મોક્ષોપાય · અધ્યાય 3.131

ઇતિ ચિન્તયતસ્ તસ્ય શુક્રસ્ય પિતુર્ અગ્રતઃ ।
જગામાતિતરાં કાલો બહુસંવત્સરાત્મકઃ ॥

અથ કાલેન મહતા પવનાતપજર્જરઃ ।
કાયસ્ તસ્ય પપાતોર્વ્યાં છિન્નમૂલ ઇવ દ્રુમઃ ॥

મનસ્ તુ ચઞ્ચલાભોગં તાસુ તાસુ દશાસુ ચ ।
બભ્રામાતિવિચિત્રાસુ વનરાજિષ્વ્ ઇવૈણકઃ ॥

ભ્રાન્તમ્ ઉદ્ભ્રાન્તમ્ અભિતશ્ ચક્રાર્પિતમ્ ઇવાકુલમ્ ।
મનસ્ તસ્ય વિશશ્રામ સમઙ્ગાસરિતસ્ તટે ॥

અનન્તવૃત્તાન્તઘનાં પેલવાં સુદૃઢામ્ અપિ ।
તાં સંસૃતિદશાં શુક્રો વિદેહો ઽનુભવન્ સ્થિતઃ ॥

મન્દરાચલસાનુસ્થા સા તનુસ્ તસ્ય ધીમતઃ ।
તાપપ્રસરસંશુષ્કા ચર્મશેષા બભૂવ હ ॥

શારીરરન્ધ્રપ્રવહદ્વાતશીત્કારરૂપયા ।
ચેષ્ટાદુઃખક્ષયાનન્દાત્ કાકલ્યેવ સ્મ ગાયતિ ॥

પ્રાણાનુસ્મરણોચ્છ્વાસમ્ ઇવ બાષ્પં સ્મ મુઞ્ચતિ ।
ચણ્ડાનિલવિલાસેન લુલિત્વા વનભૂમિષુ ॥

મનોવરાકમ્ અવટે લુઠિતં ભવભૂમિષુ ।
હસન્તીવાતિશુભ્રાભ્રસિતયા દન્તમાલયા ॥

દર્શયન્તી સ્વકં શૂન્યં વપુર્ અક્ષ્ણોર્ અકૃત્રિમમ્ ।
મુખારણ્યજરત્કૂપરૂપયા ગર્તશોભયા ॥

તાપોપતપ્તા સંસિક્તા વર્ષાજલભરેણ સા ।
પાંસુના પવનોત્થેન દુષ્કૃતેનેવ રૂષિતા ॥

શુષ્કકાષ્ઠવદ્ આલોલા પાતેષુ કૃતઝાઙ્કૃતા ।
ધારાનિકરપાતેન વિનુન્ના જલદાગમે ॥

પ્રાવૃણ્નિર્ઝરપૂરેણ પ્લુતા ગિરિનદીતટે ।
તારમારુતશીત્કારા વનોપલ ઇવ સ્થિતા ॥

વક્રા શુષ્કાન્ત્રતન્ત્રી ચ પૂતા ઝાઙ્કારકારિણી ।
અરણ્યલક્ષ્મીવીણેવ શૂન્યચર્મમયોદરી ॥

રાગદ્વેષવિહીનત્વાત્ તસ્ય પુણ્યાશ્રમસ્ય તુ ।
મહાતપસ્ત્વાચ્ ચ ભૃગોર્ ન ભુક્તા મૃગપક્ષિભિઃ ॥

યમનિયમકૃશીકૃતાઙ્ગયષ્ટેશ્ ચરતિ તપસ્ સ્મ ભૃગૂદ્વહસ્ય ચેતઃ ।
તનુર્ અથ પવનાપનીતરક્તા ચિરમ્ અલુઠન્ મહતીષુ સા શિલાસુ ॥