મોક્ષોપાય · અધ્યાય 3.138

અથાક્ષિપ્ય વચસ્ તસ્ય તનયસ્ય તદા ભૃગોઃ ।
ઉવાચ ભગવાન્ કાલો વચો ગમ્ભીરનિસ્સ્વનમ્ ॥

સમઙ્ગાતાપસીમ્ એતાં તનું સન્ત્યજ્ય ભાર્ગવ ।
પ્રવિશેમાં તનું સાધો નગરીમ્ ઇવ પાર્થિવઃ ॥

કાલે પૂર્વજયા તન્વા તપઃ કૃત્વાનયા પુનઃ ।
ગુરુત્વમ્ અસુરેન્દ્રાણાં કર્તવ્યં ભવતાનઘ ॥

મહાકલ્પાન્ત આયાતે ભવતા ભાર્ગવી તનુઃ ।
અપુનર્ગ્રહણાયૈષા ત્યાજ્યા પ્રમ્લાનપુષ્પવત્ ॥

જીવન્મુક્તપદં પ્રાપ્તસ્ તન્વા પ્રાક્તનરૂપયા ।
મહાસુરેન્દ્રગુરુતાં કુર્વંસ્ તિષ્ઠ મહામતે ॥

કલ્યાણમ્ અસ્તુ વાં યામો વયં ત્વ્ અભિમતાં દિશમ્ ।
ન કિઞ્ચિદ્ અપિ તચ્ ચિત્તં યસ્ય નાભિમતં ભવેત્ ॥

ઇત્ય્ ઉક્ત્વા મુઞ્ચતોઃ પુષ્પં તયોસ્ સો ઽન્તરધીયત ।
તપ્તાંશુર્ ઇવ રોદસ્યોસ્ સમમ્ અંશુભિર્ અંશુમાન્ ॥

ગતે તસ્મિન્ ભગવતિ તામ્ ઉક્ત્વા ભવિતવ્યતામ્ ।
વિચાર્ય ભાર્ગવો ઽભેદ્યાં નિયતાં નિયતેર્ ગતિમ્ ॥

કાલકારણસંશુષ્કાં ભાવિપુષ્પફલોદયામ્ ।
વિવેશ તાં તનું બાલાં સુલતામ્ ઇવ માધવઃ ॥

સા બ્રાહ્મણતનુર્ ભૂમૌ વિવર્ણવદનાઙ્ગિકા ।
પપાત કમ્પિતા તૂર્ણં છિન્નમૂલા લતા યથા ॥

તસ્યાં પ્રવિષ્ટજીવાયાં પુત્રતન્વાં મહામુનિઃ ।
ચકારાપ્યાયનં મન્ત્રૈસ્ સકમણ્ડલુવારિભિઃ ॥

સર્વનાડ્યસ્ તતસ્ તન્વ્યાસ્ તસ્યાઃ પૂર્ણા વિરેજિરે ।
સરિતઃ પ્રાવૃષીવામ્બુપૂરપૂરિતકોટરાઃ ॥

નલિની પ્રાવૃષીવાસૌ મધાવ્ ઇવ નવા લતા ।
યદા પૂર્ણા તદા તસ્યાઃ પ્રાણાઃ પલ્લવિતા બભુઃ ॥

અથ શુક્રસ્ સમુત્તસ્થૌ વહત્પ્રાણસમીરણઃ ।
રસમારુતસંયોગાદ્ આપૂર્ણ ઇવ વારિદઃ ॥

પુરો ઽભિવાદયામ્ આસ પિતરં પાવનાકૃતિઃ ।
પ્રથમોલ્લાસિતો મેઘસ્ સ્તનિતેનેવ પર્વતમ્ ॥

પિતાથ પ્રાક્તનીં તસ્યાપ્ય્ આલિલિઙ્ગ તનું તતઃ ।
સ્નેહાર્દ્રવૃત્તિર્ જલદશ્ ચિરાદ્ ગિરિતટીમ્ ઇવ ॥

ભૃગુર્ દદર્શ સસ્નેહં પ્રાક્તનીં તાનયીં તનુમ્ ।
મત્તો જાતો ઽયમ્ ઇત્ય્ આસ્થા હરત્ય્ અપિ મહામતિમ્ ॥

મત્પુત્રો ઽયમ્ ઇતિ સ્નેહો ભૃગુમ્ અપ્ય્ અહરત્ તદા ।
પરતાત્મીયતા ચેયં યાવદાકૃતિ ભાવિની ॥

બભૂવતુઃ પિતાપુત્રૌ તાવ્ અથાન્યોઽન્યશોભિતૌ ।
નિશાવસાનમુદિતાવ્ અર્કપદ્માકરાવ્ ઇવ ॥

ચિરસઙ્ગમસમ્બદ્ધાવ્ ઇવ ચક્રાહ્વદમ્પતી ।
ઘનાગમઘનસ્નેહૌ મયૂરજલદાવ્ ઇવ ॥

ચિરકાલદૃઢોત્કણ્ઠયોગ્યયા કથયા તયા ।
સ્થિત્વા તત્ર મુહૂર્તં તાવ્ અથોત્થાય મહામતી ॥

સમઙ્ગાદ્વિજદેહં તં ભસ્મસાત્ તત્ર ચક્રતુઃ ।
કો હિ નામ જગજ્જાત આચારં નાનુતિષ્ઠતિ ॥

એવં તૌ કાનને તસ્મિન્ પાવને ભૃગુભાર્ગવૌ ।
સંસ્થિતૌ તપસા દીપ્તૌ દિવીવ શશિભાસ્કરૌ ॥

ચેરતુર્ જ્ઞાતવિજ્ઞેયૌ જીવન્મુક્તૌ જગદ્ગુરૂ ।
દેશકાલદશૌઘેષુ સુગમં સુસ્થિરં તપઃ ॥

અથાસુરગુરુત્વં સ શુક્રઃ કાલેન લબ્ધવાન્ ।
ભૃગુર્ અપ્ય્ આત્મનો યોગ્યે પદે ઽતિષ્ઠદ્ અનામયે ॥

શુક્રો ઽસૌ પ્રથમમ્ ઇતિ ક્રમેણ જાત એતસ્માત્ પરમપદાદ્ ઉદારકીર્તિઃ ।
સ્વેનાશુ સ્મૃતિપદવિભ્રમેણ પશ્ચાદ્ એવં ચ પ્રવિલુલિતો દશાન્તરેષુ ॥