મુકુન્દમાલા · શ્લોક 1-20

શ્રીકુલશેખરનૃપતિવિરચિતા મુકુન્દમાલા
વન્દે મુકુન્દમરવિન્દદલાયતાક્ષં કુન્દેન્દુશઙ્ખદશનં શિશુગોપવેષમ્ ।
ઇન્દ્રાદિદેવગણવન્દિતપાદપીઠં વૃન્દાવનાલયમહં વસુદેવસૂનુમ્

જયતુ જયતુ દેવો દેવકીનન્દનો ઽયં જયતુ જયતુ કૃષ્ણો વૃષ્ણિવંશપ્રદીપઃ ।
જયતુ જયતુ મેઘશ્યામલઃ કોમલાઙ્ગો જયતુ જયતુ પૃથ્વીભારનાશો મુકુન્દઃ

મુકુન્દ મૂર્ધ્ના પ્રણિપત્ય યાચે ભવન્તમેકાન્તમિયન્તમર્થમ્ ।
અવિસ્મૃતિસ્ત્વચ્ચરણારવિન્દે ભવે ભવે મે ઽસ્તિ ભવત્પ્રસાદાત્

શ્રીમુકુન્દપદામ્ભોજમધુનઃ પરમાદ્ભુતમ્ ।
યત્પાયિનો ન મુહ્યન્તિ મુહ્યન્તિ યદપાયિનઃ

નાહં વન્દે તવ ચરણયોર્દ્વન્દ્વમદ્વન્દ્વહેતોઃ કુમ્ભીપાકં ગુરુમપિ હરે નારકં નાપનેતુમ્ ।
રમ્યા રામા મૃદુતનુલતા નન્દને નાપિ રન્તું ભાવે ભાવે હૃદયભવને ભાવયે ઽહં ભવન્તમ્

નાસ્થા ધર્મે ન વસુનિચયે નૈવ કામોપભોગે યદ્ભાવ્યં તદ્ભવતુ ભગવન્પૂર્વકર્માનુરૂપમ્ ।
એતત્પ્રાર્થ્યં મમ બહુમતં જન્મજન્માન્તરે ઽપિ ત્વત્પાદામ્ભોરુહયુગગતા નિશ્ચલા ભક્તિરસ્તુ

દિવિ વા ભુવિ વા મમાસ્તુ વાસો નરકે વા નરકાન્તકે પ્રકામમ્ ।
અવધીરિતશારદારવિન્દૌ ચરણૌ તે મરણે ઽપિ ચિન્તયામિ

સરસિજનયને સશઙ્ખચક્રે મુરભિદિ મા વિરમેહ ચિત્ત રન્તુમ્ ।
સુખકરમપરં ન જાતુ જાને હરિચરણસ્મરણામૃતેન તુલ્યમ્

મા ભૈર્મન્દમનો વિચિન્ત્ય બહુધા યામીશ્ચિરં યાતના નામી નઃ પ્રભવન્તિ પાપરિપવઃ સ્વામી નનુ શ્રીધરઃ ।
આલસ્યં વ્યપનીય ભક્તિસુલભં ધ્યાયસ્વ નારાયણં લોકસ્ય વ્યસનાપનોદનકરો દાસસ્ય કિં ન ક્ષમઃ

ભવજલધિમગાધં દુસ્તરં નિસ્તરેયં કથમહમિતિ ચેતો મા સ્મ ગાઃ કાતરત્વમ્ ।
સરસિજદૃશિ દેવે તાવકી ભક્તિરેકા નરકભિદિ નિષણ્ણા તારયિષ્યત્યવશ્યમ્

તૃષ્ણાતોયે મદનપવનોદ્ધૂતમોહોર્મિમાલે દારાવર્તે સહજતનયગ્રાહસંઘાકુલે ચ ।
સંસારાખ્યે મહતિ જલધૌ મજ્જતાં નસ્ત્રિધામન્પાદામ્ભોજે વરદ ભવતો ભક્તિનાવે પ્રસીદ

પૃથ્વીરેણુરણુઃ પયાંસિ કણિકાઃ ફલ્ગુઃ સ્ફુલિઙ્ગો લઘુસ્તેજો નિઃશ્વસનં મરુત્તનુતરં રન્ધ્રં સુસૂક્ષ્મં નભઃ ।
ક્ષુદ્રા રુદ્રપિતામહપ્રભૃતયઃ કીટાઃ સમસ્તાઃ સુરા દૃષ્ટે યત્ર સ તાવકો વિજયતે ભૂમાવધૂતાવધિઃ

આમ્નાયાભ્યસનાન્યરણ્યરુદિતં કૃચ્છ્રવ્રતાન્યન્વહં મેદશ્છેદપદાનિ પૂર્તવિધયઃ સર્વે હુતં ભસ્મનિ ।
તીર્થાનામવગાહનાનિ ચ ગજસ્નાનં વિના યત્પદદ્વન્દ્વામ્ભોરુહસંસ્તુતિં વિજયતે દેવઃ સ નારાયણઃ

આનન્દ ગોવિન્દ મુકુન્દ રામ નારાયણાનન્ત નિરામયેતિ ।
વક્તું સમર્થો ઽપિ ન વક્તિ કશ્ચિદહો જનાનાં વ્યસનાનિ મોક્ષે

ક્ષીરસાગરતરઙ્ગશીકરાસારતારકિતચારુમૂર્તયે ।
ભોગિભોગશયનીયશાયિને માધવાય મધુવિદ્વિષે નમઃ

વાત્સલ્યાદભયપ્રદાનસમયાદાર્તાર્તિનિર્વાપણાદૌદાર્યાદઘશોષણાદગણિતશ્રેયઃપદપ્રાપણાત્ ।
સેવ્યઃ શ્રીપતિરેવ સર્વજગતામેકાન્તતઃ સાક્ષિણઃ પ્રહ્લાદશ્ચ વિભીષણશ્ચ કરિરાટ્ પાઞ્ચાલ્યહલ્યા ધ્રુવઃ

નાથે શ્રીપુરુષોત્તમે ત્રિજગતામેકાધિપે ચેતસા સેવ્યે સ્વસ્ય પદસ્ય દાતરિ પરે નારાયણે તિષ્ઠતિ ।
યં કંચિત્પુરુષાધમં કતિપયગ્રામેશમલ્પાદર્થદં સેવાયૈ મૃગયામહે નરમહો મૂઢા વરાકા વયમ્

ભો લોકાઃ શૃણુત પ્રસૂતિમરણવ્યાધેશ્ચિકિત્સામિમાં યોગજ્ઞાઃ સમુદાહરન્તિ મુનયો યાં યાજ્ઞવલ્ક્યાદયઃ ।
અન્તર્જ્યોતિરમેયમેકમમૃતં કૃષ્ણાખ્યમાપીયતાં યત્પીતં પરમૌષધં વિતનુતે નિર્વાણમાત્યન્તિકમ્

બદ્ધેનાઞ્જલિના નતેન શિરસા ગાત્રૈઃ સરોમોદ્ગમૈઃ કણ્ઠેન સવરગદ્ગદેન નયનેનોદ્ગીર્ણબાષ્પામ્બુના ।
નિત્યં ત્વચ્ચરણારવિન્દયુગલધ્યાનામૃતાસ્વાદિનામસ્માકં સરસીરુહાક્ષ સતતં સંપદ્યતાં જીવિતમ્

તત્ત્વં બ્રુવાણાનિ પરં પરસ્માદહો ક્ષરન્તીવ સુધાં પદાનિ ।
આવર્તય પ્રાઞ્જલિરસ્મિ જિહ્વે નામાનિ નારાયણગોચરાણિ