મહાભારત · અધ્યાય 5.18

તતઃ શક્રઃ સ્તૂયમાનો ગન્ધર્વાપ્સરસાં ગણૈઃ ।
ઐરાવતં સમારુહ્ય દ્વિપેન્દ્રં લક્ષણૈર્યુતમ્ ॥

પાવકઃ સુમહાતેજા મહર્ષિશ્ચ બૃહસ્પતિઃ ।
યમશ્ચ વરુણશ્ચૈવ કુબેરશ્ચ ધનેશ્વરઃ ॥

સર્વૈર્દેવૈઃ પરિવૃતઃ શક્રો વૃત્રનિષૂદનઃ ।
ગન્ધર્વૈરપ્સરોભિશ્ચ યાતસ્ત્રિભુવનં પ્રભુઃ ॥

સ સમેત્ય મહેન્દ્રાણ્યા દેવરાજઃ શતક્રતુઃ ।
મુદા પરમયા યુક્તઃ પાલયામાસ દેવરાટ્ ॥

તતઃ સ ભગવાંસ્તત્ર અઙ્ગિરાઃ સમદૃશ્યત ।
અથર્વવેદમન્ત્રૈશ્ચ દેવેન્દ્રં સમપૂજયત્ ॥

તતસ્તુ ભગવાનિન્દ્રઃ સંહૃષ્ટઃ સમપદ્યત ।
વરં ચ પ્રદદૌ તસ્મૈ અથર્વાઙ્ગિરસે તદા ॥

અથર્વાઙ્ગિરસં નામ વેદેઽસ્મિન્વૈ ભવિષ્યતિ । ઉદાહરણમેતદ્ધિ યજ્ઞભાગં ચ લપ્સ્યસે ।

એવં સમ્પૂજ્ય ભગવાનથર્વાઙ્ગિરસં તદા ।
વ્યસર્જયન્મહારાજ દેવરાજઃ શતક્રતુઃ ॥

સમ્પૂજ્ય સર્વાંસ્ત્રિદશાનૃષીંશ્ચાપિ તપોધનાન્ ।
ઇન્દ્રઃ પ્રમુદિતો રાજન્ધર્મેણાપાલયત્પ્રજાઃ ॥

એવં દુઃખમનુપ્રાપ્તમિન્દ્રેણ સહ ભાર્યયા ।
અજ્ઞાતવાસશ્ચ કૃતઃ શત્રૂણાં વધકાઙ્ક્ષયા ॥

નાત્ર મન્યુસ્ત્વયા કાર્યો યત્ક્લિષ્ટોઽસિ મહાવને ।
દ્રૌપદ્યા સહ રાજેન્દ્ર ભ્રાતૃભિશ્ચ મહાત્મભિઃ ॥

એવં ત્વમપિ રાજેન્દ્ર રાજ્યં પ્રાપ્સ્યસિ ભારત ।
વૃત્રં હત્વા યથા પ્રાપ્તઃ શક્રઃ કૌરવનન્દન ॥

દુરાચારશ્ચ નહુષો બ્રહ્વદ્વિટ્ પાપચેતનઃ ।
અગસ્ત્યશાપાભિહતો વિનષ્ટઃ શાશ્વતીઃ સમાઃ ॥

એવં તવ દુરાત્માનઃ શત્રવઃ શત્રુસૂદન ।
ક્ષિપ્રં નાશં ગમિષ્યન્તિ કર્ણદુર્યોધનાદયઃ ॥

તતઃ સાગરપર્યન્તાં ભોક્ષ્યસે મેદિનીમિમામ્ ।
ભ્રાતૃભિઃ સહિતો વીર દ્રૌપદ્યા ચ સહાનયા ॥

ઉપાખ્યાનમિદં શક્રવિજયં વેદસમ્મિતમ્ . રાજ્ઞા વ્યૂઢેષ્વનીકેષુ શ્રોતવ્યં જયમિચ્છતા ।

તસ્માત્સંશ્રાવયામિ ત્વાં વિજયં જયતાં વર ।
સંસ્તૂયમાના વર્ધન્તે મહાત્માનો યુધિષ્ઠિર ॥

ક્ષત્રિયાણામભાવોયં યુધિષ્ઠિર મહાત્મનામ્ ।
દુર્યોધનાપરાધેન ભીમાર્જુનબલેન ચ ॥
સઙ્ગ્રામે સન્ક્ષયો ઘોરો ભવિષ્યત્યચિરાદિવ ॥

આખ્યાનમિન્દ્રવિજયં ય ઇદં નિયતઃ પઠેત્ ।
ધૂતપાપ્મા જિતસ્વર્ગઃ પરત્રેહ ચ મોદતે ॥

ન ચારિજં ભયં તસ્ય નાપુત્રો વા ભવેન્નરઃ । નાપદં પ્રાપ્નુયાત્કાઞ્ચિદ્દીર્ઘમાયુશ્ચ વિન્દતિ ।
સર્વત્ર દયમાપ્નોતિ ન કદાચિત્પરાજયમ્ ॥
વૈશમ્પાયન ઉવાચ ।

એવમાશ્વાસિતો રાજા શલ્યેન ભરતર્ષભ ।
પૂજયામાસ વિધિવચ્છલ્યં ધર્મભૃતાં વરઃ ॥

શ્રુત્વા તુ શલ્યવચનં કુન્તીપુત્રો યુધિષ્ઠિરઃ ।
પ્રત્યુવાચ મહાબાહુર્મદ્રરાજમિદં વચઃ ॥

ભવાન્કર્ણસ્ય સારથ્યં કરિષ્યતિ ન સંશયઃ ।
તત્ર તેજોવધઃ કાર્યઃ કર્ણસ્યાર્જુનસંસ્તવૈઃ ॥
શલ્ય ઉવાચ ।

એવમેતત્કરિષ્યામિ યથા માં સમ્પ્રભાષસે ।
યચ્ચાન્યદપિ શક્ષ્યામિ તત્કરિષ્યામ્યહં તવ ॥
વૈશમ્પાયન ઉવાચ ।

તતસ્ત્વામન્ત્ર્ય કૌન્તેયાઞ્છલ્યો મદ્રાધિપસ્તદા ।
જગામ સબલઃ શ્રીમાન્દુર્યોધનમરિન્દમ ॥