મહાભારત · અધ્યાય 13.113

એવમુક્ત્વા તતો ભીષ્મઃ પુનર્ધર્મસુતં નૃપમ્ ।
જનમેજયભૂપાલ ઉવાચેદં સહેતુકમ્ ॥

એતસ્મિન્નેવ કાલે તુ વસિષ્ઠમૃષિસત્તમમ્ ।
ઇક્ષ્વાકુવંશજો રાજા સૌદાસો વદતાં વરઃ ॥

સર્વલોકચરં સિદ્ધં બ્રહ્મકોશં સનાતનમ્ ।
પુરોહિતમભિપ્રષ્ટુમભિવાદ્યોપચક્રમે ॥

ત્રૈલોક્યે ભગવન્કિંસ્વિત્પવિઇત્રં કથ્યતેઽનઘ ।
યત્કીર્તયન્સદા મર્ત્યઃ પ્રાપ્નુયાત્પુણ્યમુત્તમમ્ ॥
ભીષ્મ ઉવાચ ।

તસ્મૈ પ્રોવાચ વચનં પ્રણતાય હિતં તદા ।
ગવામુપનિષદ્વિદ્યાં નમસ્કૃત્ય ગવાં શુચિઃ ॥

ગાવઃ સુરભિગન્ધિન્યસ્તથા ગુગ્ગુલુગન્ધયઃ ।
ગાવઃ પ્રતિષ્ઠા ભૂતાનાં ગાવઃ સ્વસ્ત્યયનં મહત્ ॥

ગાવો ભૂતં ચ ભવ્યં ચ ગાવઃ પુષ્ટિઃ સનાતની ।
ગાવો લક્ષ્મ્યાસ્તથા મૂલં ગોષુ દત્તં ન નશ્યતિ ॥

અન્નં હિ પરમં ગાવો દેવાનાં પરમં હવિઃ ।
સ્વાહાકારવષટ્કારૌ ગોષુ નિત્યં પ્રતિષ્ઠિતૌ ॥

ગાવો યજ્ઞસ્ય હિ ફલં ગોષુ યજ્ઞાઃ પ્રતિષ્ઠિતાઃ ।
ગાવો ભવિષ્યં ભૂતં ચ ગોષુ યજ્ઞાઃ પ્રતિષ્ઠિતાઃ ॥

સાયં પ્રાતશ્ચ સતતં હોમકાલે મહાદ્યુતે ।
ગાવો દદતિ વૈ હૌમ્યમૃષિભ્યઃ પુરુષર્ષભ ॥

યાનિ કાનિ ચ દુર્ગાણિ દુષ્કૃતાનિ કૃતાનિ ચ ।
તરન્તિ ચૈવ પાપ્માનં ધેનું યે દદતિ પ્રભો ॥

એકાં ચ દશગુર્દદ્યાદ્દશ દદ્યાચ્ચ ગોશતી ।
શતં સહસ્રગુર્દદ્યાત્સર્વે તુલ્યફલા હિ તે ॥

અનાહિતાગ્નિઃ શતગુરયજ્વા ચ સહસ્રગુઃ ।
સમૃદ્ધો યશ્ચ કીનાશો નાર્ઘમર્હન્તિ તે ત્રયઃ ॥

કપિલાં યે પ્રયચ્છન્તિ સવત્સાં કાંસ્યદોહનામ્ ।
સુવ્રતાં વસ્ત્રસંવીતામુભૌ લોકૌ જયન્તિ તે ॥

યુવાનમિન્દ્રિયોપેતં શતેન સહયૂથપમ્ ।
ગવેન્દ્રં બ્રાહ્મણેન્દ્રાય ભૂરિશૃઙ્ગમલઙ્કૃતમ્ ॥

વૃષબં યે પ્રયચ્છન્તિ શ્રોત્રિયાય પરન્તપ ।
ઐશ્વર્યં તેઽધિગચ્છન્તિ જાયમાનાઃ પુનઃપુનઃ ॥

નાકીર્તયિત્વા ગાઃક સુપ્યાત્તાસાં સંસ્મૃત્ય ચોત્પતેત્ ।
સાયં પ્રાતર્નમસ્યેચ્ચ ગાસ્તતઃ પુષ્ટિમાપ્નુયાત્ ॥

ગવાં મૂત્રપુરીષસ્ય નોદ્વિજેત કથઞ્ચન ।
ન ચાસાં માંસમશ્નીયાદ્ગવાં પુષ્ટિં તથાઽપ્નુયાત્ ॥

ગાશ્ચ સન્કીર્તયન્નિત્યં નાવમન્યેત તાસ્તથા ।
અનિષ્ટં સ્વપ્નમાલક્ષ્ય ગાં નરઃ સમ્પ્રકીર્તયેત્ ॥

ગોમયેન સદા સ્નાયાદ્ગોકરીષે ચ સંવિશેત્ ।
શ્લોષ્મમૂત્રપુરીષાણિ પ્રતિઘાતં ચ વર્જયેત્ ॥

સાર્દ્રે ચર્મણિ ભુઞ્જીત નિરીક્ષેદ્વારુણીં દિશમ્ ।
વાગ્યતઃ સર્પિષા ભૂમૌ ગવાં વ્યુષ્ટિં સદાઽશ્નુતે ॥

ઘૃતેન જુહુયાદગ્નિં ઘૃતેન સ્વસ્તિ વાચયેત્ ।
ઘૃતં દદ્યાદ્ધૃતં પ્રાશેદ્ગવાં વ્યુષ્ટિં સદાઽશ્નુતે ॥

ગોમત્યા વિદ્યયા ધેનું તિલાનામભિમન્ત્ર્ય યઃ ।
સર્વરત્નમયીં દદ્યાન્ન સ શોચેત્કૃતાકૃતે ॥

ગાવો મામુપતિષ્ઠન્તુ હેમશૃઙ્ગ્યઃ પયોમુચઃ ।
સુરભ્યઃ સૌરભેય્યશ્ચ સરિતઃ સાગરં યથા ॥

ગા વૈ પશ્યામ્યહં નિત્યં ગાવઃ પશ્યન્તુ માં સદા ।
ગાવોસ્માકં વયં તાસાં યતો ગાવસ્તતો વયમ્ ॥

એવં રાત્રૌ દિવા ચાપિ સમેષુ વિષમેષુ ચ ।
મહાભયેષુ ચ નરઃ કીર્તયન્મુચ્યતે ભવાત્ ॥