મુગ્ધોપદેશ · શ્લોક 61-66

સંસારસ્ય મહેશ્વરો દિનપતિર્ ધ્વાન્તસ્ય વૈદ્યો રુજાં પ્રાયશ્ચિત્તમ્ અઘસ્ય શાસ્ત્રમ્ અપરિજ્ઞાનસ્ય તોયં તૃષઃ
સિદ્ધાજ્ઞા ગરલસ્ય તીર્થસરણં વૃદ્ધત્વવૈક્લવ્યયોઃ સપ્તાઙ્ગવ્યસનાવલેઃ પ્રશમનોપાયશ્ ચ શિક્ષા સતામ્ ॥

ઓંકારઃ સાહસાનાં નિજગુણનિપુણપ્રત્યવેક્ષા સુખાનાં કાદાચિત્કઃ પ્રયોગઃ સકલપરિચયોપાધિવૈદગ્ધ્યબન્ધુઃ
કષ્ટાનામ્ અન્ત્યકાષ્ઠા ધનરસિકવણિગ્લોકયાત્રાપ્રસઙ્ગો જીવજ્જન્માન્તરં ચેત્ય્ અલમ્ અતિબહુના સ્વસ્તિ દેશાન્તરાય ॥

યદ્ય્ અપ્ય્ અસ્તિ સવિસ્તરાદ્ભુતકથાભૂયિષ્ઠનાનાવિધ વ્યાખ્યાયાં નિરવદ્યહૃદ્યચરિતોદારં ચ દેશાન્તરમ્
તત્રાપિ સ્વગૃહેષુ ગુણવદ્ગોષ્ઠીગરિષ્ઠીકૃત સ્ફારો ઽનારતભારતીરસપરિષ્યન્દઃ સખે સુન્દરઃ ॥

તે વન્દ્યા મકરન્દબિન્દુમધુરૈર્ અભ્યુત્થિતાદ્ અક્ષરૈર્ યેષા વાન્તિ સરસ્વતીપરિમલોદ્ગારા મુખામ્ભોરુહાત્
વન્દ્યાસ્ તે ઽપિ તદન્તરાલપતિતા યે ભૃઙ્ગભઙ્ગીજુષઃ સાન્દ્રાનન્દકરમ્બિતં જગદ્ ઇદં વિન્દન્તિ નિન્દન્તિ ચ ॥

દૃષ્ટ્વા દેશમ્ અશેષમ્ આ જલનિધેર્ આલોક્ય કૌતૂહલાદ્ આસ્થાનીર્ અવનીભૃતાં ચ પુનર્ અપ્ય્ આગત્ય દેશં નિજમ્
કારુણ્યાત્ તરુણં જનં પ્રતિ સતામ્ અભ્યર્થનાભિસ્ તથા સો ઽયં સંપ્રતિ જલ્હણેન કવિના મુદ્ઘોપદેશઃ કૃતઃ ॥

વિદ્યાભ્યાસપરમ્પરાપરિચયૈર્ બાલ્યં કૃતાર્થીકૃતં તારુણ્યં તરુણીનિરન્તરપરીરમ્ભૈશ્ ચ સંભાવિતમ્
અસ્માકં સુરસિન્ધુરોધસિ પુનઃ શંભાવદંભાર્ચનૈર્ વૃદ્ધત્વસ્ય વિશુદ્ધતાં જનયિતું કર્તવ્યશેષઃ સ્થિતઃ ॥