માર્કંડેય પુરાણ · અધ્યાય 64

ઇતિ શ્રીમાર્કણ્ડેયપુરાણે સ્વારોચિષે મન્વન્તરે ત્રિષષ્ટિતમો ઽધ્યાયઃ
ચતુઃ ષષ્ટિતમો ઽધ્યાયઃ- 64
માર્કણ્ડેય ઉવાચ
એવં વિમુક્તરોગા તુ કન્યકા તં મુદાન્વિતા ।
સ્વરોચિષમુવાચેદં શૃણુષ્વ વચનં પ્રભો

મન્દારવિદ્યાધરજા નામ્ના ખ્યાતા વિભાવરી ।
ઉપકારિન્ ! સ્વમાત્માનં પ્રયચ્છામિ પ્રતીચ્છ મામ્

વિદ્યાઞ્ચ તુભ્યં દાસ્યામિ સર્વબૂતરુતાનિ તે ।
યયાભિવ્યક્તિમેષ્યન્તિ પ્રસાદપુરગો ભવ

માર્કણ્ડેય ઉવાચ
એવમસ્ત્વિતિ તેનોક્તે ધર્મજ્ઞેન સ્વરોચિષા ।
દ્વિતીયા તુ તદા કન્યા ઇદં વચનમબ્રવીત્

કુમારબ્રહ્મચાર્યાસીત્ પારો નામ પિતા મમ ।
બ્રહ્મર્ષિઃ સુમહાભાગો વેદવેદાઙ્ગપારગઃ

તસ્ય પુંસ્કોકિલાલાપરમણીયે મધૌ પુરા ।
આજગામાપ્સરાભ્યાસં પ્રખ્યાતા પુઞ્જિકાસ્તના

કામવક્તવ્યતાં નીતઃ સ તદા મુનિપુઙ્ગવઃ ।
તત્સંયોગે ઽહમુત્પન્ના તસ્યામત્ર મહાચલે

વિહાય માં ગતા સા ચ માતાસ્મિન્નિર્જને વને ।
બાલામેકાં મહીપૃષ્ઠે વ્યાલશ્વાપદસંકુલે

તતઃ કલાભિઃ સોમસ્ય વર્ધન્તીભિરહઃ ક્ષયે ।
આપ્યાય્યમાનાહરહો વૃદ્ધિં યાતાસ્મિ સત્તમ

તતઃ કલાવતીત્યેતન્મમ નામ મહાત્મના ।
ગૃહીતાયઃ કૃતં પિત્રા ગન્ધર્વેણ શુભાનના

ન દત્તાહં તદા તેન યાચિતેન મહાત્મના ।
દેવારિણાલિના સુપ્તસ્તતો મે ઘાતિતઃ પિતા

તતો ઽહમતિનિર્વેદાદાત્મવ્યાપાદનોદ્યતા ।
નિવારિતા શમ્ભુપત્ન્યા સત્યા સત્યપ્રતિશ્રવા

મા શુચઃ સુભ્રુ ! ભર્તા તે મહાભાગો ભવિષ્યતિ ।
સ્વરોચિર્નામ પુત્રશ્ચ મનુસ્તસ્ય ભવિષ્યતિ

આજ્ઞાઞ્ચ નિધયઃ સર્વે કરિષ્યન્તિ તવાદૃતાઃ ।
યથાભિલષિતં વિત્તં પ્રદાસ્યન્તિ ચ તે શુભે

યસ્યા વત્સે પ્રભાવેણ વિદ્યાયાસ્તાં ગૃહાણ મે ।
પદ્મિની નામ વિદ્યેયં મહાપદ્માભિપૂજિતા

ઇત્યાહ માં દક્ષસુતા સતી સત્યપરાયણા ।
સ્વરોચિસ્ત્વં ધ્રુવં દેવી નાન્યથા સા વદિષ્યતિ

સાહં પ્રાણપ્રદાયાદ્ય તાં વિદ્યાં સ્વં તથા વપુઃ ।
પ્રયચ્છામિ પ્રતીચ્છ ત્વં પ્રસાદસુમુખો મમ

માર્કણ્ડેય ઉવાચ
એવમસ્ત્વિતિ તામાહ સ તુ કન્યાં કલાવતીમ્ ।
વિભાવર્યાઃ કલાવત્યાઃ સ્નિગ્ધદૃષ્ટ્યાનુમોદિતઃ

જગ્રાહ ચ તતઃ પાણી સ તયોરમરદ્યુતિઃ ।
નદત્સુ દેવતૂર્યેષુ નૃત્યન્તીષ્વપ્સરઃ સુ ચ