મૈત્રેયવ્યાકરણ · શ્લોક 31-50

(દશ માસાંશ્ ચ) નિખિલાન્ ધારયિત્વા મહાદ્યુતિમ્
સુપુષ્પિતે ઽસ્મિન્ ઉદ્યાને મૈત્રેયજનની તતઃ ॥

ન નિષણ્ણા નિપન્ના વા સ્થિતા સા ધર્મચારિણી
દ્રુમસ્ય શાખામ્ આલમ્બ્ય મૈત્રેયં જનયિષ્યતિ ॥

અલિપ્તો ગર્ભપઙ્કેન કુશેશયમ્ ઇવામ્બુના
ત્રૈધાતુકમ્ ઇદં સર્વં પ્રભયા પૂરયિષ્યતિ ॥

પ્રીતો ઽથ તં સહસ્રાક્ષો દેવરાજા શચીપતિઃ
જાયમાનં ગ્રહીતા સ મૈત્રેયં દ્વિપદોત્તમમ્ ॥

પદાનિ જાતમાત્રશ્ ચ સપ્તાસૌ પ્રક્રમિષ્યતિ
પદે પદે નિધનં ચ પદ્મં પદ્મં ભવિષ્યતિ ॥

દિશશ્ ચતસ્રશ્ ચોદ્વીક્ષ્ય વાચં પ્રવ્યાહરિષ્યતિ
ઇયં મે પશ્ચિમા જાતિર્ નાસ્તિ ભૂયઃ પુનર્ભવઃ
ન પુનર્ અભ્યાગમિષ્યામિ નિર્વાસ્યામિ નિરાસ્રવઃ ॥

સંસારાર્ણવમગ્નાનાં સત્ત્વાનાં દુઃખભાગિનામ્
તૃષ્ણાબન્ધનબદ્ધાનાં કરિષ્યામિ વિમોચનમ્ ॥

શ્વેતં ચાસ્ય સુરાશ્ છત્ત્રં ધારયિષ્યન્તિ મૂર્ધનિ
શીતોષ્ણવારિધારાભ્યાં નાગેન્દ્રૌ સ્નાપયિષ્યતઃ ॥

પ્રતિગૃહ્ય ચ તં ધાત્રી દ્વાત્રિંશદ્વરલક્ષણમ્
શ્રિયા જ્વલન્તં મૈત્રેયં માત્રે સમુપનેષ્યતિ ॥

મનોરમાં ચ શિવિકાં નાનારત્નવિભુષિતામ્
આરૂઢાં પુત્રસહિતાં વહિષ્યન્તિ ચ દેવતા ॥

તતસ્ તૂર્યસહસ્રેષુ વાદ્યમાનેષુ તત્પુરમ્
પ્રવિષ્ટમાત્રે મૈત્રેયે પુષ્પવર્ષં પતિષ્યતિ ॥

દૃષ્ટ્વૈવં પુત્રં સુબ્રહ્મા દ્વાત્રિંશદ્વરલક્ષણમ્
પ્રત્યવીક્ષાથ મન્ત્રેષુ તદા પ્રીતો ભવિષ્યતિ ॥

ગતિદ્વયં કુમારસ્ય યથા મન્ત્રેષુ દૃશ્યતે
નરાધિપશ્ ચક્રવર્તી બુદ્ધો વા દ્વીપદોત્તમઃ ॥

સ ચ યૌવનસંપ્રાપ્તો મૈત્રેયાઃ પુરુષોત્તમઃ
ચિન્તયિષ્યતિ ધર્માત્મા દુઃખિતા ખલ્વ્ ઇયાં પ્રજાઃ ॥

બ્રહ્મસ્વરો મહાઘોષો હેમવર્ણો મહાદ્યુતિઃ
વિશાલવક્ષાઃ પીનાઙ્સઃ પદ્મપત્ત્રનિભેક્ષણઃ ॥

હસ્તઃ પઞ્ચાશદ્ ઉચ્છ્રાય તસ્ય કાયો ભવિષ્યતિ
વિસૃતશ્ ચ તતો ઽર્દ્ધેન શુભવર્ણસમુચ્છ્રયઃ ॥

અશીતિભિશ્ ચતુર્ભિશ્ ચ સહસ્રૈઃ સંપુરસ્કૃતઃ
માણવાનાં સ મૈત્રેયો મન્ત્રાન્ અધ્યાપયિષ્યતિ ॥

અથ શઙ્ખો નરપતિઃ યૂપમ્ ઉચ્છ્રાપયિષ્યતિ
તિર્યઞ્ ચ ષોડશવ્યામમ્ ઊર્ધ્વં વ્યામસહસ્રકમ્ ॥

સ તં યૂપં નરપતિર્ નાનારત્નવિભૂષિતમ્
પ્રદાસ્યતિ દ્વિજાતિભ્યો યજ્ઞં કૃત્વા પુરઃસરમ્
સપ્તરત્નમયં યૂપં બ્રાહ્મણેભ્યઃ પ્રદાસ્યતિ ॥

તં ચ રત્નમયં યૂપં દત્તમાત્રં મનોરમમ્
બ્રાહ્મણાનાં સહસ્રાણિ વિકિરિષ્યન્તિ તત્ક્ષણાત્ ॥