માતૃકાભેદતન્ત્ર · ભાગ 120

માતૃકાભેદતન્ત્ર
માતૃકાભેદતન્ત્ર, પ્રથમઃ પટલઃ
કૈલાસશિખરે રમ્યે નાનારત્નોપશોભિતે ।
પપ્રચ્છ પરયા ભક્ત્યા ભૈરવં પરમેશ્વરમ્ ॥ મ્ભ્ત્_1.1
શ્રીચણ્ડિકોવાચ ।
ત્રિપુરાપૂજનં નાથ સ્વર્ણરત્નૈર્ વિશેષતઃ ।
કલિકાલે સ્વર્ણરૂપ્યં ગુપ્તભાવં તથા મણિમ્ ॥ મ્ભ્ત્_1.2
કેનોપાયેન દેવેશ સ્વર્ણરૂપ્યાદિ લભ્યતે ।
તદ્ વદસ્વ વિશેષેણ યથા રત્નાદિકં ભવેત્ ॥ મ્ભ્ત્_1.3
યન્ નોક્તં સર્વતન્ત્રેષુ તદ્ વદસ્વ દયાનિધે ॥ મ્ભ્ત્_1.4
શ્રીશઙ્કર ઉવાચ ।
શૃણુ દેવિ પ્રવક્ષ્યામિ યથા રત્નાદિકં ભવેત્ ।
મત્તેજસા પારદેન કિં રત્નં ન હિ લભ્યતે ॥ મ્ભ્ત્_1.5
તથા સામુદ્રકેણૈવ સુશુભ્રલવણેન ચ ।
સમ્બલસ્ય પ્રકારં હિ શૃણુ દેવિ પ્રયત્નતઃ ॥ મ્ભ્ત્_1.6
ચીનતન્ત્રાનુસારેણ પૂજયેત્ સિદ્ધકાલિકામ્ ।
અથવા પૂજયેદ્ દેવીં દક્ષિણાં કાલિકાં પરામ્ ।
કાલીતન્ત્રોક્તવિધિના સપ્તાહં જપપૂજનમ્ ॥ મ્ભ્ત્_1.7
સત્યે ચૈકં તુ ત્રેતાયાં દ્વિગુણં દ્વાપરે ત્રયમ્ ।
એવં સર્વત્ર જાનીયાચ્ ચતુર્ગુણજપઃ કલૌ ॥ મ્ભ્ત્_1.8
આનીય બહુયત્નેન સમ્બલં તોલદ્વયમ્ ।
વસુર્ આદ્યં શિવં ચાદ્યં માયાબિન્દુવિભૂષિતમ્ ।
બીજત્રયં ચાષ્ટશતં પ્રજપેત્ સમ્બલોપરિ ॥ મ્ભ્ત્_1.9
અશીતિતોલકં માનં કૃષ્ણધેનુસમુદ્ભવમ્ ।
દુગ્ધમ્ આનીય યત્નેન ચાષ્ટોત્તરશતં જપેત્ ॥ મ્ભ્ત્_1.10
વસ્ત્રયુક્તેન સૂત્રેણ દુગ્ધમધ્યે વિનિક્ષિપેત્ ।
ઉત્તાપં જનયેદ્ ધીમાન્ મન્દમન્દેન વહ્નિના ॥ મ્ભ્ત્_1.11
બિન્દુ વેદાન્તપર્યન્તમ્ અર્ધશોષં ભવેદ્ યદા ।
તદૈવોત્તોલ્ય તદ્ દ્રવ્યં તોયમધ્યે વિનિક્ષિપેત્ ॥ મ્ભ્ત્_1.12
તતઃ પરીક્ષા કર્તવ્યા પ્રદદ્યાત્ પાવકોપરિ ।
નિર્ધૂમં વાવકે દ્રવ્યં દૃષ્ટ્વા ઉત્થાપ્ય યત્નતઃ ॥ મ્ભ્ત્_1.13
તત્રૈવ પ્રજપેન્ મન્ત્રં સર્વવન્દ્યનવાત્મકમ્ ।
આનીય બહુયત્નેન શુદ્ધં તામ્રં મનોહરમ્ ॥ મ્ભ્ત્_1.14
સાર્ધેન તોલકં તામ્રં વહ્નિમધ્યે વિનિક્ષિપેત્ ।
યથા વહ્નિસ્ તથા તામ્રં દૃષ્ટ્વા ઉત્થાપ્ય યત્નતઃ ॥ મ્ભ્ત્_1.15
ગુઞ્જાપ્રમાણં તદ્ દ્રવ્યં તત્ક્ષણાદ્ યદિ યોજયેત્ ।
સત્યં સત્યં હિ ગિરિજે રૌપ્યં ભવતિ નિશ્ચિતમ્ ॥ મ્ભ્ત્_1.16
શ્રીચણ્ડિકોવાચ ।
કારણં દુગ્ધરૂપં વા કેન રૂપેણ શઙ્કરઃ ।
તત્પ્રકારં મહાદેવ કૃપયા વદ શઙ્કર ॥ મ્ભ્ત્_1.17

શ્રીશઙ્કર ઉવાચ ।
ટઙ્કનમ્ આનયેદ્ ધીમાન્ તોલકં તુ ચતુષ્ટયમ્ ।
વહ્નિયોગેન ગિરિજે લાજરૂપં ચકાર હ ॥ મ્ભ્ત્_1.18
આમ્રપુષ્પં તદ્ દ્વિગુણં પિષ્ટ્વા મિલનમ્ આચરેત્ ।
તસ્યોપરિ જપેન્ મન્ત્રં મહામાયાં હિ ચણ્ડિકે ॥ મ્ભ્ત્_1.19
એતત્ તુ ગુટિકાં કૃત્વા મેલનં કારયેદ્ યદિ ।
તદૈવ દુગ્ધરૂપં સ્યાત્ સત્યં સત્યં હિ શૈલજે ॥ મ્ભ્ત્_1.20
શ્રીચણ્ડિકોવાચ ।
ગન્ધહીનં ભવેન્ મદ્યં કેનોપાયેન શઙ્કર ।
તત્ સર્વં શ્રોતુમ્ ઇચ્છામિ યદિ સ્નેહો ઽસ્તિ મા પ્રતિ ॥ મ્ભ્ત્_1.21
શ્રીશઙ્કર ઉવાચ ।
શિવં વહ્નિસમારૂઢં વામનેત્રવિભૂષિતમ્ ।
બિન્દુનાદસમાયુક્તં ગન્ધમ્ આદાય સંલિખેત્ ॥ મ્ભ્ત્_1.22
ઉહ્યતાં પદમ્ ઉચ્ચાર્યં ચાષ્ટોત્તરશતં યદિ ।
પ્રજપેત્ સાધકશ્રેષ્ઠો દુર્ગન્ધાદિવિનાશનમ્ ॥ મ્ભ્ત્_1.23
માતૃકાભેદતન્ત્ર, દ્વિતીયઃ પટલઃ
શ્રીદેવ્ય્ ઉવાચ ।
વદ ઈશાન સર્વજ્ઞ સર્વતત્ત્વવિદાં વર ।
યત્ ત્વયા કથિતં નાથ મમ સઙ્ગે વિહારતઃ ॥ મ્ભ્ત્_2.1
કથં વા જાયતે પુત્રઃ શુક્રસ્ય કત્ર સંસ્થિતિઃ ।
વર્ધમાનં સદા લિઙ્ગં પ્રવેશો વા કથં ભવેત્ ॥ મ્ભ્ત્_2.2
ભીતિયુક્તા હ્ય્ અહં નાથ ત્રાહિ માં દુઃખસઙ્કટાત્ ॥ મ્ભ્ત્_2.3
શ્રીશઙ્કર ઉવાચ ।
મણિપૂરં મહાપદ્મં સુષુમ્ણામધ્યસંસ્થિતમ્ ।
તસ્ય નાલેન દેવેશિ નાભિપદ્મં મનોહરમ્ ॥ મ્ભ્ત્_2.4
વક્રત્રયસમાયુક્તં સદા શુક્રવિભૂષિતમ્ ।
ઊર્ધ્વં નાલં સહસ્રારે અતઃ શુક્રવિભૂષિતમ્ ॥ મ્ભ્ત્_2.5
તસ્માદ્ એવ સ્તનદ્વન્દ્વં વર્ધમાનં દિને દિને ॥ મ્ભ્ત્_2.6
મધ્યનાલં સુષુમ્ણાન્તં વૃન્તાકારં સુશીતલમ્ ।
આયોન્યગ્રમ્ અધોનાલં સદાનન્દમયિ શિવે ॥ મ્ભ્ત્_2.7
શૃણુ ચાર્વઙ્ગિ સુભગે તન્મધ્યે લિઙ્ગતાડનાત્ ।
યદ્ રૂપં પરમાનન્દં તન્ નાસ્તિ ભુવનત્રયે ॥ મ્ભ્ત્_2.8
નાભિપદ્મં તુ યદ્ રૂપં તચ્ છૃણુષ્વ સમાહિતઃ ।
બિન્દુસ્થાનં મધ્યદેશે સદા પદ્મવિરાજિતમ્ ॥ મ્ભ્ત્_2.9
બાહ્યદેશે ચાષ્ટપત્રં ચતુરસ્રં તુ તદ્બહિઃ ।
ચતુર્દ્વારસમાયુક્તં સુવર્ણાભં સવૃત્તકમ્ ॥ મ્ભ્ત્_2.10
તત્પત્રેણ ભવેત્ પુષ્પં વૃન્તયુક્તં ત્રિપત્ત્રકમ્ ।
પ્રફુલ્લે તુ ત્રિપત્રારે બાહ્યે રુધિરદર્શનમ્ ॥ મ્ભ્ત્_2.11
એતન્મધ્યે મહેશાનિ યદિ સ્યાલ્ લિઙ્ગતાડનમ્ ।
પદ્મમધ્યે ગતે શુક્રે સંતતિસ્ તેન જાયતે ॥ મ્ભ્ત્_2.12

પુરુષસ્ય તુ યચ્ છુક્રં શક્તેરક્તાધિકો ભવેત્ ।
તદા કન્યા ભવેદ્ દેવિ વિપરીતઃ પુમાન્ ભવેત્ ॥ મ્ભ્ત્_2.13
ઉભયોસ્ તુલ્યશુક્રેણ ક્લીબં ભવતિ નિશ્ચિતમ્ ॥ મ્ભ્ત્_2.14
શૃણુ ચાર્વઙ્ગિ સુભગે પુષ્પમાહાત્મ્યમ્ ઉત્તમમ્ ।
મધ્યે તચ્છુક્રસંયોગે વર્ધતે તદ્ દિને દિને ।
એવં દિઙ્માસસમ્પ્રાપ્તે તત્પુષ્પં વૃન્તસંયુતમ્ ॥ મ્ભ્ત્_2.15
ગલિતે પરમેશાનિ વ્યક્તો ભવતિ સંતતિઃ ॥ મ્ભ્ત્_2.16
શ્રીદેવ્ય્ ઉવાચ ।
કિંચિદ્ રોગાદિસમ્ભૂતે કૃમિકીટાદિસમ્ભવે ।
તસ્મજ્જીવં પ્રણશ્યન્તિ સા નારી જીવ્યતે કથમ્ ॥ મ્ભ્ત્_2.17
શ્રીશઙ્કર ઉવાચ ।
અસ્ય પુષ્પસ્ય માહાત્મ્યં કિં વક્તું શક્યતે મયા ।
બિન્દુસ્થાનં સહસ્રં તુ પુષ્પમધ્યે પ્રિયંવદે ॥ મ્ભ્ત્_2.18
બુદ્બુદા યત્ર તિષ્ઠન્તિ તત્રૈવ સંતતિર્ ભવેત્ ।
એવં ક્રમેણ દેવેશિ સહસ્રં સંતતિર્ યદિ ।
વર્ધમાનં મહાપુષ્પં પીડા કિંચિન્ ન જાયતે ॥ મ્ભ્ત્_2.19
મયા સાર્ધં મહેશાનિ વિહારં કુરુ યત્નતઃ ।
વિહારે યો ભવેત્ પુત્રો ગણેશઃ સ ચ કીર્તિતઃ ॥ મ્ભ્ત્_2.20
અપરે પરમેશાનિ તવ પુત્રપ્રસાદતઃ ।
પૃથિવ્યાં જાયતે સૃષ્ટિર્ નિર્વિઘ્નેન યથોચિતમ્ ॥ મ્ભ્ત્_2.21
એતચ્ છ્રુત્વા તતો દેવિ મદનાનલવિહ્વલા ।
શિવેનાલિઙ્ગિતા દેવી શિવાકારેણ વૈ તદા ॥ મ્ભ્ત્_2.22
માતૃકાભેદતન્ત્ર, તૃતીયઃ પટલઃ
શ્રીદેવ્ય્ ઉવાચ ।
સર્વત્રાહં શ્રુતા નાથ ભોગં ચેન્દ્રિયપુષ્ટિદમ્ ।
ભોગેન મોક્ષમ્ આપ્નોતિ કથં વદસિ યોગભૃત્ ॥ મ્ભ્ત્_3.1
શ્રીશઙ્કર ઉવાચ ।
ભોગેન લભતે યોગં ભોગેન કુલસાધનમ્ ।
ભોગેન સિદ્ધિમ્ આપ્નોતિ ભોગેન મોક્ષમ્ આપ્નુયાત્ ॥ મ્ભ્ત્_3.2
તસ્માદ્ ભોગં સદા કાર્યં બાહ્યપૂજા યથેચ્છયા ।
ભોજનસ્ય વિધાનં યત્ તચ્ છૃણુષ્વ પ્રિયંવદે ॥ મ્ભ્ત્_3.3
આધારે તુ યા શક્તિર્ ભુજગાકારરૂપિણી ।
આત્મા પરમેશાનિ તન્મધ્યે વર્તતે સદા ॥ મ્ભ્ત્_3.4
ભોજનેચ્છા ભવેત્ તસ્માન્ નિર્લિપ્તો જીવસંજ્ઞકઃ ।
સૈવ સાક્ષાદ્ ગુણમયો નિર્ગુણો જીવ ઉચ્યતે ॥ મ્ભ્ત્_3.5
જીવસ્ય ભોજનં દેવિ ભ્રાન્તિર્ એવ ન સંશયઃ ।
ગુણયુક્તા કુણ્ડલિની ચન્દ્રસૂર્યાગ્નિરૂપિણી ॥ મ્ભ્ત્_3.6
મૂલાધારાચ્ ચ તાં દેવીમ્ આજિહ્વાન્તાં વિભાવયેત્ ।
શોધિતાન્ મત્સ્યમાંસાદીન્ સંમુખે સ્થાપયેદ્ બુધઃ ॥ મ્ભ્ત્_3.7
મૂલમન્ત્રં સમુચ્ચાર્ય જુહોમિ કુણ્ડલીમુખે ।

અનેન મનુના દેવિ પ્રતિગ્રાસં સમાહરેત્ ॥ મ્ભ્ત્_3.8
પ્રતિગ્રાસે પરેશાનિ એવં કુર્યાદ્ વિચક્ષણઃ ।
તદૈવ બ્રહ્મરૂપો ઽસૌ સત્યં સત્યં સુરેશ્વરિ ॥ મ્ભ્ત્_3.9
ભુજ્યતે કુણ્ડલી દેવી ઇતિ ચિન્તાપરો હિ યઃ ।
મન્ત્રસિદ્ધિર્ ભવેત્ તસ્ય જ્ઞાનસિદ્ધિર્ ન ચાન્યથા ॥ મ્ભ્ત્_3.10
એવં કૃતે બ્રહ્મરૂપઃ શિવરૂપઃ સ્વયં હરિઃ ।
યોગસિદ્ધિર્ ભવેત્ તસ્ય ચાષ્ટસિદ્ધિર્ ભવિષ્યતિ ॥ મ્ભ્ત્_3.11
શત્રુભિર્ દીયતે યત્ તુ કૃત્રિમં દારુણં વિષમ્ ।
ભક્ષણાત્ તત્ ક્ષણે દેવિ હ્ય્ અમૃતં નાત્ર સંશયઃ ॥ મ્ભ્ત્_3.12
મન્ત્રેણ શોધિતં દ્રવ્યં ભક્ષણાદ્ અમૃતં ભવેત્ ।
યદૈવ કાલકૂટં તુ સમુદ્રમથને પ્રિયે ॥ મ્ભ્ત્_3.13
તદા ચાનેન મનુના તત્ક્ષણાત્ ખાદિતં મયા ॥ મ્ભ્ત્_3.14
સર્પાકારા કુણ્ડલિની યા દેવી પરમા કલા ।
ભુજ્યતે સર્પરૂપેણ તત્રૈવ દારુણં વિષમ્ ॥ મ્ભ્ત્_3.15
ઇતિ તે કથિતં કાન્તે ભોજનસ્ય વિધાનકમ્ ।
એતત્ સર્વં મહેશાનિ ગોપ્તવ્યં પશુસંકટે ॥ મ્ભ્ત્_3.16
શ્રીદેવ્ય્ ઉવાચ ।
શૃણુ નાથ પરાનન્દ પરાપરકુલાત્મક ।
વદ મે પરમેશાન હોમકુણ્ડં તુ કીદૃશમ્ ॥ મ્ભ્ત્_3.17
શ્રીશિવ ઉવાચ ।
મણિપૂરસ્ય બાહ્યે તુ નાભિપદ્મં મનોહરમ્ ।
અષ્ટપત્રં તથા વૃત્તં તન્મધ્યે કુણ્ડદુર્લભમ્ ॥ મ્ભ્ત્_3.18
ચતુરસ્રાદિકં દેવિ તત્ કુણ્ડં કામરૂપકમ્ ।
સર્વકુણ્ડસ્ય દેવેશિ વિપ્રઃ કર્તા વિધીયતે ॥ મ્ભ્ત્_3.19
વર્તુલં બાહુજાતસ્ય વૈશ્યસ્ય ચાર્ધચન્દ્રકમ્ ॥ મ્ભ્ત્_3.20
ત્રિકોણં પાદજાતસ્ય હોમકુણ્ડં સુરેશ્વરિ ।
એવં કુણ્ડં મહેશાનિ નાલત્રયવિભૂષિતમ્ ॥ મ્ભ્ત્_3.21
ઊર્ધ્વનાલં સહસ્રારે પરામૃતવિભૂષિતમ્ ।
મધ્યનાલં નાભિપદ્મે મૂલાધારે ચ સુન્દરિ ॥ મ્ભ્ત્_3.22
આલિઙ્ગાગ્રમ્ અધોનાલં સદાનન્દમયં શિવે ।
હોમકુણ્ડમ્ ઇદં દેવિ સર્વતન્ત્રે પરિષ્કૃતમ્ ॥ મ્ભ્ત્_3.23
યેન હોમપ્રસાદેન સાક્ષાદ્ બ્રહ્મમયો ભવેત્ ।
વિપ્રસ્ય ચાહુતિહોમં વિજ્ઞાતવ્યં ચતુષ્ટયમ્ ॥ મ્ભ્ત્_3.24
ક્ષત્રિયસ્ય ત્રયં દેવિ વૈશ્યસ્ય ચાહુતિદ્વયમ્ ।
શૂદ્રસ્યૈકાહુતિર્ દેવિ મુક્તિશ્ ચાપિ ચતુર્વિધા ॥ મ્ભ્ત્_3.25
મહામોક્ષં બ્રાહ્મણસ્ય સાયુજ્યં ક્ષત્રિયસ્ય ચ ।
સારૂપ્યં ચોરુજાતસ્ય સાલોક્યં શૂદ્રજાતિષુ ॥ મ્ભ્ત્_3.26
બાહ્યકુણ્ડં બાહ્યહોમે એવ હિ સુરવન્દિતે ।
જાતિભેદે કુણ્ડભેદં કુર્યાત્ સાધકસત્તમઃ ॥ મ્ભ્ત્_3.27
બાહ્યહોમે કામ્યસિદ્ધિર્ ભવિષ્યતિ ન સંશયઃ ।

જ્ઞાનહોમે મોક્ષસિદ્ધિર્ લભતે નાત્ર સંશયઃ ॥ મ્ભ્ત્_3.28
ઇતિ તે કથિતં કાન્તે તન્ત્રાણાં સારમ્ ઉત્તમમ્ ।
ન વક્તવ્યં પશોર્ અગ્રે શપથો મે ત્વયિ પ્રિયે ॥ મ્ભ્ત્_3.29
શ્રીદેવ્ય્ ઉવાચ ।
મદ્યપાને મહાપુણ્યં સર્વતન્ત્રે શ્રુતં મયા ।
જાતિભેદં ન કથિતમ્ ઇદાનીં તત્ પ્રકાશય ॥ મ્ભ્ત્_3.30
શ્રીશઙ્કર ઉવાચ ।
સર્વયજ્ઞાધિપો વિપ્રઃ સંશયો નાસ્તિ પાર્વતિ ।
સૌત્રામણ્યાં કુલાચારે ચત્વારો બ્રાહ્મણાદયઃ ॥ મ્ભ્ત્_3.31
બ્રાહ્મણસ્ય મહામોક્ષં મદ્યપાને પ્રિયંવદે ।
બ્રાહ્મણઃ પરમેશાનિ યદિ પાનાદિકં ચરેત્ ॥ મ્ભ્ત્_3.32
તત્ક્ષણાચ્ છિવરૂપો ઽસૌ સત્યં સત્યં હિ શૈલજે ॥ મ્ભ્ત્_3.33
તોયે તોયં યથા લીનં યથા તેજસિ તેજસમ્ ।
ઘટે ભગ્ને યથાકાશં વાયૌ વાયુર્ યથા પ્રિયે ॥ મ્ભ્ત્_3.34
તથૈવ મદ્યપાનેન બ્રાહ્મણો બ્રહ્મણિ પ્રિયે ।
લીયતે નાત્ર સંદેહઃ પરમાત્મનિ શૈલજે ॥ મ્ભ્ત્_3.35
સાયુજ્યાદિ મહામોક્ષં નિયુક્તં ક્ષત્રિયાદિષુ ।
સા નારી માનવી મદ્યપાને દેવિ ન સંશયઃ ॥ મ્ભ્ત્_3.36
સૂક્ષ્મસૂત્રે યથા વહ્નિર્ દેહમધ્યે તથા શિવા ।
તપોરૂપં બૃહત્સૂત્રં પૂજારૂપં તથા હરિઃ ॥ મ્ભ્ત્_3.37
સંયુક્તં કુરુતે યત્ર વર્ધમાનો મહાઙ્કુશઃ ।
મદ્યપાનં વિના દેવિ તજ્જ્ઞાનં ન હિ લભ્યતે ।
અત એવ હિ વિપ્રેણ મદ્યપાનં સદા ચરેત્ ॥ મ્ભ્ત્_3.38
વેદમાતાજપેનૈવ બ્રાહ્મણો ન હિ શૈલજે ।
બ્રહ્મજ્ઞાનં યદા દેવિ તદા બ્રાહ્મણ ઉચ્યતે ॥ મ્ભ્ત્_3.39
દેવાનામ્ અમૃતં બ્રહ્મ તદ્ ઇયં લૌકિકી સુરા ।
સુરત્વં ભોગમાત્રેણ સુરા તેન પ્રકીર્તિતા ॥ મ્ભ્ત્_3.40
મન્ત્રત્રયં સદા પાઠ્યં બ્રહ્મશાપાદિ મોચનમ્ ।
પ્રકુર્યાત્ તુ દ્વિજેનૈવ તદા બ્રહ્મમયી સુરા ॥ મ્ભ્ત્_3.41
હવિર્ આરોપમાત્રેણ વહ્નિર્ દીપ્તો યથા ભવેત્ ।
શાપમોચનમાત્રેણ સુરા મુક્તિપ્રદાયિની ॥ મ્ભ્ત્_3.42
અત એવ હિ દેવેશિ બ્રાહ્મણઃ પાનમ્ આચરેત્ ।
સ બ્રાહ્મણઃ સ વેદજ્ઞઃ સો ઽગ્નિહોત્રી સ દીક્ષિતઃ ॥ મ્ભ્ત્_3.43
બહુ કિં કથ્યતે દેવિ સ એવ ત્રિગુણાત્મકઃ ॥ મ્ભ્ત્_3.44
મુક્તિમાર્ગમ્ ઇદં દેવિ ગોપ્તવ્યં પશુસંકટે ।
પ્રકાશાત્ કાયહાનિઃ સ્યાન્ નિન્દનીયો ન ચાન્યથા ॥ મ્ભ્ત્_3.45
માતૃકાભેદતન્ત્ર, ચતુર્થઃ પટલઃ
શ્રીચણ્ડિકોવાચ ।
કારણેન મહામોક્ષં નિર્માલ્યેન શિવસ્ય ચ ।
શ્રુતં વેદે પુરાણે ચ તવ વક્ત્રે સુરેશ્વર ॥ મ્ભ્ત્_4.1

અગ્રાહ્યં તવ નિર્માલ્યમ્ અગ્રાહ્યં કારણં વિભો ।
મૃષા વાક્યં મહાદેવ કથં વદસિ યોગભૃત્ ॥ મ્ભ્ત્_4.2
કારણેન વિના દેવિ મોક્ષજ્ઞાનાદિકં ન હિ ।
મહાશઙ્ખં વિના દેવિ ન મન્ત્રઃ સિદ્ધિદાયકઃ ॥ મ્ભ્ત્_4.3
સાક્ષાદ્ બ્રહ્મમયી માલા મહાશઙ્ખાખ્યયા પુનઃ ।
શિલાયન્ત્રે ચ વૃન્દાયાં ગઙ્ગાયાં સુરપૂજિતે ।
નૈવ સ્પૃશેન્ મહાશઙ્ખં સ્પર્શનાત્ કાષ્ઠવદ્ ભવેત્ ॥ મ્ભ્ત્_4.4
શ્રીચણ્ડિકોવાચ ।
ગઙ્ગા તુ કારણં વારિ મદ્યં પરમકારણમ્ ।
કારણસ્પર્શમાત્રેણ માલાઃ શુદ્ધા ભવન્તિ હિ ॥ મ્ભ્ત્_4.5
ગઙ્ગાસ્પર્શેન દેવેશ કાષ્ઠવન્ માલિકા કથમ્ ।
વદ મે પરમેશાન ઇતિ મે સંશયો હૃદિ ॥ મ્ભ્ત્_4.6
શ્રીશંકર ઉવાચ ।
કારણં દેવદેવેશિ મોક્ષદં સર્વજાતિષુ ।
તથા સ્વર્ગાદિજનકં ગઙ્ગાતોયં ન સંશયઃ ॥ મ્ભ્ત્_4.7
કારણે નિવસેદ્ દેવિ મહાકાલી પરા કલા ।
મહાવિદ્યા વસેન્ નિત્યં સુરાયાં પરમેશ્વરિ ॥ મ્ભ્ત્_4.8
મહાશઙ્ખે વસેન્ નિત્યં પઞ્ચાશદ્વર્ણરૂપિણી ।
મહાવિદ્યા વસેન્ નિત્યં મહાશઙ્ખે ચ સર્વદા ॥ મ્ભ્ત્_4.9
ગઙ્ગાસ્પર્શનમાત્રેણ ગઙ્ગાયાં લીયતે પ્રિયે ।
કાષ્ઠસ્પર્શનમાત્રેણ કાષ્ઠે વહ્નિસ્ તૃણે યથા ॥ મ્ભ્ત્_4.10
ગઙ્ગાસ્પર્શે તથા દેવિ ગઙ્ગાયાં લીયતે પ્રિયે ।
તત્ક્ષણે ચ મહાશઙ્ખઃ કાષ્ઠવન્ નાત્ર સંશયઃ ॥ મ્ભ્ત્_4.11
શિલાયન્ત્રે તુલસ્યાદૌ તથૈવ પરમેશ્વરિ ॥ મ્ભ્ત્_4.12
મહાશઙ્ખાખ્યમાલાયાં યો જપેત્ સાધકોત્તમઃ ।
અષ્ટસિદ્ધિઃ કરે તસ્ય સ એવ શમ્ભુર્ અવ્યયઃ ।
મૌલૌ ગઙ્ગા સ્થિતા યસ્ય ગઙ્ગાસ્નાનેન તસ્ય કિમ્ ॥ મ્ભ્ત્_4.13
વારાણસી કામરૂપં હરિદ્વારં પ્રયાગકમ્ ।
ગણ્ડકી બદરિકા દેવિ ગઙ્ગાસાગરસંગમમ્ ॥ મ્ભ્ત્_4.14
યસ્ય ભક્તિર્ મહાશઙ્ખે તસ્ય દર્શનમાત્રતઃ ।
તીર્થસ્નાનફલં સર્વં લભતે નાત્ર સંશયઃ ॥ મ્ભ્ત્_4.15
ઇતિ તે કથિતં કાન્તે સર્વં પરમદુર્લભમ્ ।
ન વક્તવ્યં પશોર્ અગ્રે પ્રાણાન્તે પરમેશ્વરિ ॥ મ્ભ્ત્_4.16
માતૃકાભેદતન્ત્ર, પઞ્ચમઃ પટલઃ
શ્રીચણ્ડિકોવાચ ।
પારદં ભસ્મનિર્માણં કેનોપાયેન શંકર ।
તદ્ અહં શ્રોતુમ્ ઇચ્છામિ યદિ તે ઽસ્તિ કૃપા મયિ ॥ મ્ભ્ત્_5.1
શ્રીશંકર ઉવાચ ।
પારદે ભસ્મનિર્માણે નાનાવિઘ્નાનિ પાર્વતિ ।
અત એવ હિ તત્રાદૌ શાન્તિં કુર્યાદ્ દ્વિજોત્તમઃ ॥ મ્ભ્ત્_5.2

વરયેત્ કર્મકર્તારં વક્ષ્યમાણવિધાનતઃ ।
પૂજયેત્ ષોડશલિઙ્ગં પાર્થિવં પર્વતાત્મજે ॥ મ્ભ્ત્_5.3
ષોડશેનોપચારેણ તોડલોક્તવિધાનતઃ ।
ભોગયોગ્યં પ્રદાતવ્યં મધુપર્કં સુરેશ્વરિ ॥ મ્ભ્ત્_5.4
પઞ્ચામૃતેન દેવેશં સ્નાપયેચ્ છુદ્ધવારિણા ।
પુરુષસ્ય યથાયોગ્યં યુગ્મવસ્ત્રં નિવેદયેત્ ॥ મ્ભ્ત્_5.5
ચતુરઙ્ગુલિવિસ્તારં રૌપ્યનિર્માણપીઠકમ્ ।
અલંકારં યથાયોગ્યં પુરુષસ્ય નિવેદયેત્ ॥ મ્ભ્ત્_5.6
અલક્તકયુતં વાપિ દદ્યાન્ મલયજં શિવે ।
ષડઙ્ગધૂપં દેવેશિ પ્રદદ્યાચ્ ચ પુનઃ પુનઃ ॥ મ્ભ્ત્_5.7
ઘૃતયુક્તં તથા દીપં દદ્યાત્ કલ્યાણહેતવે ।
નૈવેદ્યં વિવિધં રમ્યં નાનાફલસમન્વિતમ્ ॥ મ્ભ્ત્_5.8
શર્કરાસંયુતં કૃત્વા પાયસં વિનિવેદયેત્ ।
દદ્યાત્ તોયં મહેશાનિ વિજયાસંયુતં પ્રિયે ॥ મ્ભ્ત્_5.9
ષડક્ષરં મહામન્ત્રં ગજાન્તકસહસ્રકમ્ ।
પ્રજપેત્ સાધકશ્રેષ્ઠસ્ તતઃ સિદ્ધો ભવેદ્ ધ્રુવમ્ ॥ મ્ભ્ત્_5.10
અથવા પરમેશાનિ ધનદાં ધનદાયિનીમ્ ।
પૂજયેદ્ બહુયત્નેન ષોડશેનોપચારતઃ ॥ મ્ભ્ત્_5.11
દ્વાદશાહ્વં યજેદ્ ધીમાન્ દિક્સહસ્રં તતો જપેત્ ।
તદ્દશાંશં મહેશાનિ હોમં કુર્યાદ્ વિચક્ષણઃ ॥ મ્ભ્ત્_5.12
હોમકર્માદ્યશક્તશ્ ચેદ્ દ્વિગુણં જપમ્ આચરેત્ ।
યદિ પ્રીતા ભવેત્ સા હિ તદા કિં વા ન સિધ્યતિ ॥ મ્ભ્ત્_5.13
પ્રત્યહં પરમેશાનિ કુબેરો દીયતે વસુ ।
ભસ્મનિર્માણકં દેવિ વિચિત્રં તસ્ય કિં શિવે ॥ મ્ભ્ત્_5.14
ગુરવે દક્ષિણાં દદ્યાદ્ યથાવિભવવિસ્તરૈઃ ।
તતઃ સિદ્ધો ભવેન્ મન્ત્રી નાત્ર કાર્યા વિચારણા ॥ મ્ભ્ત્_5.15
શ્રીચણ્ડિકોવાચ ।
વિધાનં દેવદેવેશ ભસ્મનિર્માણકર્મણિ ।
સકૃત્ કૃતે યેન રૂપે ભસ્મસાજ્ જાયતે વિભો ॥ મ્ભ્ત્_5.16
શ્રીશંકર ઉવાચ ।
આનીય પારદં દેવિ સ્થાપયેત્ પ્રસ્તરોપરિ ।
તસ્યોપરિ જપેન્ મન્ત્રં સર્વવન્દ્યનવાત્મકમ્ ॥ મ્ભ્ત્_5.17
સાષ્ટસહસ્રં દેવેશિ પ્રજપેત્ સાધકાગ્રણીઃ ।
સ્યયમ્ભુપુષ્પસંયુક્તે વસ્ત્રે ચારુણસંનિભે ॥ મ્ભ્ત્_5.18
સંસ્થાપ્ય પારદં દેવિ મૃત્પાત્રયુગલે શિવે ।
પુષ્પયુક્તેન સૂત્રેણ બધ્નીયાદ્ બહુયત્નતઃ ॥ મ્ભ્ત્_5.19
મુક્તિધારાજલેનૈવ ધાન્યસ્ય પરમેશ્વરિ ।
લેપયેદ્ બહુયત્નેન રૌદ્રે શુષ્કં ચ કારયેત્ ॥ મ્ભ્ત્_5.20
પુનશ્ ચ લેપયેદ્ ધીમાન્ તતો વહ્નૌ વિનિક્ષિપેત્ ।
અષ્ટમીનવમીરાત્રૌ ક્ષિપેન્ નૈવ સુરેશ્વરિ ॥ મ્ભ્ત્_5.21

અથવા પરમેશાનિ મૃત્પાત્રે સ્થાપયેદ્ રસમ્ ।
વલ્લીરસેન તદ્દ્રવ્યં શોધયેદ્ બહુયત્નતઃ ॥ મ્ભ્ત્_5.22
ઘૃતનારીરસેનૈવ તથૈવ શોધનં ચરેત્ ।
એવં કૃતે તુ ગુટિકા યદિ સ્યાદ્ દૃઢબન્ધનમ્ ॥ મ્ભ્ત્_5.23
ધુસ્તુરં ચ સમાનીય મધ્યે શૂન્યં ચ કારયેત્ ।
કૃષ્ણાખ્યતુલસીયોગે તથા ઘૃતકુમારિકા ॥ મ્ભ્ત્_5.24
એવં કૃતે વહ્નિયોગે ભસ્મસાજ્ જાયતે કિલ ।
ભસ્મયોગે ભવેત્ સ્વર્ણં ધનદાયાઃ પ્રસાદતઃ ॥ મ્ભ્ત્_5.25
વિવર્ણં જાયતે દ્રવ્યં યદિ પૂજાં ન ચાચરેત્ ॥ મ્ભ્ત્_5.26
શ્રીચણ્ડિકોવાચ ।
સ્વયમ્ભુ કીદૃશં નાથ કુણ્ડગોલં તુ કીદૃશમ્ ।
સ્વપુષ્પં કીદૃશં નાથ વજ્રપુષ્પં તુ કીદૃશમ્ ।
સર્વકાલોદ્ભવં નાથ કીદૃશં વદ શંકર ॥ મ્ભ્ત્_5.27
શ્રીશંકર ઉવાચ ।
વિવાહરહિતા કન્યા પ્રથમં પુષ્પસંયુતા ।
તચ્છોણિતં મહેશાનિ સ્વયમ્ભુ નાત્ર સંશયઃ ॥ મ્ભ્ત્_5.28
ભર્તરિ વિદ્યમાને તુ યા કન્યા ચાન્યજા શિવે ।
તદુદ્ભવં કુણ્ડપુષ્પં સર્વકાર્યાર્થસાધકમ્ ॥ મ્ભ્ત્_5.29
મૃતે ભર્તરિ દેવેશિ યા કન્યા અન્યજા શિવે ।
તદુદ્ભવં ગોલપુષ્પં દેવવશ્યકરં પરમ્ ॥ મ્ભ્ત્_5.30
વિવાહિતાયાઃ કન્યાયાઃ પ્રથમે ઋતુસમ્ભવે ।
તચ્છોણિતં મહેશાનિ સ્વપુષ્પં સર્વમોહનમ્ ॥ મ્ભ્ત્_5.31
વિવાહિતાયાઃ કન્યાયાઃ પુરુષસ્ય ચ તાડનાત્ ।
યદિ પુષ્પં સમુદ્ભૂતં વજ્રં તત્ પરિકીર્તિતમ્ ॥ મ્ભ્ત્_5.32
વિવાહિતાયાઃ કન્યાયાઃ પ્રતિમાસે ચ યદ્ ભવેત્ ।
સર્વકાલોદ્ભવં પુષ્પં કથિતં વીરવન્દિતે ॥ મ્ભ્ત્_5.33
સમક્રોશં વહ્નિમધ્યે સ્થાપયેદ્ બહુયત્નતઃ ।
તત ઉત્થાય તદ્ દ્રવ્યં સ્વર્ણપાત્રે નિધાય ચ ॥ મ્ભ્ત્_5.34
પ્રજપેત્ પરમેશાનિ પ્રાસાદાખ્યં મહામનુમ્ ।
તતઃ સિદ્ધો ભવેન્ મન્ત્રી નાન્યથા મમ ભાષિતમ્ ॥ મ્ભ્ત્_5.35
એતન્ મન્ત્રં મહેશાનિ ગજાન્તકસહસ્રકમ્ ।
જપિત્વા પૂજયેત્ પશ્ચાત્ પાર્થિવં શિવલિઙ્ગકમ્ ॥ મ્ભ્ત્_5.36
તતઃ પરીક્ષા કર્તવ્યા શૃણુ મત્પ્રાણવલ્લભે ।
શુદ્ધતામ્રં વહ્નિમધ્યે મૃત્પાત્રે તોલકં મિતમ્ ॥ મ્ભ્ત્_5.37
દ્રવીભૂતે ચ તામ્રે ચ ગુઞ્જામાનં ક્ષિપેદ્ યદિ ।
તત્ક્ષણે પરમેશાનિ સ્વર્ણં ભવતિ નિશ્ચિતમ્ ॥ મ્ભ્ત્_5.38
ગુઞ્જાપ્રમાણં તદ્ દ્રવ્યં ભોજનં કુરુતે યદિ ।
સર્વરોગપરિત્યક્તો જાયતે મદનોપમઃ ।
મન્ત્રસિદ્ધિર્ ભવેત્ તસ્ય જાયતે ચિરજીવિતા ॥ મ્ભ્ત્_5.39
પ્રત્યહં પરમેશાનિ શતનારીં રમેદ્ યદિ ।

વીર્યાદિરહિતં ન સ્યાત્ તેજોવૃદ્ધિકરં પરમ્ ॥ મ્ભ્ત્_5.40
મરણં નૈવ પશ્યામિ યદિ ધ્યાનયુતો ભવેત્ ।
તસ્ય વિત્તં વિલોક્યૈવ કુબેરો ઽપિ તિરસ્કૃતઃ ॥ મ્ભ્ત્_5.41
ગાનેન તુમ્બુરુઃ સાક્ષાદ્ દાનેન વાસવો યથા ।
મહેશ ઇવ યોગીન્દ્રો નિરૃતિર્ ઇવ દુર્ધરઃ ॥ મ્ભ્ત્_5.42
મહાબલો મહાવીર્યો મહાસાહસિકઃ શુચિઃ ।
મહાસ્વચ્છો દયાવાંશ્ ચ સર્વપ્રાણિહિતે રતઃ ।
બહુ કિં કથ્યતે દેવિ સ એવ ગણનાયકઃ ॥ મ્ભ્ત્_5.43
માતૃકાભેદતન્ત્ર, ષષ્ટઃ પટલઃ
શ્રીચણ્ડિકોવાચ ।
વદ ઈશાન સર્વજ્ઞ સર્વતત્ત્વવિદાં વર ।
મહારોગે મહાદુઃખે મહાદારિદ્ર્યસંકટે ॥ મ્ભ્ત્_6.1
નાના વ્યાધિગતે વાપિ નાનાપીડાદિસંકટે ।
રાજ્યનાશે રાજભયે કારાગારગતે પુનઃ ॥ મ્ભ્ત્_6.2
રાયદણ્ડે ચ દેવેશ તથા ચ ગ્રહપીડિતે ।
કેનોપાયેન દેવેશ મુચ્યતે વદ શંકર ॥ મ્ભ્ત્_6.3
શ્રીશંકર ઉવાચ ।
શૃણુ ચાર્વઙ્ગિ સુભગે યન્ માં ત્વં પરિપૃચ્છસિ ।
તત્ તત્ સર્વં પ્રવક્ષ્યામિ સાવધાનાવધારય ॥ મ્ભ્ત્_6.4
યા ચાદ્યા પરમા વિદ્યા ચામુણ્ડા કાલિકા પરા ।
તસ્યાઃ પ્રયોગમાત્રેણ કિં ન સિધ્યતિ ભૂતલે ॥ મ્ભ્ત્_6.5
શ્રીચણ્ડિકોવાચ ।
રાહુશ્ ચણ્ડાલો વિખ્યાતઃ સર્વત્ર પરમેશ્વર ।
પુણ્યકાલઃ કથં દેવ તસ્ય સ્પર્શે દિવાકરે ॥ મ્ભ્ત્_6.6
નિશાકરે તથા નાથ ઇતિ મે સંશયો હૃદિ ।
કથયસ્વ પરાનન્દ પશ્ચાદ્ અન્યત્ પ્રકાશય ॥ મ્ભ્ત્_6.7
શ્રીશંકર ઉવાચ ।
શૃણુ ચાર્વઙ્ગિ સુભગે ગ્રહણં ચોત્તમોત્તમમ્ ।
ગ્રહણં ત્રિવિધં દેવિ ચન્દ્રસૂર્યાગ્નિસંયુતમ્ ॥ મ્ભ્ત્_6.8
શક્તેર્ લલાટકે નેત્રે વહ્નિસ્ તિષ્ઠતિ સર્વદા ।
વામનેત્રે તથા ચન્દ્રો દક્ષે સૂર્યઃ પ્રતિષ્ઠિતઃ ॥ મ્ભ્ત્_6.9
શમ્ભુનાથેન દેવેશિ રમણં ક્રિયતે યદા ।
તદૈવ ગ્રહણં દેવિ શક્તિયુક્તો યદા શિવઃ ॥ મ્ભ્ત્_6.10
વામનેત્રે ચુમ્બને તુ શશાઙ્કગ્રહણં તદા ।
દક્ષનેત્રે ચુમ્બને ચ ભાસ્કરગ્રહણં તદા ॥ મ્ભ્ત્_6.11
લલાટે ચુમ્બને ચાગ્નિગ્રહણં પરમેશ્વરિ ।
શિવવીર્યં યતો વહ્નિરતો ઽદૃશ્યઃ સુરેશ્વરિ ॥ મ્ભ્ત્_6.12
રાહુઃ શિવઃ સમાખ્યાતસ્ ત્રિગુણા શક્તિર્ ઈરિતા ।
શિવશક્ત્યોઃ સમાયોગો ગ્રહણં પરમેશ્વરિ ॥ મ્ભ્ત્_6.13
શિવશક્તિસમાયોગઃ કાલં બ્રહ્મમયં પ્રિયે ।

અત એવ મહેશાનિ રાશ્યાદીન્ ન વિચારયેત્ ॥ મ્ભ્ત્_6.14
તિથિનક્ષત્રયોગેન યદ્ યોગં પરમેશ્વરિ ।
તદૈવ પરમેશાનિ રાશ્યાદિગણનં ચરેત્ ॥ મ્ભ્ત્_6.15
શિવશક્તિસમાયોગાત્ સર્વં બ્રહ્મમયં જગત્ ।
માસપક્ષતિથીનાં ચ નોચ્ચાર્યં પરમેશ્વરિ ॥ મ્ભ્ત્_6.16
દૃષ્ટિમાત્રેણ જપ્તવ્યં તદા સિદ્ધિર્ ભવેદ્ ધ્રુવમ્ ।
તત્કાલં પરમં કાલં વિજ્ઞેયં વીરવન્દિતે ॥ મ્ભ્ત્_6.17
તત્ર યદ્ યત્ કૃતં સર્વમ્ અનન્તફલમ્ ઈરિતમ્ ।
પુરૈવ કથિતં સર્વં બહુ કિં કથ્યતે ઽધુના ॥ મ્ભ્ત્_6.18
એતત્ સુગુપ્તભેદં હિ તવ સ્નેહાત્ પ્રકાશિતમ્ ।
ન વક્તવ્યં પશોર્ અગ્રે ન વક્તવ્યં સુરેશ્વરિ ॥ મ્ભ્ત્_6.19
એતત્ તત્ત્વં પ્રયત્નેન બ્રહ્મા જાનાતિ માધવઃ ।
પ્રગોપ્તવ્યં પ્રયત્નેન સ્વયોનિર્ ઇવ શૈલજે ॥ મ્ભ્ત્_6.20
શ્રીચણ્ડિકોવાચ ।
ચામુણ્ડાયા મહામન્ત્રં કીદૃશં પરમેશ્વર ।
આરાધનં કીદૃશં વા તદ્ વદસ્વ દયાનિધે ॥ મ્ભ્ત્_6.21
શ્રીશંકર ઉવાચ ।
શૃણુ ચાર્વઙ્ગિ સુભગે ચામુણ્ડામન્ત્રમ્ ઉત્તમમ્ ।
યસ્ય વિજ્ઞાનમાત્રેણ પુનર્જન્મ ન વિદ્યતે ॥ મ્ભ્ત્_6.22
કાલીબીજયુગં દેવિ કૂર્ચબીજં તતઃ પરમ્ ।
ત્ર્યક્ષરી પરમા વિદ્યા ચામુણ્ડા કાલિકા સ્વયમ્ ॥ મ્ભ્ત્_6.23
સપ્તાહં પૂજયેદ્ દેવીમ્ ઉપચારૈશ્ ચ ષોડશૈઃ ।
પૂજાન્તે પ્રજપેન્ મન્ત્રં ત્રિસહસ્રં વરાનને ॥ મ્ભ્ત્_6.24
રાત્રૌ તુ પઞ્ચતત્ત્વેન પૂજયેત્ પરમેશ્વરીમ્ ।
તથા રાત્રૌ જપેન્ મન્ત્રં કુલશક્તિસમન્વિતમ્ ॥ મ્ભ્ત્_6.25
યન્ત્રનિર્માણયોગ્યં હિ પીઠં દદ્યાત્ સુવિસ્તરમ્ ।
ભોગયોગ્યં પ્રદાતવ્યં મધુપર્કં યથોચિતમ્ ॥ મ્ભ્ત્_6.26
શક્તેર્ યથા વિધેયં સ્યાદ્ યુવત્યાઃ પરમેશ્વરિ ।
તથા વસ્ત્રં પ્રદાતવ્યં સર્વકલ્યાણહેતવે ॥ મ્ભ્ત્_6.27
અલંકારં યથાયોગ્યં તત્ર તત્ર નિયોજયેત્ ।
નૈવેદ્યં વિવિધં રમ્યં નાનાદ્રવ્યસમન્વિતમ્ ॥ મ્ભ્ત્_6.28
સામિષાન્નં પ્રદાતવ્યં પરમાન્નં સશર્કરમ્ ।
પૂજયેત્ પરયા ભક્ત્યા બલિદાનં તતઃ પરમ્ ॥ મ્ભ્ત્_6.29
પ્રત્યહં પરમેશાનિ ચાદ્યન્તે વા બલિં હરેત્ ।
સાઙ્ગે જાતે મહેશાનિ ચાથવા બલિમ્ આહરેત્ ॥ મ્ભ્ત્_6.30
એવં કૃતે મહાસિદ્ધિં લભતે નાત્ર સંશયઃ ।
ધનાર્થી ધનમ્ આપ્નોતિ પુત્રાર્થી પુત્રવાન્ ભવેત્ ॥ મ્ભ્ત્_6.31
વિવાદે જયમ્ આપ્નોતિ રાજદ્વારે જયી ભવેત્ ।
સર્વત્ર વિજયી ભૂત્વા દેવીપુત્ર ઇવ ક્ષિતૌ ॥ મ્ભ્ત્_6.32
રોગેભ્યો ઘોરરૂપેભ્યઃ પૂજયિત્વા પ્રમુચ્યતે ।

ઇચ્છાસિદ્ધિર્ ભવેત્ તસ્ય સર્વસિદ્ધિર્ ન ચાન્યથા ॥ મ્ભ્ત્_6.33
કારાગારગતે દેવિ મુચ્યતે નાત્ર સંશયઃ ।
પ્રયોગં પરમેશાનિ સારં પરમદુર્લભમ્ ॥ મ્ભ્ત્_6.34
અતિસ્નેહેન દેવેશિ તવ સ્થાને પ્રકાશિતમ્ ।
અથવા પરમેશાનિ પઠેચ્ ચણ્ડીં સનાતનીમ્ ॥ મ્ભ્ત્_6.35
પૂજયેચ્ ચણ્ડિકાં દેવીં સુગન્ધિપુષ્પસંયુતૈઃ ।
ધૂપદીપેન ગન્ધેન નૈવેદ્યેન સુરેશ્વરિ ॥ મ્ભ્ત્_6.36
અવશ્યં પઞ્ચતત્ત્વેન પૂજયેચ્ ચણ્ડિકાં પરામ્ ॥ મ્ભ્ત્_6.37
આદાવ્ ઋષ્યાદિસૂક્તેન ચાર્ઘ્યાન્તે પરમેશ્વરિ ।
પઞ્ચતત્ત્વં સમાનીય શોધયેચ્ છાસ્ત્રવિત્તમઃ ॥ મ્ભ્ત્_6.38
તર્પણં ચ તતઃ કૃત્વા ચાર્ઘ્યપાત્રે વિનિક્ષિપેત્ ।
અર્ઘ્યોદકેન સંપ્રોક્ષ્ય પૂજયેત્ પીઠદેવતામ્ ॥ મ્ભ્ત્_6.39
પ્રણવં ચ સમુદ્ધૃત્ય માયાબીજં તતઃ પરમ્ ।
પ્રભાં માયાં જયાં સૂક્ષ્માં વિશુદ્ધાં નન્દિનીં તથા ॥ મ્ભ્ત્_6.40
સુપ્રભાં વિજયાં સર્વસિદ્ધિદાં પરિપૂજયેત્ ।
વજ્રનખદંષ્ટ્રાયુધાય હૂં ફડ્ ઇત્યન્તતસ્ તતઃ ॥ મ્ભ્ત્_6.41
નમો ઽન્તેન તુ દેવેશિ આસનં ચ સમર્ચયેત્ ।
ગુરુપઙ્ક્તિં પૂજયિત્વા પુનર્ ધ્યાનં સમાચરેત્ ॥ મ્ભ્ત્_6.42
આવાહનં તતો મુદ્રાં જીવન્યાસં પ્રપૂજનમ્ ।
ષડઙ્ગેન તુ સમ્પૂજ્ય પરિવારાન્ પ્રપૂજયેત્ ॥ મ્ભ્ત્_6.43
શઙ્ખનિધિં પદ્મનિધિં તથા બ્રાહ્મ્યાદિકં યજેત્ ।
ઇન્દ્રાદીંશ્ ચૈવ વજ્રાદીન્ પૂજયેત્ સાધકોત્તમઃ ॥ મ્ભ્ત્_6.44
પ્રણવાદિનમો ઽન્તેન પૂજયેત્ સાધકોત્તમઃ ।
પુનર્ દેવીં મહેશાનિ પઞ્ચતત્ત્વેન પૂજયેત્ ॥ મ્ભ્ત્_6.45
પ્રાણાયામં તતઃ કૃત્વા ગુરુમન્ત્રેષ્ટદેવતામ્ ।
ઐક્યં વિભાવ્ય દેવેશિ મૂલમન્ત્રં જપેચ્ છતમ્ ॥ મ્ભ્ત્_6.46
પ્રાણાયામં તતઃ કૃત્વા કારણાદીન્ સમાહરેત્ ।
તસ્યૈ દત્ત્વા સ્વયં પીત્વા પઠેચ્ ચણ્ડીં સુરેશ્વરિ ॥ મ્ભ્ત્_6.47
સાઙ્ગે જાતે તુ માહાત્મ્યે પુનઃ પાનં સમાચરેત્ ।
તતસ્ તુ પ્રપઠેદ્ ધીમાન્ ક્રમેણ પાનમ્ આચરેત્ ॥ મ્ભ્ત્_6.48
સમાપ્તે તુ વિલોમેન પુનર્ મન્ત્રં શતં જપેત્ ।
યદિ ભાગ્યવશાદ્ દેવિ શક્તિયોગં લભેન્ નરઃ ॥ મ્ભ્ત્_6.49
તત્ક્ષણે હિ વિજાનીયાત્ સર્વસિદ્ધિઃ કરે સ્થિતા ।
એવં કૃત્વા મહેશાનિ યદિ પાઠં સમાચરેત્ ॥ મ્ભ્ત્_6.50
માહાત્મ્યં તસ્ય પાઠસ્ય કિં વક્તું શક્યતે મયા ।
શતવક્ત્રં યદિ ભવેત્ તદા વક્તું ન શક્યતે ॥ મ્ભ્ત્_6.51
પઞ્ચવક્ત્રેણ દેવેશિ કિં વક્તું શક્યતે ઽધુના ।
સકૃત્ પાઠેન દેવેશિ કિં પુનર્ બ્રહ્મ કેવલમ્ ॥ મ્ભ્ત્_6.52
અવશ્યં લભતે શાન્તિં સર્વત્ર પરમેશ્વરિ ।
યદિ શાન્તિં ન લભતે મમ વાક્યં મૃષા તદા ॥ મ્ભ્ત્_6.53

ષોડશેનોપચારેણ પ્રથમં પૂજનં ચરેત્ ।
દ્વિતીયે પઞ્ચતત્ત્વેન પૂજયેચ્ ચણ્ડિકાં પ્રિયે ॥ મ્ભ્ત્_6.54
સહસ્રાવૃત્તિપાઠેન યત્ ફલં લભતે નરઃ ।
સકૃત્ પાઠસ્ય દેવેશિ કલાં નાર્હતિ ષોડશીમ્ ॥ મ્ભ્ત્_6.55
ધ્યાનમ્ અસ્યાઃ પ્રવક્ષ્યામિ યથા ધ્યાત્વા પઠેન્ નરઃ ॥ મ્ભ્ત્_6.56
ઓં યા ચણ્ડી મધુકૈટભાદિદૈત્યદલની માહિષોન્માદિની યા ધૂમ્રેક્ષણચણ્ડમુણ્ડમથની યા રક્તબીજાશની ।
શક્તિઃ શુમ્ભનિશુમ્ભદૈત્યદલની યા સિદ્ધિલક્ષ્મીઃ પરા સા દેવી નવકોટિમૂર્તિસહિતા માં પાતુ વિશ્વેશ્વરી ॥ મ્ભ્ત્_6.57
ધ્યાનમ્ એતચ્ ચણ્ડિકાયાઃ શૃણુષ્વ વીરવન્દિતે ॥ મ્ભ્ત્_6.58
શૃણુ મન્ત્રં પ્રવક્ષ્યામિ ત્રૈલોક્યેષુ ચ દુર્લભમ્ ।
વેદાદ્યં વાગ્ભવં માયાં કામબીજં તતઃ પરમ્ ॥ મ્ભ્ત્_6.59
સ્થિરમાયાં મહામાયાં કામબીજં તતો નમઃ ।
નવાક્ષરં મહામન્ત્રં જપેદ્ આદૌ શતં પ્રિયે ॥ મ્ભ્ત્_6.60
વિપરીતં મહામન્ત્રં પાઠાન્તે તુ શતં જપેત્ ।
શૃણુ દેવિ પ્રવક્ષ્યામિ ઋષિચ્છન્દઃ સુદુર્લભમ્ ॥ મ્ભ્ત્_6.61
ઓં સપ્તશતીમહાસ્તોત્રસ્ય મેધાતિથિઋષિર્ ગાયત્ર્યનુષ્ટુબ્બૃહતીપંક્તિત્રિષ્તુબ્જગત્યશ્ છન્દાંસિ મહાકાલીમહાલક્ષ્મીમહાસરસ્વીદેવતાસ્તવકં ઐં હ્રીં ક્લીં બીજાનિ ક્ષ્રૌં શક્તિઃ મમામુકકામસિદ્ધ્યર્થે વિનિયોગઃ ॥ મ્ભ્ત્_6.62
પ્રણવેન મહેશાનિ ષડઙ્ગન્યાસમ્ આચરેત્ ।
ઇતિ તે કથિતં કાન્તે ચણ્ડીપાઠસ્ય લક્ષણમ્ ॥ મ્ભ્ત્_6.63
સાર્વણિઃ સૂર્ય ઇત્યાદિ સાર્વણિર્ ભવિતા મનુઃ એતન્માત્રં પઠેદ્ દેવિ કિંચિન્ ન્યૂનાધિકં ન હિ ॥ મ્ભ્ત્_6.64
વારત્રયં પઠેદ્ દેવિ સંજપ્ય તુ દિનત્રયમ્ ॥ મ્ભ્ત્_6.65
મહારોગે સહાદુઃખે રાજપીડાદિદારુણે ।
નાના વ્યાધિગતે વાપિ રાજ્યનાશે તથા ભયે ॥ મ્ભ્ત્_6.66
ગ્રહપીડાદિસંજાતે બ્રહ્મહત્યાદિપાતકે ।
એવં પાઠેન દેવેશિ મુચ્યતે નાત્ર સંશયઃ ॥ મ્ભ્ત્_6.67
બહુ કિં કથ્યતે દેવિ સર્વશાન્તિં લભેન્ નરઃ ।
સર્વશઙ્કાવિનિર્મુક્તો જાયતે મદનોપમઃ ॥ મ્ભ્ત્_6.68
એવં કૃતે મહેશાનિ યદિ સિદ્ધિર્ ન જાયતે ।
પુનસ્ તેનૈવ કર્તવ્યં તતઃ સિદ્ધો ભવેદ્ ધ્રુવમ્ ॥ મ્ભ્ત્_6.69
માતૃકાભેદતન્ત્ર, સપ્તમઃ પટલઃ
શ્રીશિવ ઉવાચ ।
અથાતઃ સમ્પ્રવક્ષ્યામિ ત્રિપુરામન્ત્રમ્ ઉત્તમમ્ ।
યસ્ય વિજ્ઞાનમાત્રેણ પુનર્જન્મ ન વિદ્યતે ॥ મ્ભ્ત્_7.1
ત્રિપુરા ત્રિવિધા દેવિ બાલા પ્રોક્તા પુરા શિવે ।
તથૈવ ભૈરવી દેવી નિત્યાતન્ત્રે મયોદિતા ।
ઇદાનીં સુન્દરીં દેવી શૃણુ પાર્વતિ સાદરમ્ ॥ મ્ભ્ત્_7.2
શ્રીદેવ્ય્ ઉવાચ ।
મહામન્ત્રં શ્રુતં નાથ વામકેશ્વરયામલે ।
પ્રાતઃકૃત્યાદિ દેવેશ આરાધનક્રમં વદ ॥ મ્ભ્ત્_7.3
શ્રીશિવ ઉવાચ ।
પ્રાતર્ ઉત્થાય મન્ત્રજ્ઞઃ સહસ્રારે નિજં ગુરુમ્ ।
પૂર્વોક્તધ્યાનમ્ ઉચ્ચાર્ય પૂજયેદ્ બહુયત્નતઃ ॥ મ્ભ્ત્_7.4

તથા ચ શ્રીગુરોર્ ધ્યાનં ગુપ્તસાધનતન્ત્રકે ।
કથિતં ચ મયા પૂર્વં મન્ત્રં શૃણુ વરાનને ॥ મ્ભ્ત્_7.5
વાગ્બીજં ચ મહામાયાં વિષ્ણુશક્તિં સમુચ્ચરેત્ ।
હસખફ્રેં તથાનન્દભૈરવસ્ય મનું તતઃ ॥ મ્ભ્ત્_7.6
તસ્ય શક્તેર્ મનું પશ્ચાત્ તતશ્ ચૈવં હસૌઃ સ્મૃતઃ ।
શ્રીગુરોશ્ ચ તથા શક્તેર્ મન્ત્રમ્ એતત્ સુરેશ્વરિ ॥ મ્ભ્ત્_7.7
શ્રીગુરોર્ આનન્દનાથાન્તે અથાતઃ શક્તિર્ ઈરિતા ।
વાગ્બીજાદીન્ સમુચ્ચાર્ય અમુકાનન્દનાથ ચ ॥ મ્ભ્ત્_7.8
શ્રીપાદુકાં સમુચ્ચાર્ય પૂજયામિ નમસ્ તતઃ ।
વાગ્બીજં ચ શમ્ભુપત્નીં તદુત્તરે હરિપ્રિયામ્ ॥ મ્ભ્ત્_7.9
ભૂતબીજં સમુચ્ચાર્ય પ્રવદેચ્ ચ તદાત્મકમ્ ।
સમર્પયામિ દેવેશિ પૂજાવિધિર્ ઇતિ પ્રિયે ॥ મ્ભ્ત્_7.10
તતશ્ ચાષ્ટાક્ષરં મન્ત્રમ્ અષ્ટોત્તરશતં જપેત્ ।
જપં સમર્પયિત્વા તુ નમેદ્ અઞ્જલિના પ્રિયે ॥ મ્ભ્ત્_7.11
શ્રીદેવ્ય્ ઉવાચ ।
સ્તુતિં ચ કવચં નાથ શ્રોતુમ્ ઇચ્છામિ સામ્પ્રતમ્ ।
શ્રીગુરોઃ કવચં સ્તોત્રં ત્વયા પ્રોક્તં પુરા પ્રભો ॥ મ્ભ્ત્_7.12
ઇદાનીં સ્ત્રીગુરોઃ સ્તોત્રં કવચં મયિ કથ્યતામ્ ।
યસ્ય વિજ્ઞાનમાત્રેણ પુનર્જન્મ ન વિદ્યતે ॥ મ્ભ્ત્_7.13
શ્રીશિવ ઉવાચ ।
શૃણુ દેવિ પ્રવક્ષ્યામિ સ્તોત્રં પરમગોપનમ્ ।
યસ્ય શ્રવણમાત્રેણ સંસારાન્ મુચ્યતે નરઃ ॥ મ્ભ્ત્_7.14
નમસ્ તે દેવદેવેશિ નમસ્ તે હરપૂજિતે ।
બ્રહ્મવિદ્યાસ્વરૂપાયૈ તસ્યૈ નિત્યં નમો નમઃ ॥ મ્ભ્ત્_7.15
અજ્ઞાનતિમિરાન્ધસ્ય જ્ઞાનાઞ્જનશલાકયા ।
યયા ચક્ષુર્ ઉન્મીલિતં તસ્યૈ નિત્યં નમો નમઃ ॥ મ્ભ્ત્_7.16
ભવબન્ધનપારસ્ય તારિણી જનની પરા ।
જ્ઞાનદા મોક્ષદા નિત્યા તસ્યૈ નિત્યં નમો નમઃ ॥ મ્ભ્ત્_7.17
શ્રીનાથવામભાગસ્થા સદા યા સુરપૂજિતા ।
સદા વિજ્ઞાનદાત્રી ચ તસ્યૈ નિત્યં નમો નમઃ ॥ મ્ભ્ત્_7.18
સહસ્રારે મહાપદ્મે સદાનન્દસ્વરૂપિણી ।
મહામોક્ષપ્રદા દેવી તસ્યૈ નિત્યં નમો નમઃ ॥ મ્ભ્ત્_7.19
બ્રહ્મવિષ્ણુસ્વરૂપા ચ મહારુદ્રસ્વરૂપિણી ।
ત્રિગુણાત્મસ્વરૂપા ચ તસ્યૈ નિત્યં નમો નમઃ ॥ મ્ભ્ત્_7.20
ચન્દ્રસૂર્યાગ્નિરૂપા ચ સદાઘૂર્ણિતલોચના ।
સ્વનાથં ચ સમાલિઙ્ગ્ય તસ્યૈ નિત્યં નમો નમઃ ॥ મ્ભ્ત્_7.21
બ્રહ્મવિષ્ણુશિવત્વાદિજીવન્મુક્તિપ્રદાયિની ।
જ્ઞાનવિજ્ઞાનદાત્રી ચ તસ્યૈ નિત્યં નમો નમઃ ॥ મ્ભ્ત્_7.22
ઇદં સ્તોત્રં મહેશાનિ યઃ પઠેદ્ ભક્તિસંયુતઃ ।
સ સિદ્ધિં લભતે નિત્યં સત્યં સત્યં ન સંશયઃ ॥ મ્ભ્ત્_7.23

પ્રાતઃકાલે પઠેદ્ યસ્ તુ ગુરુપૂજાપુરઃસરમ્ ।
સ એવ ધન્યો લોકે ઽસ્મિન્ દેવીપુત્ર ઇવ ક્ષિતૌ ॥ મ્ભ્ત્_7.24
શ્રીશઙ્કર ઉવાચ ।
સ્તોત્રં સમાપ્તં દેવેશિ કવચં શૃણુ સાદરમ્ ।
યસ્ય શ્રવણમાત્રેણ વાગીશસમતાં વ્રજેત્ ॥ મ્ભ્ત્_7.25
સ્ત્રીગુરોઃ કવચસ્યાસ્ય સદાશિવ ઋષિઃ સ્મૃતઃ ।
તદાખ્યા દેવતા પ્રોક્તા ચતુર્વર્ગફલપ્રદા ॥ મ્ભ્ત્_7.26
ક્લીં બીજં મે શિરઃ પાતુ તદ્ આખ્યાતં લલાટકમ્ ।
ક્લીં બીજં ચક્ષુષોઃ પાતુ સર્વાઙ્ગં મે સદાવતુ ॥ મ્ભ્ત્_7.27
ઐં બીજં મે મુખં પાતુ હ્રીં જઙ્ઘાં પરિરક્ષતુ ।
શ્રીં બીજં સ્કન્ધદેશં મે વાગ્ભવં મે ભુજદ્વયમ્ ॥ મ્ભ્ત્_7.28
હકારં મે દક્ષભુજં ક્ષકારં વામહસ્તકમ્ ।
ક્ષમણૌ તદધઃ પાતુ લકારં હૃદયં મમ ॥ મ્ભ્ત્_7.29
રકારં પૃષ્ઠદેશં ચ રકારં દક્ષપાર્શ્વકમ્ ।
જૂઙ્કારં વામપાર્શ્વે તુ સકારં મેરુમ્ એવ તુ ॥ મ્ભ્ત્_7.30
મકારં ચાઙ્ગુલીઃ પાતુ લકારં મે નખોપરિ ।
વકારં મે નિતમ્બં ચ રકારં જાનુયુગ્મકમ્ ॥ મ્ભ્ત્_7.31
યીઃકારં પાદયુગલં હસૌઃ સર્વાઙ્ગમ્ એવ તુ ।
હસૌર્ લિઙ્ગં ચ લોમં ચ કેશં ચ પરિરક્ષતુ ॥ મ્ભ્ત્_7.32
ઐં બીજં પાતુ પૂર્વે તુ હ્રીં બીજં દક્ષિણે ઽવતુ ।
શ્રીં બીજં પશ્ચિમે પાતુ ઉત્તરે ભૂતસમ્ભવમ્ ॥ મ્ભ્ત્_7.33
શ્રીં પાતુ ચાગ્નિકોણે ચ તદાખ્યાં નૈરૃતે ઽવતુ ।
દેવ્ય્ અમ્બા પાતુ વાયવ્યાં શમ્ભોઃ શ્રીપાદુકાં તથા ॥ મ્ભ્ત્_7.34
પૂજયામિ તથા ચોર્ધ્વં નમશ્ ચાધઃ સદાવતુ ।
ઇતિ તે કથિતં કાન્તે કવચં પરમાદ્ભુતમ્ ॥ મ્ભ્ત્_7.35
ગુરુમન્ત્રં જપિત્વા તુ કવચં પ્રપઠેદ્ યદિ ।
સ સિદ્ધઃ સગણઃ સો ઽપિ શિવઃ સાક્ષાન્ ન સંશયઃ ॥ મ્ભ્ત્_7.36
પૂજાકાલે પઠેદ્ યસ્ તુ કવચં મન્ત્રવિગ્રહમ્ ।
પૂજાફલં ભવેત્ તસ્ય સત્યં સત્યં સુરેશ્વરિ ॥ મ્ભ્ત્_7.37
ત્રિસંધ્યં યઃ પઠેદ્ દેવિ સ સિદ્ધો નાત્ર સંશયઃ ॥ મ્ભ્ત્_7.38
ભૂર્જે વિલિખ્ય ગુટિકાં સ્વર્ણસ્થા ધારયેદ્ યદિ ।
તસ્ય દર્શનમાત્રેણ વાદિનો નિષ્પ્રભાં ગતાઃ ॥ મ્ભ્ત્_7.39
વિવાદે જયમ્ આપ્નોતિ રણે ચ નિરૃતિર્ ઇવ ।
સભાયાં જયમ્ આપ્નોતિ મમ તુલ્યો ન સંશયઃ ॥ મ્ભ્ત્_7.40
સહસ્રારે ભાવયં સ્તાં ત્રિસન્ધ્યં પ્રપઠેદ્ યદિ ।
સ એવ સિદ્ધો લોકેશો નિર્વાણપદમ્ ઈહતે ॥ મ્ભ્ત્_7.41
સમસ્તમઙ્ગલં નામ કવચં પરમાદ્ભુતમ્ ।
યસ્મૈ કસ્મૈ ન દાતવ્યં ન પ્રકાશ્યં કદાચન ॥ મ્ભ્ત્_7.42
દેયં શિષ્યાય શાન્તાય ચાન્યથા પતનં ભવેત્ ।
અભક્તેભ્યો ઽપિ દેવેશિ પુત્રેભ્યો ઽપિ ન દર્શયેત્ ॥ મ્ભ્ત્_7.43

ઇદં કવચમ્ અજ્ઞાત્વા દશવિદ્યાં ચ યો જપેત્ ।
સ નાપ્નોતિ ફલં તસ્ય પરે ચ નરકં વ્રજેત્ ॥ મ્ભ્ત્_7.44
સમાપ્તં કવચં દેવિ કિમ્ અન્યચ્ છ્રોતુમ્ ઇચ્છસિ ।
તવ સ્નેહાનુબન્ધેન કિં મયા ન પ્રકાશિતમ્ ॥ મ્ભ્ત્_7.45
કૂર્ચબીજં સમુચ્ચાર્ય પ્રાણમન્ત્રં તતઃ પ્રિયે ।
અનેન વાયુયોગેન કુણ્ડલીચક્રં સંચરેત્ ॥ મ્ભ્ત્_7.46
અષ્ટોત્તરશતં મૂલમન્ત્રં જપ્ત્વા નમેત્ સુધીઃ ।
સ્નાનકર્મ તતઃ કૃત્વા સંધ્યાં કુર્યાત્ પુરોદિતામ્ ॥ મ્ભ્ત્_7.47
શ્રીદેવ્ય્ ઉવાચ ।
સંધ્યાયાઃ કીદૃશં ધ્યાનં વદ મે પરમેશ્વર ।
શ્રીવિદ્યાવિષયે નાથ વિશેષો મયિ કથ્યતામ્ ॥ મ્ભ્ત્_7.48
શ્રીશિવ ઉવાચ ।
ધ્યાયેચ્ ચ સુન્દરીં દેવીં ત્રિવિધાં બીજરૂપિણીમ્ ।
પ્રભાતે વાગ્ભવાં દેવી મધ્યાહ્ને મદનાત્મિકામ્ ॥ મ્ભ્ત્_7.49
સાયાહ્ને શક્તિરૂપાં ચ ત્રિવિધાં બિન્દુરૂપિણીમ્ ।
પૂજાકાલે મહાદેવીં ધ્યાનાનુરૂપિણીં શિવામ્ ॥ મ્ભ્ત્_7.50
વાગ્ભવેનેન્દુસદૃશાં શુક્લવર્ણાં વિચિન્તયેત્ ।
શક્તિબીજં સ્વર્ણવર્ણં રક્તવર્ણાં વિભાવયેત્ ॥ મ્ભ્ત્_7.51
પ્રભાતે શુક્લવર્ણાભાં મધ્યાહ્ને નીલસંનિભામ્ ।
સાયાહ્ને રક્તવર્ણાભાં ભાવયેત્ સાધકોત્તમઃ ॥ મ્ભ્ત્_7.52
એવં ધ્યાત્વા મહેશાનિ સંધ્યાં કુર્યાદ્ વિચક્ષણઃ ।
શિવપૂજાં તતઃ કૃત્વા પૂજયેત્ પરદેવતામ્ ॥ મ્ભ્ત્_7.53
તતસ્ તુ પૂજયેદ્ દેવીં ત્રિપુરાં મોક્ષદાયિનીમ્ ।
ત્રિપુરા પરમા વિદ્યા મહાવિદ્યા પતિવ્રતા ॥ મ્ભ્ત્_7.54
પતિપૂજાં વિના પૂજાં ન ગૃહ્ણાતિ કદાચન ।
અત એવ મહેશાનિ આદૌ લિઙ્ગં પ્રપૂજયેત્ ॥ મ્ભ્ત્_7.55
પઞ્ચાક્ષરં પઞ્ચવક્ત્રં પૂજયેદ્ બહુયત્નતઃ ।
તતસ્ તુ પૂજયેદ્ દેવીં ત્રિપુરાં મોક્ષદાયિનીમ્ ॥ મ્ભ્ત્_7.56
શ્રીદેવ્ય્ ઉવાચ ।
કિમાધારે યજેચ્ છમ્ભું કૃપયા વદ શંકર ।
આધારભેદે દેવેશ સાધકઃ ફલભાગ્ ભવેત્ ॥ મ્ભ્ત્_7.57
શ્રીશંકર ઉવાચ ।
પૂજયેત્ પાર્થિવે લિઙ્ગે પાષાણે લિઙ્ગકે તથા ।
સ્વર્ણલિઙ્ગે ઽથવા દેવિ રૌપ્યે તામ્રે ચ કાંસ્યકે ॥ મ્ભ્ત્_7.58
પારદે વાથ ગઙ્ગાયાં સ્ફાટિકે મારકતે ઽપિ વા ।
કાર્યભેદે લૌહલિઙ્ગે ભસ્મનિર્માણલિઙ્ગકે ॥ મ્ભ્ત્_7.59
વાલુકાનિર્મિતે લિઙ્ગે ગોમયે વાથ પૂજયેત્ ।
પાર્થિવે પૂજનં દેવિ તોડલાખ્યે મયોદિતમ્ ॥ મ્ભ્ત્_7.60
સંસ્કારેણ વિના દેવિ પાષાણાદૌ ન પૂજયેત્ ।
સંસ્કારં ચ પ્રવક્ષ્યામિ વિશેષ ઇહ યદ્ ભવેત્ ॥ મ્ભ્ત્_7.61

રૌપ્યં ચ સ્વર્ણલિઙ્ગં ચ સ્વર્ણપાત્રે નિધાય ચ ।
તસ્માદ્ ઉત્તોલ્ય તં લિઙ્ગં દુગ્ધમધ્યે દિનત્રયમ્ ॥ મ્ભ્ત્_7.62
ત્ર્યમ્બકેણ સ્થાપયિત્વા કાલરુદ્રં પ્રપૂજયેત્ ।
ષોડશેનોપચારેણ વેદ્યાન્ તુ પાર્વતીં યજેત્ ॥ મ્ભ્ત્_7.63
તસ્માદ્ ઉત્તોલ્ય તં લિઙ્ગં ગઙ્ગાતોયે દિનત્રયમ્ ।
તતો વેદોક્તવિધિના સંસ્કારમ્ આચરેત્ સુધીઃ ॥ મ્ભ્ત્_7.64
શ્રીચણ્ડિકોવાચ ।
લિઙ્ગપ્રમાણં દેવેશ કથયસ્વ મયિ પ્રભો ।
પાર્થિવે ચ શિલાદૌ ચ વિશેષો યદિ વા ભવેત્ ॥ મ્ભ્ત્_7.65
શ્રીશિવ ઉવાચ ।
મૃત્તિકાતોલકં ગ્રાહ્યમ્ અથવા તોલકદ્વયમ્ ।
એતદન્યં ન કર્તવ્યં કદાચિદ્ અપિ પાર્વતિ ॥ મ્ભ્ત્_7.66
શિલાદૌ પરમેશાનિ સ્થૂલં ચ ફલદાયકમ્ ।
અઙ્ગુષ્ઠમાનં દેવેશિ યદ્ વા હેમાદ્રિમાનકમ્ ॥ મ્ભ્ત્_7.67
એવં ક્રમેણ દેવેશિ ફલં બહુવિધં લભેત્ ।
સ્થૂલાત્ સ્થૂલતરં લિઙ્ગં રુદ્રાક્ષં પરમેશ્વરિ ॥ મ્ભ્ત્_7.68
પૂજનાદ્ ધારણાદ્ દેવિ ફલં બહુવિધં સ્મૃતમ્ ॥ મ્ભ્ત્_7.69
માતૃકાભેદતન્ત્ર, અષ્ટમઃ પટલઃ
શ્રીદેવ્ય્ ઉવાચ ।
શૃણુ નાથ પરાનન્દ પરાપરકુલાત્મક ।
ત્વાં વિના ત્રાણકર્તા ચ મમ જ્ઞાને ન વર્તતે ॥ મ્ભ્ત્_8.1
પૂર્ણલિઙ્ગં મહેશાન શિવબીજં ન ચાન્યથા ।
શિલામધ્યે તથા ચક્રં લક્ષ્મીનારાયણં પરમ્ ॥ મ્ભ્ત્_8.2
પારદસ્ય શતાંશૈકં મમ જ્ઞાને ન વર્તતે ।
શિવબીજં મહાદેવ શિવરૂપં ન ચાન્યથા ।
લિઙ્ગરૂપં કથં દેવ તદ્ વદસ્વ મયિ પ્રભો ॥ મ્ભ્ત્_8.3
શ્રીશિવ ઉવાચ ।
યથા જ્યોતિર્મયં લિઙ્ગં કૈલાસશિખરે મમ ।
તસ્યૈવ ષોડશાંશૈકઃ કાશ્યાં વિશ્વેશ્વરઃ સ્થિતઃ ॥ મ્ભ્ત્_8.4
પૂર્ણલિઙ્ગં મહેશાનિ શિવબીજં ન ચાન્યથા ।
શિલામધ્યે તથા ચક્રં લક્ષ્મીનારાયણં પરમ્ ॥ મ્ભ્ત્_8.5
પારદસ્ય શતાંશૈકં લક્ષ્મીનારાયણં ન હિ ।
પકારં વિષ્ણુરૂપં ચ આકારં કાલિકા તથા ॥ મ્ભ્ત્_8.6
રેફં શિવં દકારં ચ બ્રહ્મરૂપં ન ચાન્યથા ।
પારદં પરમેશાનિ બ્રહ્મવિષ્ણુશિવાત્મકમ્ ॥ મ્ભ્ત્_8.7
યો યજેત્ પારદં લિઙ્ગં સ એવ શમ્ભુર્ અવ્યયઃ ।
સ એવ ધન્યો દેવેશિ સ જ્ઞાની સ તુ તત્ત્વવિત્ ॥ મ્ભ્ત્_8.8
સ બ્રહ્મવેત્તા સ ધની સ રાજા ભુવિ પૂજિતઃ ।
અણિમાદિવિભૂતીનામ્ ઈશ્વરઃ સાધકોત્તમઃ ॥ મ્ભ્ત્_8.9
સ્ત્રિયઃ સ્વભાવચપલા ગોપિતું ન હિ શક્યતે ।

અત એવ હિ દેવેશિ વિરતા ભવ પાર્વતિ ॥ મ્ભ્ત્_8.10
શ્રીદેવ્ય્ ઉવાચ ।
કથયસ્વ કૃપાનાથ કરુણા યદિ વર્તતે ।
તવ વાક્યં વિના દેવ ક્વ મુક્તિઃ ક્વ ચ સાધુતા ॥ મ્ભ્ત્_8.11
શ્રીશિવ ઉવાચ ।
પારદં શિવબીજં હિ તાડનં ન હિ કારયેત્ ।
તાડનાદ્ વિત્તનાશઃ સ્યાત્ તાડનાત્ સુતહીનતા ।
તાડનાદ્ રોગયુક્તઃ સ્યાત્ તાડનાન્ મરણં ભવેત્ ॥ મ્ભ્ત્_8.12
શ્રીદેવ્ય્ ઉવાચ ।
એતદ્ વિઘ્નાદિકં નાથ સત્યમ્ એવ ન સંશયઃ ।
વિઘ્નાદિરહિતં નાથ કથયસ્વ દયાનિધે ॥ મ્ભ્ત્_8.13
શ્રીશિવ ઉવાચ ।
પારદે શિવનિર્માણે નાનાવિઘ્નં યતઃ શિવે ।
અત એવ હિ તત્રાદૌ શાન્તિસ્વસ્ત્યયનં ચરેત્ ॥ મ્ભ્ત્_8.14
દ્વાદશં પાર્થિવં લિઙ્ગમ્ ઉપચારૈશ્ ચ ષોડશૈઃ ।
પટ્ટાદિસૂત્રનિર્માણં રચિતં શુક્લમ્ એવ વા ॥ મ્ભ્ત્_8.15
પુરુષસ્ય યથાયોગ્યં યુગ્મવસ્ત્રં નિવેદયેત્ ।
ભોગયોગ્યં પ્રદાતવ્યં મધુપર્કં સુરેશ્વરિ ॥ મ્ભ્ત્_8.16
અલંકારં યથાશક્તિ દદ્યાત્ કલ્યાણહેતવે ।
પૂજયેદ્ બહુયત્નેન બિલ્વપત્ત્રેણ પાર્વતિ ॥ મ્ભ્ત્_8.17
તોડલોક્તેન વિધિના પ્રત્યેકેનાયુતં જપેત્ ।
આદૌ પઞ્ચાક્ષરં મન્ત્રમ્ અષ્ટોત્તરશતં જપેત્ ॥ મ્ભ્ત્_8.18
પૂજાન્તે પ્રજપેત્ પશ્ચાત્ પ્રાસાદાખ્યં મહામનુમ્ ।
દક્ષિણાન્તં સમાચર્ય હવિષ્યાશી જિતેન્દ્રિયઃ ॥ મ્ભ્ત્_8.19
તામ્બૂલં ચ તથા મત્સ્યં વર્જયેન્ ન કદાચન ।
અસ્મિંસ્ તન્ત્રે હવિષ્યાન્નં તામ્બૂલં મીનમ્ ઉત્તમમ્ ॥ મ્ભ્ત્_8.20
હોમયેત્ પરમેશાનિ દશાંશં વા શતાંશમ્ ।
હોમસ્ય દક્ષિણા કાર્યા તદા વિઘ્નૈર્ ન લિપ્યતે ॥ મ્ભ્ત્_8.21
તતઃ પરસ્મિન્ દિવસે પારદમ્ આનયેદ્ બુધઃ ।
તસ્યોપરિ જપેન્ મન્ત્રં સર્વવન્દ્યનવાત્મકમ્ ॥ મ્ભ્ત્_8.22
વ્યોમબીજં શિવાન્તં ચ વર્ગાદ્યં બિન્દુમસ્તકમ્ ।
વાયુબીજં ચ ત્રિતયં ત્રિતયં ત્ર્યમ્બકં પ્રિયે ॥ મ્ભ્ત્_8.23
ઇમં મન્ત્રં મહેશાનિ પ્રજપેદ્ ઔષધોપરિ ।
પારદે પ્રજપેન્ મન્ત્રમ્ અષ્ટોત્તરશતં યદિ ॥ મ્ભ્ત્_8.24
તદ્ એવૌષધયોગેન બદ્ધો ભવતિ નાન્યથા ॥ મ્ભ્ત્_8.25
તતઃ પરસ્મિન્ દિવસે શૃણુ મત્પ્રાણવલ્લભે ।
વરયેત્ કર્મકર્તારં યથોક્તવિભવાવધિ ॥ મ્ભ્ત્_8.26
સુવર્ણં ચમ્પકાકારં કર્ણયુગ્મે નિવેદયેત્ ।
ચતુષ્કોણયુતં સ્વર્ણં ગ્રીવાયાં સુમનોહરમ્ ॥ મ્ભ્ત્_8.27
હસ્તદ્વયે મહેશાનિ દદ્યાદ્ વલયયુગ્મકમ્ ।

વલયં શુક્લવર્ણં ચ અઙ્ગરીયં તથૈવ ચ ॥ મ્ભ્ત્_8.28
ઊર્મિં દદ્યાત્ પીતવસ્ત્રં ક્ષૌમવસ્ત્રયુગં શિવે ।
એવં કૃત્વા મહેશાનિ શિવરૂપં વિચિન્તયેત્ ॥ મ્ભ્ત્_8.29
અથાતઃ સમ્પ્રવક્ષ્યામિ વિધાનં શૃણુ પાર્વતિ ।
પ્રસ્તરે ચૈવ સંસ્થાપ્ય ઝિણ્ટીપત્ત્રરસેન ચ ।
પ્રસ્તરેણ સમાલોડ્ય કુર્યાત્ કર્દમવત્ પ્રિયે ॥ મ્ભ્ત્_8.30
નિર્માણયોગ્યં તત્રૈવ યદિ સ્યાત્ સુરસુન્દરિ ।
તદા નિર્માય તં લિઙ્ગં પુનર્ દૃઢતરં ચરેત્ ॥ મ્ભ્ત્_8.31
સ્વપુષ્પસંયુતે વસ્ત્રે અઙ્ગારે ચ કરીષકે ।
કિંચિદ્ ઉષ્ણં પ્રકર્તવ્યં યતો દૃઢતરો ભવેત્ ॥ મ્ભ્ત્_8.32
તતો નિર્માય તં લિઙ્ગં પુનર્ દૃઢતરં ચરેત્ ।
સ્વપુષ્પસંયુતે વસ્ત્રે સ્થાપયેત્ પાર્થિવે પુનઃ ॥ મ્ભ્ત્_8.33
કિંચિદ્ ઉષ્ણં પ્રકર્તવ્યં યાવદ્ દૃઢતરો ભવેત્ ।
વિના હ્ય્ ઔષધયોગેન ભસ્મ ભવતિ નાન્યથા ॥ મ્ભ્ત્_8.34
માતૃકાભેદતન્ત્ર, નવમઃ પટલઃ
શ્રીશિવ ઉવાચ ।
ભસ્મપ્રકારં દેવેશિ શૃણુ મત્પ્રાણવલ્લભે ।
કર્તારં વરયેદ્ આદૌ યથોક્તવિભવાવધિ ॥ મ્ભ્ત્_9.1
સુવર્ણં મૌક્તિકયુતં કર્ણયુગ્મે નિવેદયેત્ ।
હસ્તયુગ્મે ચ વલયમ્ અઙ્ગુરીયં તથૈવ ચ ॥ મ્ભ્ત્_9.2
તોઢદ્વયં બાહુયુગ્મે શુદ્ધકાઞ્ચનનિર્મિતમ્ ।
ગ્રીવાયાં દાપયેત્ સ્વર્ણં ચતુષ્કોણં મનોરમમ્ ॥ મ્ભ્ત્_9.3
વસ્ત્રયુગ્મં પટ્ટસૂત્રનિર્મિતં ચ સુશોભનમ્ ।
ઉષ્ણીષં શુક્લવર્ણં ચ ઉષ્ણીષં પીતવાસસમ્ ॥ મ્ભ્ત્_9.4
એવં હિ વરયેદ્ દેવિ કર્મયોગ્યં વિચિન્તયેત્ ।
ચિન્તયેચ્ છિવરૂપં ચ ચિન્તયેત્ ત્રિગુણાત્મકમ્ ॥ મ્ભ્ત્_9.5
તતઃ પરસ્મિન્ દિવસે શાન્તિસ્વસ્ત્યયનં ચરેત્ ।
નિર્મિતં શુદ્ધસ્વર્ણેન બિલ્વપત્ત્રેણ સુન્દરિ ॥ મ્ભ્ત્_9.6
સહસ્રસઙ્ખ્યયા દેવિ પાર્થિવં દ્વાદશં યજેત્ ।
ષોડશેનોપચારેણ પટ્ટવસ્ત્રયુગેન ચ ॥ મ્ભ્ત્_9.7
અલંકારવિચિત્રૈશ્ ચ પૂજયેત્ પરમેશ્વરમ્ ।
ભોગયોગ્યં પ્રદાતવ્યં મધુપર્કં નિવેદયેત્ ॥ મ્ભ્ત્_9.8
સ્વર્ણાસનેન સંસ્થાપ્ય પ્રત્યેકં પૂજનં ચરેત્ ।
પૂજાન્તે પ્રજપેન્ મન્ત્રમ્ અષ્ટોત્તરશતં સુધીઃ ॥ મ્ભ્ત્_9.9
ષડક્ષરં મહામન્ત્રં પ્રાસાદાખ્યં મનું તતઃ ।
દિક્સહસ્રં જપેન્ મન્ત્રં તદ્દશાંશં હુનેત્ પ્રિયે ॥ મ્ભ્ત્_9.10
હોમસ્ય દ્રવ્યં દેવેશિ શૃણુ મત્પ્રાણવલ્લભે ।
વાલુકાનિર્મિતે વાપિ કુણ્ડે વા પરમેશ્વરિ ॥ મ્ભ્ત્_9.11
દ્વાત્રિંશદઙ્ગુલિમાનં વિસ્તૃતં તત્સમં પ્રિયે ।
ષોડશાઙ્ગુલિમાનં હિ કુણ્ડં કુર્યાત્ સુલક્ષણમ્ ॥ મ્ભ્ત્_9.12

તદૂર્ધ્વે પરમેશાનિ વેદનેત્રાઙ્ગુલિં શિવે ।
એવ હિ સ્વર્ણકુમ્ભં ચ તામ્રકુમ્ભાસમર્થિના ॥ મ્ભ્ત્_9.13
એતદ્ અન્યતરં કુમ્ભં સ્થાપયેદ્ વેદિકોપરિ ।
પટ્ટવસ્ત્રેણ યુગ્મેન સંવેષ્ટ્ય બહુયત્નતઃ ॥ મ્ભ્ત્_9.14
હોમયેદ્ બિલ્વપત્ત્રેણ યથોક્તેન સુરેશ્વરિ ।
ત્રિમધ્વક્તેન વિધિના તતઃ સિદ્ધો ભવેદ્ ધ્રુવમ્ ॥ મ્ભ્ત્_9.15
તતસ્ તુ દક્ષિણા કાર્યા યથોક્તવિભવાવધિ ।
સર્વદ્રવ્યમયં મૂલ્યં દ્વિગુણં વા પ્રદાપયેત્ ॥ મ્ભ્ત્_9.16
દક્ષિણાવિહીના યજ્ઞાઃ સિદ્ધિદા ન ચ મોક્ષદાઃ ।
અત એવ મહેશાનિ દક્ષિણા વિભવાવધિ ॥ મ્ભ્ત્_9.17
વરાહવત્ સમાનીય જન્મમાત્રે ઽપિ સુન્દરિ ।
પારદં તોલકં માનં ભક્ષયેદ્ બહુયત્નતઃ ॥ મ્ભ્ત્_9.18
પુનસ્ તોલકમાનં હિ માતૃદુગ્ધં તતઃ પરમ્ ।
પુનશ્ ચ ભક્ષયેદ્ ધીમાંસ્ તતો દુગ્ધં તુ ભક્ષયેત્ ॥ મ્ભ્ત્_9.19
તતશ્ ચ વત્સમ્ આનીય નવદ્વારં પ્રયત્નતઃ ।
સૂત્રયોગેણ દેવેશિ બદ્ધં કુર્યાત્ પ્રયત્નતઃ ॥ મ્ભ્ત્_9.20
તતશ્ ચ હેલકીમન્ત્રમ્ અષ્ટોત્તરશતં જપેત્ ।
ગજપ્રમાણં દેવેશિ દીર્ઘપ્રસ્થં તુ ખાતકમ્ ॥ મ્ભ્ત્_9.21
કરીષકેણ દેવેશિ પૂર્ણં કુર્યાદ્ વિચક્ષણઃ ।
તન્મધ્યે સ્થાપયેદ્ વત્સં સંદહેદ્ બહુયત્નતઃ ॥ મ્ભ્ત્_9.22
વહ્નિસ્થિતે મહેશાનિ ન સ્પૃશેત્ કુણ્ડમ્ ઉત્તમમ્ ।
કુણ્ડે સુશીતલે જાત ઉત્થાપ્ય બહુયત્નતઃ ॥ મ્ભ્ત્_9.23
સર્વપ્રકાશકં મન્ત્રમ્ અષ્ટોત્તરશતં જપેત્ ।
વિશ્વેશ્વરં પ્રવક્ષ્યામિ શૃણુ પાર્વતિ સાદરમ્ ॥ મ્ભ્ત્_9.24
પારદં તોલકં માનં તામ્રપાત્રે તુ લેપયેત્ ।
ચૂર્ણં કુર્યાન્ મહેશાનિ ગન્ધકં સાર્ધં તોલકમ્ ॥ મ્ભ્ત્_9.25
સમાચ્છાદ્ય પ્રયત્નેન ચૂર્ણેન પરમેશ્વરિ ।
સંદહેદ્ બહુયત્નેન મન્દમન્દેન વહ્નિના ॥ મ્ભ્ત્_9.26
કૃષ્ણવર્ણં રેણુયુતં દૃષ્ટ્વા ઉત્થાપ્ય સુન્દરિ ।
રત્તિપ્રમાણં તદ્ દ્રવ્યં ભક્ષયેદ્ યદિ સુન્દરિ ॥ મ્ભ્ત્_9.27
સત્યં સત્યં સર્વકુષ્ઠં ભક્ષણાન્ નાશમ્ આપ્નુયાત્ ।
અનુપાનમ્ ઉષ્ણતોયં મત્સ્યાદીન્ પરિવર્જયેત્ ॥ મ્ભ્ત્_9.28
એવં પ્રયોગં દેવેશિ ન કુર્યાત્ પુત્રવાન્ ગૃહી ।
પ્રથમે દિવસે પુત્રાન્ દ્વિતીયે દિવસે ધનમ્ ॥ મ્ભ્ત્_9.29
તૃતીયે દિવસે શક્તિં ચતુર્થે દિવસે ગૃહમ્ ।
પઞ્ચમે દિવસે રોગં નાશં તુ જાયતે ધ્રુવમ્ ॥ મ્ભ્ત્_9.30
અત એવ મહેશાનિ આત્મસ્વસ્ત્યયનં ચરેત્ ।
પૂર્વોક્તવિધિના મન્ત્રી ચતુર્ગુણં સમાચરેત્ ॥ મ્ભ્ત્_9.31
માતૃકાભેદતન્ત્ર, દશમઃ પટલઃ
શ્રીદેવ્ય્ ઉવાચ ।

નરાકૃતિં ગુરું નાથ મન્ત્રં વર્ણાત્મકં તથા ।
ધ્યાનાનુરૂપિણં દેવમ્ એકત્વં વા કથં વદ ॥ મ્ભ્ત્_10.1
શ્રીશિવ ઉવાચ ।
ગુરુવક્ત્રાન્ મહામન્ત્રો લભ્યતે સાધકોત્તમૈઃ ।
યદ્ય્ એકો જાયતે વીર્યસ્ તસ્ય મૂર્તિર્ ભવેદ્ ધ્રુવમ્ ॥ મ્ભ્ત્_10.2
દેવતાયાઃ શરીરં ચ બીજાદ્ ઉત્પદ્યતે પ્રિયે ।
ગુરોર્ આજ્ઞાનુસારેણ ચાન્યમૂર્તિસ્ તુ જાયતે ॥ મ્ભ્ત્_10.3
ગુર્વાદિભાવનાદ્ દેવિ ભાવસિદ્ધિઃ પ્રજાયતે ।
અત એવ મહેશાનિ ચૈકત્વં પરિકથ્યતે ॥ મ્ભ્ત્_10.4
શ્રીદેવ્ય્ ઉવાચ ।
યચ્ ચાક્ષુષં મહાદેવ તદાકરં વિચિન્તયેત્ ।
અચાક્ષુષે મહાદેવ ધ્યાનં વા કીદૃશં ભવેત્ ॥ મ્ભ્ત્_10.5
શ્રીશિવ ઉવાચ ।
શબ્દબ્રહ્મમયં દેવિ મમ વક્ત્રાદ્ વિનિર્ગતમ્ ।
આકારરહિતે દેવિ યથા ધ્યાનાદિકં ભવેત્ ॥ મ્ભ્ત્_10.6
તથૈવોચ્ચારણેનૈવ ભક્તિયુક્તેન ચેતસા ।
સત્યં સત્યં મહેશાનિ પ્રત્યક્ષં નાત્ર સંશયઃ ॥ મ્ભ્ત્_10.7
શ્રીદેવ્ય્ ઉવાચ ।
પશુપ્રદાને વાક્યં તુ કીદૃશં વદ શંકર ।
યેન વાક્યેન દેવેશ દેવી તુષ્ટા ભવત્ય્ અપિ ॥ મ્ભ્ત્_10.8
શ્રીશિવ ઉવાચ ।
મૃગે મહિષે ચોષ્ટ્રે ચ પશુશબ્દં ન યોજયેત્ ।
છાગલે ચ તથા સિંહે વ્યાઘ્રે ચ પરમેશ્વરિ ॥ મ્ભ્ત્_10.9
પશુશબ્દં યોજયિત્વા મહાદેવ્યૈ નિવેદયેત્ ।
પશુભાવસ્થિતો મન્ત્રી મહિષો દીયતે યદિ ॥ મ્ભ્ત્_10.10
બલિદાનં પ્રકર્તવ્યં ન માંસં ભક્ષયેન્ નરઃ ।
સમ્યક્ ફલં ન લભતે દશાંશં લભતે પ્રિયે ॥ મ્ભ્ત્_10.11
મહિષાદિ પ્રદાતવ્યં દિવ્યવીરમતે સ્થિતઃ ।
સ એવ સિદ્ધિમ્ આપ્નોતિ ફલં સમ્યક્ પ્રિયંવદે ॥ મ્ભ્ત્_10.12
પશુદાનં વિના દેવિ પૂજયેન્ ન કદાચન ।
તથા ચ નિત્યપૂજાયાં યદિ શક્તો ભવેન્ નરઃ ॥ મ્ભ્ત્_10.13
કેવલં બલિદાનેન સિદ્ધો ભવતિ નાન્યથા ।
નિર્ધનઃ પરમેશાનિ યદિ પૂજાદિકં ચરેત્ ॥ મ્ભ્ત્_10.14
વત્સરાન્તે પ્રદાતવ્યં બલિમ્ એકં સુરેશ્વરિ ।
અન્યથા નૈવ સિદ્ધિઃ સ્યાદ્ આજન્મ પૂજનાદ્ અપિ ॥ મ્ભ્ત્_10.15
બલિદાનં મહાયજ્ઞં કલિકાલે ચ ચણ્ડિકે ।
અશ્વમેધાદિકં યજ્ઞં કલૌ નાસ્તિ સુરેશ્વરિ ॥ મ્ભ્ત્_10.16
કેવલં બલિદાનેન ચાશ્વમેધફલં ભવેત્ ।
યજ્ઞાવશેષં યદ્ દ્રવ્યં ભોજનીયં ન ચાન્યથા ॥ મ્ભ્ત્_10.17
યજ્ઞાવશેષભોગેન સ યજ્ઞી નાત્ર સંશયઃ ।