મહાભારત · અધ્યાય 3.95

યદાત્વમન્યતાગસ્ત્યો ગાર્હસ્થ્યે તાં ક્ષમામિતિ ।
તદાઽભિગમ્ય પ્રોવાચ વૈદર્ભં પૃથિવીપતિમ્ ॥

રાજન્નિવેશે બુદ્ધિર્મે વર્તતે પુત્રકારણાત્ ।
વરયેત્વાં મહીપાલ લોપામુદ્રાં પ્રયચ્છ મે ॥

એવમુક્તઃ સ મિનિના મહીપાલો વિચેતનઃ ।
પ્રત્યાખ્યાનાય ચાશક્તઃ પ્રદાતું ચૈવ નૈચ્છત ॥

તતઃ સ ભાર્યામભ્યેત્ય પ્રોવાચ પૃથિવીપતિઃ ।
મહર્ષિર્વીર્યવાનેષ ક્રુદ્ધઃ શાપાગ્નિના દહેત્ ॥

તં તથા દુઃખિતં દૃષ્ટ્વા સભાર્યં પૃથિવીપતિમ્ ।
લોપામુદ્રાઽભિગમ્યેદં કાલે વચનમબ્રવીત્ ॥

ન મત્કૃતે મહીપાલ પીડામભ્યેતુમર્હસિ ।
પ્રયચ્છ મામગસ્ત્યાય ત્રાહ્યાત્માનં મયા પિતઃ ॥

દુહિતુર્વચનાદ્રાજા સોઽગસ્ત્યાય મહાત્મને ।
લોપામુદ્રાં તતઃ પ્રાદાદ્વિધિપૂર્વં વિશામ્પતે ॥

પ્રાપ્ય ભાર્યામગસ્ત્યસ્તુ લોપામુદ્રામભાષત ।
મહાર્હાણ્યુત્સૃજૈતાનિ વાસાંસ્યાભરણાનિ ચ ॥

તતઃ સા દર્શનીયાનિ મહાર્હાણિ તનૂનિ ચ ।
સમુત્સસર્જ રમ્ભોરૂર્વસનાન્યાયતેક્ષણા ॥

તતશ્ચીરાણિ જગ્રાહ વલ્કલાન્યજિનાનિ ચ ।
સમાનવ્રતચર્યા ચ બભૂવાયતલોચના ॥

ગઙ્ગાદ્વારમથાગમ્ય ભગવાનૃષિસત્તમઃ ।
ઉગ્રમાતિષ્ઠત તપઃ સહ પત્ન્યાઽનુકૂલયા ॥

સા પ્રીત્યા બહુમાનાચ્ચ પતિં પર્યચરત્તદા ।
અગસ્ત્યશ્ચ પરાં પ્રીતિં ભાર્યાયામગમત્પ્રભુઃ ॥

તતો બહુતિથે કાલે લોપામુદ્રાં વિશામ્પતે ।
તપસા દ્યોતિતાં સ્નાતાં દદર્શ ભગવાનૃષિઃ ॥

સ તસ્યાઃ પરિચારેણ શૌચેન ચ દમેન ચ ।
શ્રિયા રૂપેણ ચ પ્રીતો મૈથુનાયાજુહાવ તામ્ ॥

તતઃ સા પ્રાઞ્જલિર્ભૂત્વા લજ્જમાનેવ ભામિની ।
તદા સપ્રણયં વાક્યં ભગવન્તમથાબ્રવીત્ ॥

અસંશયં પ્રજાહેતોર્ભાર્યાં પતિરવિન્દત ।
પા તુ ત્વયિ મમ પ્રીતિસ્તામૃષે કર્તુમર્હસિ ॥

યથા પિતુર્ગૃહે વિપ્ર પ્રાસાદે શયનં મમ ।
તથાવિધે ત્વં શયને મામુપૈતુમિહાર્હસિ ॥

ઇચ્છામિ ત્વાં સ્રગ્વિણં ચ ભૂષણૈશ્ચ વિભૂષિતમ્ ।
ઉપસર્તું યથાકામં દિવ્યાભરણભૂષિતા ॥

અન્યથા નોપતિષ્ઠેયં ચીરકાષાયવાસિની ।
નૈવાપવિત્રો વિપ્રર્ષે ભૂષણોયં કથઞ્ચન ॥
અગસ્ત્ય ઉવાચ ।

ન તે ધનાનિ વિદ્યન્તે લોપામુદ્રે તથા મમ ।
યથાવિધાનિ કલ્યાણિ પિતુસ્તવ સુમધ્યમે ॥
લોપામુદ્રોવાચ ।

ઈશોસિ તપસા સર્વં સમાહર્તું તપોધન ।
ક્ષણેન જીવલોકે યદ્વસુ કિઞ્ચન વિદ્યતે ॥
અગસ્ત્ય ઉવાચ ।

એવમેતદ્યથાઽત્થ ત્વં તપોવ્યયકરં તુ તત્ ।
યથા તુ મે ન નશ્યેત તપસ્તન્માં પ્રયોદય ॥
લોપામુદ્રોવાચ ।

અલ્પાવશિષ્ટઃ કાલોઽયમૃતોર્મમ તપોધન ।
ન ચાન્યથાઽહમિચ્છામિ ત્વામુપૈતું કથઞ્ચન ॥

ન ચાપિ ધર્મમિચ્છામિ વિલોપ્તું તે કથઞ્ચન ।
એવં તુ મે યથાકામં સમ્પાદયિતુમર્હસિ ॥
અગસ્તય ઉવાચ ।

યદ્યેષ કામ સુભગે તવ બુદ્ધ્યા વિનિશ્ચિતઃ ।
હર્તું ગચ્છામ્યહં ભદ્રે ચર કામમિહ સ્થિતા ॥