મહાભારત · અધ્યાય 6.23

ધાર્તરાષ્ટ્રબલં દૃષ્ટ્વા યુદ્ધાય સમુપસ્થિતમ્ ।
અર્જુનસ્ય હિતાર્થાય કૃષ્ણો વચનમબ્રવીત્ ॥
શ્રીભગવાનુવાચ ।

શુચિર્ભૂત્વા મહાબાહો સન્ગ્રામાભિમુખે સ્થિતઃ ।
પરાજયાય શ્ત્રુણાં દુર્ગાસ્તોત્રમુદીરય ॥
સઞ્જય ઉવાચ ।

એવમુક્તોઽર્જુનઃ સઙ્ખ્યે વાસુદેવેન ધીમતા ।
અવતીર્ય રથાત્પાર્થઃ સ્તોત્રમાહ કૃતાઞ્જલિઃ ॥
અર્જુન ઉવાચ ।

નમસ્તે સિદ્ધસેનાનિ આર્યે મન્દરવાસિનિ ।
કુમારિ કાલિ કાપાલિ કપિલે કૃષ્ણપિઙ્ગલે ॥

ભદ્રકાલિ નમસ્તુભ્યં મહાકાલિ નમોઽસ્તુ તે ।
ચણ્ડિ ચણ્ડે નમસ્તુભ્યં તારિણિ વરવર્ણિનિ ॥

કાત્યાયનિ મહાભાગે કરાલિ વિજયે જયે ।
શિખિપિચ્છધ્વજધરે નાનાભરણભૂષિતે ॥

અટ્ટશૂલપ્રહરણે સ્વઙ્ગખેટકધારિણિ ।
ગોપેન્દ્રસ્યાનુજે જ્યેષ્ઠે નન્દગોપકુલોદ્ભવે ॥

મહિષાસૃક્પ્રિયે નિત્યં કૌશિકિ પીતવાસિનિ ।
અટ્ટહાસે કોકમુખે નમસ્તેઽસ્તુ રણપ્રિયે ॥

ઉભે શાકમ્ભરિ શ્વેતે કૃષ્ણે કૈટભનાશિનિ ।
હિરણ્યાશ્ચિ વિરૂપાક્ષિ સુધૂમ્રાક્ષિ નમોઽસ્તુ તે ॥

વેદશ્રુતિ મહાપુણ્યે બ્રહ્મણ્યે જાતવેદસિ ।
જમ્બૂકટકચૈત્યેષુ નિત્યં સન્નિહિતાલયે ॥

ત્વં બ્રહ્મવિદ્યા વિદ્યાનાં મહાનિદ્રા ચ દેહિનામ્ ।
સ્કન્દમાતર્ભગવતિ દુર્ગે કાન્તારવાસિનિ ॥

સ્વાહાકારઃ સ્વધા ચૈવ કલા કાષ્ઠા સરસ્વતી ।
સાવિત્રી વેદમાતા ચ તથા વેદાન્ત ઉચ્યતે ॥

સ્તુતાસિ ત્વં મહાદેવિ વિશુદ્ધેનાન્તરાત્મના ।
જયો ભવતુ મે નિત્યં ત્વત્પ્રસાદાદ્રણાજિરે ॥

કાન્તારભયદુર્ગેષુ ભક્તાનાં ચાલયેષુ ચ ।
નિત્યં વસસિ પાતાલે યુદ્ધે જયસિ દાનવાન્ ॥

ત્વં જમ્ભની મોહિની ચ માયા હ્રીઃ શ્રીસ્તથૈવ ચ ।
સન્ધ્યા પ્રભાવતી ચૈવ સાવિત્રી જનની તથા ॥

તુષ્ટિઃ પુષ્ટિર્ધૃતિર્દીપ્તિશ્ચન્દ્રાદિત્યવિવર્ધિની ।
ભૂતિર્ભૂતિમતાં સઙ્ખ્યે વીક્ષ્યસે સિદ્ધચારણૈઃ ॥
સઞ્જય ઉવાચ ।

તતઃ પાર્થસ્ય વિજ્ઞાય ભક્તિં માનવવત્સલા । 6-23-17બન્તરિક્ષગતોવાચ ગોવિન્દસ્યાગ્રતઃ સ્થિતા ॥
દેવ્યુવાચ ।

સ્વલ્પેનૈવ તુ કાલેન શત્રૂઞ્જેષ્યસિ પાણ્ડવ ।
નરસ્ત્વમસિ દુર્ધર્ષ નારાયણસહાયવાન્ ॥

અજેયસ્ત્વં રણેઽરીણામપિ વજ્રભૃતઃ સ્વયમ્ ।
ઇત્યેવમુક્ત્વા વરદા ક્ષણેનાન્તરધીયત ॥

લબ્ધ્વા વરં તુ કૌન્તેયો મેને વિજયમાત્મનઃ ।
આરુરોહ તતઃ પાર્થો રથં પરમસમ્મતમ્ ॥

કૃષ્ણાર્જુનાવેકરથૌ દિવ્યૌ શઙ્ખૌઃ પ્રદધ્મતુઃ ।
ય ઇદં પઠતે સ્તોત્રં કલ્ય ઉત્થાય માનવઃ ॥

યક્ષરક્ષઃપિશાચેભ્યો ન ભયં વિદ્યતે સદા ।
ન ચાપિ રિપવસ્તેભ્યઃ સર્પાદ્યા યે ચ દંષ્ટ્રિણઃ ॥

ન ભયં વિદ્યતે તસ્ય સદા રાજકુલાદપિ ।
વિવાદેક જયમાપ્નોતિ બદ્ધો મુચ્યતિ બન્ધનાત્ ॥

દુર્ગં તરતિ ચાવશ્યં તથા ચોરૈર્વિમુચ્યતે ।
સન્ગ્રામે વિજયેન્નિત્યં લક્ષ્મીં પ્રાપ્નોતિ કેવલામ્ ॥

આરોગ્યબલસમ્પન્નો જીવેદ્વર્ષશતં તથા ।
એતદ્દૃષ્ટં પ્રસાદાત્તુ મયા વ્યાસસ્ય ધીમતઃ ॥

મોહાદેતૌ ન જાનન્તિ નરનારાયણાવૃષી ।
તવ પુત્રા દુરાત્માનઃ સર્વે મન્યુવશાનુગાઃ ॥

પ્રાપ્તકાલમિદં વાક્્યં કાલપાશેન કુણ્ઠિતાઃ . દ્વૈપાયનો નારદશ્ચ કણ્વો રામસ્તથાનઘઃ ।
અવારયંસ્તવ સુતં ન ચાસૌ તદ્ગૃહીતવાન્ ॥

યત્ર ધર્મો દ્યુતિઃ કાન્તિર્યત્ર હ્રીઃ શ્રીસ્તથા મતિઃ ।
યતો ધર્મસ્તતઃ કૃષ્ણો યતઃ કૃષ્ણસ્તતો જયઃ ॥