મુકુન્દમાલા · શ્લોક 21-40

હે ગોપાલક હે કૃપાજલનિધે હે સિન્ધુકન્યાપતે હે કંસાન્તક હે ગજેન્દ્રકરુણાપારીણ હે માધવ ।
હે રામાનુજ હે જગત્ત્રયગુરો હે પુણ્ડરીકાક્ષ માં હે ગોપીજનનાથ પાલય પરં જાનામિ ન ત્વાં વિના

ભક્તાપાયભુજાઙ્ગગારુડમણિસ્ ત્રૈલોક્યરક્ષામણિર્ ગોપીલોચનચાતકામ્બુદમણિઃ સૌન્દર્યમુદ્રામણિઃ ।
યઃ કાન્તામણિરુક્મિણીઘનકુચદ્વન્દ્વૈકભૂષામણિઃ શ્રેયો દેવશિખામણિર્ દિશતુ નો ગોપાલચૂડામણિઃ

શત્રુચ્છેદૈકમન્ત્રં સકલમ્ ઉપનિષદ્વાક્યસમ્પૂજ્યમન્ત્રં સંસારોત્તારમન્ત્રં સમુપચિતતમસઃ સઙ્ઘનિર્યાણમન્ત્રમ્ ।
સર્વૈશ્વર્યૈકમન્ત્રં વ્યસનભુજગસન્દષ્ટસન્ત્રાણમન્ત્રં જિહ્વે શ્રીકૃષ્ણમન્ત્રં જપ જપ સતતં જન્મસાફલ્યમન્ત્રમ્

વ્યામોહપ્રશમૌષધં મુનિમનોવૃત્તિપ્રવૃત્ત્યૌષધં દૈત્યેન્દ્રાર્તિકરૌષધં ત્રિભુવને સઞ્જીવનૈકૌષધમ્ ।
ભક્તાત્યન્તહિતૌષધં ભવભયપ્રધ્વંસનૈકૌષધં શ્રેયઃપ્રાપ્તિકરૌષધં પિબ મનઃ શ્રીકૃષ્ણદિવ્યૌષધમ્

આમ્નાયાભ્યસનાન્ય્ અરણ્યરુદિતં વેદવ્રતાન્ય્ અન્વહં મેદશ્છેદફલાનિ પૂર્તવિધયઃ સર્વે હુતં ભસ્મનિ ।
તીર્થાનામ્ અવગાહનાનિ ચ ગજસ્નાનં વિના યત્પદ-દ્વન્દ્વામ્ભોરુહસંસ્મૃતીર્ વિજયતે દેવઃ સ નારાયણઃ

શ્રીમન્નામ પ્રોચ્ય નારાયણાખ્યં કે ન પ્રાપુર્ વાઞ્છિતં પાપિનો ઽપિ ।
હા નઃ પૂર્વં વાક્ પ્રવૃત્તા ન તસ્મિંસ્ તેન પ્રાપ્તં ગર્ભવાસાદિદુઃખમ્

મજ્જન્મનઃ ફલમ્ ઇદં મધુકૈટભારે મત્પ્રાર્થનીયમદનુગ્રહ એષ એવ ।
ત્વદ્ભૃત્યભૃત્યપરિચારકભૃત્યભૃત્ય-ભૃત્યસ્ય ભૃત્ય ઇતિ માં સ્મર લોકનાથ

નાથે નઃ પુરુષોત્તમે ત્રિજગતાં એકાધિપે ચેતસા સેવ્યે સ્વસ્ય પદસ્ય દાતરિ સુરે નારાયણે તિષ્ઠતિ ।
યં કઞ્ચિત્ પુરુષાધમં કતિપયગ્રામેશમ્ અલ્પાર્થદં સેવાયૈ મૃગયામહે નરમ્ અહો મૂકા વરાકા વયમ્

મદન પરિહર સ્થિતિં મદીયે મનસિ મુકુન્દપદારવિન્દધામ્નિ ।
હરનયનકૃશાનુના કૃશો ઽસિ સ્મરસિ ન ચક્રપરાક્રમં મુરારેઃ

તત્ત્વં બ્રુવાણાનિ પરં પરસ્તાન્ મધુ ક્ષરન્તીવ સતાં ફલાનિ ।
પ્રાવર્તય પ્રાઞ્જલિર્ અસ્મિ જિહ્વે નામાનિ નારાયણગોચરાણિ

ઇદં શરીરં પરિણામપેશલં પતત્ય્ અવશ્યં શ્લથસન્ધિજર્જરમ્ ।
કિમ્ ઔષધૈઃ ક્લિશ્યસિ મૂઢ દુર્મતે નિરામયં કૃષ્ણરસાયનં પિબ

દારા વારાકરવરસુતા તે તનૂજો વિરિઞ્ચઃ સ્તોતા વેદસ્ તવ સુરગણો ભૃત્યવર્ગઃ પ્રસાદઃ ।
મુક્તિર્ માયા જગદ્ અવિકલં તાવકી દેવકી તે માતા મિત્રં બલરિપુસુતસ્ ત્વય્ય્ અતો ઽન્યન્ ન જાને

કૃષ્ણો રક્ષતુ નો જગત્ત્રયગુરુઃ કૃષ્ણં નમસ્યામ્ય્ અહં કૃષ્ણેનામરશત્રવો વિનિહતાઃ કૃષ્ણાય તસ્મૈ નમઃ ।
કૃષ્ણાદ્ એવ સમુત્થિતં જગદ્ ઇદં કૃષ્ણસ્ય દાસો ઽસ્મ્ય્ અહં કૃષ્ણે તિષ્ઠતિ સર્વમ્ એતદ્ અખિલં હે કૃષ્ણ સંરક્ષ મામ્

સ ત્વં પ્રસીદ ભગવન્ કુરુ મય્ય્ અનાથે વિષ્ણો કૃપાં પરમકારુણિકઃ કિલ ત્વમ્ ।
સંસારસાગરનિમગ્નમ્ અનન્ત દીનમ્ ઉદ્ધર્તુમ્ અર્હસિ હરે પુરુષોત્તમો ઽસિ

નમામિ નારાયણપાદપઙ્કજં કરોમિ નારાયણપૂજનં સદા ।
વદામિ નારાયણનામ નિર્મલં સ્મરામિ નારાયણતત્ત્વમ્ અવ્યયમ્

શ્રીનાથ નારાયણ વાસુદેવ શ્રીકૃષ્ણ ભક્તપ્રિય ચક્રપાણે ।
શ્રીપદ્મનાભાચ્યુત કૈટભારે શ્રીરામ પદ્માક્ષ હરે મુરારે

અનન્ત વૈકુણ્ઠ મુકુન્દ કૃષ્ણ ગોવિન્દ દામોદર માધવેતિ ।
વક્તું સમર્થો ઽપિ ન વક્તિ કશ્ચિદ્ અહો જનાનાં વ્યસનાભિમુખ્યમ્

ધ્યાયન્તિ યે વિષ્ણુમ્ અનન્તમ્ અવ્યયં હૃત્પદ્મમધ્યે સતતં વ્યવસ્થિતમ્ ।
સમાહિતાનાં સતતાભય-પ્રદં તે યાન્તિ સિદ્ધિં પરમાં તુ વૈષ્ણવીમ્

ક્ષીરસાગરતરઙ્ગશીકરા-સારતારકિતચારુમૂર્તયે ।
ભોગિભોગશયનીયશાયિને માધવાય મધુવિદ્વિષે નમઃ

યસ્ય પ્રિયૌ શ્રુતિધરૌ કવિલોકવીરૌ મિત્રે દ્વિજન્મવરપદ્મશરાવ્ અભૂતામ્ ।
તેનામ્બુજાક્ષચરણામ્બુજષટ્પદેન રાજ્ઞા કૃતા કૃતિર્ ઇયં કુલશેખરેણ