મુકુન્દમાલા · શ્લોક 1-20

ઘુષ્યતે યસ્ય નગરે રઙ્ગયાત્રા દિને દિને ।
તમ્ અહં શિરસા વન્દે રાજાનં કુલશેખરમ્ ॥
શ્રીવલ્લભેતિ વરદેતિ દયાપરેતિ ભક્તપ્રિયેતિ ભવલુણ્ઠનકોવિદેતિ ।
નાથેતિ નાગશયનેતિ જગન્નિવાસેત્ય્ આલાપિનં પ્રતિદિનં કુરુ માં મુકુન્દ

જયતુ જયતુ દેવો દેવકીનન્દનો ઽયં જયતુ જયતુ કૃષ્ણો વૃષ્ણિવંશપ્રદીપઃ ।
જયતુ જયતુ મેઘશ્યામલઃ કોમલાઙ્ગો જયતુ જયતુ પૃથ્વીભારનાશો મુકુન્દઃ

મુકુન્દ મૂર્ધ્ના પ્રણિપત્ય યાચે ભવન્તમ્ એકાન્તમ્ ઇયન્તમ્ અર્થમ્ ।
અવિસ્મૃતિસ્ ત્વચ્ચરણારવિન્દે ભવે ભવે મે ઽસ્તુ ભવત્પ્રસાદાત્

નાહં વન્દે તવ ચરણયોર્ દ્વન્દ્વમ્ અદ્વન્દ્વહેતોઃ કુમ્ભીપાકં ગુરુમ્ અપિ હરે નારકં નાપનેતુમ્ ।
રમ્યા રામા મૃદુતનુલતા નન્દને નાપિ રન્તું ભાવે ભાવે હૃદયભવને ભાવયેયં ભવન્તમ્

નાસ્થા ધર્મે ન વસુનિચયે નૈવ કામોપભોગે યદ્ ભાવ્યં તદ્ ભવતુ ભગવન્ પૂર્વકર્માનુરૂપમ્ ।
એતત્ પ્રાર્થ્યં મમ બહુ-મતં જન્મજન્માન્તરે ઽપિ ત્વત્પાદામ્ભોરુહયુગગતા નિશ્ચલા ભક્તિર્ અસ્તુ

દિવિ વા ભુવિ વા મમાસ્તુ વાસો નરકે વા નરકાન્તક પ્રકામમ્ ।
અવધીરિતશારદારવિન્દૌ ચરણૌ તે મરણે ઽપિ ચિન્તયામિ

કૃષ્ણ ત્વદીયપદપઙ્કજપઞ્જરાન્તર્ અદ્યૈવ મે વિશતુ માનસરાજહંસઃ ।
પ્રાણપ્રયાણસમયે કફવાતપિત્તૈઃ કણ્ઠાવરોધનવિધૌ સ્મરણં કુતસ્ તે

ચિન્તયામિ હરિમ્ એવ સન્તતં મન્દમન્દહાસિતાનનામ્બુજમ્ ।
નન્દગોપતનયં પરાત્ પરં નારદાદિમુનિવૃન્દવન્દિતમ્

કરચરણસરોજે કાન્તિમન્નેત્રમીને શ્રમમુષિ ભુજવીચિવ્યાકુલે ઽગાધમાર્ગે ।
હરિસરસિ વિગાહ્યાપીય તેજોજલૌઘં ભવમરુપરિખિન્નઃ ખેદમ્ અદ્ય ત્યજામિ

સરસિજનયને સશઙ્ખચક્રે મુરભિદિ મા વિરમસ્વ ચિત્ત રન્તુમ્ ।
સુખતરમ્ અપરં ન જાતુ જાને હરિચરણસ્મરણામૃતેન તુલ્યમ્

માભીર્ મન્દમનો વિચિન્ત્ય બહુધા યામીશ્ ચિરં યાતના નામી નઃ પ્રભવન્તિ પાપરિપવઃ સ્વામી નનુ શ્રીધરઃ ।
આલસ્યં વ્યપનીય ભક્તિસુલભં ધ્યાયસ્વ નારાયણં લોકસ્ય વ્યસનાપનોદનકરો દાસસ્ય કિં ન ક્ષમઃ

ભવજલધિગતાનાં દ્વન્દ્વવાતાહતાનાં સુતદુહિતૃકલત્રત્રાણભારાર્દિતાનામ્ ।
વિષમવિષયતોયે મજ્જતામ્ અપ્લવાનાં ભવતુ શરણમ્ એકો વિષ્ણુપોતો નરાણામ્

ભવજલધિમ્ અગાધં દુસ્તરં નિસ્તરેયં કથમ્ અહમ્ ઇતિ ચેતો મા સ્મ ગાઃ કાતરત્વમ્ ।
સરસિજદૃશિ દેવે તાવકી ભક્તિર્ એકા નરકભિદિ નિષણ્ણા તારયિષ્યત્ય્ અવશ્યમ્

તૃષ્ણાતોયે મદનપવનોદ્ધૂતમોહોર્મિમાલે દારાવર્તે તનયસહજગ્રાહસઙ્ઘાકુલે ચ ।
સંસારાખ્યે મહતિ જલધૌ મજ્જતાં નસ્ ત્રિધામન્ પાદામ્ભોજે વરદ ભવતો ભક્તિનાવં પ્રયચ્છ

મા દ્રાક્ષં ક્ષીણપુણ્યાન્ ક્ષણમ્ અપિ ભવતો ભક્તિહીનાન્ પદાબ્જે મા શ્રૌષં શ્રાવ્યબન્ધં તવ ચરિતમ્ અપાસ્યાન્યદ્ આખ્યાનજાતમ્ ।
મા સ્માર્ષં માધવ ત્વામ્ અપિ ભુવનપતે ચેતસાપહ્નુવાનાન્ મા ભૂવં ત્વત્સપર્યાવ્યતિકરરહિતો જન્મજન્માન્તરે ઽપિ

જિહ્વે કીર્તય કેશવં મુરરિપું ચેતો ભજ શ્રીધરં પાણિદ્વન્દ્વ સમર્ચયાચ્યુતકથાઃ શ્રોત્રદ્વય ત્વં શૃણુ ।
કૃષ્ણં લોકય લોચનદ્વય હરેર્ ગચ્છાઙ્ઘ્રિયુગ્માલયં જિઘ્ર ઘ્રાણ મુકુન્દપાદતુલસીં મૂર્ધન્ નમાધોક્ષજમ્

હે લોકાઃ શૃણુત પ્રસૂતિમરણવ્યાધેશ્ ચિકિત્સામ્ ઇમાં યોગજ્ઞાઃ સમુદાહરન્તિ મુનયો યાં યાજ્ઞવલ્ક્યાદયઃ ।
અન્તર્જ્યોતિર્ અમેયમ્ એકમ્ અમૃતં કૃષ્ણાખ્યમ્ આપીયતાં તત્ પીતં પરમૌષધં વિતનુતે નિર્વાણમ્ આત્યન્તિકમ્

હે મર્ત્યાઃ પરમં હિતં શૃણુત વો વક્ષ્યામિ સઙ્ક્ષેપતઃ સંસારાર્ણવમ્ આપદૂર્મિબહુલં સમ્યક્ પ્રવિશ્ય સ્થિતાઃ ।
નાનાજ્ઞાનમ્ અપાસ્ય ચેતસિ નમો નારાયણાયેત્ય્ અમું મન્ત્રં સપ્રણવં પ્રણામસહિતં પ્રાવર્તયધ્વં મુહુઃ

પૃથ્વી રેણુર્ અણુઃ પયાંસિ કણિકાઃ ફલ્ગુઃ સ્ફુલિઙ્ગો લઘુઃ તેજો નિઃશ્વસનં મરુત્ તનુતરં રન્ધ્રં સુસૂક્ષ્મં નભઃ ।
ક્ષુદ્રા રુદ્રપિતામહપ્રભૃતયઃ કીટાઃ સમસ્તાઃ સુરાઃ દૃષ્ટે યત્ર સ તાવકો વિજયતે ભૂમાવધૂતાવધિઃ

બદ્ધેનાઞ્જલિના નતેન શિરસા ગાત્રૈઃ સરોમોદ્ગમૈઃ કણ્ઠેન સ્વરગદ્ગદેન નયનેનોદ્ગીર્ણબાષ્પામ્બુના ।
નિત્યં ત્વચ્ચરણારવિન્દયુગલધ્યાનામૃતાસ્વાદિનામ્ અસ્માકં સરસીરુહાક્ષ સતતં સમ્પદ્યતાં જીવિતમ્