મહાભારત · અધ્યાય 12.362

ધર્માઃ પિતામહેનોક્તા મોક્ષધર્માશ્રિતાઃ શુભાઃ ।
ધર્મમાશ્રમિણાં શ્રેષ્ઠં વક્તુમર્હતિ મે ભવાન્ ॥
ભીષ્મ ઉવાચ ।

સર્વત્ર વિહિતો ધર્મઃ સત્યઃ સત્યફલોદયઃ ।
બહુદ્વારસ્ય ધર્મસ્ય નેહાસ્તિ વિફલા ક્રિયા ॥

યસ્મિન્યસ્મિંશ્ચ વિષયે યો યો યાતિ વિનિશ્ચયમ્ ।
સ તમેવાભિજાનાતિ નાન્યં ભરતસત્તમ ॥

ઇમાં ચ ત્વં નરવ્યાઘ્ર શ્રોતુમર્હસિ મે કથામ્ ।
પુરા શક્રસ્ય કથિતાં નારદેન મહર્ષિણા ॥

મહર્ષિર્નારદો રાજન્સિદ્ધસ્ત્રૈલોક્યસમ્મતઃ ।
પર્યેતિ ક્રમશો લોકાન્વાયુરવ્યાહતો યથા ॥

સ કદાચિન્મહેષ્વાસ દેવરાજાલયં ગતઃ ।
સત્કૃતશ્ચ મહેન્દ્રેણ પ્રત્યાસન્નગતોઽભવત્ ॥

તં કૃતક્ષણમાસીનં પર્યપૃચ્છચ્છત્તીપતિઃ ।
મહર્ષે કિઞ્ચિદાશ્ચર્યમસ્તિ દૃષ્ટં ત્વયાઽનઘ ॥

દૃષ્ટમેવ હિ વિપ્રર્ષે ત્રૈલોક્યં સચરાચરમ્ ।
જાતકૌતૂહલો નિત્યં સિદ્ધશ્ચરસિ સાક્ષિવત્ ॥

ન હ્યસ્ત્યવિદિતં લોકે દેવર્ષે તવ કિઞ્ચન ।
શ્રુતં વાઽપ્યનુભૂતં વા દૃષ્ટં વા કથયસ્વ મે ॥

તસ્મૈ રાજન્સુરેન્દ્રાય નારદો વદતાંવરઃ ।
આસીનાયોપપન્નાય પ્રોક્તવાન્વિપુલાં કથામ્ ॥

યથા યેન ચ કલ્પેન સ તસ્મૈ દ્વિજસત્તમઃ ।
કથાં કથિતવાન્પૃષ્ટસ્તથા ત્વમપિ મે શૃણુ ॥