મહાભારત · અધ્યાય 1.80

એવં સ નાહુષો રાજા યયાતિઃ પુત્રમીપ્સિતમ્ ।
રાજ્યેઽભિષિચ્ય મુદિતો વાનપ્રસ્થોઽભવન્મુનિઃ ॥

ઉષિત્વા ચ વને વાસં બ્રાહ્મણૈઃ સંશિતવ્રતઃ ।
ફલમૂલાશનો દાન્તસ્તતઃ સ્વર્ગમિતો ગતઃ ॥

સ ગતઃ સ્વર્નિવાસં તં નિવસન્મુદિતઃ સુખી ।
કાલેન નાતિમહતા પુનઃ શક્રેણ પાતિતઃ ॥

સાધુભિઃ સન્ગતિં લબ્ધ્વા પુનઃ સ્વર્ગમુપેયિવાન્ ।
જનમેજય ઉવાચ ।
સ્વર્ગતશ્ચ પુનર્બ્રહ્મન્નિવસન્દેવવેશ્મનિ ।
કાલેન નાતિમહતા કથં શક્રેણ પાતિતઃ ॥

નિપતન્પ્રચ્યુતઃ સ્વર્ગાદપ્રાપ્તો મેદિનીતલમ્ ।
સ્થિત આસીદન્તરિક્ષે સ તદેતિ શ્રુતં મયા ॥

તત એવ પુનશ્ચાપિ ગતઃ સ્વર્ગમિતિ શ્રુતમ્ ।
રાજ્ઞા વસુમતા સાર્ધમષ્ટકેન ચ વીર્યવાન્ ॥

પ્રતર્દનેન શિવિના સમેત્ય કિલ સંસદિ ।
કર્મણા કેન સ દિવં પુનઃ પ્રાપ્તો મહીપતિઃ ॥

સર્વમેતદશેષેણ શ્રોતુમિચ્છામિ તત્ત્વતઃ ।
કથ્યમાનં ત્વયા વિપ્ર વિપ્રર્ષિગણસન્નિધૌ ॥

દેવરાજસમો હ્યાસીદ્યયાતિઃ પૃથિવીપતિઃ ।
વર્ધનઃ કુરુવંશસ્ય વિભાવસુસમદ્યુતિઃ ॥

તસ્ય વિસ્તીર્ણયશસઃ સત્યકીર્તેર્મહાત્મનઃ ।
ચરિતં શ્રોતુમિચ્છામિ દિવિ ચેહ ચ સર્વશઃ ॥
વૈશમ્પાયન ઉવાચ ।

હન્ત તે કથયિષ્યામિ યયાતેરુત્તરાં કથામ્ ।
દિવિ ચેહ ચ પુણ્યાર્થાં સર્વપાપપ્રણાશિનીમ્ ॥

યયાતિર્નાહુષો રાજા પૂરું પુત્રં કનીયસમ્ ।
રાજ્યેઽભિષિચ્ય મુદિતઃ પ્રાવવ્રાજ વનં તદા ॥

અન્ત્યુષે સ વિનિક્ષિપ્ય પુત્રાન્યદુપુરોગમાન્ ।
ફલમૂલાશનો રાજા વને સન્ન્યવસચ્ચિરમ્ ॥

શંસિતાત્મા જિતક્રોધસ્તર્પયન્પિતૃદેવતાઃ ।
અગ્નીંશ્ચ વિધિવજ્જુહ્વન્વાનપ્રસ્થવિધાનતઃ ॥

અથિતીન્પૂજયામાસ વન્યેન હવિષા વિભુઃ ।
શિલોઞ્છવૃત્તિમાસ્થાય શેષાન્નકૃતભોજનઃ ॥

પૂર્ણં વર્ષસહસ્રં ચ એવંવૃત્તિરભૂન્નૃપઃ ।
અબ્ભક્ષઃ શરદસ્ત્રિંશદાસીન્નિયતવાઙ્મનાઃ ॥

તતશ્ચ વાયુભક્ષોઽભૂત્સંવત્સરમતન્દ્રિતઃ ।
તથા પઞ્ચાગ્નિમધ્યે ચ તપસ્તેપે સ વત્સરમ્ ॥

એકપાદઃ સ્તિતશ્ચાસીત્ષણ્માસાનનિલાશનઃ ।
પુણ્યકીર્તિસ્તતઃ સ્વર્ગે જગામાવૃત્ય રોદસી ॥