નારદ પુરાણ · અધ્યાય 2.6

ઇતિ શ્રીબૃહન્નારદીયપુરાણોત્તરભાગે યમવિલાપનં નામ પઞ્ચમો ઽધ્યાયઃ
બ્રહ્મોવાચ
કિમાશ્ચર્યં ત્વયા દૃષ્ટં કથં વા ખિદ્યતે ભવાન્ ।
સદ્ગુણેષુ ચ સંતાપઃ સ તાપો મરણાન્તિકઃ

યસ્યોચ્ચારણમાત્રેણ પ્રાપ્યતે પરમં પદમ્ ।
તમુપોષ્ય કથં સૌરે ન ગચ્છતિ નરસ્ત્વિતિ

એકો હિ કૃષ્ણસ્ય કૃતઃ પ્રણામો દશાશ્વમેધાવભૃથેન તુલ્યઃ ।
દશાશ્વમેધી પુનરેતિ જન્મ કષ્ણપ્રણામી ન પુનર્ભવાય

કુરુક્ષેત્રેણ કિં તસ્ય કિં કાશ્યા વિરજેન વા ।
જિહ્વાગ્રે વર્તતે યસ્ય હરિરિત્યક્ષરદ્વયમ્

બ્રાહ્મણઃ શ્વપચીં ગચ્છન્ વિશેષેણ રજસ્વલામ્ ।
અન્નમશ્નન્સુરાપક્વં મરણે યો હરિં સ્મરેત્

અભક્ષ્યાગમ્યયોર્જાતં વિહાય પાપસંચયમ્ ।
સ યાતિ વિષ્ણુસાયુજ્યં વિમુક્તો ભવબન્ધનૈઃ

યન્નામોચ્ચારણાન્મોક્ષઃ કથં ન તદુપોષણે ।
યસ્મિન્સંગીયતે સો ઽપિ ચિન્ત્યતે પુરુષોત્તમઃ

લીલયા ચોચ્ચરેદ્દેવં શૃણુયાચ્ચ જનાર્દનમ્ ।
ગઙ્ગાંભઃ પૂતપુણ્યત્વે સ નરઃ સમતાં વ્રજેત્

અસ્માકં જગતાંનાથો જન્મદઃ પુરુષોત્તમઃ ।
કથં શાસતિ દુર્મેધાસ્તસ્ય વાસરસેવિનમ્

યસ્ત્વં ન ચૂર્ણિતસ્તૈસ્તુ યસ્ત્વં બદ્ધો ન તૈર્દૃઢમ્ ।
તદસ્માકં કૃતં માનં મે તત્ત્વં નાવબુધ્યસે

યો નિયોગી ન જાનાતિ નૃપભક્તાન્વરાન્ ક્ષિતૌ ।
કૃત્સ્નાયાસેન સંયુક્તઃ સ તૈર્નિગ્રાહ્યતે પુનઃ

રાજેષ્ટા ન નિયોક્તવ્યાઃ સાપરાધા નિયોગિના ।
સ્વામિપ્રસાદાત્સિદ્ધાસ્તે વિનિન્યુર્વ્વૈ નિયોગિનમ્

એવં હિ પાપકર્તારઃ પ્રણતા યે જનાર્દને ।
કથં સંયમિતા તેષાં બાલ્યાદ્ભાસ્કરનન્દન

શૈવૈર્ભાસ્કરભક્તૈર્વા મદ્ભક્તૈર્વા દિવાકરે ।
કરોમિ તવ સાહાય્યં હરિભક્તૈર્ન ભાસ્કરે

સર્વેષામેવ દેવાનામાદિસ્તુપુરુષોત્તમઃ

મધુસૂદનભક્તાનાં નિગ્રહો નોપપદ્યતે ।
વ્યાજેનાપિ કૃતા યૈસ્તુ દ્વાદશી પક્ષયોર્દ્વયોઃ

તૈઃ કૃતે અવમાને તુ તવ નાહં સહાયવાન્ ।
કૃતે સહાયે તવ સૂર્યસૂનો ભવેદનીતિર્મમ દેહઘાતિની ।
વિપર્યયો બ્રહ્મપદાત્સુપુણ્યાત્કૃતેવ માર્ગે સહ વિષ્ણુભક્તૈઃ