મહાભારત · અધ્યાય 4.8

વિરાટનગરં રમ્યં ગચ્છમાનો યુધિષ્ઠિરઃ ।
અસ્તુવન્મનસા દેવીં દુર્ગાં ત્રિભુવનેશ્વરીમ્ ॥ 1 ॥

યશોદાગર્ભસમ્ભૂતાં નારાયણવરપ્રિયામ્ ।
નન્દગોપકુલે જાતાં મઙ્ગલ્યાં કુલવર્ધનીમ્ ॥ 2 ॥

કંસવિદ્રાવણકરીમસુરાણાં ક્ષયન્કરીમ્ ।
શિલાતટવિનિક્ષિપ્તામાકાશં પ્રતિ ગામિનીમ્ ॥ 3 ॥

વાસુદેવસ્ય ભગિનીં દિવ્યમાલ્યવિભૂષિતામ્ ।
દિવ્યામ્બરધરાં દેવીં ખઙ્ગખેટકધારિણીમ્ ॥ 4 ॥

ભારાવતરણે પુણ્યે યે સ્મરન્તિ સદા શિવામ્ ।
તાન્વૈ તારયતે પાપાત્પઙ્કે ગામિવ દુર્બલામ્ ॥ 5 ॥

સ્તોતું પ્રચક્રમે ભૂયો વિવિધૈઃ સ્તોત્રસમ્ભવૈઃ ।
આમન્ત્ર્ય દર્શનાકાઙ્ક્ષી રાજા દેવીં સહાનુજઃ ॥ 6 ॥

નમોસ્તુ વરદે કૃષ્ણે કુમારિ બ્રહ્મચારિણિ ।
બાલાર્કસદૃશાકારે પૂર્ણચન્દ્રનિભાનને ॥ 7 ॥

ચતુર્ભુજે ચતુર્વક્રે પીનશ્રોણિપયોધરે ।
મયૂરપિચ્છવલયે કેયૂરાઙ્ગદધારિણિ ॥ 8 ॥

ભાસિ દેવિ યથા પદ્મા નારાયણપરિગ્રહઃ ।
સ્વરૂપં બ્રહ્મચર્યં ચ વિશદં તવ ખેચરિ ॥ 9 ॥

કૃષ્ણચ્છવિસમા કૃષ્ણા સન્કર્ષણસમાનના ।
બિભ્રતી વિપુલૌ બાહુ શક્રધ્વજસમુચ્છ્રયૌ ॥ 10 ॥

પાત્રી ચ પઙ્કજી ઘણ્ટી સ્ત્રી વિશુદ્ધા ચ યા ભુવિ ।
પાશં ધનુર્મહાચક્રં વિવિધાન્યાયુધાનિ ચ ॥ 11 ॥

કુણ્ડલાભ્યાં સુપૂર્ણાભ્યાં કર્ણાભ્યાં ચ વિભૂષિતા ।
ચન્દ્રવિસ્પર્ધિના દેવિ મુખેન ત્વં વિરાજસે ॥ 12 ॥

મુકુટેન વિચિત્રેણ કેશબન્ધેન શોભિના ।
ભુજઙ્ગાભોગવાસેન શ્રોણિસૂત્રેણ રાજતા ॥ 13 ॥

વિભ્રાજસે ચાઽબદ્ધેન ભોગેનેવેહ મન્દરઃ ।
ધ્વજેન શિખિપિચ્છાનામુચ્છ્રિતેન વિરાજસે ॥ 14 ॥

કૌમારં વ્રતમાસ્થાય ત્રિદિવં પાવિતં ત્વયા ।
તેન ત્વં સ્તૂયસે દેવિ ત્રિદશૈઃ પૂજ્યસેઽપિ ચ ॥ 15 ॥

ત્રૈલોક્યરક્ષણાર્થાય મહિષાસુરનાશિનિ ।
પ્રસન્ના મે સુરશ્રેષ્ઠે દયાં કુરુ શિવા ભવ ॥ 16 ॥

જયા ત્વં વિજયા ચૈવ સન્ગ્રામે ચ જયપ્રદા ।
મમાપિ વિજયં દેહિ વરદા ત્વં ચ સામ્પ્રતમ્ ॥ 17 ॥

વિન્ધ્યે ચૈવ નગશ્રેષ્ઠે તવ સ્થાનં હિ શાશ્વતમ્ ।
કાલિ કાલિ મહાકાલિ શીધુમાંસપશુપ્રિયે ॥ 18 ॥

કૃતાનુયાત્રા ભૂતૈસ્ત્વં વરદા કામચારિણી ।
ભારાવતારે યે ચ ત્વાં સંસ્મરિષ્યન્તિ માનવાઃ ॥ 19 ॥

પ્રણમન્તિ ચ યે ત્વાં હિ પ્રભાતે તુ નરા ભુવિ ।
ન તેષાં દુર્લભં કિઞ્ચિત્પુત્રતો ધનતોપિ વા ॥ 20 ॥

દુર્ગાત્તારયસે દુર્ગે તત્ત્વં દુર્ગા સ્મૃતા જનૈઃ . કાન્તારેષ્વવસન્નાનાં મગ્રાનાં ચ મહાર્ણવે ।
દસ્યુભિર્વા નિરુદ્ધાનાં ત્વં ગતિઃ પરમા નૃણામ્ ॥ 21 ॥

જલપ્રતરણે ચૈવ કાન્તારેષ્વટવીષુ ચ ।
યે સ્મરન્તિ મહાદેવિ ન ચ સીદન્તિ તે નરાઃ ॥ 22 ॥

ત્વં કીર્તિઃ શ્રીર્ધૃતિઃ સિદ્ધિર્હ્રીર્વિદ્યા સન્તતિર્મતિઃ ।
સન્ધ્યા રાત્રિઃ પ્રભા નિદ્રા જ્યોત્સ્ના કાન્તિઃક્ષમાદયા ॥ 23 ॥

નૃણાં ચ બન્ધનં મોહં પુત્રનાશં ધનક્ષયમ્ ।
વ્યાધિં મૃત્યું ભયં ચૈવ પૂજિતા નાશયિષ્યસિ ॥ 24 ॥

સોહં રાજ્યાત્પરિભ્રષ્ટઃ શરણં ત્વાં પ્રપન્નવાન્ ।
પ્રણતશ્ચ યથા મૂર્ધ્ના તવ દેવિ સુરેશ્વરિ ॥ 25 ॥

ત્રાહિ માં પદ્મપત્રાક્ષિ સત્યે સત્યા ભવસ્વ નઃ ।
શરણં ભવ મે દુર્ગે શરણ્યે ભક્તવત્સલે ॥ 26 ॥

એવં સ્તુતા હિ સા દેવી દર્શયામાસ પાણ્ડવમ્ ।
ઉપગમ્ય તુ રાજાનમિદં વચનમબ્રવીત્ ॥ 27 ॥
દેવ્યુવાચ ।

શૃણુ રાજન્મહાબાહો મદીયં વચનં પ્રભો ।
ભવિષ્યત્યચિરાદેવ સન્ગ્રામે વિજયસ્તવ ॥ 28 ॥

મમ પ્રસાદાન્નિર્જિત્ય હત્વા કૌરવવાહિનીમ્ ।
રાજ્યં નિષ્કણ્ટકં કૃત્વા ભોક્ષ્યસે મેદિનીં પુનઃ ॥ 29 ॥

ભ્રાતૃભિઃ સહિતો રાજન્પ્રીતિં પ્રાપ્સ્યસિ પુષ્કલામ્ ।
મત્પ્રસાદાચ્ચ તે સૌખ્યમારોગ્યં ચ ભવિષ્યતિ ॥ 30 ॥

યે ચ સન્કીર્તયિષ્યન્તિ લોકે વિગતકલ્મષાઃ ।
તેષાં તુષ્ટા પ્રદાસ્યામિ રાજ્યમાયુર્વપુઃ સુતમ્ ॥ 31 ॥

પ્રવાસે નગરે વાઽપિ સન્ગ્રામે શત્રુસન્કટે ।
અટવ્યાં દુર્ગકાન્તારે સાગરે ગહને ગિરૌ ॥ 32 ॥

યે સ્મરિષ્યન્તિ માં રાજન્યથાઽહં ભવતા સ્મૃતા ।
ન તેષાં દુર્લભં કિઞ્ચિતસ્મિઁલ્લોકે ભવિષ્યતિ ॥ 33 ॥

ઇદં સ્તોત્રવરં ભક્ત્યા શૃણુયાદ્વા પઠેત વા ।
તસ્ય સર્વાણિ કાર્યાણિ સિદ્ધિં યાસ્યન્તિ પાણ્ડવાઃ ॥ 34 ॥

મત્પ્રસાદાચ્ચ વઃ સર્વાન્વિરાટનગરે સ્થિતાન્ ।
ન પ્રજ્ઞાસ્યન્તિ કુરકો નરા વા તન્નિવાસિનઃ ॥ 35 ॥

ઇત્યુક્ત્વા વરદા દેવી યુધિષ્ઠિરમરિન્દમમ્ ।
રક્ષાં કૃત્વા ચ પાણ્ડૂનાં તત્રૈવાન્તરધીયત ॥ ] 36 ॥