહં શ્રોતુમ્ ઇચ્છામિ વદ સૂત વિવસ્વતઃ ॥

તાનિ મે શૃણુ નામાનિ યૈઃ સ્તુતો વિશ્વકર્મણા
સવિતા તાનિ વક્ષ્યામિ સર્વપપહરાણિ તે ॥

આદિત્યઃ સવિતા સૂર્યઃ ખગઃ પૂષા ગભસ્તિમાન્
તિમિરોન્મથનઃ શંભુસ્ ત્વષ્ટા માર્તણ્ડ આશુગઃ ॥

હિરણ્યગર્ભઃ કપિલસ્ તપનો ભાસ્કરો રવિઃ
અગ્નિગર્ભો ઽદિતેઃ પુત્રઃ શંભુસ્ તિમિરનાશનઃ ॥

અંશુમાન્ અંશુમાલી ચ તમોઘ્નસ્ તેજસાં નિધિઃ
આતપી મણ્ડલી મૃત્યુઃ કપિલઃ સર્વતાપનઃ ॥

હરિર્ વિશ્વો મહાતેજાઃ સર્વરત્નપ્રભાકરઃ
અંશુમાલી તિમિરહા ઋગ્યજુસ્સામભાવિતઃ ॥

પ્રાણાવિષ્કરણો મિત્રઃ સુપ્રદીપો મનોજવઃ
યજ્ઞેશો ગોપતિઃ શ્રીમાન્ ભૂતજ્ઞઃ ક્લેશનાશનઃ ॥

અમિત્રહા શિવો હંસો નાયકઃ પ્રિયદર્શનઃ
શુદ્ધો વિરોચનઃ કેશી સહસ્રાંશુઃ પ્રતર્દનઃ ॥

ધર્મરશ્મિઃ પતઙ્ગશ્ ચ વિશાલો વિશ્વસંસ્તુતઃ
દુર્વિજ્ઞેયગતિઃ શૂરસ્ તેજોરાશિર્ મહાયશાઃ ॥

ભ્રાજિષ્ણુર્ જ્યોતિષામ્ ઈશો વિજિષ્ણુર્ વિશ્વભાવનઃ
પ્રભવિષ્ણુઃ પ્રકાશાત્મા જ્ઞાનરાશિઃ પ્રભાકરઃ ॥

આદિત્યો વિશ્વદૃગ્ યજ્ઞ કર્તા નેતા યશસ્કરઃ
વિમલો વીર્યવાન્ ઈશો યોગજ્ઞો યોગભાવનઃ ॥

અમૃતાત્મા શિવો નિત્યો વરેણ્યો વરદઃ પ્રભુઃ
ધનદઃ પ્રાણદઃ શ્રેષ્ઠઃ કામદઃ કામરૂપધૃક્ ॥

તરણિઃ શાશ્વતઃ શાસ્તા શાસ્ત્રજ્ઞસ્ તપનઃ શયઃ
વેદગર્ભો વિભુર્ વીરઃ શાન્તઃ સાવિત્રિવલ્લભઃ ॥

ધ્યેયો વિશ્વેશ્વરો ભર્તા લોકનાથો મહેશ્વરઃ
મહેન્દ્રો વરુણો ધાતા વિષ્ણુર્ અગ્નિર્ દિવાકરઃ ॥

એતૈસ્ તુ નામભિઃ સૂર્યઃ સ્તુતસ્ તેન મહાત્મના
ઉવાચ વિશ્વકર્માણં પ્રસન્નો ભગવાન્ રવિઃ ॥

ભ્રમિમ્ આરોપ્ય મામ્ અત્ર મણ્ડલં મમ શાતય
ત્વદ્બુદ્ધિસ્થં મયા જ્ઞાતમ્ એવમ્ ઔષ્ણ્યં શમં વ્રજેત્ ॥

ઇત્યુક્તો વિશ્વકર્મા ચ તથા સ કૃતવાન્ દ્વિજ
શાન્તોષ્ણઃ સવિતા તસ્ય દુહિતુર્ વિશ્વકર્મણઃ ॥

સંજ્ઞાયાશ્ ચાભવદ્ વિપ્ર ભાનુસ્ ત્વષ્ટારમ્ અબ્રવીત્
ત્વયા યસ્માત્ સ્તુતો ઽહં વૈ નામ્નામ્ અષ્ટશતેન ચ ॥

વરં વૃણીષ્વ તસ્માત્ ત્વં વરદો ઽહં તવાનઘ
ઇત્યુક્તો ભાનુના સો ઽથ વિશ્વકર્માબ્રવીદ્ ઇદમ્ ॥

વરદો યદિ મે દેવ વરમ્ એતં પ્રયચ્છ મે
એતૈસ્ તુ નામભિસ્ યસ્ ત્વાં નરઃ સ્તોષ્યતિ નિત્યશઃ ॥

તસ્ય પાપક્ષયં દેવ કુરુ ભક્તસ્ય ભાસ્કર ॥

તેનૈવમ્ ઉક્તો દિનકૃત્ તથેતિ ત્વષ્ટારમ્ ઉક્ત્વા વિરરામ ભાસ્કરઃ
સંજ્ઞાં વિશઙ્કાં રવિમણ્ડલસ્થિતાં કૃત્વા જગામાથ રવિં પ્રસાદ્ય ॥