મોક્ષોપાય · અધ્યાય 5.8

અસ્ત્ય્ અસ્તમિતસર્વાપદ્ ઉદ્યત્સમ્પદ્ ઉદારધીઃ ।
વિદેહાનાં મહીપાલો જનકો નામ વીર્યવાન્ ॥

કલ્પવૃક્ષો ઽર્થિસાર્થાનાં મિત્રાબ્જાનાં દિવાકરઃ ।
માધવો બન્ધુપુષ્પાણાં સ્ત્રીણાં મકરકેતનઃ ॥

દ્વિજકૈરવશીતાંશુર્ દ્વિષત્તિમિરભાસ્કરઃ ।
સૌજન્યરત્નજલધિર્ ભુવં વિષ્ણુર્ ઇવાસ્થિતઃ ॥

પ્રફુલ્તબાલલતિકે મઞ્જરીપુઞ્જપિઞ્જરે ।
સ કદાચિન્ મધૌ મત્તકોકિલોલ્લાસલાસિનિ ॥

યયૌ કુસુમિતાભોગં સવિલાસલતાઙ્ગનમ્ ।
લીલયોપવનં કાન્તં નન્દનં વાસવો યથા ॥

તસ્મિન્ વરવને હૃદ્યે કેસરામોદિમારુતે ।
દૂરસ્થાનુચરશ્ ચારુકુઞ્જેષુ વિચચાર હ ॥

અથ શુશ્રાવ કસ્મિંશ્ચિત્ તમાલવનગુલ્મકે ।
સિદ્ધાનામ્ અપ્રદૃશ્યાનાં સ્વપ્રસઙ્ગાદ્ ઉદાહૃતાઃ ॥

વિરક્તમનસાં નિત્યં શૈલકન્દરચારિણામ્ ।
ઇમાઃ કમલપત્ત્રાક્ષ ગીતા ગીતાત્મભાવનાઃ ॥

દ્રષ્ટૃદૃશ્યસમાયોગાત્ પ્રત્યયાનન્દનિશ્ચયઃ ।
યસ્ તં સ્વમ્ આત્મતત્ત્વોત્થં નિષ્ષ્યન્દં સમુપાસ્મહે ॥

દ્રષ્ટૃદર્શનદૃશ્યાનિ ત્યક્ત્વા વાસનયા સહ ।
દર્શનપ્રથમાભાસમ્ આત્માનં સમુપાસ્મહે ॥

નિર્ભાસનં નિર્મનનમ્ આભાસમનનોપમમ્ ।
અભાવભાવનાભોગં સદાત્માનમ્ ઉપાસ્મહે ॥

દ્વયોર્ મધ્યગતં નિત્યમ્ અસ્તિ નાસ્તીતિ પક્ષયોઃ ।
પ્રકાશનં પ્રકાશાનામ્ આત્માનં સમુપાસ્મહે ॥

અશિરસ્કહકારાભમ્ અશેષાકારસંસ્થિતમ્ ।
અજસ્રમ્ ઉચ્ચરન્તં તં સ્વમ્ આત્માનમ્ ઉપાસ્મહે ॥

સન્ત્યજ્ય હૃદ્ગુહેશાનં દેવમ્ અન્યં પ્રયાન્તિ યે ।
તે રત્નમ્ અભિવાઞ્છન્તિ ત્યક્તહસ્તસ્થકૌસ્તુભાઃ ॥

સર્વાશાઃ કિલ સન્ત્યજ્ય ફલમ્ એતદ્ અવાપ્યતે ।
યેનાશાવિષવલ્લીનાં મૂલમાલા વિલૂયતે ॥

બુદ્ધ્વાપ્ય્ અત્યન્તવૈરસ્યં યઃ પદાર્થેષુ દુર્મતિઃ ।
બધ્નાતિ ભાવનાં ભૂયો નરો નાસૌ સ ગર્દભઃ ॥

ઉત્થિતાનુત્થિતાન્ એતાન્ ઇન્દ્રિયાહીન્ પુનઃ પુનઃ ।
હન્યાદ્ વિવેકવજ્રેણ વજ્રેણેવ હરિર્ ગિરીન્ ॥

ઉપશમસુખમ્ આવહેત્ પવિત્રં શમવશતશ્ શમમ્ એતિ સાધુચેતઃ ।
પ્રશમિતમનસસ્ સ્વકે સ્વરૂપે ભવતિ સુખે સ્થિતિર્ ઉત્તમા ચિરાય ॥