માતૃકાભેદતન્ત્ર · ભાગ 2130

ન ભક્ષેદ્ યદિ મોહેન ન યજ્ઞફલભાગ્ ભવેત્ ॥ મ્ભ્ત્_10.18
ત્યાજ્યં દ્રવ્યં કથં દેવિ મહાદેવ્યૈ નિવેદયેત્ ।
બ્રહ્મરૂપં મહાતન્ત્રં મમ વક્ત્રાદ્ વિનિર્ગતમ્ ॥ મ્ભ્ત્_10.19
સ પૂતઃ સર્વપાપેભ્યો યદિ ચૈકાક્ષરં શ્રુતમ્ ।
મહાભક્તિયુતો ભૂત્વા શૃણોતિ પટલં યદિ ॥ મ્ભ્ત્_10.20
કિં તસ્ય ધ્યાનપૂજાયાં તીર્થસ્નાનેન તસ્ય કિમ્ ।
શબ્દબ્રહ્મમયં જ્ઞાત્વા સમસ્તં યદિ ચણ્ડિકે ॥ મ્ભ્ત્_10.21
કેવલં શ્રવણેનૈવ સ સિદ્ધો નાત્ર સંશયઃ ।
અષ્ટાદશપુરાણાનાં શ્રવણેનૈવ યત્ ફલમ્ ॥ મ્ભ્ત્_10.22
ચતુર્વેદેન સાઙ્ગેન શ્રવણેનૈવ યતઃ ફલમ્ ।
અસ્ય તન્ત્રસ્ય દેવેશિ કલાં નાર્હન્તિ ષોડશીમ્ ॥ મ્ભ્ત્_10.23
બ્રહ્મરૂપમ્ ઇદં તન્ત્રં સારાત્ સારં પરાત્ પરમ્ ॥ મ્ભ્ત્_10.24
માતૃકાભેદતન્ત્ર, એકાદશઃ પટલઃ
શ્રીચણ્ડિકોવાચ ।
પ્રાસાદં મણ્ડપં વાપિ યદિ દેવ્યૈ નિવેદયેત્ ।
વિધાનં તસ્ય માહાત્મ્યં વદ મે પરમેશ્વર ॥ મ્ભ્ત્_11.1
કૂપાદિકં મહાદેવ યદિ દેવ્યૈ નિવેદયેત્ ।
વિધાનં તસ્ય માહાત્મ્યં વદ મે પરમેશ્વર ॥ મ્ભ્ત્_11.2
શ્રીશઙ્કર ઉવાચ ।
શૃણુ દેવિ પ્રવક્ષ્યામિ યેન પ્રાસાદમ્ ઉત્સૃજેત્ ।
તસ્યૈવ પશ્ચિમે ભાગે વેદિકાં ચતુરસ્રકામ્ ॥ મ્ભ્ત્_11.3
પ્રકુર્યાદ્ બહુયત્નેન વસ્ત્રેણ વેષ્ટનં ચરેત ।
તદભાવે મહેશાનિ તૃણેનૈનં ચ વેષ્ટયેત્ ॥ મ્ભ્ત્_11.4
કુમ્ભયુગ્મં સ્થાપયિત્વા ક્ષૌમવસ્ત્રેણ વેષ્ટયેત્ ।
યુગ્મં યુગ્મં ક્ષૌમવસ્ત્રં કુમ્ભયુગ્મે નિયોજયેત્ ॥ મ્ભ્ત્_11.5
ઈશકુમ્ભે યજેદ્ દેવીમ્ આગ્નેયામ્ અગ્નિદૈવતમ્ ।
ચતુઃષષ્ટ્યુપચારેણ પૂજયેદ્ ઇષ્ટદેવતામ્ ॥ મ્ભ્ત્_11.6
અભાવે પૂજયેદ્ દેવીં તદર્ધેન પ્રયત્નતઃ ।
અથવા પરમેશાનિ યથાશક્ત્યુપચારતઃ ॥ મ્ભ્ત્_11.7
પૂજયેદ્ બહુયત્નેન તતો હોમાદિકં ચરેત્ ।
આગમોક્તેન વિધિના કુર્યાત્ તત્ર કુશણ્ડિકામ્ ॥ મ્ભ્ત્_11.8
ત્રિમધ્વક્તેન દેવેશિ બિલ્વપત્રેણ હોમયેત્ ।
સહસ્રં હોમયેન્ મન્ત્રી શતન્યૂનં ન કારયેત્ ॥ મ્ભ્ત્_11.9
પૂર્ણાહુતિં તતો દત્ત્વા તતો વાક્યં સમાચરેત્ ।
અદ્યેત્યાદિ સમુચ્ચાર્યં સૌરમાસં સમુચ્ચરેત્ ॥ મ્ભ્ત્_11.10
તિથિગોત્રં ચામુકો ઽહં ધર્માર્થકામમ્ એવ વા ।
પ્રાપ્તયે પરમેશાનિ તતો મૂલં સમુચ્ચરેત્ ॥ મ્ભ્ત્_11.11
દેવતાયૈ નમઃ પશ્ચાદ્ દક્ષિણાં દાપયેદ્ ગુરૌ ।
કુમ્ભતોયેન દેવેશિ સ્નાપયેદ્ યજમાનકમ્ ॥ મ્ભ્ત્_11.12
સુરાસ્ ત્વ્ આદીન્ સમુચ્ચાર્ય શાન્તિં કુર્યાત્ તતો ગુરુઃ ।

સર્વાદૌ ગુરુદેવસ્ય વરણં કારયેત્ સુધીઃ ॥ મ્ભ્ત્_11.13
સુવર્ણં ચમ્પકાકારં કર્ણયુગ્મે નિવેદયેત્ ।
ચતુષ્કોણયુતં સ્વર્ણં ગ્રીવાયાં પરિયોજયેત્ ॥ મ્ભ્ત્_11.14
ઉષ્ણીષં ચ તતો દદ્યાત્ કણ્ઠે માલાં નિયોજયેત્ ।
તાડયુગ્મં તતો બાહૌ વલયં મણિબન્ધકે ॥ મ્ભ્ત્_11.15
અઙ્ગુલ્યામ્ અઙ્ગુરી દેયા દિવ્યવસ્ત્રં નિયોજયેત્ ।
એવં હિ વરણં કૃત્વા કર્મયોગ્યં વિચિન્તયેત્ ॥ મ્ભ્ત્_11.16
ગુરું વા ગુરુપુત્રં વા વરયેદ્ યત્નતઃ સુધીઃ ।
સદસ્યં ન હિ કર્તવ્યં તન્ત્રધારં ન તત્ર વૈ ॥ મ્ભ્ત્_11.17
બ્રહ્માણં ન હિ કર્તવ્યં કેવલં વરયેદ્ ગુરુમ્ ।
ગુરોર્ ભૃત્યો મહેશાનિ ભૈરવો નાત્ર સંશયઃ ॥ મ્ભ્ત્_11.18
સ્વીયેન પરિધાનેન વાસસા તોષયેત્ સ્વયમ્ ।
સ્વયં હોતા ભવેદ્ વિપ્રો ગુરોર્ આજ્ઞાનુસારતઃ ॥ મ્ભ્ત્_11.19
માયાબીજં સમુચ્ચાર્ય આધારશક્તયે નમઃ ।
અનેન મનુના દેવિ વેદિસંસ્કારમ્ આચરેત્ ॥ મ્ભ્ત્_11.20
ભૂરસીત્યાદિમન્ત્રેણ ઘટયુગ્માભિમન્ત્રિતમ્ ।
અસ્ત્રાન્તેનૈવ મૂલેન ઉષ્ણીષં પરિયોજયેત્ ॥ મ્ભ્ત્_11.21
વેદોક્તં ચૈવ સ્મૃત્યુક્તં મન્ત્રં ન યોજયેત્ સુધીઃ ।
એવં કૂપાદિદાનેષુ કર્તવ્યં પરમેશ્વરિ ॥ મ્ભ્ત્_11.22
અન્યત્ સર્વં સમાનં હિ પ્રાસાદાદિસ્થલે પુનઃ ।
કૂપાદિયોજનં કુર્યાત્ યષ્ટિપ્રોતનમ્ આચરેત્ ॥ મ્ભ્ત્_11.23
ચતુર્હસ્તપ્રમાણં ચ મધ્યભાગે તુ પ્રોતનમ્ ।
મૂલમન્ત્રં સમુચ્ચાર્ય તતો વહ્નિવધૂં ન્યસેત્ ॥ મ્ભ્ત્_11.24
તતો યષ્ટિં સમુચ્ચાર્ય પોતયામિ વદેત્ સુધીઃ ।
તત્ર સંતરણં ધેનું નૈવ કુર્યાદ્ વિચક્ષણઃ ॥ મ્ભ્ત્_11.25
ધેનુસંતરણેનૈવ ફલહાનિઃ પ્રજાયતે ।
સ્વર્ણં રૂપ્યં પ્રવાલં ચ દક્ષિણાં પરિયોજયેત ॥ મ્ભ્ત્_11.26
સ્નાપયિત્વા કુમ્ભતોયૈઃ શાન્તિં કુર્યાત્ તતો ગુરુઃ ॥ મ્ભ્ત્_11.27
અનેનૈવ વિધાનેન કૂપાદ્યુત્સર્ગમ્ આચરેત્ ।
વાપીકૂપતડાગાદિ હ્ય્ અનેનોત્સર્ગમ્ આચરેત્ ॥ મ્ભ્ત્_11.28
દીર્ઘિકાં ચ પુષ્કરિણીં હ્ય્ અનેનૈવ જલાશયમ્ ।
ઉત્સૃજ્ય પરયા ભક્ત્યા મહાદેવ્યૈ પ્રયત્નતઃ ॥ મ્ભ્ત્_11.29
પુરુષં સપ્તમં કાન્તે પિતૃવંશે ચ માતરિ ।
સપ્તમં પુરુષં કાન્તે માતૃવંશે સમં પ્રિયે ॥ મ્ભ્ત્_11.30
કૈલાસે નિવસેન્ નિત્યં દેવ્યા વરપ્રસાદતઃ ।
સ્વયં દેવસ્વરૂપશ્ ચ જીવન્મુક્તો ન સંશયઃ ॥ મ્ભ્ત્_11.31
અશ્વમેધસહસ્રેણ વાજપેયશતેન ચ ।
યત્ ફલં લભતે દેવિ તસ્માલ્ લક્ષગુણં ભવેત્ ॥ મ્ભ્ત્_11.32
મેરુતુલ્યં સુવર્ણં તુ બ્રાહ્મણે વેદપારગે ।
દત્ત્વા યત્ ફલમ્ આપ્નોતિ તસ્માલ્ લક્ષગુણં ભવેત્ ॥ મ્ભ્ત્_11.33

પૂર્ણશસ્યેન દેવેશિ સપ્તદ્વીપાં વસુંધરામ્ ।
પ્રદદ્યાદ્ બહુયત્નેન બ્રાહ્મણે વેદપારગે ॥ મ્ભ્ત્_11.34
તસ્માલ્ લક્ષગુણં પુણ્યમ્ અનેન પરમેશ્વરિ ॥ મ્ભ્ત્_11.35
સદક્ષિણં વ્રતં સર્વં દાનં યદ્ વેદસંમતમ્ ।
તસ્માલ્ લક્ષગુણં પુણ્યમ્ અનેન પરમેશ્વરિ ॥ મ્ભ્ત્_11.36
શ્રીચણ્ડિકોવાચ ।
યજ્ઞસૂત્રધારણેન ભૂપૂજ્યો નાત્ર સંશયઃ ।
ઇદાનીં યજ્ઞસૂત્રસ્ય વિધાનં મયિ કથ્યતામ્ ॥ મ્ભ્ત્_11.37
શ્રીશંકર ઉવાચ ।
યજ્ઞસૂત્રસ્ય યન્ માનં તચ્ છૃણુષ્વ વરાનને ।
ઋગ્વેદી ધારયેત્ સૂત્રં નાભેર્ ઊર્ધ્વં સ્તનાદ્ અધઃ ॥ મ્ભ્ત્_11.38
યજુષાં સૂત્રમાનં હિ આશ્ચર્યં શૈલજે પરમ્ ।
બાહુમૂલપ્રમાણેન યજ્ઞસૂત્રં દ્વિજાતિભિઃ ।
ધારણીયં પ્રયત્નેન નાન્યદ્ દૈર્ઘ્યં કદાચન ॥ મ્ભ્ત્_11.39
સામગસ્ય યજ્ઞસૂત્રં ત્રિવિધં વરવર્ણિનિ ।
બ્રહ્મરન્ધ્રાન્ નાભિદેશપર્યન્તં યજ્ઞસૂત્રકમ્ ॥ મ્ભ્ત્_11.40
અથવાપિ ચ ગ્રીવાયામ્ આરોપ્ય નાભિં સંસ્પૃશેત્ ।
તસ્માત્ પૃષ્ઠાન્ મેરુદણ્ડપર્યન્તં યજ્ઞસૂત્રકમ્ ॥ મ્ભ્ત્_11.41
અથવા પરમેશાનિ પ્રકારાન્તરકં શૃણુ ।
ગ્રીવાયા દક્ષિણાઙ્ગુષ્ઠપર્યન્તં યજ્ઞસૂત્રકમ્ ॥ મ્ભ્ત્_11.42
અથવા ધારયેત્ સૂત્રં યત્નેન યજુષાં મતમ્ ।
અથવા ધારયેત્ સૂત્રં સામગસ્ય પ્રમાણતઃ ॥ મ્ભ્ત્_11.43
અથર્વી ધારયેદ્ યજ્ઞસૂત્રં પરમમોહનમ્ ।
આજ્ઞાચક્રાન્ નાભિદેશપર્યન્તં યજ્ઞસૂત્રકમ્ ॥ મ્ભ્ત્_11.44
એતત્ સંકેતમ્ અજ્ઞાત્વા યઃ કુર્યાત્ સૂત્રધારણમ્ ।
સ ચણ્ડાલસમો દેવિ યદિ વ્યાસસમો ભવેત્ ॥ મ્ભ્ત્_11.45
માતૃકાભેદતન્ત્ર, દ્વાદશઃ પટલઃ
શ્રીશંકર ઉવાચ ।
અથાતઃ સમ્પ્રવક્ષ્યામિ પૂજાધારં સુદુર્લભમ્ ॥ મ્ભ્ત્_12.1
શાલગ્રામે મણૌ યન્ત્રે પ્રતિમાયાં ઘટે જલે ॥ મ્ભ્ત્_12.2
પુસ્તિકાયાં ચ ગઙ્ગાયાં શિવલિઙ્ગે પ્રસૂનકે ।
શાલગ્રામે શતગુણં મણૌ તદ્વત્ ફલં લભેત્ ॥ મ્ભ્ત્_12.3
યન્ત્રે લક્ષગુણં પુણ્યં મૂર્તૌ લક્ષં સુલોચને ।
ઘટે ચૈકગુણં પુણ્યં જલે ચૈકગુણં પ્રિયે ॥ મ્ભ્ત્_12.4
પુસ્તિકાયાં સહસ્રં તુ ગઙ્ગાયાં તત્સમં ફલમ્ ।
શિવલિઙ્ગે હ્ય્ અનન્તં હિ વિના પાર્થિવલિઙ્ગકે ॥ મ્ભ્ત્_12.5
પુષ્પયન્ત્રે મહેશાનિ પૂજનાત્ સર્વસિદ્ધિભાક્ ।
શાલગ્રામે ચ પૂજાયાં ન લિખેદ્ યન્ત્રમ્ ઉત્તમમ્ ॥ મ્ભ્ત્_12.6
મણૌ સ્થિતે મહેશાનિ ન લિખેદ્ યન્ત્રમ્ ઉત્તમમ્ ।
પ્રતિમાયાં ચ પૂજાયાં ન લિખેદ્ યન્ત્રમ્ ઉત્તમમ્ ॥ મ્ભ્ત્_12.7

પ્રતિમાયાશ્ ચ પુરતો ઘટં સંસ્થાપ્ય યત્નતઃ ।
પરિવારાન્ યજેત્ તત્ર ઘટે તુ પરમેશ્વરિ ॥ મ્ભ્ત્_12.8
યન્ત્રાધિષ્ઠાતૃદેવાંશ્ ચ ઘટે યન્ત્રે પ્રપૂજયેત્ ।
સમસ્તદેવતારૂપં ઘટં તુ પરિચિન્તયેત્ ।
સુરદ્રુમસ્વરૂપો ઽયં ઘટો હિ પરમેશ્વરિ ॥ મ્ભ્ત્_12.9
જન્મસ્થાનં મહાયન્ત્રં યદિ કુર્યાત્ તુ સાધકઃ ।
તત્ર મૂર્તિં ન કુર્યાત્ તુ કદાચિદ્ અપિ મોહતઃ ॥ મ્ભ્ત્_12.10
યદિ મૂર્તિં પ્રકુર્યાત્ તુ તત્ર યન્ત્રં ન કારયેત્ ।
યદિ કુર્યાત્ તુ મોહેન યજેદ્ વારદ્વયં પ્રિયે ॥ મ્ભ્ત્_12.11
દ્વિગુણં પૂજનં તત્ર દ્વિગુણં બલિદાનકમ્ ।
દ્વિગુણં પ્રજપેન્ મન્ત્રં દ્વિગુણં હોમયેત્ સુધીઃ ॥ મ્ભ્ત્_12.12
અન્યથા વિફલા પૂજા વિફલં બલિદાનકમ્ ।
સર્વં હિ વિફલં યસ્માત્ તસ્માદ્ યન્ત્રં ન કારયેત્ ॥ મ્ભ્ત્_12.13
ઇતિ તે કથિતં કાન્તે પૂજાધારં સુદુર્લભમ્ ॥ મ્ભ્ત્_12.14
અથાતઃ સમ્પ્રવક્ષ્યામિ શિવલિઙ્ગસ્ય લક્ષણમ્ ।
પાર્થિવે શિવપૂજાયાં સર્વસિદ્ધિયુતો ભવેત્ ॥ મ્ભ્ત્_12.15
પાષાણે શિવપૂજાયાં દ્વિગુણં ફલમ્ ઈરિતમ્ ।
સ્વર્ણલિઙ્ગે ચ પૂજાયાં શત્રૂણાં નાશનં મતમ્ ॥ મ્ભ્ત્_12.16
સર્વસિદ્ધીશ્વરો રૌપ્યે ફલં તસ્માચ્ ચતુર્ગુણમ્ ।
તામ્રે પુષ્ટિં વિજાનીયાત્ કાંસ્યે ચ ધનસંચયમ્ ॥ મ્ભ્ત્_12.17
પારદસ્ય ચ માહાત્મ્યં પુરૈવ કથિતં મયા ।
ગઙ્ગાયાં ચ લક્ષગુણં લાક્ષાયાં રોગવાન્ ભવેત્ ॥ મ્ભ્ત્_12.18
સ્ફાટિકે સર્વસિદ્ધિઃ સ્યાત્ તથા મારકતે પ્રિયે ।
લૌહલિઙ્ગે રિપોર્ નાશં કામદં ભસ્મલિઙ્ગકે ॥ મ્ભ્ત્_12.19
વાલુકાયાં કામ્યસિદ્ધિર્ ગોમયે ઋતુહિંસનમ્ ।
સર્વલિઙ્ગસ્ય માહાત્મ્યં ધર્માર્થકામમોક્ષદમ્ ॥ મ્ભ્ત્_12.20
આધારભેદે યત્ પુણ્યં ચાધિકં કથિતં તુ તે ।
અતિરિક્તફલાન્ય્ એતદ્ધારસ્ય સુલોચને ॥ મ્ભ્ત્_12.21
શિવસ્ય પૂજનાદ્ દેવિ ચતુર્વર્ગાધિપો ભવેત્ ।
અષ્ટૈશ્વર્યયુતો મર્ત્યઃ શમ્ભુનાથસ્ય પૂજનાત્ ॥ મ્ભ્ત્_12.22
સ્વયં નારાયણઃ પ્રોક્તો યદિ શમ્ભું પ્રપૂજયેત્ ।
સ્વર્ગે મર્ત્યે ચ પાતાલે યે દેવાઃ સંસ્થિતાઃ સદા ।
તેષાં પૂજા ભવેદ્ દેવિ શમ્ભુનાથસ્ય પૂજનાત્ ॥ મ્ભ્ત્_12.23
સ્વર્ણપુષ્પસહસ્રેણ યત્ ફલં લભતે નરઃ ।
તસ્માલ્ લક્ષગુણં પુણ્યં ભગ્નૈકબિલ્વપત્ત્રકે ॥ મ્ભ્ત્_12.24
ભગ્નૈકબિલ્વપત્ત્રસ્ય સહસ્રકેન ભાગતઃ ।
મેરુતુલ્યસુવર્ણેન તત્ફલં ન હિ લભ્યતે ॥ મ્ભ્ત્_12.25
શુદ્ધાશુદ્ધવિચારો ઽપિ નાસ્તિ તચ્ છિવપૂજને ।
યેન તેન પ્રકારેણ બિલ્વપત્ત્રૈઃ પ્રપૂજનાત્ ।
સર્વસિદ્ધિયુતો ભૂત્વા સ નરઃ સિદ્ધો હિ ॥ મ્ભ્ત્_12.26

બ્રહ્માણ્ડમધ્યે યે દેવાસ્ તદ્બાહ્યે યાશ્ ચ દેવતાઃ ।
તે સર્વે તૃપ્તિમ્ આયાન્તિ કેવલં શિવપૂજનાત્ ॥ મ્ભ્ત્_12.27
પુષ્પં ગન્ધં જલં દ્રવ્યં લિઙ્ગોપરિ નિયોજયેત્ ।
લિઙ્ગમધ્યે મહાવહ્નિઃ સૈવ રુદ્રઃ પ્રકીર્તિતઃ ॥ મ્ભ્ત્_12.28
રુદ્રોપરિ ક્ષિપેદ્ યત્ તુ તદ્ એવ ભસ્મતાં ગતઃ ॥ મ્ભ્ત્_12.29
સાક્ષાદ્ ધોમો મહેશાનિ શિવસ્ય પૂજનાદ્ ભવેત્ ।
મહાયજ્ઞેશ્વરો મર્ત્યઃ શિવસ્ય પૂજનાદ્ ભવેત્ ॥ મ્ભ્ત્_12.30
કુશાગ્રમાનં યત્ તોયં તત્ તોયેન યજેદ્ યદિ ।
સત્યં સત્યં હિ ગિરિજે તજ્ જલં સાગરોપમમ્ ॥ મ્ભ્ત્_12.31
પુષ્પં ચ મેરુસદૃશં લિઙ્ગોપરિ નિયોજનાત્ ।
લિઙ્ગસ્ય મસ્તકે દેવિ યદ્ અન્નં પરિતિષ્ઠતિ ॥ મ્ભ્ત્_12.32
તદન્નસ્ય ચ દાનેન ક્ષિતિદાનફલં લભેત્ ॥ મ્ભ્ત્_12.33
એકેન તણ્ડુલેનૈવ યદિ લિઙ્ગં પ્રપૂજયેત્ ।
બ્રહ્માણ્ડપાત્રસમ્પૂર્ણમ્ અન્નદાનફલં લભેત્ ॥ મ્ભ્ત્_12.34
એકયા દૂર્વયા વાપિ યો ઽર્ચયેચ્ છિવલિઙ્ગકમ્ ।
સર્વદેવસ્ય શીર્ષે તુ ચાર્ધદાનફલં લભેત્ ॥ મ્ભ્ત્_12.35
સામાન્યતોયમ્ આનીય યદિ સ્નાયાન્ મહેશ્વરમ્ ।
સાર્ધત્રિકોટિતીર્થસ્ય સ્નાનસ્ય ફલભાગ્ ભવેત્ ॥ મ્ભ્ત્_12.36
શ્રીચણ્ડિકોવાચ ।
તારિણી બ્રહ્મણઃ શક્તિસ્ ત્રિપુરા વૈષ્ણવી પરા ।
કથં શાકમ્ભરી તારા ત્રિપુરા શામ્ભવી કથમ્ ॥ મ્ભ્ત્_12.37
શ્રીશંકર ઉવાચ ।
કાલી દેહાદ્ યદા જાતા સાવિત્રી વેદમાતૃકા ।
ત્રિવર્ગદાત્રી સા દેવી બ્રહ્મણઃ શક્તિર્ એવ ચ ॥ મ્ભ્ત્_12.38
ગુપ્તરૂપા મહાવિદ્યા શૈવી સૈકજટા પરા ।
તસ્માલ્ લક્ષ્મીર્ વૈષ્ણવી યા ત્રિવર્ગદાયિની શિવા ॥ મ્ભ્ત્_12.39
ગુપ્તરૂપા મહાવિદ્યા શ્રીમત્ત્રિપુરસુન્દરી ।
શામ્ભવી પરમા માયા ત્રિપુરા મોક્ષદાયિની ॥ મ્ભ્ત્_12.40
એકૈવ હિ મહાવિદ્યા નામમાત્રં પૃથક્ પૃથક્ ।
તથૈવ પુરુષશ્ ચૈકો નામમાત્રવિભેદકઃ ॥ મ્ભ્ત્_12.41
શ્રીચણ્ડિકોવાચ ।
મન્ત્રધારણમાત્રેણ તદાત્મા તન્મયો ભવેત્ ।
કથં વા વાતુલઃ સો ઽપિ કથં વા રોગવાન્ ભવેત્ ॥ મ્ભ્ત્_12.42
શ્રીશંકર ઉવાચ ।
મન્ત્રચ્છન્નાદ્ વાતુલત્વં રોગો દેહે ન જાયતે ।
મન્ત્રચ્છન્નં પ્રવક્ષ્યામિ શૃણુ દેવિ સમાહિતા ॥ મ્ભ્ત્_12.43
અભક્તિશ્ ચાક્ષરે ભ્રાન્તિર્ લુપ્તિશ્ છન્નસ્ તથૈવ ચ ।
હ્રસ્વો દીર્ઘશ્ ચ કથનં સ્વપ્ને તુ ચાષ્ટધા સ્મૃતઃ ॥ મ્ભ્ત્_12.44
અભક્ત્યા નૈવ સિદ્ધિઃ સ્યાત્ કલ્પકોટિશતૈર્ અપિ ।
એવં મન્ત્રશ્ ચાન્યથા વા ચેતિ ભ્રાન્ત્યા ચ વાતુલઃ ॥ મ્ભ્ત્_12.45

લુપ્તવર્ણે બુદ્ધિનાશશ્ છિન્ને નાશો ભવેત્ કિલ ।
હ્રસ્વોચ્ચારે વ્યાધિયુક્તો દીર્ઘજાપે વસુક્ષયઃ ॥ મ્ભ્ત્_12.46
કથને મૃત્યુમ્ આપ્નોતિ સ્વપ્ને ઽપિ શૃણુ શૈલજે ।
કાલિકાયાશ્ ચ તારાયા મન્ત્રો ઽપિ જ્વલદગ્નિવત્ ॥ મ્ભ્ત્_12.47
વિપ્રરૂપેણ દેવેન પ્રેમભાવેન ચેતસા ।
યદિ મન્ત્રં હરેદ્ દેવિ શૃણુ સાધકલક્ષણમ્ ॥ મ્ભ્ત્_12.48
સર્વાઙ્ગે વૈ ભવેજ્ જ્વાલા દેહમધ્યે વિશેષતઃ ।
તોયે શૈત્યં ન જાયેત તથૈવૌષધસેવને ॥ મ્ભ્ત્_12.49
સદા વાતુલવત્ સર્વં પ્રત્યક્ષે સ્વપ્નવદ્ ભવેત્ ।
વર્ષમધ્યે ત્રિવર્ષે વા મૃત્યુસ્ તસ્ય ન સંશયઃ ॥ મ્ભ્ત્_12.50
શ્રીચણ્ડિકોવાચ ।
મન્ત્રચ્છન્નં ચાષ્ટવિધં તવ વક્ત્રાચ્ છ્રુતં મયા ।
યદિ દૈવાદ્ ભવેદ્ દેવ તસ્યોપાયં વદસ્વ મે ॥ મ્ભ્ત્_12.51
શ્રીશંકર ઉવાચ ।
બહુજાપાત્ તથા હોમાત્ કાયક્લેશાદિવિસ્તરાત્ ।
યદિ ભક્તિર્ ભવેદ્ દેવિ તસ્ય સિદ્ધિર્ અદૂરતઃ ॥ મ્ભ્ત્_12.52
ગુરુણા તત્સુતેનૈવ સાધકેન વરાનને ।
અક્ષરે દૂષણં હિત્વા પુનર્ મન્ત્રં પ્રકાશયેત્ ॥ મ્ભ્ત્_12.53
ગુરુણા તત્સુતેનૈવ સાધકેન સમાહિતઃ ।
લુપ્તવર્ણં સમુત્થાપ્ય પુનર્ મન્ત્રં પ્રકાશયેત્ ॥ મ્ભ્ત્_12.54
ચક્રભેદેન ષટ્કોણં તથૈવ યોનિમુદ્રયા ।
એકોચ્ચારે જપેન્ મન્ત્રં લક્ષમ્ એકં વરાનને ।
ગુર્વાદિના મહેશાનિ છિન્નદોષનિકૃન્તનમ્ ॥ મ્ભ્ત્_12.55
ગુરુણા લક્ષજાપેન તન્ મન્ત્રં શ્રાવયેત્ ત્રિધા ।
દૂષણં હ્રસ્વદીર્ઘસ્ય શાન્તિશ્ ચાત્ર ન સંશયઃ ॥ મ્ભ્ત્_12.56
ગુરુણા તત્સુતેનૈવ સાધકેનૈવ શૈલજે ।
ઉક્તમાર્ગેણ દેવેશિ જપેલ્ લક્ષચતુષ્ટયમ્ ॥ મ્ભ્ત્_12.57
તદ્દશાંશં હુનેત્ પશ્ચાત્ તર્પણાદિ સમાચરેત્ ॥ મ્ભ્ત્_12.58
તતો ઽપિ યદિ નૈવાભૂત્ સાધકઃ સ્થિરમાનસઃ ।
ચતુર્ગુણં હિ કર્તવ્યં શિષ્યસ્ય મુક્તિહેતવે ॥ મ્ભ્ત્_12.59
યદિ મૃત્યુર્ ભવેત્ તસ્ય તથાપિ મુક્તિભાગ્ ભવેત્ ।
કથનસ્ય દોષશાન્તિર્ ભવત્ય્ એવ ન સંશયઃ ॥ મ્ભ્ત્_12.60
સ્વપ્ને ઽપિ મન્ત્રકથને શ્મશાને ચૈવ શૈલજે ।
ઉક્તમાર્ગેણ દેવેશિ જપેલ્ લક્ષં ચતુષ્ટયમ્ ॥ મ્ભ્ત્_12.61
તદ્દશાંશં હુનેત્ પશ્ચાત્ તર્પણાદિ સમાચરેત્ ।
તતો ઽપિ યદિ નૈવાભૂત્ સાધકઃ સ્થિરમાનસઃ ॥ મ્ભ્ત્_12.62
ચતુર્ગુણં હિ કર્તવ્યં પૂર્વોક્તં પૂજનં ચરેત્ ।
કુજે વા શનિવારે વા પ્રથમે ગમનં ચરેત્ ।
સપ્તાહં વા યજેદ્ દેવીં તુરીયં વાદિનં યજેત્ ॥ મ્ભ્ત્_12.63
શ્મશાનસાધનં વક્ષ્યે શૃણુ ચૈકાગ્રચેતસા ।

સ્વર્ણં રૌપ્યં તથા વસ્ત્રં દત્ત્વા વરણમ્ આચરેત્ ॥ મ્ભ્ત્_12.64
સ્વર્ણપીઠં પ્રદાતવ્યં ચતુરઙ્ગુલિવિસ્તૃતમ્ ।
ભોગયોગ્યં પ્રદાતવ્યં મધુપર્કં યથોદિતમ્ ॥ મ્ભ્ત્_12.65
રાજપત્ની યેન તુષ્ટા તોષયેત્ તેન વાસસા ।
અલંકારં યથાયોગ્યં તત્ર તત્ર નિયોજયેત્ ॥ મ્ભ્ત્_12.66
નૈવેદ્યં વિવિધં રમ્યં નાનાદ્રવ્યસમન્વિતમ્ ।
સામિષાન્નં ગુડં છાગં સુરાપિષ્ટકપાયસમ્ ॥ મ્ભ્ત્_12.67
ભોગ્યદ્રવ્યં જલે દદ્યાદ્ યદિ ભોક્તા ન તિષ્ઠતિ ।
એવં પૂજાં સમાપ્યાદૌ શિવપૂજાં સમાચરેત્ ॥ મ્ભ્ત્_12.68
ષોડશૈર્ ઉપચારૈશ્ ચ લિઙ્ગાનાં ચૈકવિંશતિમ્ ।
અષ્ટોત્તરશતેનૈવ બિલ્વપત્ત્રૈઃ સચન્દનૈઃ ॥ મ્ભ્ત્_12.69
પ્રત્યેકં પૂજયેન્ મન્ત્રં ગજાન્તકસહસ્રકમ્ ।
સહસ્રં હોમયેત્ પશ્ચાદ્ બિલ્વપત્ત્રૈર્ વરાનને ॥ મ્ભ્ત્_12.70
એવં કૃતે લભેચ્ છાન્તિં દીર્ઘાયુર્ નાત્ર સંશયઃ ॥ મ્ભ્ત્_12.71
માતૃકાભેદતન્ત્ર, ત્રયોદશઃ પટલઃ
શ્રીચણ્ડિકોવાચ ।
શૃણુ નાથ પરાનન્દ પરાપરજગત્પતે ।
ઇદાનીં શ્રોતુમ્ ઇચ્છામિ માલાયાઃ કીદૃશો જપઃ ।
કા માલા કસ્ય દેવસ્ય તદ્ વદસ્વ સમાહિતઃ ॥ મ્ભ્ત્_13.1
શ્રીશંકર ઉવાચ ।
વૈષ્ણવે તુલસીમાલા ગજદન્તૈર્ ગણેશ્વરે ।
કાલિકાયા મહામન્ત્રં જપેદ્ રુદ્રાક્ષમાલયા ॥ મ્ભ્ત્_13.2
તારાયાશ્ ચ જપેન્ મન્ત્રી મહાશઙ્ખાખ્યમાલયા ।
મહાશઙ્ખાખ્યમાલાયાં સર્વાં વિદ્યાં જપેત્ સુધીઃ ॥ મ્ભ્ત્_13.3
અકસ્માદ્ વૈ મહાસિદ્ધિર્ મહાશઙ્ખાખ્યમાલયા ।
તથૈવ સકલા વિદ્યા મહાશઙ્ખે વસેત્ સદા ॥ મ્ભ્ત્_13.4
સ્ફાટિકી સર્વદેવસ્ય પ્રવાલૈઃ સકલાં જપેત્ ।
સ્વર્ણરૌપ્યસમુદ્ભૂતાં સર્વદેવેષુ યોજિતામ્ ॥ મ્ભ્ત્_13.5
કાલિકાયાશ્ ચ સુન્દર્યા રુદ્રાક્ષૈઃ પ્રજપેત્ સદા ।
ભૈરવ્યાઃ પ્રજપેન્ મન્ત્રી શઙ્ખપદ્માખ્યયા પ્રિયે ॥ મ્ભ્ત્_13.6
શ્મશાને ધુસ્તુરૈર્ માલા જપેદ્ ધૂમાવતીવિધૌ ।
ઇતિ તે કથિતં કાન્તે મહામાલાવિનિર્ણયમ્ ॥ મ્ભ્ત્_13.7
અથ ગ્રન્થિં પ્રવક્ષ્યામિ શૃણુ કાન્તે સમાહિતા ।
યેન માલા સુસિદ્ધા ચ ન્ણાં સર્વફલપ્રદા ॥ મ્ભ્ત્_13.8
માલાયાશ્ ચાધિકા કાન્તે ગ્રન્થિશ્ ચૈકા ફલપ્રદા ।
એકપઞ્ચાશિકાયાં ચ માલાયાં પરમેશ્વરિ ॥ મ્ભ્ત્_13.9
બ્રહ્મગ્રન્થિયુતાં માલાં સાર્ધદ્વિતયવેષ્ટિતામ્ ।
સપાદવેષ્ટનં દેવિ નાગપાશં મનોહરમ્ ॥ મ્ભ્ત્_13.10
સર્વદેવસ્ય માલાયાં સર્વત્ર પરમેશ્વરિ ।
બ્રહ્મગ્રન્થિં વિધાયેત્થં નાગપાશમ્ અથાપિ વા ॥ મ્ભ્ત્_13.11

માલાયાં ત્વ્ અધિકાં દેવિ ચૈકાં ગ્રન્થિં પ્રદાપયેત્ ।
મૂલેન ગ્રથિતં કુર્યાત્ પ્રણવેનાથવા પ્રિયે ॥ મ્ભ્ત્_13.12
ગ્રન્થિમધ્યે ચ ગુટિકાં કુર્યાદ્ અતિમનોહરામ્ ।
સૂત્રદ્વયં મહેશાનિ મિલનં કારયેત્ તતઃ ॥ મ્ભ્ત્_13.13
મેરું ચ ગ્રથનં કુર્યાત્ તદૂર્ધ્વે ગ્રન્થિસંયુતમ્ ।
એવં માલાં વિનિર્માય ગોપયેદ્ બહુયત્નતઃ ॥ મ્ભ્ત્_13.14
કમ્પનં ધૂનનં શબ્દં નૈવ તત્ર પ્રકાશયેત્ ।
કરભ્રષ્ટં તથા છિન્નં મહાવિઘ્નસ્ય કારણમ્ ॥ મ્ભ્ત્_13.15
કમ્પને સિદ્ધિહાનિઃ સ્યાદ્ ધૂનનં બહુદુઃખદમ્ ।
શબ્દે જાતે ભવેદ્ રોગઃ કરભ્રષ્ટાદ્ વિનાશકૃત્ ॥ મ્ભ્ત્_13.16
છિન્નસૂત્રે ભવેન્ મૃત્યુસ્ તસ્માદ્ યત્નપરો ભવેત્ ।
એવં જ્ઞાત્વા મહેશાનિ શાન્તિસ્વસ્ત્યયનં ચરેત્ ॥ મ્ભ્ત્_13.17
કમ્પને યો જપેન્ મન્ત્રં યદિ સિદ્ધિં પ્રયચ્છતિ ।
યત્નેન ગુરુમ્ આનીય દ્વાવિંશદુપચારતઃ ॥ મ્ભ્ત્_13.18
કુમ્ભસ્થાપનકં કૃત્વા પૂજયેદ્ ઇષ્ટદેવતામ્ ।
તતો હુનેદ્ બિલ્વપત્ત્રૈર્ અષ્ટોત્તરશતાહુતિમ્ ॥ મ્ભ્ત્_13.19
ત્રિમધ્વક્તેન વિધિના ધૂનને ઽપિ ચ સુન્દરિ ।
સશબ્દે જપને ચણ્ડિ હ્ય્ એવં કુર્યાદ્ વિચક્ષણઃ ॥ મ્ભ્ત્_13.20
કરભ્રષ્ટે તથા છિન્ને પુરશ્ચરણમ્ આચરેત્ ।
જપાદ્યન્તે યજેદ્ દેવીં ષોડશૈર્ ઉપચારકૈઃ ॥ મ્ભ્ત્_13.21
પ્રત્યહં પ્રજપેન્ મન્ત્રં પ્રત્યહં બલિદાનકમ્ ।
પઞ્ચાઙ્ગસ્ય પ્રમાણેન સર્વકર્મ સમાપયેત્ ॥ મ્ભ્ત્_13.22
દરિદ્રઃ પરમેશાનિ યદિ વિઘ્નપરાયણઃ ।
આદ્યન્તે મહતીં પૂજાં દિક્સહસ્રં જપેન્ મનુમ્ ॥ મ્ભ્ત્_13.23
સહસ્રૈકં હુનેત્ પશ્ચાત્ સર્વવિઘ્નસ્ય શાન્તયે ।
કુમ્ભતોયૈઃ સ્નાપયિત્વા પુનર્ માલાં પ્રદાપયેત્ ॥ મ્ભ્ત્_13.24
અનેનૈવ વિધાનેન વિઘ્નજાલૈર્ ન લિપ્યતે ॥ મ્ભ્ત્_13.25
માતૃકાભેદતન્ત્ર, ચતુર્દશઃ પટલઃ
શ્રીચણ્ડિકોવાચ ।
મન્ત્રધારણમાત્રેણ તત્ક્ષણે તન્મયો ભવેત્ ।
જીવાત્મા કુણ્ડલીમધ્યે પ્રદીપકલિકા યથા ॥ મ્ભ્ત્_14.1
નિજેષ્ટદેવતારૂપા દેહસંસ્થા ચ કુણ્ડલી ।
ભુજ્યતે સૈવ દેહસ્થા કા ચિન્તા સાધકસ્ય ચ ।
તન્ મે બ્રૂહિ મહાદેવ યદ્ય્ અહં તવ વલ્લભા ॥ મ્ભ્ત્_14.2
શ્રીશંકર ઉવાચ ।
ભોગસ્ તુ ત્રિવિધો દેવિ દિવ્યવીરપશુક્રમાત્ ।
નિર્લિપ્તો દિવ્યભાવસ્થઃ કુણ્ડલી ભુજ્યતે યદિ ॥ મ્ભ્ત્_14.3
અજિહ્વાન્તા કુણ્ડલિની વીરસ્ય વીરવન્દિતે ।
મહાદેવ્યાઃ પ્રીતયે ચ પ્રસાદં ભુજ્યતે પશુઃ ॥ મ્ભ્ત્_14.4
દ્વિજાતેર્ દિવ્યભાવશ્ ચ સદા નિર્વાણદાયકઃ ।

વિપ્રો વીરશ્ ચ નિર્વાણી ભવત્ય્ એવ ન સંશયઃ ॥ મ્ભ્ત્_14.5
સાયુજ્યાદિ મહામોક્ષં નિયુક્તં ક્ષત્રિયાદિષુ ।
પશુના ભક્તિયુક્તેન પ્રસાદં ભુજ્યતે યદિ ॥ મ્ભ્ત્_14.6
સ્વર્ગભોગી ભવત્ય્ એવ મરણે નાધિકારિતા ।
જન્માન્તરમ્ અવાપ્નોતિ મહાદેવ્યાઃ પ્રસાદતઃ ॥ મ્ભ્ત્_14.7
દિવ્યવીરમતે દૃષ્ટિર્ જાયતે નાત્ર સંશયઃ ।
દિવ્યવીરપ્રસાદેન નિર્વાણી નાત્ર સંશયઃ ॥ મ્ભ્ત્_14.8
પ્રસાદભોગી યો દેવિ સ પશુર્ નાત્ર સંશયઃ ।
મરણે નાધિકારો ઽસ્તિ પશુભાવસ્થિતસ્ય ચ ॥ મ્ભ્ત્_14.9
નૈવ મુક્તિર્ ભવેત્ તસ્ય જન્મ ચાપ્નોતિ નિશ્ચિતમ્ ॥ મ્ભ્ત્_14.10
શ્રીચણ્ડિકોવાચ ।
વદ મે પરમેશાન દિવ્યવીરસ્ય લક્ષણમ્ ।
યત્ કૃતે દિવ્યવીરસ્ય મહામુક્તિર્ ભવિષ્યતિ ॥ મ્ભ્ત્_14.11
શ્રીશંકર ઉવાચ ।
સાક્ષાદ્ બ્રહ્મમયી દેવી ચાભિશપ્તા ચ વારુણી ।
શાપમોચનમાત્રેણ બ્રહ્મરૂપા સુધા પરા ॥ મ્ભ્ત્_14.12
નિવેદનાન્ મહાદેવ્યૈ તત્ તદ્ દેવી ભવેત્ કિલ ।
મૂલાધારાત્ કુણ્ડલિનીમ્ આજિહ્વાન્તાં વિભાવયેત્ ॥ મ્ભ્ત્_14.13
તન્મુખે દાનમાત્રેણ જ્ઞાનવાન્ સાધકો ભવેત્ ।
યથૈવ કુણ્ડલી દેવી દેહમધ્યે વ્યવસ્થિતા ॥ મ્ભ્ત્_14.14
તથૈવ વારુણીં ધ્યાયેત્ કલાઙ્ગે સ્વેષ્ટદેવતામ્ ।
કુણ્ડલ્યા સમભાવેન શક્તિવક્ત્રે પ્રદાપયેત્ ॥ મ્ભ્ત્_14.15
આત્મોચ્છિષ્ટં મહાપૂતં તન્મુખાત્ પરમામૃતમ્ ।
અવશ્યમ્ એવ ગૃહ્ણીયાત્ તાદાત્મ્યેન વરાનને ॥ મ્ભ્ત્_14.16
ઉત્સૃષ્ટાદિવિચારો ઽપિ કદાચિન્ નાસ્તિ બ્રહ્મણિ ।
ગઙ્ગાતોયં પરં બ્રહ્મ પ્રસાદં કસ્ય તદ્ વદ ॥ મ્ભ્ત્_14.17
ગઙ્ગાસાગરતોયં વા પ્રસાદં કસ્ય વા ભવેત્ ।
શૃણુ દેવિ પ્રવક્ષ્યામિ તજ્જલે સ્નાનમાત્રતઃ ॥ મ્ભ્ત્_14.18
મુક્તિભાગી ભવેન્ મર્ત્યઃ સ્નાનાવગાહનાત્ કિલ ।
પાદાદિમસ્તકાન્તં વૈ સ્નાનકાલે પ્રમજ્જતિ ॥ મ્ભ્ત્_14.19
પાદસ્પર્શો ન દોષાય પરબ્રહ્મણિ શૈલજે ।
પરમાત્મનિ લીને ચ તથૈવ પરમેશ્વરિ ॥ મ્ભ્ત્_14.20
ઇતિ તે કથિતં દેવિ દિવ્યવીરસ્ય લક્ષણમ્ ।
વીરતન્ત્રે ચ કથિતં માહાત્મ્યં પ્રાણવલ્લભે ॥ મ્ભ્ત્_14.21
શૃણુ દેવિ પ્રવક્ષ્યામિ સાધિકાયાશ્ ચ લક્ષણમ્ ।
દિવ્યશક્તિર્ વીરશક્તિર્ ગુરુશક્તિસ્ તથા પરા ॥ મ્ભ્ત્_14.22
કુલશક્તિઃ કામિની ચ નવશક્તિઃ કુમારિકા ।
શ્રીગુરું પૂજયેદ્ ભક્ત્યા સ્વદેહદાનપૂર્વકમ્ ॥ મ્ભ્ત્_14.23
અન્યથા તુ સ્વદેહસ્ય નિગ્રહો જાયતે ધ્રુવમ્ ।
સપ્તજન્મનિ સા દેવી પુક્કસી પતિવર્જિતા ॥ મ્ભ્ત્_14.24

શિવં મત્વા સ્વકાન્તં ચ પૂજાસાધનમ્ આચરેત્ ।
કદાચિન્ ન યજેચ્ ચાન્યં પુરુષં પરમેશ્વરિ ॥ મ્ભ્ત્_14.25
અન્યસ્ય યજનાચ્ ચણ્ડિ સર્વનાશો ભવેદ્ ધ્રુવમ્ ।
કાન્તસ્યાયુર્વિહીનત્વં વિપતિં ચ પદે પદે ॥ મ્ભ્ત્_14.26
ધનનાશો ભવેન્ નિત્યં દેવ્યાઃ ક્રોધશ્ ચ જાયતે ।
અવશ્યં પૂજયેન્ નિત્યં ગુરુદેવં સનાતનમ્ ॥ મ્ભ્ત્_14.27
ભદ્રાભદ્રવિચારં ચ યા કરોતિ ગુરુસ્થલે ।
તસ્યા મન્ત્રં ક્રોધયુક્તં વિપત્તિશ્ ચ પદે પદે ॥ મ્ભ્ત્_14.28
વરં જનમુખાન્ નિન્દા વરં પ્રાણાન્ પરિત્યજેત્ ।
તથાપિ પૂજયેદ્ દેવં સાક્ષાન્ નિર્વાણદાયકમ્ ॥ મ્ભ્ત્_14.29
સદા ભયં ચ કાપટ્યં વર્જયેદ્ ગુરુપૂજને ॥ મ્ભ્ત્_14.30
શ્રીગુરોસ્ તેજસં ભક્ત્યા યદિ ધારણમ્ આચરેત્ ।
સત્યં સત્યં પુનઃ સત્યં કાશી સા નાત્ર સંશયઃ ॥ મ્ભ્ત્_14.31
અભક્ત્યા પરમેશાનિ યદિ ધારણમ્ આચરેત્ ।
જપપૂજાદિકં તસ્યાઃ સંદહેત્ તેન તેજસા ॥ મ્ભ્ત્_14.32
શ્રીચણ્ડિકોવાચ ।
સપત્નીકં યજેદ્ દેવં ગુરું નિર્વાણદાયકમ્ ।
તસ્ય સઙ્ગં પરિત્યજ્ય કથમ્ આત્મનિયોજનમ્ ॥ મ્ભ્ત્_14.33
શ્રીશંકર ઉવાચ ।
શૃણુ દેવિ પ્રવક્ષ્યામિ ગુરોર્ આજ્ઞાનુસારતઃ ।
ધારયેત્ તેજસં ભક્ત્યા સ્વયં લિપ્સાવિવર્જિતા ॥ મ્ભ્ત્_14.34
ગુરુપત્ન્યાશ્ ચાત્મજશ્ ચ શ્રીગુરોર્ આત્મજો યતઃ ।
ગુરુપત્ની ગુરુઃ સાક્ષાદ્ ગુરુપુત્રો ન સંશયઃ ॥ મ્ભ્ત્_14.35
એકસ્ય પૂજનાત્ કાન્ત ઉભયોઃ પૂજનં ભવેત્ ।
ગુરુપુત્રો ગણેશશ્ ચ ગુરુપુત્રઃ ષડાનનઃ ॥ મ્ભ્ત્_14.36
એકં ગુરુસુતં કાન્તે પૂજને યા સદા રતા ।
અન્યં ગુરુસુતં કાન્તે પૂજયેન્ ન કદાચન ॥ મ્ભ્ત્_14.37
વીરં વા દિવ્યમૂર્તિં વા કદાચિન્ ન હિ પૂજયેત્ ।
એકસ્ય પૂજનાદ્ દેવિ મહાસિદ્ધીશ્વરો ભવેત્ ॥ મ્ભ્ત્_14.38
ઉભયોસ્ ત્રીણિ ચત્વારિ યા નારી પૂજનં ચરેત્ ।
તસ્યાઃ સમસ્તં વિફલં ધ્યાનાદિજપપૂજનમ્ ॥ મ્ભ્ત્_14.39
યદિ ભાગ્યવશાદ્ દેવિ એકં ગુરુસુતં લભેત્ ।
મનોજ્ઞં શાસ્ત્રવેત્તારં નિગ્રહાનુગ્રહે રતમ્ ॥ મ્ભ્ત્_14.40
સુન્દરં યૌવનોન્મત્તં ગુરુતુલ્યં જિતેન્દ્રિયમ્ ।
પ્રાણાન્તે ઽપિ ચ કર્તવ્યં પૂજનં મોક્ષદાયકમ્ ॥ મ્ભ્ત્_14.41
નો યજેદ્ યદિ મોહેન સૈવ પાપમયી ભવેત્ ॥ મ્ભ્ત્_14.42