મઞ્જુશ્રીનામસંગીતિ · શ્લોક 1-20

અથ વજ્રધરઃ શ્રીમાન્ દુર્દાન્તદમકઃ પરઃ
ત્રિલોકવિજયી વીરો ગુહ્યરાટ્ કુલિશેશ્વરઃ ॥

વિબુદ્ધપુણ્ડરીકાક્ષઃ પ્રોત્ફુલ્લકમલાનનઃ
પ્રોલ્લાલયન્ વજ્રવરં સ્વકરેણ મુહુર્મુહુઃ ॥

ભૃકુટીતરઙ્ગપ્રમુખૈર્ અનન્તૈર્ વજ્રપાણિભિઃ
દુર્દાન્તદમકૈર્ વીરૈર્ વીરબીભત્સરૂપિભિઃ ॥

ઉલ્લાલયદ્ભિઃ સ્વકરૈઃ પ્રસ્ફુરદ્વજ્રકોટિભિઃ
પ્રજ્ઞોપાયમહાકરુણા જગદર્થકરૈઃ પરઃ ॥

હૃષ્ટતુષ્ટાશયૈર્ મુદિતૈઃ ક્રોધવિગ્રહરૂપિભિઃ
બુદ્ધકૃત્યકરૈર્ નાથૈઃ સાર્દ્ધં પ્રણતવિગ્રહૈઃ ॥

પ્રણમ્ય નાથં સંબુદ્ધં ભગવન્તં તથાગતમ્
કૃતાઞ્જલિપુટો ભૂત્વા ઇદમ્ આહ સ્થિતો ઽગ્રતઃ ॥

મદ્ધિતાય મમાર્થાય અનુકમ્પાય મે વિભો
માયાજાલાભિસંબોધિં યથા લાભી ભવામ્ય્ અહમ્ ॥

અજ્ઞાનપઙ્કમગ્નાનાં ક્લેશવ્યાકુલચેતસામ્
હિતાય સર્વસત્ત્વાનામ્ અનુત્તરફલાપ્તયે ॥

પ્રકાશયતુ સંબુદ્ધો ભગવાઞ્ શાસ્તા જગદ્ગુરુઃ
મહાસમયતત્ત્વજ્ઞ ઇન્દ્રયાશયવિત્ પરઃ ॥

ભગવજ્જ્ઞાનકાયસ્ય મહોષ્ણીષસ્ય ગીષ્પતેહ્
મઞ્જુશ્રીજ્ઞાનસત્ત્વસ્ય જ્ઞાનમૂર્તેઃ સ્વયમ્ભુવઃ ॥

ગમ્ભીરાર્થામ્ ઉદારાર્થં મહાર્થામ્ અસમાં શિવામ્
આદિમધ્યાન્તકલ્યાણીં નામસંગીતિમ્ ઉત્તમામ્ ॥

યાતીતૈર્ ભાષિતા બુદ્ધૈર્ ભાષિષ્યન્તે હ્ય્ અનાગતાઃ
પ્રત્યુત્પન્નાશ્ ચ સંબુદ્ધા યાં ભાષન્તે પુનઃ પુનઃ ॥

માયાજાલે મહાતન્ત્રે યા ચાસ્મિન્ સંપ્રગીયતે
મહાવજ્રધરૈર્ હૃષ્ટૈર્ અમેયૈર્ મન્ત્રધારિભિઃ ॥

અહં ચૈનાં ધારયિષ્યામ્ય્ આ નિર્યાણાં દૃઢાશયઃ
યથા ભવામ્ય્ અહં નાથ સર્વસંબુદ્ધગુહ્યધૃક્ ॥

પ્રકાશયિષ્યે સત્ત્વાનાં યથાશયવિશેષતઃ
અશેષક્લેશનાશાય અશેષાજ્ઞાનહાનયે ॥

એવમ્ અધ્યેષ્ય ગુહ્યેન્દ્રો વજ્રપાણિસ્ તથાગતમ્
કૃતાઞ્જલિપુટો ભૂત્વા પ્રહ્વકાયઃ સ્થિતો ઽગ્રતઃ ॥

અથ શાક્યમુનિર્ ભગવાન્ સંબુદ્ધો દ્વિપદોત્તમઃ
નિર્ણમય્યાયતાં સ્ફીતં સ્વજિહ્વાં સ્વમુખાચ્ છુભામ્ ॥

સ્મિતં સંદર્શ્ય લોકાનામ્ અપાયત્રયશોધનમ્
ત્રિલોકાભાસકરણં ચતુર્મારારિશાસનમ્ ॥

ત્રિલોકમ્ આપૂરયન્ત્યા બ્રાહ્મ્યા મધુરયા ગિરા
પ્રત્યભાષત ગુહ્યેન્દ્રં વજ્રપાણિં મહાબલમ્ ॥

સાધુ વજ્રધર શ્રીમન્ સાધુ તે વજ્રપાણયે
યસ્ તં જગદ્ધિતાર્થાય મહાકરુણયાન્વિતઃ ॥