મોક્ષોપાય · અધ્યાય 1.14

મુધૈવાભ્યુત્થિતો મોહાન્ મુધૈવ પરિવર્ધતે ।
મિથ્યામયેન ભીતો ઽસ્મિ દુરહઙ્કારશત્રુણા ॥

અહઙ્કારવશાદ્ એવ દોષકોશઃ કદર્થનામ્ ।
દદાતિ દીનદીનાનાં સંસારો વિવિધાકૃતિઃ ॥

અહઙ્કારવશાદ્ આપદ્ અહઙ્કારાદ્ દુરાધયઃ ।
અહઙ્કારવશાદ્ ઈહાપ્ય્ અહઙ્કારો મહામયઃ ॥

તમ્ અહઙ્કારમ્ આશ્રિત્ય પરમં ચિરવૈરિણમ્ ।
ન ભુઞ્જે ન પિબામ્ય્ અમ્ભઃ કિમ્ ઉ ભોગાન્ ભજે મુને ॥

સંસારરજ્જુર્ આદીર્ઘા મમ ચેતસિ મોહિની ।
તતાહઙ્કારદોષેણ કિરાતેનેવ વાગુરા ॥

યાનિ દુઃખાનિ દીર્ઘાણિ વિષમાણિ મહાન્તિ ચ ।
અહઙ્કારાત્ પ્રસૂતાનિ તાન્ય્ અગાત્ ખદિરા ઇવ ॥

શમેન્દોસ્ સૈંહિકેયાસ્યં ગુણપદ્મમહાશનિમ્ ।
જ્ઞાનમેઘશરત્કાલમ્ અહઙ્કારં ત્યજામ્ય્ અહમ્ ॥

નાહં રામો ન મે વાઞ્છા ભાવેષુ ચ ન મે મનઃ ।
શાન્ત આસિતુમ્ ઇચ્છામિ સ્વાત્મન્ય્ એવ જિનો યથા ॥

અહઙ્કારવશાદ્ યદ્ યન્ મયા ભુક્તં કૃતં હૃતમ્ ।
સર્વં તુ તદ્ અવસ્ત્વ્ એવ વસ્ત્વ્ અહઙ્કારરિક્તતા ॥

અહમ્ ઇત્ય્ અસ્તિ ચેદ્ બ્રહ્મન્ન્ અહમ્ આપદિ દુઃખિતઃ ।
સમ્પત્સુ સુખિતસ્ તસ્માદ્ અનહઙ્કારિતાધનઃ ॥

અહઙ્કારં પરિત્યજ્ય મુને શાન્તમનાસ્ તથા ।
અવતિષ્ઠે ગતોદ્વેગો ભોગૌઘે ઽભઙ્ગુરાસ્પદમ્ ॥

બ્રહ્મન્ યાવદ્ અહઙ્કારવારિદઃ પ્રવિજૃમ્ભતે ।
તાવદ્ વિકાસમ્ આયાતિ તૃષ્ણાકુટજમઞ્જરી ॥

અહઙ્કારઘને શાન્તે તૃષ્ણાનવતડિલ્લતા ।
શાન્તદીપશિખાવૃત્ત્યા ક્વાપિ યાસ્યતિ સત્વરમ્ ॥

અહઙ્કારમહાવિન્ધ્યે મનોમત્તમતઙ્ગજઃ ।
વિસ્ફૂર્જતિ ઘનાસ્ફોટૈસ્ સ્તનિતૈર્ ઇવ વારિદઃ ॥

ઇહ દેહમહાદર્યાં ઘનાહઙ્કારકેસરી ।
યો ઽયમ્ ઉલ્લસતિ સ્ફારં તેનેદં જગદ્ આતતમ્ ॥

તૃષ્ણાતન્તુલવપ્રોતા બહુજન્મપરમ્પરા ।
અહઙ્કારોગ્રશિડ્ગેન કણ્ઠે મુક્તાવલી કૃતા ॥

પુત્રદારકલત્રાણિ તન્ત્રં મન્ત્રવિવર્જિતમ્ ।
પ્રસારિતમ્ અનેનેહ દુરહઙ્કારવૈરિણા ॥

પ્રમાર્જિતે ઽહમ્ ઇત્ય્ અસ્મિન્ પદે સ્વયમ્ અખિદ્યતા ।
પ્રમાર્જિતા ભવન્ત્ય્ એવ સર્વ એવ દુરાધયઃ ॥

અહમ્ ઇત્ય્ અમ્બુદે શાન્તે શનૈસ્ સુશમશાલિનિ ।
મનોમનનસમ્મોહમિહિકા ક્વાપિ ગચ્છતિ ॥

નિરહઙ્કારવૃત્તેર્ મે મૌર્ખ્યાચ્ છોકેન સીદતઃ ।
યત્ કિઞ્ચિદ્ ઉચિતં બ્રહ્મંસ્ તદ્ આખ્યાતુમ્ ઇહાર્હસિ ॥

સર્વાપદાં નિલયમ્ અધ્રુવમ્ અન્તરસ્થમ્ ઉન્મુક્તમ્ ઉત્તમગુણેન ન સંશ્રયામિ ।
યત્નાદ્ અહઙ્કૃતિપદં પરિતો ઽતિદુઃખં શેષેણ માં સમનુશાધિ મહાનુભાવ ॥