નારદસ્મૃતિ · અધ્યાય v10

પાષણ્ડનૈગમાદીનાં સ્થિતિઃ સમય ઉચ્યતે ।
સમયસ્યાનપાકર્મ તદ્ વિવાદપદં સ્મૃતમ્ ॥

પાષણ્ડનૈગમશ્રેણી પૂગવ્રાતગણાદિષુ ।
સંરક્ષેત્ સમયં રાજા દુર્ગે જનપદે તથા ॥

યો ધર્મઃ કર્મ યચ્ ચૈષામ્ ઉપસ્થાનવિધિશ્ ચ યઃ ।
યચ્ ચૈષાં વૃત્ત્યુપાદાનમ્ અનુમન્યેત તત્ તથા ॥

પ્રતિકૂલં ચ યદ્ રાજ્ઞઃ પ્રકૃત્યવમતં ચ યત્ ।
બાધકં ચ યદ્ અર્થાનાં તત્ તેભ્યો વિનિવર્તયેત્ ॥

મિથઃ સંઘાતકરણમ્ અહિતં શસ્ત્રધારણમ્ ।
પરસ્પરોપઘાતં ચ તેષાં રાજા ન મર્ષયેત્ ॥

પૃથગ્ ગણાંશ્ ચ યે ભિન્દ્યુસ્ તે વિનેયા વિશેષતઃ ।
આવહેયુર્ ભયં ઘોરં વ્યાધિવત્ તે હ્ય્ ઉપેક્ષિતાઃ ॥

દોષવત્ કરણં યત્ સ્યાદ્ અનામ્નાયપ્રકલ્પિતમ્ ।
પ્રવૃત્તમ્ અપિ તદ્ રાજા શ્રેયસ્કામો નિવર્તયેત્ ॥