મુકુન્દમાલા · શ્લોક 21-34

ઇદં શરીરં પરિણામપેશલં પતત્યવશ્યં શ્લથસંધિ જર્જરમ્ ।
કિમૌષધૈઃ ક્લિશ્યસિ મૂઢ દુર્મતે નિરામયં કૃષ્ણરસાયનં પિબ

શ્રીમન્નામ પ્રોચ્ય નારાયણાખ્યં યેન પ્રાપ્તા વાઞ્છિતં પાપિનો ઽપિ ।
હા નઃ પૂર્વં વાક્પ્રવૃત્તા ન તસ્મિંસ્તેન પ્રાપ્તં ગર્ભવાસાદિદુઃખમ્

મા દ્રાક્ષં ક્ષીણપુણ્યાન્ક્ષણમપિ ભવતો ભક્તિહીનાન્પદાબ્જે મા શ્રૌષં શ્રવ્યબદ્ધં તવ ચરિતમપાસ્યાન્યદાખ્યાનજાતમ્ ।
મા સ્પ્રાક્ષં માધવ ત્વામપિ ભુવનપતે ચેતસાપહ્નુવાનં મા ભૂવં ત્વત્સપર્યાવ્યતિકરરહિતો જન્મજન્માન્તરે ઽપિ

મદન પરિહર સ્થિતિં મદીયે મનસિ મુકુન્દપદારવિન્દધામ્નિ ।
હરનયનકૃશાનુના કૃશો ઽસિ સ્મરસિ ન ચક્રપરાક્રમં મુરારેઃ

દારા વારાકરવરસુતા તે ઽઙ્ગજો ઽયં વિરિઞ્ચઃ સ્તોતા વેદસ્તવ સુરગણો ભૃત્યવર્ગઃ પ્રસાદઃ ।
મુક્તિર્મધ્યે જગદવિકલં તાવકે દેવકી તે માતા મિત્ત્રં બલરિપુસુતસ્તત્ત્વતો ઽન્યન્ન જાને

જિહ્વે કીર્તય કેશવં મુરરિપું ચેતો ભજ શ્રીધરં પાણિદ્વન્દ્વ સમર્ચયાચ્યુતકથાં શ્રોત્રદ્વય ત્વં શ્રુણુ ।
કૃષ્ણં લોકય લોચનદ્વય હરેર્ગચ્છાઙ્ઘ્રિયુગ્માલયં જિઘ્ર ઘ્રાણ મુકુન્દપાદતુલસીં મુર્ધન્નમાધોક્ષજમ્

યત્કૃષ્ણપ્રણિપાતધૂલિધવલં તદ્વૈ શિરઃ સ્યાચ્છુભં તે નેત્રે તમસોજ્ઝિતે સુરુચિરે યાભ્યાં હરિર્દૃશ્યતે ।
સા બુદ્ધિર્નિયમૈર્યમૈશ્ચ વિમલા યા માધવધ્યાયિની સા જિહ્વામૃતવર્ષિણી પ્રતિપદં યા સ્તૌતિ નારાયણમ્

ભક્તદ્વેષિભુજંગગારુડમણિસ્ત્રૈલોક્યરક્ષામણિર્ગોપીલોચનચાતકામ્બુદમણિઃ સૌન્દર્યમુદ્રામણિઃ ।
શ્રીકાન્તામણિરુક્મિણીઘનકુચદ્વન્દ્વૈકભૂષામણિઃ શ્રેયો ધ્યેયશિખામ્ણિર્દિશતુ નો ગોપાલચૂડામણિઃ

શત્રુચ્છેદૈકમન્ત્રં સકલમુપનિષદ્વાક્યસંપૂજ્યમન્ત્રં સંસારોત્તારમન્ત્રં સમુદિતમનસાં સઙ્ગનિર્યાણમન્ત્રમ્ ।
સર્વૈશ્વર્યૈકમન્ત્રં વ્યસનભુજગસંદષ્ટસંત્રાણમન્ત્રં જિહ્વે શ્રીકૃષ્ણમન્ત્રં જપ જપ સતતં જન્મસાફલ્યમન્ત્રમ્

વ્યામોહોદ્દલનૌષધં મુનિમનોવૃત્તિપ્રવૃત્ત્યૌષધં દૈત્યાનર્થકરૌષધં ત્રિજગતાં સંજીવનૈકૌષધમ્ ।
ભક્તાર્તિપ્રશમૌષધં ભવભયપ્રધ્વંસિ દિવ્યૌષધં શ્રેયઃપ્રાપ્તિકરૌષધં પિબ મનઃ શ્રીકૃષ્ણનામૌષધમ્

આશ્ચર્યમેતદ્ધિ મનુષ્યલોકે સુધાં પરિત્યજ્ય વિષં પિબન્તિ ।
નામાનિ નારાયણગોચરાણિ ત્યક્ત્વાન્યવાચઃ કુહકાઃ પઠન્તિ

લાટીનેત્રપુટીપયોધરઘટીરેવાતટીદુષ્કુટીપાટીરદ્રુમવર્ણનેન કવિભિર્મૂઢૈર્દિનં નીયતે ।
ગોવિન્દેતિ જનાર્દનેતિ જગતાં નાથેતિ કૃષ્ણેતિ ચ વ્યાહારૈઃ સમયસ્તદેકમનસાં પુંસામતિક્રામતિ

અયાચ્યમક્રેયમયાતયામમપાચ્યમક્ષય્યમદુર્ભરં મે ।
અસ્ત્યેવ પાથેયમિતઃ પ્રયાણે શ્રીકૃષ્ણનામમૃતભાગધેયમ્

યસ્ય પ્રિયૌ શ્રુતધરૌ કવિલોકગીતૌ મિત્ત્રે દ્વિજન્મપરિવારશિવાવભૂતામ્ ।
તેનામ્બુજાક્ષચરણામ્બુજષટ્પદેન રાજ્ઞા કૃતા સ્તુતિરિયં કુલશેખરેણ