માર્કંડેય પુરાણ · અધ્યાય 92

ઇતિ શ્રીમાર્કણ્ડેયમહાપુરાણે સાવર્ણિકે મન્વન્તરે દેવીમાહત્મ્યે દેવૈઃ કૃતા નારાયણો સ્તુતિર્નામૈકનવતિતમો ઽધ્યાયઃ
દ્વિનવતિતમો ઽધ્યાયઃ- 92
દેવ્યુવાચ
એભિઃ સ્તવૈશ્ચ માં નિત્યં સ્તોષ્યતે યઃ સમાહિતઃ ।
તસ્યાહં સકલાં બાધાં નાશયિષ્યામ્યસંશયમ્

મધુકૈટભાનાશં ચ મહિષાસુરઘાતનમ્ ।
કીર્તયિષ્યિન્તિ યે તદ્વદ્ વધં શુમ્ભનિશુમ્ભયોઃ

અષ્ટમ્યાં ચ ચતુર્દશ્યાં નવમ્યાં ચૈકચેતસઃ ।
સ્તોષ્યન્તિ ચૈવ યે ભક્ત્યા મમ માહાત્મ્યમુત્તમમ્

ન તેષાં દુષ્કૃતં કિઞ્ચિદ્ દુષ્કૃતોત્થા ન ચાપદઃ ।
ભવિષ્યતિ ન દારિદ્રયં ન ચૈવેષ્ટવિયોજનમ્

શત્રુતો ન ભયં તસ્ય દસ્યુતો વા ન રાજતઃ ।
ન શસ્ત્રાનલતોયૌઘાત્ કદાચિત્ સમ્ભવિષ્યતિ

તસ્માન્મમૈતન્માહાત્મ્યં પઠિતવ્યં સહાહિતૈઃ ।
શ્રોતવ્યં ચ સદા ભક્ત્યા પરં સ્વસ્ત્યયનં મહત્

ઉપસર્ગાનશેષાંસ્તુ મહામારીસમુદ્ભવાન્ ।
તથા ત્રિવિધમુત્પાતં માહાત્મ્યં શમયેન્મમ

યત્રૈતત્ પઠ્યતે સમ્યઙ્નિત્યમાયતને મમ ।
સદા ન તદ્વિમોક્ષ્યામિ સાંનિધ્યં તત્ર મે સ્થિતમ્

બલિપ્રદાને પૂજાયામગ્નિકાર્યે મહોત્સવે ।
સર્વં મમૈતચ્ચરિતમુચ્ચાર્યં શ્રાવ્યમેવ ચ

જાનતાજાનતા વાપિ બલિપૂજાં તથા કૃતામ્ ।
પ્રતીચ્છિષ્યામ્યહં પ્રીત્યા વહ્નિહોમં તથા કૃતમ્

શરત્કાલે મહાપૂજા ક્રિયતે યા ચ વાર્ષિકી ।
તસ્યાં મમૈતન્માહાત્મ્યં શ્રુત્વા ભક્તિસમન્વિતઃ

સર્વબાધાવિનિર્મૃક્તો ધનધાન્યસમન્વિતઃ ।
મનુષ્યો મત્પ્રસાદેન ભવિષ્યતિ ન સંશયઃ

શ્રુત્વા મમૈતન્માહાત્મ્યં તથોત્પત્તીઃ પૃથક્ શુભાઃ ।
પરાક્રમં ચ યુદ્ધેષુ જાયતે નિર્ભયઃ પુમાન્

રિપવઃ સંક્ષયં યાન્તિ કલ્યાણં ચોપપદ્યતે ।
નન્દતે ચ કુલં પુંસાં માહાત્મ્યં મમ શૃણ્વતામ્

શાન્તિકર્મણિ સર્વત્ર તથા દુઃ સ્વપ્નદર્શને ।
ગ્રહપીડાસુ ચોગ્રાસુ માહાત્મ્યં શૃણુયાન્મમ

ઉપસર્ગાઃ શમં યાન્તિ ગ્રહપીડાશ્ચ દારુણાઃ ।
દુઃ સ્વપ્નં ચ નૃભિર્દૃષ્ટં સુસ્વપ્નમુપજાયતે

બાલગ્રહાભિભૂતાનાં બાલાનાં શાન્તિકારકમ્ ।
સંઘાતભેદે ચ નૃણાં મૈત્રીકરણમુત્તમમ્

દુર્વૃત્તાનામશેષાણાં બલહાનિકરં પરમ્ ।
રક્ષોભૂતપિશાચાનાં પઠનાદેવ નાશનમ્

સર્વં મમૈતન્માહાત્મ્યં મમ સન્નિધિકારકમ્

પશુપુષ્પાર્ઘ્યધૂપૈશ્ચ ગન્ધદીપૈસ્તથોત્તમૈઃ ।
વિપ્રાણાં ભોજનૈર્હેમૈઃ પ્રોક્ષણીયૈરહર્નિશમ્

અન્યૈશ્ચ વિવિધૈર્ભોગૈઃ પ્રદાનૈર્વત્સરેણ યા ।
પ્રીતિર્મે ક્રિયતે સાસ્મિન્ સકૃત્સુચરિતે શ્રુતે

શ્રુતં હરતિ પાપાનિ તથાઽરોગ્યં પ્રયચ્છતિ ।
રક્ષાં કરોતિ ભૂતેભ્યો જન્મનાં કીર્તનં મમ

યુદ્ધેષુ ચરિતં યન્મે દુષ્ટદૈત્યનિબર્હણમ્ ।
તસ્મિન્ શ્રુતે વૈરિકૃતં ભયં પુંસાં ન જાયતે

યુષ્માભિઃ સ્તુતયો યાશ્ચ યાશ્ચ બ્રહ્મર્ષિભિઃ કૃતાઃ ।
બ્રહ્મણા ચ કૃતાસ્તાસ્તુ પ્રયચ્છન્તિ શુભાં ગતિમ્

અરણ્યે પ્રાન્તરે વાપિ દાવાગ્નિપરિવારિતઃ ।
દસ્યુભિર્વા વૃતઃ શૂન્યે ગૃહીતો વાપિ શત્રુભિઃ

સિંહવ્યાઘ્રાનુયાતો વા વને વા વનહસ્તિભિઃ ।
રાજ્ઞા ક્રુદ્ધેન ચાજ્ઞપ્તો વધ્યો બન્ધગતો ઽપિ વા

આઘૂર્ણિતો વા વાતેન સ્થિતઃ પોતે મહાર્ણવે ।
પતત્સુ ચાપિ શસ્ત્રેષુ સંગ્રામે ભૃશદારુણે

સર્વાબાધાસુ ઘોરાસુ વેદનાભ્યર્દિતો ઽપિ વા ।
સ્મરન્મમૈતચ્છરિતં નરો મુચ્યેત સઙ્કટાત્

મમ પ્રભાવાત્સિંહાદ્યા દસ્યવો વૈરિણસ્તથા ।
દૂરાદેવ પલાયન્તે સ્મરતશ્ચરિતં મમ

ઋષિરુવાચ
ઇત્યુક્ત્વા સા ભગવતી ચણ્ડિકા ચણ્ડવિક્રમા ।
પશ્યતામેવ દેવાનાં તત્રૈવાન્તરધીયત

તે ઽપિ દેવ્યા નિરાતઙ્કા સ્વાધિકારાન્ યથા પુરા ।
યજ્ઞભાગભુજઃ સર્વે ચક્રુર્વિનિહતારયઃ

દૈત્યાશ્ચ દેવ્યા નિહતે શુમ્ભે દેવરિપૌ યુધિ ।
જગદ્વિધ્વંસકે તસ્મિન્ મહોગ્રે ઽતુલવિક્રમે ।
નિશુમ્ભે ચ મહાવીર્યે શેષાઃ પાતાલમાયયુઃ

એવં ભગવતી દેવી સા નિત્યાપિ પુનઃ પુનઃ ।
સમ્ભૂય કુરુતે ભૂપ જગતઃ પરિપાલનમ્

તયૈતન્મોહ્યતે વિશ્વં સૈવ વિશ્વં પ્રસૂયતે ।
સા યાચિતા ચ વિજ્ઞાનં તુષ્ટા ઋદ્ધિં પ્રયચ્છતિ

વ્યાપ્તં તયૈતત્સકલં બ્રહ્માણ્ડં મનુજેશ્વર ।
મહાકાલ્યા મહાકાલે મહાકારીસ્વરૂપયા

સૈવ કાલે મહામારી સૈવ સૃષ્ટિર્ભવત્યજા ।
સ્થિતિં કરોતિ ભૂતાનાં સૈવ કાલે સનાતની

ભવકાલે નૃણાં સૈવ લક્ષ્મીર્વૃદ્ધિપ્રદા ગૃહે ।
સૈવાભાવે તથાલક્ષ્મીર્વિનાશાયોપજાયતે

સ્તુતા સમ્પૂજિતા પુષ્પૈર્ધૂપગન્ધાદિબિસ્તથા ।
દદાતિ વિત્તં પુત્રાંશ્ચ મતિં ધર્મે ગતિં શુભામ્