મૈત્રેયવ્યાકરણ (અન્ય આવૃત્તિ) · શ્લોક 1-20

આર્ય મૈત્રેયવ્યાકરણં
નમઃ આર્યમૈત્રેયાય ।
શારિપુત્રો મહાપ્રજ્ઞઃ ધર્મસેનાપતિબિભુઃ ।
લોકાનામનુકમ્પાય શાસ્તારં પર્યપૃચ્છત

સૂત્રાન્તરે પુરા ઽખ્યાતં યં લોકનાયકસ્ય ચ ।
બુદ્ધસ્યાનાગતસ્ય હિ મૈત્રેયનામ શાસનં

વ્યાખ્યાહિ તદ્વલં ચાપિ ઋદ્ધિં સર્વાર્થવર્ધનં ।
શ્રોતુમિચ્છામ એવ ચ નાયકસ્ય નરોત્તમ

તચ્છ્રુત્વા ભગવાનાહ શૃણુ નરવરસ્ય ત્વં ।
તસ્ય મૈત્રેયબુદ્ધસ્ય વિભવં વ્યાકૃતં મયા

શુક્ષ્યન્તિ ચ તદાર્નવાઃ સમન્તાત્ બહુયોજનાઃ ।
પ્રતિપાદ્યા ભવિષ્યન્તિ માર્ગાશ્ચ ચક્રવર્તિનઃ

જમ્બુદ્વીપં સમન્તતઃ આયતનં તદાહિ ચ ।
આવાસં સર્વભૂતાનાં દશસહસ્રયોજનમ્

નરાસ્તદ્દેશિકાશ્ચ હિ ભવિષ્યન્તિ શુભઙ્કરાઃ ।
અહિંસકાશ્ચ નિર્દણ્ડ્યાઃ સુસમૃદ્ધાશ્ચ સુભગાઃ

નિષ્કણ્ટકશ્ચ ભૂસ્થલં સમતલં હિ શ્યામલં ।
ઉન્નમાવનમશ્રિતં મૃદુતૂલ ઽપિચોપમં

ગન્ધશાલિ જનિષ્યતે કૃષ્ટિમૃતે ચ મધુરં ।
નાનાવર્ણાભિલઙ્કૃતા ભવિષ્યન્તિ ચૈલદ્રુમાઃ

દ્રુમાશ્ચ ક્રોશવિસ્તૃતા પત્રપુષ્પફલાનતાઃ ।
સહસ્રાશીતિમાત્રશ્ચ આયુસ્તદા ભવિષ્યતિ

વર્ણવન્તઃ ભવિષ્યન્તિ બલવન્તો મહાકાયાઃ ।
સત્ત્વાઃ દક્ષાશ્ચ નિષ્ક્લેશા નિર્દોષા દિર્ઘજીવિનઃ

રોગત્રયં ભવિષ્યતિ કામોજરા ઽગ્નિમાન્દ્યઞ્ચ ।
પઞ્ચશતતમે વર્ષે પરિણીતા ચ દારિકા

તદા કેતુમતી નામ પુરી તત્ર ભવિષ્યતિ ।
સત્ત્વાનાઞ્ચ નિવાસનં પ્રાણિનાં હિતકારિણાં

દીર્ઘા દ્વાદશયૌજન સપ્ત વિસ્તારશો હ્યસૌ ।
નગરં પુણ્યવચ્ચ તત્ વિશુદ્ધઞ્ચ મનોરમં

સપ્તરત્નમયાઃ પ્રાંશુપ્રાકારાઃ ક્રોશવિસ્તૃતાઃ ।
નાનારત્નવિભૂષિતગોપુરતોરણાન્યપિ

ઇષ્ટકૈર્નિમિતાશ્ચ તે રત્નમયૈર્ભવિષ્યન્તિ ।
પદ્મોત્પલસમાચ્છનાઃ પરિખા હંસશોભિતા

માલૈર્હિ પરિવેષ્ટિતં સપ્તતાલૈસ્મમન્તતઃ ।
ચતૂરત્નમયાસ્તાલાઃ કિઙ્કિનીજાલશોભિતાઃ

તત્તાલેભ્યોનિલાજ્જાતઃ શબ્દશ્ચૈવ મનોરમઃ ।
સુમધુરો યથા તૂર્યં તચ્ચ પઞ્ચાઙ્ગસંયુતં

નગરે ઽસ્મિન્ નરાશ્ચ યે વિશ્રામસુખકામિનઃ ।
પ્રહૃષ્ટાભિરભિષ્યન્તે તાલશબ્દૈશ્ચ તે તદા

નગરમપિ તત્કૃતમુત્પલકુમુદાકીર્ણં ।
તડાગોપવનોદ્યાનં ત્રયમેતદ્ભવિષ્યતિ