નારદસ્મૃતિ · અધ્યાય v2

સ્વદ્રવ્યં યત્ર વિશ્રમ્ભાન્ નિક્ષિપત્ય્ અવિશઙ્કિતઃ ।
નિક્ષેપો નામ તત્ પ્રોક્તં વ્યવહારપદં બુધૈઃ ॥

અન્યદ્રવ્યવ્યવહિતં દ્રવ્યમ્ અવ્યાકૃતં ચ યત્ ।
નિક્ષિપ્યતે પરગૃહે તદ્ ઔપનિધિકં સ્મૃતમ્ ॥

સ પુનર્ દ્વિવિધઃ પ્રોક્તઃ સાક્ષિમાન્ ઇતરસ્ તથા ।
પ્રતિદાનં તથૈવાસ્ય પ્રત્યયઃ સ્યાદ્ વિપર્યયે ॥

યાચ્યમાનસ્ તુ યો દાત્રા નિક્ષેપં ન પ્રયચ્છતિ ।
દણ્ડ્યઃ સ રાજ્ઞા દાપ્યશ્ ચ નષ્ટે દાપ્યશ્ ચ તત્સમમ્ ॥

યશ્ ચાર્થં સાધયેત્ તેન નિક્ષેપ્તુર્ અનનુજ્ઞયા ।
તત્રાપિ દણ્ડ્યઃ સ ભવેત્ તચ્ ચ સોદયમ્ આવહેત્ ॥

ગ્રહીતુઃ સહ યો ઽર્થેન નષ્ટો નષ્ટઃ સ દાયિનઃ ।
દૈવરાજકૃતે તદ્વન્ ન ચેત્ તજ્ જિહ્મકારિતમ્ ॥

એષ એવ વિધિર્ દૃષ્ટો યાચિતાન્વાહિતાદિષુ ।
શિલ્પિષૂપનિધૌ ન્યાસે પ્રતિન્યાસે તથૈવ ચ ॥

પ્રતિગૃહ્ણાતિ પોગણ્ડં યશ્ ચ સપ્રધનં નરઃ ।
તસ્યાપ્ય્ એષ ભવેદ્ ધર્મઃ ષડ્ એતે વિધયઃ સમાઃ ॥