મત્સ્ય પુરાણ · અધ્યાય 176

એવમસ્ત્વિતિ સંહૃષ્ટઃ શક્રસ્ત્રિદશવર્ધનઃ
સંદિદેશાગ્રતઃ સોમં યુદ્ધાય શિશિરાયુધમ્ ॥

ગચ્છ સોમ સહાયત્વં કુરુ પાશધરસ્ય વૈ
અસુરાણાં વિનાશાય જયાર્થં ચ દિવૌકસામ્ ॥

ત્વં મત્તઃ પ્રતિવીર્યશ્ચ જ્યોતિષાં ચેશ્વરેશ્વરઃ
ત્વન્મયં સર્વલોકેષુ રસં રસવિદો વિદુઃ ॥

ક્ષયવૃદ્ધી તવ વ્યક્તે સાગરસ્યેવ મણ્ડલે
પરિવર્તસ્યહોરાત્રં કાલં જગતિ યોજયન્ ॥

લોકચ્છાયામયં લક્ષ્મ તવાઙ્કઃ શશસંનિભઃ
ન વિદુઃ સોમ દેવાપિ યે ચ નક્ષત્રયોનયઃ ॥

ત્વમાદિત્યપથાદૂર્ધ્વં જ્યોતિષાં ચોપરિ સ્થિતઃ
તમઃ પ્રોત્સાર્ય મહસા ભાસયસ્યખિલં જગત્ ॥

શ્વેતભાનુર્ હિમતનુર્ જ્યોતિષામ્ અધિપઃ શશી
અધિકૃત્ કાલયોગાત્મા ઇષ્ટો યજ્ઞરસો ઽવ્યયઃ ॥

ઓષધીશઃ ક્રિયાયોનિર્ હરશેખરભાક્તથા
શીતાંશુરમૃતાધારશ્ ચપલઃ શ્વેતવાહનઃ ॥

ત્વં કાન્તિઃ કાન્તિવપુષાં ત્વં સોમઃ સોમપાયિનામ્
સૌમ્યસ્ત્વં સર્વભૂતાનાં તિમિરઘ્નસ્ત્વમ્ ઋક્ષરાટ્ ॥

તદ્ગચ્છ ત્વં મહાસેન વરુણેન વરૂથિના
શમય ત્વાસુરીં માયાં યયા દહ્યામ સંયુગે ॥

યન્માં વદસિ યુદ્ધાર્થે દેવરાજ વરપ્રદ
એષ વર્ષામિ શિશિરં દૈત્યમાયાપકર્ષણમ્ ॥

એતાન્મચ્છીતનિર્દગ્ધાન્ પશ્ય ત્વં હિમવેષ્ટિતાન્
વિમાયાન્વિમદાંશ્ચૈવ દૈત્યસિંહાન્મહાહવે ॥

ઇત્યુક્ત્વા તારકાધીશઃ સજલેશઃ શિવોદકૈઃ
પ્લાવયામાસ સૈન્યાનિ સુરાણાં શાન્તિવૃદ્ધયે ॥

તેષાં હિમકરોત્સૃષ્ટાઃ સપાશા હિમવૃષ્ટયઃ
વેષ્ટયન્તિ સ્મ તાન્ઘોરાન્ દૈત્યાન્મેઘગણા ઇવ ॥