મોક્ષોપાય · અધ્યાય 1.12

ઇયમ્ અસ્મિન્ વિનોદાય સંસારે પરિકલ્પિતા ।
શ્રીર્ મુને પરિમોહાય સાપિ નૂનમ્ અનર્થદા ॥

ઉલ્લાસબહુલાન્ અન્તઃ કલ્લોલાન્ અક્રમાકુલાન્ ।
જડાન્ પ્રસ્રવતિ સ્ફારાન્ પ્રાવૃષીવ તરઙ્ગિણી ॥

ચિન્તાદુહિતરો બહ્વ્યો ભૂરિદુર્લલિતેરિતાઃ ।
ચઞ્ચલાઃ પ્રભવન્ત્ય્ અસ્યાસ્ તરઙ્ગાસ્ સરિતો યથા ॥

એષા હિ પદમ્ એકત્ર ન નિબધ્નાતિ દુર્ભગા ।
મુગ્ધેવાનિયતાચારમ્ ઇતશ્ ચેતશ્ ચ ધાવતિ ॥

જનયન્તી પરં દાહં પરામૃષ્ટાઙ્ગિકા સતી ।
વિનાશમ્ એવ ધત્તે ઽન્તર્ દીપલેખેવ કજ્જલમ્ ॥

ગુણાગુણવિચારેણ વિનૈવ કિલ પાર્શ્વગમ્ ।
રાજપ્રકૃતિવન્ મૂઢા દુરારૂઢાવલમ્બતે ॥

કર્મણા તેન તેનૈષા વિસ્તારમ્ ઉપગચ્છતિ ।
દોષાશીવિષવેગસ્ય યત્ ક્ષીરવિસરાયતે ॥

તાવચ્ છીતમૃદુસ્પર્શઃ પરે સ્વે ચ જને જનઃ ।
વાત્યયેવ હિમં યાવચ્ છ્રિયા ન પરુષીકૃતઃ ॥

પ્રાજ્ઞાશ્ શૂરાઃ કૃતજ્ઞાશ્ ચ પેશલા મૃદવશ્ ચ યે ।
પાંસુમુષ્ટ્યેવ મણયશ્ શ્રિયા તે મલિનીકૃતાઃ ॥

ન શ્રીસ્ સુખાય ભગવન્ દુઃખાયૈવ હિ કલ્પતે ।
ગુપ્તં વિનાશનં ધત્તે મૃતિં વિષલતા યથા ॥

શ્રીમાન્ અજનનિન્દ્યશ્ ચ શૂરશ્ ચાપ્ય્ અવિકત્થનઃ ।
સમદૃષ્ટિઃ પ્રભુશ્ ચૈવ દુર્લભાઃ પુરુષાસ્ ત્રયઃ ॥

એષા હિ વિષમા દુઃખભોગિનાં ગહના ગુહા ।
ઘનમોહગજેન્દ્રાણાં વિન્ધ્યશૈલમહાટવી ॥

સત્કાર્યપદ્મરજની દુઃખકૈરવચન્દ્રિકા ।
સદ્દૃષ્ટિદીપિકાવાત્યા કલ્લોલૌઘતરઙ્ગિણી ॥

સમ્ભ્રમાભ્રાદ્રિપદવી વિષાદવિષવર્ધિની ।
કેદારિકા વિકલ્પાનાં ખદા કુભયભોગિનામ્ ॥

હિમં વૈરાગ્યવલ્લીનાં વિકારોલૂકયામિની ।
રાહુદંષ્ટ્રા વિવેકેન્દોસ્ સૌજન્યામ્ભોજચન્દ્રિકા ॥

ઇન્દ્રાયુધવદ્ આલોલનાનારાગમનોહરા ।
લોલા તડિદ્ ઇવોત્પન્નધ્વંસિની જડસંશ્રયા ॥

ચપલા વર્જિતા રત્યા નકુલી નકુલીનજા ।
વિપ્રલમ્ભનતાત્પર્યહેતૂગ્રમૃગતૃષ્ણિકા ॥

લહરીવૈકરૂપેણ ક્ષણં પદમ્ અકુર્વતી ।
ચલા દીપશિખેવાતિદુર્જ્ઞેયાગતિગોચરા ॥

સિંહીવ વિગ્રહવ્યગ્રકરીન્દ્રકુલપાતિની ।
ખડ્ગધારેવ શિશિરા તીક્ષ્ણા તીક્ષ્ણાશયાશ્રયા ॥

નાનયોપહતાર્થિન્યા દુરાધિપરિપીનયા ।
પશ્યામ્ય્ અભવ્યયા લક્ષ્મ્યા કિઞ્ચિદ્ દુઃખાદ્ ઋતે સુખમ્ ॥

દ્વારેણોત્સારિતા લક્ષ્મીઃ પુનર્ એતિ તમોઽરિણા ।
અહો વત હૃતસ્થાના નિર્લજ્જા દુર્જનાસ્પદા ॥

મનોરમા કર્ષતિ ચિત્તવૃત્તિં કદર્યસાધ્યા ક્ષણભઙ્ગુરા ચ ।
વ્યાલાવલીગર્ભનિવૃત્તદેહા શ્વભ્રોત્થિતા પુષ્પલતેવ લક્ષ્મીઃ ॥